دلوقتي انا محتارة ف حاجة وعايزة آخد رأيكم
انا طالبة في 2ث ومكنتش مرتاحة عند المدرس اللي كنت بروح له ف سبته ودورت ع مدرسين تانيين بس كنت جربت كل المدرسين ما عدا 2 وهما الإتنين صغيرين ف السن ودي حاجة بتخلي المدرس الصغير عايز يثبت نفسه دايما وبيحاول يطور من نفسه
جربته حصتين الحصة الأولى كانو بيحلو ع الدرس اللي خدوه وانا محضرتوش علشان رايحة مأتخرة حصتين ف هو جابني حصة لوحدي علشان يشرحلي اللي فاتني وتمام ظبطت الدرس بس في مشكلة هو شرحه حلو وجميل وهادي وكل الكلام دا بس معايا ف الدرس كام بنت مش برتاح لهم وجودهم بيضايقني ودايما بحس ان انا قليلة ومبفهمش حاجة مقارنة بيهم علشان هما بيجاوبو الأسئلة في غير دورهم و جو غير مريح يعني وهما كانو معايا عند المدرس اللي سبته وجودهم كان بيأثر ع مستوايا
المدرس التاني بقى
روحتله حصتين برضو
هو مش متمكن اوي من شرحه ومش مرتب كلامه بس جو الدرس مريح ويخليني اقدر أسأل ع اللي مش فاهمه وكدا بس هو انهاردة كان بيظبط معانا المواعيد وخد الجدول بتاعي يبص فيه ع مواعيدي وانا كنت كاتبة في خانة المادة دي مواعيده ومواعيد المدرس التاني ف تقريبا هو خد باله ان انا بروح عند مدرس تاني واتحرجت اوي بصراحة ووندهلي ف آخر الحصة وقالي عايزك لما تكوني مش فاهمة او حاجة واقفة معاكي تسأني والكلام من دا يعني وقولتله ان انا عايزاه يسألني ف الحصة علشان الكلام يثبت وكدا يعني ف هو صعب عليا بصراحة بس للأمانة هو من النوع اللي مستعد يطور من نفسه وبيحاول ولو لفت انتباهي للسلبيات اللي عنده بطريقة لطيفة هحاول يظبطها
ف انا مش عارفة دلوقتي اروح عند مين ولا اعمل ايه
ممكن تنصحوني
هل ينفع تتكلمي مع المدرس اللي شرحه كويس وتقولي له .. ينبه على الطلبة انهم يكونوا هادين في الحصة، علشان انتي مش قادرة تتعايشي في الجو معاهم، وده بيأثر عليكي ومش بتكوني مركزة. خليكي واثقة في نفسك .. اسالي زي ما انت عايزة .. كلنا بنفضل نسأل لحد دلوقت مفيش حد كبير على اي حاجة. علشان لو مسألتيش مش هتعرفي اللي انتي عايزاه .. ولازم تعرفي انهم برده فيه حاجات هما مش عارفينها.
تم النشر الاثنين، ١٣ فبراير ٢٠٢٣
انا شايفه المدرس اللي اجواءه مريحه احسن وبتعرفي تساليه الاساله اللي واقفه معاكي ده هيفيدك اكتر وهتقدرو تتطورا مع بعض ولو حبيتي الحصه واجواءها هتتشجعي ع المذاكره اكتر ومستواكي هيعلي جامد ♥️
تم النشر الأحد، ١٢ فبراير ٢٠٢٣
انا شايفة انك تعملى دكتوراه ف المدرسين. المشكلة هنا مش فى المدرسين بصراحة ...واضح جدا انك بتركزى فى شخصيات اللى حواليكى وتحللى كتير وده بيشتتك شوية حلوين عن الهدف الاساسي ..اللى هو الشرح والمذاكرة. ولو على المذاكرة والشرح ...المنهج واحد ...المدرس بيبقي طريقة وكل طريقة ممكن تناسب حد اه وحد لا ....والتزامك انتى قبل المدرس هو العامل الاهم فى تحقيق نتيجة كويسة من المذاكرة. جربي كده تسمعى شرح مدرس ع اليوتيوب....وقوليلى ايه اللى جه فى بالك وانتى بتقررى شرحه كويس ولا لا؟ هستناكى 😊
تم النشر الاثنين، ١٣ فبراير ٢٠٢٣
لعرض السؤال في فدني اضغط هنا