اولا انا عندي 19 سنه وشخصيه كتومه جدا مش بعرف اعبر عن مشاعري اتجاه الشخص اللي قدامي يعني مهما. كنت بحبه اوي ببينله عكس كده وده بيكون مش ب ايدي هي حاجه جوايا مش بعرف اقول كلام حلو للناس في وشها بتكسف خصوصا اهلي بجد عشان دول اكتر ناس يستحقو اني اعاملهم كويس واعبرلهم عن مشاعري تجاهم
طيب فيه فرق ما بين مش عارفة تعبري عن حبك، وفيه فرق انك تعامليهم كويس. ديه حاجة وديه حاجة تانية خالص .. وعلى ما اظن انتي تقصدي التعبير عن مشاعرك. طيب انتي ممكن تعملي ايه مثلا ل بابا او ل ماما علشان تعبري عن مشاعرك .. علشان مش كل الناس تقدر تعبر بالكلام، في ناس بتعبر بحاجات تانية .. فيه ناس بتعبر بالتلامس، ناس تانية بتعبر بالهدايا، ناس تانية بتعبر بالاعمال الخدمية .. يعني انك ترتبي مثلا البيت لماما انتي بتعبري لماما عن حبك ولكن انتي عندك طريقة تانية تعبري بيها. ولكن ايه رايك تبدأي تكتبي ليهم .. سواء مثلا جوابات او رسائل وتكتبي فيها كل حاجة جواكي .. اتمنى اكون قدرت افيدك بحاجة
تم النشر الخميس، ١٦ فبراير ٢٠٢٣
غصبن عنك ...التعبير عن المشاعر ده بيكون مهارة من الطفولة ...فلو ما اتعززتش وما اتشجعتيش عليها واتعلمتيها بالتدريج ...فطبيعى تبقي دلوقتى كده وتسميها كسوف. بس وجود المشاعر جواكى بيبقي عامل زى البركان المكتوم ( يعنى فى مرحلة ما بينفجر ) التنفجار بيكون للمشاعر الحلوة والوحشة ....مجرد انها مكتومة ده بيخليها تضغط على الشخص لحد ما يطلعها فى اى موقف غلط بشكل غلط على هيئة انفجار وغير مرتب ولا منتظر. ممكن تستنى مشكلة عشان تقولى لمامتك مثلا ...ليه تعملى كده فيا ده انا بحبك. ( وده شكل تعبيرك عن حبك اللى مكتوم بقاله كتير ) وهكذا امثلة اخرى. ممكن يكون كتمانك بسبب خوفك من انه يخذلك او يستغل ده بعد كده باى شكل . اشكال التعبير عن الحب مش بس كلام ...وممكن تخففى من الكلام المباشر بانك تقوليه جوه جملة تانية . او يبقي جزء من فعل. مثلا اقول لبابا...هعملك احلى كوباية شاى عشان انت الغالى على قلبي. اجيب لاختى حاجة كان نفسها فيها واقولها...انتى دايما فى بالى وكل اللى تحبيه بفضل فاكراه. مش كل المشاعر كلمة واحده...اهم حاجة تعبرى باى شكل .
تم النشر الخميس، ١٦ فبراير ٢٠٢٣
مش لازم تعبري بالكلام حببتي ابدأي بورقه وقلم وستيكي نوتس مثلا خفيفه شيكولاته وورده وأي هديه بسيطه تسمعي كلامهم وتريحيهم وتحضنيهم وتساعديهم كل ده حب واقيم من الكلام مع صحابك بردو مره شكلك حلو مره الطقمم حلو مره تعزميها مره تسمعيها وهكذا في ٥ طرق للتعبير عن الحب وكل واحد ليه ٢ أو ٣ مختلفين عن غيره فمش شرط أبدا الكلام ومع ذلك اشتغلي علي نفسك تكوني لبقه آكتر لأن الكلمه الحلوه بتسرق فعلا 🌻
تم النشر الخميس، ١٦ فبراير ٢٠٢٣
مش ضروري دايما تعبري عن مشاعرك بالكلام ممكن ابتسامه او معامله كويسه واسلوبك بيوصلهم حبك ليهم ... ومش هنكر ان التعبير اللفظي عن المشاعر مهم ف ممكن نعبر عنها من خلال كلمه شكر ع اي حاجه هم عملوها ليكي كويسه او اعتذار عند الخطأ او عن طريق الاحضان انك تحضني مامتك بباكي او تبوسي اديهم او تخصصي وقت تقعدي مع مامتك تشاركيها اهتماماتها وتجبيلها الحجات الي بتحبها ونفس الكلام مع بباكي واخواتك واتعلمي حاجه لما تحصلك حاجه تفرحك شاركيها ولما تحصلك حاجه تزعلك شاركيها مع اهلك حتى لو اتدايقتي منهم هتتمرني مع الوقت تعبري عن مشاعرك المهمه للناس الصح
تم النشر الخميس، ١٦ فبراير ٢٠٢٣
لعرض السؤال في فدني اضغط هنا