( اغلب كلامكم مع بعض عن المصاريف و الماديات ) لا ده مش عادي .. فين الحب الاجتماعيات الحاجات المشتركة دا جواز مش داخل تتعرف علي واحدة و مش رايح تشتري عروسة لعبة ..!! بص يابني.. اختار واحدة عندها دين علشان الجواز الايام دي بيبدأ بكلمة ( إحنا بتشتري راجل ) بس سبحان الله بيتحول أثناء الاتفاق ل ( إحنا بنبيع بنت لأعلي سعر ) محدش هيقولك الكلمتين دول .. الجواز مش واحدة هجيب ليها كل حاجه علشان تفضل معايا .. الجواز واحدة عارفة ربنا و متعلمة ع الاقل بتعرف تقري و تكتب كويس علشان تربي عيالك وسط انشغالك في جمع الفلوس ف الخارج ..و تصون بيتك في غيابك و انت كده كده هتجيب لها و لبيتك كل حاجه من غير حتي ما هيه تطلب دي حقيقية . انا بكلمك بصراحة فمتزعلش علشان خاصية تذويق و تجميل الكلام مش بتبقي شغالة معايا و انا لسه قايم من النوم ، في الدين بيقول اختر ذات الدين تربت يداك ، اختار واحدة امها مشهود ليها بحسن السمعة و عارفة ربنا و إسأل عنهم كويس عنها و عن امها و ابوها ، و شوف بعينك امها طريقة كلامها عامل ازاي ، علشان مراتك مهما كانت مختلفة في 90٪ من الحالات بتبقي نسخة من امها حتي لو هيه مش شايفة كده ، شوف واحدة عايزة تعيش مش عايزة تبني مستقبلها علي حسابك و بس ، واحدة وسط الكلام لو قولتلها احتمال بعد الجواز اقولك تسافري معايا أهلها يقولوا الست مع جوزها مطرح ما يروح مش يقولوا بنتنا قاعدة معانا ، واحدة لما تقولها علي حاجه بلاش و نحط فلوسها في حاجه تنفعنا احنا متقولش اشمعني فلانة او علانة .. و انا مش اقل منهم .. بالعكس هيه نفسها تكون مرحب بالفكرة .. لكن لو عايز واحدة بيعة و شروة هما كتير قوي و خلي بالك هما برضه السبب ان حالات الزواج بقت في تراجع .. احسن طريقة تعرف بيها ابوك معاك ولا لاء انك تسأل هل هتنزل معايا في البداية ولا يوم الفرح بس ولا ايه نظامه علشان تبقي علي نور ، و خلي بالك مفيش شفقة في اختيار العروسة لو مطلعتش اللي انت عايزه لانك لو اخترت واحدة مش مناسبة و اكتشفت انها فعلا متنفعكش و قولت امشي أصلها صعبت عليا هتندم ، و هتتمني كل يوم لو فضلت عازب ، يبقي كده انت عرفت كل حاجه انت عايز تعرفها .. واحدة عندها دين تصونك في غيابك معندهاش مانع تبقي معاك في اي بلد و اي مكان ، و تكون طلباتها في المعقول ( المعقول ده بيختلف من بلد للتانية في مصر ) و تكون مؤمنة بالله مش عرفت انك عايز واحدة متدينة فقامت لابسة الحجاب .. و هتسأل عنها .. معني كلام تسأل عنها و تقعد مع اسرتها و معاها و تشوف هل هيه تسرك ولا لاء و التدين مش بالحجاب مش شرط .. أما لو اللي معاك بتوفر نفس الشروط و متدينة و اسرتها ناس كويسة عارفة ربنا يبقي خلاص توكل علي الله .. ممكن في البدايات تاخد حد من الأسرة في مصر مثلا و تعرفهم بالاتفاق مع والدك انه هييجي ع الفرح و يبقي علي اطلاع عن كل اتفاق بيحصل و تعرفهم انك لو جبت دهب مش هتكتب في القاية اي دهب إضافي جرامات و لو اصروا يبقي خلاص اكتبه فلوس مش دهب يعني لو قالوا لك اكتب لنا مثلا 100 جرام ذهب في القايمة قولهم شوفوا ال 100 جرام بكام و اكتبه بفلوس لان اللي 300 الف دلوقتي بعد 5 سنين هيبقي ب 900 الف فاهمني .. و الأفضل قبل القايمة تروح لمحامي شاطر يفهمك تعمل ايه .. من غير ما تظلمها او هي تظلمك .طالما انتم في البداية متكلمتوش غير عن الماديات و بس .. و ربنا يوفقك .
طالما كلمتها انت ملتزم معاها بكلمتك او انك تقدم اعتذار عن الموضوع كله و تشرح لها ظروفك و لكن مش قبل ما تقول والدك الأول و تشوف رأيه ممكن هو ليه رأي تاني اسمعه ، لو والدك موافق يبقي تمام و بعد كده اتجنب تدخل في علاقة او تعارف و انت مش جاهز علشان متكسرش قلب واحدة ، او تعشمها و تشيل ذنبها .
تم النشر الاثنين، ٢ ديسمبر ٢٠٢٤
وبرضوا حاليا بفكر اكلم ابوها واشوف الكلام هيجبني ولا لا ، ومش عارف هل الخطوة دي صح ولا لا ، عشان لو مينفعش يبقي ابعد وكل واحد في طريق
تم النشر الاثنين، ٢ ديسمبر ٢٠٢٤
حقيقي شكراً جدا ليك ، على كل كلمة قولتها ، بس حابب ارد على نقطة سبب فتح الكلام على الماديات كانت هي وكانت بتسالني معاك شقة ولا لا مرتبك كام ، وانا مكنتش ممانع لاني كانت عايز اعرف هل انا نفس المستوى اللي هتوافق علية ولا لا ،عشان متعبش نفسي
تم النشر الاثنين، ٢ ديسمبر ٢٠٢٤
ولا مع العريس زي ما حصل هنا .. انت صح يا عم جاد انا مستني بس رده علشان افهم اكتر ..
تم النشر الاثنين، ٢ ديسمبر ٢٠٢٤
الماديات واتفاقات الزواج الكلام فيها بيكون مع ولي الأمر وليس مع العروسة
تم النشر الاثنين، ٢ ديسمبر ٢٠٢٤
و هو ينفع برضه يتكلموا في الماديات و هو لسه مدخلش البيت من بابه ، دي حالة شخص بيدور علي انسانة تصلح للزواج معندوش اي خبرة في اي حاجه بدليل انه و لسبب ما ممكن يكون قلة خبرة او حسن تربية داخل علشان يتقدم مباشر و واضح كمان انه مفاتحش اي حد من اهله في الموضوع .. شخص زي ده خبرته معدمة و لو اللي في دماغي صح يبقي هوا سافر من سن صغير مع والده بالعربي انا شايف قدامي انسان علي وشك انه يورط نفسه ، اخر مشكلة عندي دلوقتي معضلة الحب بتاعتي .. لانه حتي لو حبها هيبقي حب غيابي من طرف واحد الطرف التاني شاري و لأسباب قلقتني .
تم النشر الاثنين، ٢ ديسمبر ٢٠٢٤
ولكن ازاي يتكلم في الحب وهو لسة حتى مدخلش البيت من بابه واتقدم لها في البيت وعرف إذا كان أبوها هيوافق عليه ولا لا؟
تم النشر الاثنين، ٢ ديسمبر ٢٠٢٤
لعرض الإجابة في فدني اضغط هنا