محتاجه اخد رأيكم فحاجه
انا عندي 23 سنه ، كنت في كلية هندسه اتخطبت لواحد قدي 4 سنين معايا في نفس الكليه فالاول كنا مش شايلين مسؤوليه بس انا كبرت فكريا اسرع منه وحسيت انى شايله هم وتفكير كل حاجه لوحدي وهو عقله لسا فالبلايستيشن والكلام بتاع المراهقين وانا كنت مستنياه يتغير ويفكر فمستقبلنا بس دا محصلش فسيبته رغم انى كنت متعلقه بيه جدا وهو كان بيحبني حب تملك.
المهم تخطيت وكانت فترة صعبه كانت سنه التخرج بتاعتي اتخرجت هلكانه من الكليه عديت بأعجوبه فقدت الشغف بعدها فأي حاجه قلت هدي لنفسي فترة عشان استعيد صحتي وقوتي النفسيه تاني بس اللي حصل عكس كل توقعاتي.
انا كنت رافضه فكرة الارتباط تاني خلاص بس اهلى كانو شايفين انى مينفعش ابقي معقدة واني لازم اتجوز والكلام دا الصراحه من ساعة ما قعدت من الكليه وانا بيتقدملى عرسان كتير وكلهم غراب الشكل اللي اكبر مني بكتير بس مكونش نفسه بالنسبه لسنه بالنسبالى واللي قدي ولسا قدامه كام سنه عقبال ما يتجوز واللي متكبر ومش شايف حد وعايز يتحكم فيا وانتهت بواحد متجوز وعنده بنتين ومراته حامل.
انا حاليا اتخطبت ليه بعد صراعات وإصرار كبير موافقه من عيلتي هما اللي بيقنعوني مع العلم انا امي زوجه تانيه اتجوزت بعد ما بابا مات فيمكن عشان كدا هي شايفه أن الوضع عادي وبتقولى اعتبريه مش متجوز لحد ما اقتنعت وقابلته ولقيت بصراحه حنيه وشخصيته حلوة قعدت اتكلم على مراته كتير وأقنعه أنه يصلح حياته يقولى هي مش بتقدرني ومش بتلبي رغباتي وأكلها كله دليفري ومهمله فيّ وف بناته وكمان عندها مرض اسمه الصدفيه فده بيخليه غصب عنها تبعد عنه وبتقسي بناته عليه واهلها دايما اللي ممشينها، أسرارهم كلها مع امها واخواتها وعايزين ياخدوه من عيلته والحمل الاخير دا كان قرار من والدتها عشان بس حست أنه بيفكر يتجوز.
هو كويس معايا ومرتاح ماديًا شويه بيجبلى هدايا غاليه وبيفاجاني كل شويه وانا كل شويه بحال احيانا بنسي أنه متجوز واحيانا بتنكد بسبب الموضوع دا روحنا انا وهو وشفنا شقه تحفه واشتراها وشرطت عليه يكتب نصها بأسمي عشان اطمن ع حقي وطلب مني أنه نفسه يخلف ولد يسميه ع اسم باباها وباباه يشوفوه قبل ما يتوفى.
اقترح عليا نعمل تحديد جنس المولود من الاول نجيب توأم ولاد وهو بصراحه اتعلق بيا جامد وانا بعرف احتويه وبننجذب لبعض جنسيا انا لاحظت مع العلم انا طبعا مطبقه قواعد الخطوبه الشرعيه مبسمحلهوش يمسك ايدي حتي طبعا أنا عشان مترددة كل شويه افكر اسيبه مع العلم هو عايز يكتب كتب كتابنا علطول عشان مراته لو عرفت متعملش مشكله وأننا نسيب بعض هو بقاله سنتين بيدور على عروسه وكدا كدا كان هيتجوز لانه مش مرتاح فحياته + هو من المنصورة بس شغله فالعبور جنبنا فبالتالي قاعد خمس ايام هنا وبيروح بيتهم يوم الخميس والجمعه.
بس الكلام دا بقاله سنتين فإنتو شوروا عليا انا اهلى موافقين طبعا محدش يعرف من صحابي مش قادرة اتكلم مع حد لانى عمري ما تخيلت يحصل معايا انا كل دا وكمان عمامي عرفوا قبل ما ييجي هو وأخوه يقروا الفاتحه وكلهم كانو بيقنعوني بردو هو بصراحه انا طول عمري بحلم اعيش في مستوي حلو وهو عيشهولى بس خايفه كل دا ميرضينيش أو ميجيش حاجه جنب أن يكون ليا زوج لوحدي ومحدش يشاركني فيه
+ حاسه لو جالى حد تاني انى سقف طموحي ومطلباتي على وهشوف اى حد قليل حد فاهم حاجه انا كانت كل مشكلتى مع خطيبي أنه مكنش طموح زيي وأنه كان سلبي ومش بتاع شغل كنت بشيل هم كل حاجه لوحدي أما مع الشخص اللي متقدملى اللي هو خطيبي دلوقتي دا مش بشيل هم حاجه بيجيبلى كل حاجه عايزاها.
مشكلته بس أنه بتاع حوارات شويه ومبيبطلش رغي يعني ماشي يقول للناس كلها أنه هيتجوز الكلام دا فبدايه العلاقه احنا بقالنا شهر كدا سوا كان ناقص يروح يقول لمراته بس هو فرحان بيا وبيفتخر بيا انى مهندسه وجمال وكل الكلام دا فمش مصدق انى رضيت بيه وانا بنت بنوت والمشكله التانيه اخوه الكبير علطول بيدخل فحياته هما شركا فالشغل سوا فأي حاجه خطيبي يعملها لازم تعدي ع اخوه وياخد رأيه فيها وخطيبي بيتأثر بيه جدا مع العلم اخوه فدماغه يتجوز بردو بس معرفش اى السبب 🙂
انا عملت استخارة كتير فالبدايه والمواضيع كانت بتمشي اسرع فكل مرة شوروا عليا مش عارفه اعمل اى لان معاد كتب كتابي قرب
السلام عليكم ورحمه الله وبركاته. طيب خليني اقول لك حاجه اييي اولوياتك محتاجه انك تكوني متاكده منها كويس محتاجه انك تبقي عارفه انه الانسان ما بياخدش كل حاجه يعني مفيش حد يضحك على نفسه ويقول انه معنى جمله ان الشخص ده شخص مناسب او شخص جاهز معنى كده ان هو عنده كل حاجه او ده عريس كويس فمعنى كده ان هو في كل حاجه مضبوطه لان دي بتبقى خدعه البني ادم بيخدع بها نفسه وبعدها بيبدا. يظلم بقى الشخص لو بدا يطلع منه صفاته الشخصيه العاديه اللي هي جواها اكيد في عيوب يبدا يقول انا اتخدعت في يعني في الموضوع من اوله فعلشان نكون واضحين وانت بتكرري قرارك هتبقي بتقولي الاتي انا. اقبل الشيء بمميزاته اللي هي كذا وبعيوبه اللي هي كذا وابقى عارفه ان انا المميزات اكيد يعني هتبقى ازاي الجميله على قلبي وبتديني احساس حلو جدا ومدياني نقط راحه والناحيه الثانيه في عيوب هتصيبني بالتوتر وهتزعلني في الاوقات اللي عفيها وانا هيبقى عندي طريقه اقدر ان انا اتعامل بها مع العيوب دي وات. حملها فتخلي بالك كويس قوي من النقطه دي وانت بتكرري القرار ده معنا نفسك اي حد فينا ما ينفعش يقول لك رايي واضح وصريح ويقول لك اه كملي او يقول لك لا ابعدي انا مش من حقنا ليه لان احنا مش انت احنا مش مكاني كل واحد فينا هنا هينصحك او هيقول لك راي وهيبقى رايي وهو الشخص اللي هو بناء على اولوياته هو فانا دلوقتي لو قلت لك لا علشان كذا فدي اولوياتي انا يعني مش شرط تكون اولوياتك انت ولا حاجه فارقه معاكي انت فلذلك انت شخصيا لازم تكوني عارفه ده عن نفسك عشان تقدري تقدري تكرري الصح دي اول نقطه ثاني نقطه ااا يا ريت يا ريت تحطي كمان