المبالغه فى المشاعر تعطي انطباع عني للأخرين انني شخصية مضمونة وضعيفة!

Question

مش عاوزه اقول كلام كتير عشان محدش يزهق ويتوه فى الكلام ، لكن انا شخصيه مبالغه جدا جدا فى مشاعرها بشكل مش طبيعي لدرجه ان دايما وبشكل أساسي الي قدامى بيكون خلاص مدرك انو ضمن وجوده وانو ممكن يمشي او يرجع وتظل العلاقه نفسها هفضل المكان الي اما حد يزهق يجيلو ولما مشاكلو تتحل يبعد عنى ويتكلم عنى وقد ايه انا أوفر فى مشاعرى وبغير جامد والحقيقه ان انا كل مشاعرى لو كانت زياده ده بسبب انى اتعرضت لنقص كبير فى المشاعر لا عمرى حسيت بالحب والحنان من الأهل وبما أن العامل الأساسي فى تكوين شخصيتى هو انى اعمل كل الناس بالطريقه الي كنت اتمنى ف يوم حد يعاملنى بيها بحس انى سعات بدايقهم بس لما براجع نفسي بلاقي انى ببقا خايفه عليهم جدا عشان كده علطول بسال عليهم وبطمن وعاوزه احتويهم بس دايما يلاحظ يا جماعه أن برغم كل محاولاتى فى اسعاد الشخص الي فى حياتى دايما بيبعد عنى مع الوقت ويروح لحد مش مديلو نص المشاعر يعنى هما علطول بيسبنى وبيتم استبدالي بناس عارفين انتوا النوعيه الي تحبك اه بس تحسسك انك لو خسرتها مش هتعرف ترجعلها أو الي تكون عارف انك مش حاجه اساسيه ف دايما يتمسكوا بالناس دى ويسيبوا الناس الي زى الي هما صامتين وجودهم انا عارفه انى ببالغ فى مشاعرى بس والله اهلي عامل أساسي فى تكوين شخصية مش سليمه بنسبه ١٠٠٪ ده غير يا جماعه أن الموضوع مش عارفه اعالجو وكمان لما بحب ببقا مهوسه ومراقباه الموضوع صعب مفيش تحكم وانا مش حابه حد يقول عليا انى علطول مدلوقه انا فعلا حبي بيتفهم غلط

Accepted Answer

دايما جدتي كانت بتقول لي الشيء انزاد عن حده اتقلب ضده فحتى لو الشيء ده كان كويس فالمبالغه فيه مش مطلوبه انت انسانه مسامحه بس مسامحه زياده عن اللزوم والحاجه الحلوه لما بتكون كويسه قوي قوي قوي قوي قوي فالانسان ده احنا بنسميه انسان سلبي مع ان كل تفاعلاته وكل كلامه وكل حياته اصلا كلها ايجابي بس بيبقى سلبي فبلاش تكوني انسانه سلبيه حاولي يكون ليكي رد فعل اللي يغلط فيك يكون لك موقف للانسان اللي يسيبك ما يبقاش كل حاجه كده تاخديها بالايجابي واللي عايز يرجع عادي يرجع مكانه موجود هتلاقي نفسك عامله زي الاستراحه اي حد بيتعب يرجعلك وقت ما يزهق يمشي الاحسن ان انت تكوني ذكرى حلوه في كل حاجه وفعلا متتعوضيش

Answer

أوقات كتير لما بنفتقد مشاعر معينة بنعوض ده باننا نبالغ في منحها، وكأن دي الطريقة الي هتخلينا ناخدها من غير ما نطلب. تقدري تغيري كل حاجة لو بدأتي تحبي نفسك وتحترميها، لو محبتيش نفسك وتعاطفتي معاها واحترمتيها وقدرتيها.. وحسيتي إنك غالية وربنا مكرمك وأراد وجودك وخلقك، هتفضلي عايشة في دور الضحية.. وحقيقي هتتعبي جدا مع الناس. المشكلة مش في العاطفة الجياشة، المشكلة إنك مش مقدرة نفسك وبالتالي مش حاطة حدود وبتبالغي وتندفعي في مشاعرك.

Answer

دا طبع في الإنسان أنه يزهق لو الحاجه اتكررت كتير يعنى لو انتى بتحبي اكله مثلا وفضلتي تكليها متواصل كل شويه ل مده سنه مثلا هتلاقي نفسك كرهتيها مع الوقت أو بدأتي تستغني عنها واعرفي أن في يوم من الايام هيجي الشخص يقدر الحب الزياده دا ومن كلامك باين انك لسه صغيره ف السن على ما اعتقد يعنى لسه ف مدرسه تقريباً ف عيشي سنك اشغلي وقتك ب هواياتك أو حتي اخترعي هوايات ل نفسك ودي حاجه هتسعدك تخرجي جزء من كبت الحب الزياده ال عندك في انك تحبي حاجات كتير مش لازم الحاجات دى تكون أشخاص طوري من نفسك ومستواكي الفكري والتعليمي ووعدك انك هتكوني شخصيه محبوبه والناس هي ال هتبقا بتقدملك كل الحب وهيبقا نفسهم بس انك تكلميهم

المبالغه فى المشاعر تعطي انطباع عني للأخرين انني شخصية مضمونة وضعيفة!

نفسية

خوف

ثقة بالنفس

اجتماعية

علاقات

سؤال من احد أعضاء فدني

تم النشر الثلاثاء، ٢٦ ديسمبر ٢٠٢٣

3 إجابة

7 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك