انا ف عيله كويسه جدا بس محدش بيشجعني ع اي حاجه بكون عاوز اعملها م نفسي ديما لازم يحسسوني اني هفشل ف اي قرار هعمله لازم يحسسوني هغلط
وكمان اخويا الكبير تقريبا اناني ديما بيعارضني اني اعمل حاجه كويسه سواء كنت هبقا ف سواه او احسن منه م ابسط الامور اني كنت بقنع اهلي اني اكمل دراسه بره بعد الثانويه لاقيته بيهاجمني ويقولي انت طفل مش هتعرف تشيل مسوليه هو اصلا ميعرفش حاجه عني ولا يعرف شخصيتي فانا عاوز اعرف اتعامل ازاي لحد ما استقل بنفسي
واضح انك الاصغر وهما بيعاملوك بشكل طفولى ومش عارفين يشوفوك غير كده. ارسم احلامك الحاليه فى حدود المتاح اللى ميزعلش ابوك وامك منك ..دول اهم حاجة ..وقلل احتكاك باخوك فيما يخص المستقبل او الافكار اللىى تخص احلامك عشان ميعملش ليك إحباط بس .
تم النشر الاثنين، ١٠ يوليو ٢٠٢٣
طيب مش ممكن تكون انت فاهم الموضوع غلط؟ يعني كونه انه يوقلك انك طفل، ديه مش معناها اللي تقصده بالمعني اللي انت فهمته، ليه مفكرتش مثلا انه خايف عليك .. لانه اخوك الكبير وخايف اكيد ع مصلحتك .. طبعا انا مقدرة انك مستاء جدا ومضايق لانك في المرحلة ديه بتبقى شايف ان معظم اللي حواليك ضدك، بس في الحقيقة بيبقى التحكمات ديه خوف مش اكتر وحب، ولكن بيبقى حب غلط شوية، وبطريقة ممكن تكون قاسية او جافة .. ف ده بيترجم انه تحكم، ومعاملة وحشة .. حاول تقرب منهم .. وتفهمهم . مش انت بتقول محدش فاهمني ولا عارف شخصيتي .. عرفهم انت وقرب منهم وبادر انت.
تم النشر الأحد، ٩ يوليو ٢٠٢٣
كون أنهم يخافوا عليك من السفر برة مصر بعد الثانوية فدة شيء طبيعي جدا المفروض مايزعلكش وأنا لو مكانهم هخاف عليك برده مش لأنك طفل لكن لأن المخاطر الموجودة برة بتحتاج كمية نضج كبيرة ومش أي حد المفروض يسافر الواحد دايما بيشوف الدائرة المتاحة لتحركه ويتحرك داخلها لحد ما شوية شوية الدايرة دي بتوسع ودة اللي بانصحك تعمله دلوقتي .. حاول ما توترش الأمور بينك وبين أهلك ومع الوقت هتلاقي الدايرة بتاعتك بتوسع وحاجات كتير بتتغير مع الزمن
تم النشر السبت، ٨ يوليو ٢٠٢٣
كمان قبل ما تسافر المكان اللي انت رايحه ده لازم تقرا عن العادات والتقاليد اللي هناك وتعرف انت بالظبط هتتعامل ازاي وتشوف ايه المخاطر اللي ممكن تواجهها هناك ومن الساعه كام للساعه كام تقدر تبقى بره في الشارع فيما بعد كده ما ينفعش ولازم تبقى حاطط جوه دماغك انك ممكن تتعرض لاي عمليه نصب او احتيال او ان اي حد يقدم لك اذى طبعا انت هتكون شخص غريب عن البلد دي فاكيد هتواجه حاجات كثير سيئه فلازم كمان تقوي معلوماتك في النقطه دي وتبحث كويس ولما تكون متاكد من انك قادر انك تسافر وتتعامل بره وهتخلي بالك على نفسك اذا ما لكش دعوه بكلام اهلك وبرده تسمع نصائحهم وتحاول تفهم هم خايفين عليك من ايه وكده كده الموضوع مش هيكون صعب باذن الله وفي نفس الوقت لما تكون بتقوي شخصيتك لازم كمان تعرف ازاي تتعامل مع الناس والنقطه دي مهمه جدا من حيث ان مش اي حد يقدر يتعامل معاك او يضحك عليك او يعمل نفسه بيحبك في المكان الجديد اللي انت رايحه ده حاول تستعين دايما بالله وتكون حطه في بالك دايما وتقرب منه وما تعملش اي حاجه تغضبه وباذن الله هيكون في عونك وهيبعد عنك اي اذى المهم نيتك تكون خير
تم النشر الأحد، ٩ يوليو ٢٠٢٣
اول حاجه لازم تقوي من شخصيتك شويه من ناحيه اول ما الشخص اللي قدامك يبدا يرمي كلام سلبي ترد عليه بكلام يسكته تمام الكلام ده بعيدا عن مامتك وباباك مامتك وباباك هتستحملهم وهتعاملهم عشان ربنا لكن اخوك ما تسمحلوش بانه يكسر فيك تاني تمام ولازم تتعلم انك لا تبالي لكلام الناس وتسال نفسك انت من جوه هل انت لما تسافر بره انت هتعرف تتعامل هل هتستفاد هل هيكون في فايده اكثر من هنا وهتبص للموضوع من كل النقط واهم نقطه هي النقطه الدينيه علشان لازم نكون عارفين ان الاخره اهم من الدنيا ولو الدوله دي دوله مش عربيه طبعا ده لو انت مسلم لو الدوله دي مش عربيه يبقى لازم تقوي نفسك دينيا الاول وبعد كده تاخذ القرار بس تكون حاطط في نيتك انك رايح هناك علشان المذاكره وعلشان ترجع بشهاده كويسه وساعتها لما انت ترجع لها اخوك ولا اي حد من اللي بيشتتك او بيكسر فيك هيعرف يقول لك حاجه انت فكر وشوف عايز تعمل ايه ونفذ على طول كل الناس عندها عوامل بتبعدها عن الشيء الاحسن ليها انت العامل اللي بيبعدك عن الحاجه الاحسن ليك علشان كده كده اي حاجه مفيده للانسان بتبقى صعب الوصول ليها اذا انت لازم تواجه اخوك ده وما تاخدش رايه في حاجه ثانيه وبمجرد ما يرمي عليه الكلام سلبي توقفه وتهاجموا بس هتعاملوا بالحسنى برده علشان الدين ما قالكش انك تخسره ممنوع منعا باتا تخسره انت هتعامله بالحسنى علشان هو اخوك لكن هو مؤذي يبقى انا لازم ما اعملهوش بزياده لازم اخذ احتياطاتي منه واقوي شخصيتي اول حاجه علشان اي شخص بيسعل انه يبقى ناجح هتلاقي الناس كلها بتسعى معاه لانها تدمره وربنا يوفقك
تم النشر الأحد، ٩ يوليو ٢٠٢٣
انا كواحده عانيت بالموضوع ده وعديت بمرحله وحشه ف ثانويه عامه وجبت مجموع سئ جداااا.. جايه اقولك بلاش تغلط غلطتي وتخلي كلامهم يسيطر عليك.. اتحداهم.. اللي يقولك مش هتنفع ف الحاجه دي قول حاضر واثبت انك تقدر.. وخليك دايما الداعم النفسي ليك.. صدقني الموضوع متعب واياك والاستسلام
تم النشر الأحد، ٩ يوليو ٢٠٢٣
للأسف الأهالي كلهم كدا
تم النشر الأحد، ٩ يوليو ٢٠٢٣
لعرض السؤال في فدني اضغط هنا