في الحسبان ان لو انت اعتمدتي على اي نقطه في الشخص ان هي نقطه مضمونه ومكمله الى ما لا نهايه فارجوك تراجعي عندها. وده مش عشان الشخص اللي متقدم لك بس ده عشان اي شخص في الحياه وعشان نحن كمان شخصين. احنا كلنا معرضين ان احنا يحصل تغيرات في شخصيتنا يكون كان فينا صفات حلوه وجميله جدا بس يعني تشاء الظروف والاحداث وحاجات كثير جدا ان احنا ننقلب على النقيض طيب هل احنا شخصيا نحب لو حصل ده معانا وتغيرت في نصيب الناس اللي كانت معنا تقول لنا لا معلش خلاص انا ما اقدرش ابقى معاك عشان تغيرت فيك الصفه دي. اكيد لا. وكذلك والاكثر كمان لما يكون زوج او زوج. مينفعش ابقى مشتري حد بشروط واقول له انا معاك طول ما انت فيك الحته دي بدات تفقد الحته دي معلش انا لا كده انا مش هعرف هبقى معاك. لانه دي حاجه مهمه جدا ان احنا نكون حطينها في اعتبارنا واحنا بنبص للشريك حياتنا. لانك ممكن تقولي انا هتحمل عيب من عيوبه عشان ميزه مميزاته طيب طب ولو الميزه دي حصل فيها اي خلل او حصل فيها اي دروب هتلاقي نفسك ساعتها ما عندكيش حاجه تتحملي بيها العيب لا فخلي بالك كويس قوي من الموضوع ده. في نقطه كمان بقى مهمه جدا. هو انك تخلي بالك. مساله بقى انك هتكوني زوجه ثانيه والقصه دي خليني اقول لك انه افضل شيء انك تحاولي توصلي لحد يكون قريب او في نفس المنطقه او اي حد تقدري فعلا تتاكدي من الكلام اللي هو بيقوله وان الحياه مش لطيفه زي ما هو بيقول مع مراته والكلام ده هو طبعا بيقول علشان يبرر لكن انا عايزه اقول انه مش بتكون دي الطف حاجه الراجل يعملها اذا كان هو هيستخدم حقه في الزواج مره ثانيه مش ضروري ان هو يعني يطلع مراته ان هي فيها عيوب. فخلينا اقول لك ان دي نصيحتي انا الشخصيه لو في عندك طريقه تتاكدي بيها من الكلام اللي هو بيقوله عشان لو ده هيفرق معاكي يعني انه الراجل عنده اسباب ان هو يكون عايز يتجوز ثاني اعملي ده اتاكدي اطمني وراجعي نفسك هل انت مع تغير الاوضاع هتتحملي فكره ان هو مش هيكون معاكي طول الوقت هيكون في وقت والوقت ده هيختلف على فكره يعني المواضيع دي ما بتمشيش قوي بشكل جدول لانه لو طرق اي طوارئ في همم بيت الزوجه الاولى هو لازم يكون هناك فهيعمل كده. فهيبقى سايبك انت فا انت لازم تكوني عارفه ان حاجه زي دي هتتعاملي معاها وتتحملي فكري في الحاجات دي كويس جدا جدا جدا وتخيليها كويس جدا وقيمي على اساسها بشكل كبير.
تم النشر الخميس، ١٧ أكتوبر ٢٠٢٤
هناك أمور في الإنسان ممكن تعوض أنه متزوج لو كان به من الصفات التي تتمنينها - و لكن لا أنصحك أن تجعلي من ضمن هذه المواصفات الأساسية أنه (بيجيب لك اللي عايزاه) لأن الحالة المادية قد تتغير ولكن ليكن تركيزك على الصفات الثابتة المتعلقة بالشخصية والدين والأخلاق والفكر وغير ذلك وعموما أفضل طريقة تدرسي بها أخلاقه هي طريقة تعامله مع زوجته الأولى ثم ليكن في حسابك أن ظروف العمل والسكن قد تتغير وتكونين أنت والزوجة الأولى معه في نفس المحافظة مثلا وحينها سيكون عليه العدل بينكما في المبيت وربنا يكتب لك الخير
تم النشر الأربعاء، ١٦ أكتوبر ٢٠٢٤
