انا ف تانية كلية بس انا تايهة وكرهت حياتى بسبب اللاشئ ال انا عايشة فيه الناس والناجحة وبتروح وتيجى وتشتغل وتدرس وتنجح وتخرج ولها اصحاب وحياة حلوة دول بيضغطوا عليا زيادة عن اللازم انا عارفه ان ال بيظهر منهم مش هو الحقيقة بس ع الاقل هما عندهم قيمة لحياتهم انما انا انا عايشة ليه بذاكر لما يكون عندى امتحانات وانضف البيت واعمل اكل لبابا وماما واخدم ع الضيوف ال مبيخلصوش وباقي اليوم بسكرول ع السوشال ميديا وبس انا فاضية حياتى فاضية ملهاش قيمة مليش اصحاب غير واحدة او اتنين كل فين وفين ع م نتكلم مرة وف الكلية بفضل قاعدة ف جمب لوحدى ومبتكلمش مع حد لان محدش بيعبرنى حتى مش مرتبطة ولا بكلم واحد مثلا زى البنات زهقت من حياتى الفاضية المملة المقرفة حتى الشغل حاولت كتيرا
انزل شغل بس بيتى حرفيا ف حتة مقطوعة وكليتى عملية وبخلص العصر مثلا ف مش هعرف اروح شغل متأخر اخد كورسات حاولت كتير وفشلت والحجات المجانيه مقرفة وملهاش لازمة وال بفلوس بتبقا غالية اوى وانا اهلى بيدفعو مصاريف دراستى بالعافيه
اخواتى كارفنى بسبب انى الصغير وفرق السن بينا كبير ف هما الاتلاتة قريبين من بعض وانا لوحدى دايما مبيحاولوش يقربو منى ومهما قربت منهم بلايقهم بردو واخدين جمب ودايما كلامى بيتفهم غلط ولو هزرت معاهم بنفس الطريقة بتاعتهم معايا مثلا يقولولى انتى بغل وبتحقدى وانا والله عمرى م كنت كدا انا مخنوقة اوى بجد نفسي اخلص من الحياة دى لولا ان الانتحار حرام وانا مش عايزة اخسر اخرتى كنت موت نفسي من زمان
انا عارفه ان ممكن تقولوا اڤورة مراهقة مثلا بس لا دى الحقيقة للاسف وحاولت اتجاهل كتير واقول فترة وهتعدى بس مبتعديش انا نفسي ابقا ليا اهمية نفسي اهلى يبقو شايفنى ليا لازمة بدل مهما طول الوقت بيتريقو وسايفين انى قليلة اوى وبيتنقدو اي حاجه اقزلها لدرجة ان بقيت عايشة خارسة عشان خايفة اتكلم ف يتريقو عليا ويقولو كلام يوجعنى زيادة 💔
انتى عايشه حاجات كتير وحياتك ليها قيمتها .. بس انتى اللى مش مستشعره القيمة دى للاسف . القيمة لحياة اى شخص فى كونه بيؤدى دوره الحالى ....الادوار بتختلف باختلاف العمر والظروف .. المقارنة فى نقطة بينا وبين حياة شخص اخر ....ده ظلم لان دوره المطلوب غيرنا.. فى اشخاص كل المطلوب منهم كقيمة فى حياتهم لمدة سنين ...انهم يراعوا شخص مريض و من غير ما يكون فى اى حاجة تانيه ...وقيمة حياته بتنحصر فعلا انه يركز فى تأدية الدور ده وبس . احنا طبعا بسبب السوشيال ميديا بنلاقى ان الحياة لازم تبقي زحمة وتبقي فيها تفاصيل كتيرة ...وده مش ضرورى خالص. انجحى فى الحاجات الصغيرة مهما كانت وكونى فخورة بيها وحسنى من جودتها وشوفى قيمتك فى اجتهادك فيها ...حتى لو هى نفس المهمة بتعمليها كل يوم. قيمتك فى اختلافك ...مهما كنت مش شبههم فانتى مميزة مش مختلفة بشكل وحش يعنى ....فرق السن بينك وبين اخواتك ممكن يبقي ميزة وممكن يبقي عيب ...اللى هيفرق هو تقبلك انتى لنفسك. اتكلمى واتحركى وهزرى وخليكى مبسوطة بنفسك هيكونوا هما اللى بيعلقوا عليكى عشان اختلافك مؤثر وملحوظ ...مش عشان منبوذة .
