للأسف دي مشكلة العلاقات غير الرسمية، في النهاية طرف من الطرفين بينجرح بعد ما بيرسم آمال عريضة وبيتعلق بالتاني. في الغالب بتكون البنت هي الطرف المجروح لكن أحيانًا بلاقي العكس، والشاب هو اللي بيعاني في آخر القصة. عمومًا اللي حصل حصل. كنتِ مراهقة وتعلقتِ به ومشاعرك زي ما هو طبيعي مع عمر المراهقة بتكون لسه متغيرة وعرضة للتقلب وده اللي حصل. بدأتِ تحسي بالنفور وبقى اهتمامه بك يشكل عبء عليكِ وبدأت مشاعرك تأخذ منحنى مختلف عن مشاعره. إذا كان مفيش أمل أبدًا من موافقتك على تقدمه لكِ ولا إن مشاعرك تتغير نحوه تاني ولا أمل في موافقة أهلك عليه فانهي الموضوع خالص، صارحيه وقولي له إنك مش هتقدري تكملي وإنه يستحق واحدة تكون بتحبه فعلا. إذا استمر على إصراره فاوعي توافقي على مقابلته تحت ضغط إنه بيحسسك بالذنب... بلاش خالص مقابلات. وإذا كان لابد من الحظر نهائيًا فاحظريه... هو بقى يتعافى مع نفسه من تعلقه بك... ربنا يسهل له. ____ جايز بعد كده ينتابك شعور بالندم وده طبيعي، مش ضروري إنه يكون مشاعرك الحقيقية، ممكن يتولد من إحساسك بالذنب ومن الكلام اللي قاله لك إنك ممكن تندمي بعد خسارته. ___ أنتِ ذنبك كان إنك دخلتِ في علاقة واتكلمتِ مع شاب أجنبي عنك، وده استغفري عنه ربنا وتوبي وانوي متدخليش علاقات تانية من دي وتحفظي قلبك لوقت ييجي النصيب الحلال. الأكيد، إنك هتكوني مذنبة في حقه أكتر وظالماه إذا كملتِ معه لشعورك بالذنب نحوه أو خوفك من الندم بعدين. انهي الموضوع وركزي في حياتك وادعي له هو ربنا يوفقه مع واحدة تانية.
لعرض الإجابة في فدني اضغط هنا