انا حالياً في الكويت ، وابويا موجود معايا بس ممكن ميجيش معايا لما اتقدم
هل ينفع اقابل ابوها لوحدي؟
نقطة تانية انا معرفهاش قوي ، بس اغلب كلامنا عن المصاريف والماديات وكدا ، هل دا عادي ؟
( اغلب كلامكم مع بعض عن المصاريف و الماديات ) لا ده مش عادي .. فين الحب الاجتماعيات الحاجات المشتركة دا جواز مش داخل تتعرف علي واحدة و مش رايح تشتري عروسة لعبة ..!! بص يابني.. اختار واحدة عندها دين علشان الجواز الايام دي بيبدأ بكلمة ( إحنا بتشتري راجل ) بس سبحان الله بيتحول أثناء الاتفاق ل ( إحنا بنبيع بنت لأعلي سعر ) محدش هيقولك الكلمتين دول .. الجواز مش واحدة هجيب ليها كل حاجه علشان تفضل معايا .. الجواز واحدة عارفة ربنا و متعلمة ع الاقل بتعرف تقري و تكتب كويس علشان تربي عيالك وسط انشغالك في جمع الفلوس ف الخارج ..و تصون بيتك في غيابك و انت كده كده هتجيب لها و لبيتك كل حاجه من غير حتي ما هيه تطلب دي حقيقية . انا بكلمك بصراحة فمتزعلش علشان خاصية تذويق و تجميل الكلام مش بتبقي شغالة معايا و انا لسه قايم من النوم ، في الدين بيقول اختر ذات الدين تربت يداك ، اختار واحدة امها مشهود ليها بحسن السمعة و عارفة ربنا و إسأل عنهم كويس عنها و عن امها و ابوها ، و شوف بعينك امها طريقة كلامها عامل ازاي ، علشان مراتك مهما كانت مختلفة في 90٪ من الحالات بتبقي نسخة من امها حتي لو هيه مش شايفة كده ، شوف واحدة عايزة تعيش مش عايزة تبني مستقبلها علي حسابك و بس ، واحدة وسط الكلام لو قولتلها احتمال بعد الجواز اقولك تسافري معايا أهلها يقولوا الست مع جوزها مطرح ما يروح مش يقولوا بنتنا قاعدة معانا ، واحدة لما تقولها علي حاجه بلاش و نحط فلوسها في حاجه تنفعنا احنا متقولش اشمعني فلانة او علانة .. و انا مش اقل منهم .. بالعكس هيه نفسها تكون مرحب بالفكرة .. لكن لو عايز واحدة بيعة و شروة هما كتير قوي و خلي بالك هما برضه السبب ان حالات الزواج بقت في تراجع .. احسن طريقة تعرف بيها ابوك معاك ولا لاء انك تسأل هل هتنزل معايا في البداية ولا يوم الفرح بس ولا ايه نظامه علشان تبقي علي نور ، و خلي بالك مفيش شفقة في اختيار العروسة لو مطلعتش اللي انت عايزه لانك لو اخترت واحدة مش مناسبة و اكتشفت انها فعلا متنفعكش و قولت امشي أصلها صعبت عليا هتندم ، و هتتمني كل يوم لو فضلت عازب ، يبقي كده انت عرفت كل حاجه انت عايز تعرفها .. واحدة عندها دين تصونك في غيابك معندهاش مانع تبقي معاك في اي بلد و اي مكان ، و تكون طلباتها في المعقول ( المعقول ده بيختلف من بلد للتانية في مصر ) و تكون مؤمنة بالله مش عرفت انك عايز واحدة متدينة فقامت لابسة الحجاب .. و هتسأل عنها .. معني كلام تسأل عنها و تقعد مع اسرتها و معاها و تشوف هل هيه تسرك ولا لاء و التدين مش بالحجاب مش شرط .. أما لو اللي معاك بتوفر نفس الشروط و متدينة و اسرتها ناس كويسة عارفة ربنا يبقي خلاص توكل علي الله .. ممكن في البدايات تاخد حد من الأسرة في مصر مثلا و تعرفهم بالاتفاق مع والدك انه هييجي ع الفرح و يبقي علي اطلاع عن كل اتفاق بيحصل و تعرفهم انك لو جبت دهب مش هتكتب في القاية اي دهب إضافي جرامات و لو اصروا يبقي خلاص اكتبه فلوس مش دهب يعني لو قالوا لك اكتب لنا مثلا 100 جرام ذهب في القايمة قولهم شوفوا ال 100 جرام بكام و اكتبه بفلوس لان اللي 300 الف دلوقتي بعد 5 سنين هيبقي ب 900 الف فاهمني .. و الأفضل قبل القايمة تروح لمحامي شاطر يفهمك تعمل ايه .. من غير ما تظلمها او هي تظلمك .طالما انتم في البداية متكلمتوش غير عن الماديات و بس .. و ربنا يوفقك .
تم النشر الاثنين، ٢ ديسمبر ٢٠٢٤
شوف يا اخويا من حسب كلامك هتفهمها اذا كانت مادية فعلا او لا وفعلا الحب بينكو موجود وقوي او لا لان ده جواز يعني عمر المفروض يتكرس مع بعض جزئية تروح مع والدك او لا انا افضل انو يحضر لانو وليك وبرضو هقولك الافضل تصلي صلاة استخارة على العروسة وعلى الموضوع بتاع ولدك وربنا يعملك الخير
تم النشر الاثنين، ٢ ديسمبر ٢٠٢٤
بالطبع، يُعتبر الذهاب إلى والد الفتاة عند التقدم لها أمرًا مهمًا في ثقافتنا، ولكن إن كانت ظروفك تمنع والدك من الذهاب معك، يمكنك الذهاب وحدك. من الجيد أن تكون صريحًا ومنفتحًا عند اللقاء مع والدها، طالما أنك تحترم العادات والتقاليد. أما بالنسبة للتحدث عن الأمور المادية والمصاريف، فإن ذلك يمكن أن يكون جزءًا من الحديث التمهيدي، خاصة إذا كانت لديك نوايا جادة. لكن يُفضل أن يكون الحوار متوازنًا، بحيث يشمل أيضًا التعرف على شخصية الفتاة وأهدافها وطموحاتها. التواصل الجيد والفهم المتبادل هما أساس أي علاقة ناجحة. إذا شعرت أنك بحاجة إلى نصائح إضافية حول كيفية التعامل مع هذا الموقف، فلا تتردد في طرح أسئلتك.
تم النشر الأحد، ١ ديسمبر ٢٠٢٤
عادي تتقدم لوحدك توكل على الله بمنتهي الثقة لإنك داخل البيت من بابه علشان راجل ابن ناس .. ربنا يوفقك
تم النشر الأحد، ١ ديسمبر ٢٠٢٤
لو هي كويسه واهلها ناس كويسين يبقي تقلق ليه وعادي ممكن تتقدم لوحدك ومش شرط انكم بتتكلموا في الماديات انها تكون ماديه يمكن عشان مافيش بينكم كلام غير في التجيهزات في الوقت الحالي
تم النشر الأحد، ١ ديسمبر ٢٠٢٤
لعرض السؤال في فدني اضغط هنا