تم النشر الثلاثاء، ٣٠ مايو ٢٠٢٣
اولآ كان نفسي اطلع وجهة نظرك للامور صح او غلط لكن انتي بتبصي للامور من الطريقه الي تضرك (نفسيآ) لكن يفضل اقولك ان انتي بسبب جلوسك علي السوشيال كتير ادى ذلك انك تشوفي نفسك فاضيه ومفيش حاجه فى حياتك وان الحياه المثاليه موجودة وانك مش عارفه تخلي حياتك كدا لكن الحياه المثاليه كدبه وغير كدا انتي مش بانيه لنفسك صوره حلوه قصاد نفسك (حقيقتك الكامله) لكن لو قللتي سوشيال وبقيتي مثلآ تبدليها بحاجات زي(القراء)فى اي حاجه انتي عايزاها وانصحك انك تروحي تخرجي لوحدك بشكل كامل وتقفلي كل تطبيقات السوشيال ميديا دا هيساعدك تعرفى نفسك و تفهمي نفسك واتعلمي اي رياضه فى (المنزل/برا المنزل) واقري ثم اقري اي حاجه فى الدنيا و اقرائي كتاب سندريلا سيكريت هيناسبك و هيساعدك تعرفى نفسك واتمني نصايحي تنفعك
تم النشر الثلاثاء، ٣٠ مايو ٢٠٢٣
بصي انتي كارهه الحياه عشان مفيش تجديد ف حياتك حياتك ممله لازم تخلي حياتك فيها شغف لازم تعرفي انتي عايزه ايه من الحياه دي عشان محدش بيجي يعيش ويلا وهيا ماشي لاء مينفعش لازم يبقى ليكي دور ف الحياه فيي حاجه بتعمليها+محدش هيحبك وانتي فاشله فاهمه انتي بتقولي حياتك فاضيه طب ليه مش بتحاول تتعلمي حاجه لغه جديده حاجه تفيدك ولا سوشيال ولا الضيوف هينفعوكِ كمان بتقولي عايزه ترتبطي بصي عمتا الارتباط هياخد من وقتك كتير عشان لازم تركزي ف دراستك وتتخرجي وكدا بتقولي اخواتك كارفينلك بصي متشغليش نفسك ب مين بيحبك ومين مش بيحبك عادي ممكن شايفين صغيره ومعرفش ايه بصي الوقت الشغل بقا سهل اوي حتا ممكن تشتغلي اون لاين زي مثلا ال ماركتينج ودي حاجه سهله شوفي اي حاجه المهم اعرفي ان ربنا هيحاسبك على كل وقت بتضيعيه على الفاضي قربي من ربنا اكتر وتثقفي اقرئي كتب اي حاجه مفيده وعايزه يكون ليكي صحاب خليكي اجتماعيه اكتر حد ناجح حد يخلي كل الناس تحبه مع ان مش مهم حد يحبك ولا لاء قد م انتي تحبي نفسك وتبقى واثقه من نفسك♥️
تم النشر الجمعة، ٢ يونيو ٢٠٢٣
استهدي بالله بس .. بص مش هقول افورة مراهقة .. بس انا قادرة افهمك. قادرة افهمك لانك حاسه بانك وحيدة رغم انك مش وحيدة .. قادرة افهمك لانك تايهة .. وطبيعي على فكرة ان هتيجي فترة في حياة كل واحد يحس انه تايه .. مش عارف يعمل ايه، طيب هو كويس في ايه؟ طيب عايش ليه؟ طيب هو ايه له قيمة بالنسبة له يعمله؟ اول حاجه محتاجة انك تعمليها دلوقت .. تتقبلي الوضع الحالي .. ومن الوضع ده تباي تشوفي حلول فعليه وعملية .. طيب انتي دلوقتي حابه انك تعملي حاجه ليها قيمة مش كده؟ ياترى ايه اللي له قيمة بالنسبة ليكي؟ كورسات، شغل، تعليم .. ايه هو اللي له قيمة ومتقوليش (نجاح) لانها كلمة عايمة جدا .. يعني ايه عايمة .. يعني مش قادرة تمسكيها لازم تحددي هتنجحي في ايه؟ ايه هو اللي انتي حابه ونفسك تنجحي فيه، ايه هو اللي هيحسسك بالقيمة اللي انتي عايزاها. الفترة ديه ممكن متلاقيش نفسك بسهولة .. لانها مش سهلة بصراحه علشان اكون معاكي صادقة، هي محتاجة معافرة .. محتاجة انك تجربي حاجات كتير علشان تعرفي نفسك، وفي كل مرة هتعرفي نفسك اكتر، هي هي نفس المرة اللي ممكن تقولي لا لسه معرفتهاش .. لسه فيه حاجه ناقصة، لسه محتاجة اتعرف على نفس كمان اكتر .. بالنسبة للكورسات حاولي تاخدي كورسات من على النت .. وعلى فكرة المحتوى الاونلاين ممتاز جدا زي مثلا منصة كورسرا عليها محتوى جميل جدا ومن جامعات بره، ومجتوى دسم فعلا، وفيه عنك برذه منصة ادراك كويسة جدا .. وعندك اليوتيوب .. استغلي الحاجات اللي حواليكي .. وهتعرفي تلاقي المحتوى الكويس .. متيأسيش بسرعة. لينك كورسيرا : https://www.coursera.org/ ... الكورسات اللي في كورسيرا على ما اظن مش كلها مجانية .. ف لازم تقدمي على حاجه اسمها الدعم المالي وبيردوا عليكي بعد 15 يوم ده لو محتاجة الشهادة .. وده مقال هيفهمك كل التفاصيل عن الدعم المالي الدعم المالى من كورسيرا واجابات اسئلة لينك ادراك: https://www.edraak.org/ كل الكورسات مجانية وباللغة العربية. ابدئي كمان بقراءة الكتب اللي انتِ مهتمة بيها، واللي قراتها نوعا ما تجذبك. هترك ليكي قنوات على اليويتيوب مفيدة جدا جدا وان شاء الله هتترك ليكي حاجاة جديدة في حياتك. قناة حازم الصديق والبودكاست بتاعه Hazcast : اجتماعية، تعليمية قناة اسماعيل فؤاد قاسم : صحة نفسية قناة وعد امين : تغذية دروس اونلاين : تعليمية Nedal Reads : مراجعة كتب نادي القراءة العملية: تعليمية ومهنية وتطوير ذات وده برده الموقع بتاعهم (نادي القراءة العملية) هتستفادي منه جدا باذن الله نرمين البحيري : صحة نفسية اخضر : تعليمية ، تطوير ذات، مراجعة كتب جيل يقرأ : تعليمية ، كتب وده اختبار تحليل الشخصية mbti https://jass.im/test ده اختبار كويس جدا .. بيجيب ليكي مقالة مفصلة بعد ما تجاوبي على ال 36 سؤال .. بوضوح وصراحة .. التحليل ف النهاية بيكون ناتج عن كذا حاجة في شخصيتك .. زي التخصصات اللي انت ممكن تكوني شاطرة فيها .. وعلاقتك بأهلك او بأصدقائك وعلاقتك بنفسك . انزلي كمان انشطة تطوعية .. هتفرق معاكي جدا سواء في العلاقات اللي ممكن تكتسبيها، او انك تطوري نفسك .. هتتعلمي كتير، والعبي كمان رياضة هتفرق معاكي جدا استثمري اليوم بتاعك كويس وكمان لو حابه تشتغلي ممكن لو عندك مهارة معينة تستغلي ده واعملي الخدمة ديه اونلاين .. مجالات كتير دلوقت تقدري تشتغليها وانتي في البيت .. + تقدري تتقني مجال منهم وتشتغلي بيه بعد مدة معينة من اتقانك له. اتمنى اكون افادتك بشئ .. وربنا يوفقك
تم النشر الثلاثاء، ٣٠ مايو ٢٠٢٣
انتي مش ملزمه تعجبي حد اساسا وبعدين انتي لسه في تانيه كليه و ممكن تشتغلي في الاجازه ومش حاجه حلوه الارتباط وحرام هما غلط حاولي متركزيش مع الي حواليكي
تم النشر الثلاثاء، ٣٠ مايو ٢٠٢٣
ثانيا حاولي تتعرفي على ناس و تكسري حاجز الخوف الي يمنعك من التعرف على الناس
تم النشر الجمعة، ٤ أغسطس ٢٠٢٣
اولا خلي يبقى عندك ثقة في نفسك وانا عندي نفس الحالة زي عقدة من الناس الي عندها كاريزما شوية للحياة
تم النشر الجمعة، ٤ أغسطس ٢٠٢٣
حاولي تشاركي مثلا حاجات مع اخواتك وكده وصاحبه او اتنين دي حاجه طبيعيه والله احسن من شله كبيره مش سالكه لبعض
تم النشر الثلاثاء، ٣٠ مايو ٢٠٢٣
بالنسبه لموضوع التريقه وكده لما حد يتريق مترديش عليه وادي ريأكشن انك متضليقه ومتكلمهوش هيعرفوا انك اتضايقتي
تم النشر الثلاثاء، ٣٠ مايو ٢٠٢٣
لعرض السؤال في فدني اضغط هنا