السلام عليكم ورحمة الله وبركاته اولا ياختي انتي مش مطره انك تاخدي واحد متزوج قبل كده اي رجل محترم حكيم مخلص هيعرف يكسب شريكة حياته ويحل كل المشاكل اللي معاها مش مع حدوث مشاكل يفكر يتزوج وكما حدث مع زوجته الأولى ممكن يحدث معكي ويتزوج عليكي الحياة الزوجيه لا تخلوا من المشاكل والساعات وكل حاجه في اولها حلوه وبيها شغف واهتمام ومع مرور الوقت الدنيا بتهدي نصيحه لوجه الله تعاله بلاش تهدمي بيته وترتبطي بشخص استسهل انه يتزوج على شريكة حياته بلاش انتي الوحيده اللي هتتعبي
تم النشر الخميس، ١٧ أكتوبر ٢٠٢٤
بصي بصراحة انا خايفة تتجوزيه يحصل مشاكل بينكم بسبب مراته لإن اكيد مراته هتعرف وممكن تخرب عليكي البيت ومش بعيد ولعياذ بالله تجيب بلطجية يقتلوكي او تعملك عمل تفرق بينك وبينه او لو خلفتي تإذي ولادك،فبادية كده ياتحطيله شرط انه يعرف مراته وكل شئ يبقى على نور،يابلاش خالص يابنتي وياما عرسان بيتقدموا كويسين انت بس اصبري وادعي ربنا يرزقك بالزوج الصالح
تم النشر الخميس، ١٧ أكتوبر ٢٠٢٤
انا حاسه بيكي وفهماكي جدا اعملي الا انتي مرتحاله ميه ف الميه لو متردده واحد ف الميه متوفقيش لانك بعد كده هتحسي انك تسرعتي خلي فتره الخطوبه اطول تفهمي شويه دماغه شوفي مرتاحه لكل الصفات فيه ولا شكله أسلوبه استايل لبسه كل كل حاجه بصي عليها لو شايفه أنه عادي تتجوزي واحد متجوز دا شي يرجعلك صلي استماره كمان وحسيتي انك مرتاحه يبقي أن شاء الله خير ليكي
تم النشر الأربعاء، ١٦ أكتوبر ٢٠٢٤
تمام بس لي يحكي عن مرتو؟ لي يفضحها ويقول انه عندها صدفية وبتاكل بس ديلفري وحملت بسبب قرار مامتها؟ ما بتخافي زي ما حكى عن مرته الاولى يصير يحكي عنك؟
تم النشر الثلاثاء، ١٥ أكتوبر ٢٠٢٤
طيب يعني هو حنين وطموح عكس خطيبك الأولاني ودي صفات انتي عايزاها في شريك حياتك ف انا شايفه دا كويس انك لقيتي الصفات اللي عايزاها فيه ، وانتي متقبله الفكره يعني مش جديده عليكي لان مامتك زوجه ثانيه ممكن برضو تتعبي لما تفكري انه مش ليكي لوحدك، من رأي صلي استخاره تاني وان شاء الله خير
تم النشر الثلاثاء، ١٥ أكتوبر ٢٠٢٤
احس ازا متردده لا تخاطري لان الامر مش سهل. و موقفك صعب فاهماك بس انتي اهم ورائيك مهم لا تخلي قرار غيرك ياثر عليكي لان ترددك هيدا اكيد له سبب داخلي 🤍
تم النشر الأربعاء، ١٦ أكتوبر ٢٠٢٤
السلام عليكم والله هو الراجل مش عيب لما يتجوز مره واتنين وتلاته طالما هو مش بيأثر في حق زوجاته وبيراعي ربنا فيهم يعني مفيش مشكله من الناحية دي وطالما انتي منجذبه ليه ومعجبه بشخصيته من رأيي الشخصي أن توافقي عليه الزواج قبول وايجاب
تم النشر الأربعاء، ١٦ أكتوبر ٢٠٢٤
بصى انتى بتقولى انك صليتى وربنا مسخر لك الأمور وماشيه تمام فا ممكن دى اشاره من ربنا أنه تمام وشايف أنه خير ليكى وبعدين اقولك ع حاجه ياما ناس مش متجوزين بيتجوزو مطلقات وارامل والعكس فامتاخديش ده مبدأ ليكى انتى شيفاه مناسب اتوكلى ع الله مش مناسب يبقى خلاص وبرضو خليكى مع ربنا ويقدملك اللى فيه الخير ويسعدنا ويسعدك اللهم امين
تم النشر الثلاثاء، ١٥ أكتوبر ٢٠٢٤
لعرض السؤال في فدني اضغط هنا