السلام عليكم ورحمه الله وبركاته انا شاب عندي 24 سنه بعد مرحله ابتدائي كان معايا بنت في الفصل وكنت باخد معاها دروس وساكنه في نفس المنطقة بتاعتي في مرحله الثانوي اتكلمنا وابتدينا نلمح لبعض بس انا كنت اول مرة أخوض علاقه اصلا مع بنت في حياتي بس هي مش اول مرة ومكانتش قايلالي حاجه عن الموضوع ده وانا عرفته عن طريق عوامل خارجيه واتضايقت أنها مصارحتنيش وابتديت اقولها اني مش بحب الكدب ولازم تصارحني بكل حاجه بس دايما أنا احساسي بعد الموقف ده يحسسني أنها بتعمل حاجه غلط بس ابتديت اتعافى وكملنا وهي دايما كانت تقولي اني بفتح دايما في حاجات قديمه مع إن ده بيبقى بسبب تصرفات جديده بتخليني افتكر كل القديم بس قلت هي عندها حق ولازم اغير من نفسي ومفتحش في حاجات قديمه عدت فتره كبيره حصل مشاكل وانفصلنا وانا كنت ديما برجعلها معرفش السبب بس هي مارست عليا ألاعيب كتير بسبب صاحبها وخلتني اتعلق بيها واستغرب أفعالها لحد وكان كل شويه يحصل مشكله وانا اللي احس بذنب مع أني ببقى ساعتها شايف انها غلطانه بس مع الوقت بهدى وارجع واقول هي عندها حق انا اذيتها في فتره انفصلنا كالعادة بس الفتره دي انا كنت تعبان جدا بسبب فقدها وهي مش حاسه وكله بيقولي أنها بتعيش عادي انت اللي موقف حياتك كانت ديما بعد اي انفصال الاقي عندها شخص على الفيسبوك ولما اسألها تقولي انت مكنتش موجود للعلم انها ماخدتش وقت للتعافي حتي عديت كل ده وحصل مواقف كتير قدامي تثبت اني صح بس كنت بغمي عيني عن كل حاجه لحد في مرة كنت بكلمها والمفروض ننزل نصلح مشكله لينا بس كانت متغيره لحد ما اكتشفت من عند ربنا كده أنها بتتكلم مع شخص بقالها فتره وهي معايا ومعاه والشخص ده اتعرف عليا وقالي اللي حصل وقالي أنها كانت بتقول كلام عليا وحش وكانت بتقول اني مؤذي واكتشفت أنها كانت بتكدب عليا في حاجات كتير بعد ما عرفت فضلت تقولي انا غلطانه انا معرفش عملت كده ازاي انا اسفه وعيطت وقالتلي متسبنيش وانا قولتلها انا مش هعرف اتعايش معاكي بعد كل ده بس هي قدرت بحبي ليها تخليني اكمل مع أن اني اكمل ده يثبت اني شخص مش طبيعي بس انا كنت معمي عن كل حاجه بجد عدى 6 شهور بعد الموضوع ده وبحاول مفتحش اي حاجه من اللي فاتت علشان فاكر أنها بتتاذي وكان ديما سؤالي هو هي فعلا حبتني ولا كانت بتتسلي ولا هي مريضه ولا ايه مش فاهم لاني مبقتش بصدق كلامها ف لاقيت نفسي في يوم كده افتكرت القديم كله وواجهتها بيه وردها صدمني لما لقيتها قلبت الترابيزه انت ليه تفتح معايا كل ده ومتردش عليا وانا مكنتش عايز اخسرها بس هي فرق معاها نفسها زي كل مرة وقعدت تقولي أنها مخانتنيش انا دي خانت الشخص التاني معايا وأنها زهقت وبتزعق وانا لما افتكرت اني ديما كنت معاها في عز كسرتها قدامي ومردتش تسببها صعبت عليا نفسي واتعصبت وشتمتها وعملتها بلوك عدي كام اسبوع كده ولقيت نفسي بكلمها بقولها متزعليش مني بس لازم نبعد وكان غصب عني شتيمتي بس ديما بحس بالذنب ليه انا ديما بحس بالذنب مع اني اقسم بالله عانيت كتير معاها بسبب كدبها مبقتش عارف انزل اشتغل وشغفي راح وقاعد في البيت وديما بفكر ف كل ده هي كدبت عليا في وقت انا بحاول اقرب منها فيه وفي الاخر انا اللي بقيت وحش ومؤذي بالنسبالها مبقتش عارف فعلا انا مؤذي ليها ولا هي اللي بتوصلي كده ولا ايه بالظبط محتاج مساعده بجد لان ربنا يعلم بيا انا عامل ازاي وللعلم انا شخصيتي مش من النوع اللي اتحايل على حد بس معاها كنت ديما ضعيف واقولها اني مش بحب اشوف ضعفي ده وهي رغم كل ده كانت بتعمل كل اللي قولته ده
دا تعلق شديد بيها اكتر منه حب .. احساسك بالذنب عالي .. وبتحاول ترضي الاخرين على حساب نفسك ، كل دا راجع لعلاقتك باهلك ، والدتك ووالدك وطريقة تربيتهم لك ، وطريقة نظرك وتفسيرك للامور. اولا انت محتاج توزن مشاعرك وتفكيرك .. تفهم ليه ممكن تكون متعلق بيها بالشكل دا؟ ليه حبيتها؟ ايه الصفات اللى فيها تخليها تكون شريكة حياة وزوجة مناسبة ليك؟ هل انت بتفكر فعليا انك تتجوزها؟ ولا وجودها في حياتك هو مجرد سد فراغ عاطفي عندك؟ ولو مش عارف تلاقي الاجابات دي بنفسك ، اطلب المساعدة من اخصائي او معالج نفسي يساعدك في انك تتوازن في مشاعرك وعلاقاتك بالاخرين عموما ، مش بس البنت دي. وثانيا، لو انت جاهز للارتباط والزواج ، خد خطوة رسمية في الارتباط بيها ، وادخل البيت من بابه ، احتراما لاهلها وحفاظ على دينك واخلاقك ، وحفاظ عليها هي كمان .. لو مش قادر ماديا دلوقتي لخطوبة والتزامات زواج .. ابعد عن البنت .. وانت ونصيبك بعد كدا لما تبقى جاهز لفتح بيت وتاسيسه ، يا يكون ليك نصيب فيها ، يا ميكونش ... فلازم تتعلم متعلقش قلبك بحد انت متعرفش اخر علاقتكم هيكون ايه، لان دا متعب جدا ليك ، وللطرف التاني ، غير انك كمان بتظلمها بوجودك في حياتها لو انت مش هتقدر فعليا تخطبها من اهلها وتتجوزها. ثالثا، اي حاجة قبل ارتباطك بيها، انت ملكش تتكلم او تسال او تطلب منها انها تحكيلك اي حاجة .. لو انت مش واثق في اخلاقها ودينها وسلوكها .. يبقى الافضل تبعد عنها ، لان الشك وعدم الثقة بيهدم اي علاقة بين اي اتنين... ولو هي فعلا شخص مش قد الثقة .. يبقى لازم تفكر الف مرة قبل ما ترتبط بيها او تقول انها تصلح تكون زوجة وام لاطفالك .. (الحكم ليك انت لانك انت اللى تعرفها ، انا مبحكمش عليها باي حاجة). واقعيا هي مش ملزمة تجاهك حاليا بأي حاجة، وانت ممكن تتفاجيء منها في اي وقت بانها هتتخطب وتتجوز شخص تاني، وهيكون مبررها انك مقدمتش اي فعل او اي خطوة جادة في ارتباطك بيها وهي مش مضطرة تفضل رابطة نفسها بيك وتضمن منين انك صادق في مشاعرك ناحيتها والعمر بيجري ، والفرص مبتتعوضش ووووو الخ. ربنا ينور بصيرك ويلهمك رشدك و يقدرلك الخير ويرضيك
تم النشر الثلاثاء، ٣ سبتمبر ٢٠٢٤
وعليكم السلام ورحمه الله وبركاته انا مش قادره اقول لك جرينا الموضوع من اوله لاخره غلط في غلط يعني فاحنا هنا لو مسكنا الغلط فصصناه علشان نشوف فيه ايه صح وايه غلط فاحنا كده يعني بنعمل حاجه ملهاش لازمه فالموضوع غلط انك ترتبط. في السن ده. غلط مش صح سن ثانوي. الواضح من الموضوع كله انه البنت كانت. عندها ثبات اعلى منك النفسيه عندها خبره اعلى منك في مساله الارتباط عندها طريقه بتعرف تكون بتتلعب بها بشكل اكثر حرفيه منه انت يعني. خبرتك قليله ما سمحتلكش انك تعرف تجاريها ان هي بتعمله بتتعامل انت بالتلقائيه العاديه الطبيعيه بتاعتك فاا اخرج من الموضوع ده كله بانك محتاج اييي انك تقاويه نفسك نفسيا شويه متسمحش لحد ان هو يتلاعب بيك نفسيا تحت اي ظرف من الظروف خلي في عندك حدود ما تسمحش بان الحدود دي تنكسر. ولو حد تعداها اكثرها لازم يلاقي عواقب جديد يعني لان هو تعدى الحدود بتاعتك والعواقد دي ما بيكونش بعدها انك تجي انت تعتذر حتى لو انت تعتذر على يعني لفظ انت قولته لكن انت مش هتعتذر. انت علشان اللي قدامك هو اللي عدى الحدود خلي بالك من النقط دي كويس قوي وانسى بقى الموضوع ده كله خالص الموضوع ده تاخده كده وتطبقه وتحطه في ورقه وترمكت الموضوع مش محتاج اكتر من كده. بص على نفسك اكثر. اييي شوف الطريقه السويه في انك تتعامل مع الاخرين وما تمشيش في الطريق بتاع الارتباط ده ثاني لانه غير مناسب تماما وهيستهلك مشاعرك بس.
تم النشر الأربعاء، ٤ سبتمبر ٢٠٢٤
ما تحكيه سواء من ناحيتك أو ناحيتها ليس حبًا. ما أنت فيه هو تعلق مرضي لا أكثر، وهي لا تحبك بكل هذه التصرفات التي قلت أنها كانت تفعلها. عامة انتهى الأمر كما قلت، فلا داعي لتسمح لعلاقة مؤذية بتدمير حياتك أكثر من هذا. الحياة أكبر من هذا وأرى أنك تضيع عمرك على تفاهات بينما هناك ما هو أهم، هناك مسؤوليات في حياتك، هناك نفسك التي تحتاج لتهتم بها وتقوم بواجبك تجاهها لتستطيع الاهتمام ببقية العلاقات المهمة... مثل علاقتك بربك وعلاقتك بأهلك وواجبك نحوهم. اختل بنفسك قليلا واسألها، هل أنت راض عن هذا الحال الذي وصلت إليه؟ هل عمرك يستحق أن يضيع من أجل فتاة مثلها؟ هذا إذا وضعنا جانبًا أنّها من الأساس كانت علاقة غير شرعية ولا ترضي الله. هل تستحق بالفعل أن تتوقف عن العمل وتضيع مستقبلك لأنك عاجز عن تخطي الأثر السلبي الذي تركته في نفسك؟ أفق لنفسك يا أخي والتفت لحياتك ومستقبلك. إن شاء الله ستتجاوز وتنسى وعندما تجد الحب الحقيقي أو الإنسانة المُقدرة لك فهذه المرة تأكد من أن تأخذ الخطوة الصحيحة نحوها... بدخول بيتها وطلب يدها. إن شاء الله يكتب لك الخير ويرضيك به. تحياتي.
تم النشر الثلاثاء، ٣ سبتمبر ٢٠٢٤
هو طبعا انا ضد فكرة الارتباط الغير رسمي ، واضح انك بتحبها بس هي مش بتبادلك نفس المشاعر كمان بدليل انها بتقدر تموڤ اون و تصاحب شخص تاني .... من رأيي انك مش أذيتها بالعكس هي عارفه انك بتحبها و ضامنه وجودك مهما عملت و ان حبك هو نقطه ضعفك علشان كدا بتحسسك انك اللي غلطان وانها مظلومه ... ممكن اسألك سؤال ، هل انت بكل اللي حصل دا ممكن تتجوزها و تكون مسؤله عن بيتك و اولادك ، هل عندك ثقة فيها لو سافرت و سيبتها ؟ بعتذر بس معتقدش انها شخص كويس ، بلاش تضيع مشاعرك و نفسك و اهلك علشان حد مش مقدر حبك و انت تستحق حد افضل
تم النشر الثلاثاء، ٣ سبتمبر ٢٠٢٤
لعرض السؤال في فدني اضغط هنا