انا طاب اولي ثانوي بحب او معجب بأخت صاحبي لانها محترمه جدا وفي شعور كده كل ما اشوفها احس ان مفيش غيرها بيتكلم بس صاحبي دا مقرب جدا ليا وهو قريبي كمان بس انا مش عارف اعمل ايه انا خايف اقول ليها او ليه وخايف تروح مني اعمل ايه 🙂
تروح منك؟ وأنت لسة في أولى ثانوي؟! طيب هي هتروح فين بالضبط يعني .. هل خايف أن حد يتقدم لها في السن دة - وإن كان يبدو احتمال مستحيل ولا حاسس أن حد ممكن (يشقطها) ودة لو حصل فدة يعني أنها غير محترمة وليس محترمة زي ما أنت بتقول - حتى لو كان الحد دة هو أنت! الشعور بالإعجاب ممكن يكون شعور طبيعي بس اللي مش طبيعي أنك تحاول تطوره لقصة حب وهمية وأنت شايف أن دة مش وقته أبدا أو أنك تفترض من الفراغ أنها تبادلك نفس الشعور .. نصيحة ركز في دراستك وهتلاقي نفسك مع الأيام انشغلت بحاجات أنسب لسنك و خلي الحب لما تكون قادر على الزواج علشان ما تتعبش
تم النشر الخميس، ١٩ يناير ٢٠٢٣
متقولش اى حاجة....خليك راجل وخلى اعجابك فى قلبك ولو هى نصيبك كل الامور هتتيسر انها تكون ليك باذن الله
تم النشر الجمعة، ٢٠ يناير ٢٠٢٣
يا راجل حرام عليك ؟ أولى ثانوي وخايف تروح منك .. يعني هتروح منك فين وهي ممكن اساسا تبقى أصغر منك؟ هل انت بتحبها فعلا ولا لا؟ فالاجابة هي لأ مش بتحبها طيب أنا ليه بحس ان هي ديه .. اول ما بشوفها وان لا مفيش غيرها وأنها محترمة جدا. هل يعقل ان الواحد بيحب حد علشان والله اصله محترم، والله اصل هو في حاجة كده مش عارف اوصفها لما اشوفها. هقولك انا ايه الحاجه ديه؟ ديه كيميا .. شعور بالانجذاب يعني ايه برده .. مش ممكن لما تشوف حد لأول مرة كده تقول ياه انا حاسس اني اعرفه من زمن .. ده فيه كيميا رهيبة كده واخد عليه وحابب القعدة معاه. بس كده ولا اكتر ولا اقل انت فقط معجب ومنجذب الحب والجواز والحاجات ديه حاجة واللي بتمر بيه حاجة تانية خالص. علان نكون واضحين اكتر برده ... انا مكنتش بقلل منك اطلاقا طبعا في الاول بانك لسه صغير .. لكن انت فعلا المرحلة اللي انت فيها طبيعية جدا انك تبدأ تتشد للجنس الاخر، بل ان فيه مراحل اقل برده ممكن تبدأ برده بمرحلة الانجذاب برده في سن اصغر. لكن ده طبيعي جدا ولكن السؤال هل ده حقيقي؟ او بمعنى اصح ينفع الواحد يكون في علاقة جادة او حقيقية ؟ لأ شعورك طبيعي .. بس لازم تعرف انه مش حب .. فقط اعجاب وانجاذب طبيعي انك تنجذب وتعجب عادي جدا. لكن اللي محتاجينه دلوقت نعرفه .. انه مش حب .. وان الحب حاجة تانية خالص .. وانه مش وقته الدخول في علاقات من اي نوع حاليا. ليه هضيع وقتك، ثانيا دينيا مش هينفع، ثالثا مش وقتها. اتمنى تكون اجاباتي مفيدة ليك
تم النشر الخميس، ١٩ يناير ٢٠٢٣
بص بصراحة انا عارفه انك ممكن مش تقتنع بالكلام اللي هيتقالك لأنك مش عاوز حاجه تخرجك من الوهم اللي انت فيه - اه زي ما شوفت وهم - وهم جميل بتعيش وانت في سن المراهقة ومع الوقت ولما تكبر شوية هتقول ياااااه انا قد اي كنت ساذج أو هو انا كنت بفكر كده ازاي وانا بقولك الكلام ده عن تجربة لأني مريت بتجربة مشابهة وخسرت فيها ثقة اعز الناس عليا اصل انت لسه صغير هتمر بحاجات كتير وهتبدأ كل ما تكبر وتفتكر حاجه انت عملت بسبب الوهم اللي في دماغك دلوقتي وشايفه احساس جميل ولو زي ما انت بتقول ان البنت محترمه جدا فده معناه انها مستحيل توافق ترتبط بيك او بحد غيرك ولو قولتلها انك معجب بيها اول حاجه هتعملها هتروح تقول لاخوها اللي هو صاحبك واكيد صاحبك هيدايق وهيلومك انك خونت الامانه لأنه دخلك بيته وآمنك على اهل بيته تقوم تحب اخته واعتقد انك ممكن تخسره للأبد فيبقى خسرت البت اللي بتحبها زي ما بتقول - مع اني متاكده ان بعد فترة هتغير رأيك و متاكده ان حكاية الحب او الإعجاب ده هيروح مع الوقت - وخسرت اعز اصحابك بسبب وهم فترة وهيروح
تم النشر الخميس، ١٩ يناير ٢٠٢٣
لسه قدامك المشوار طويل ، اظن ان أنت في الاغلب هتخسر صديقك وهتسبب مشاكل لنفسك ف متاخدش الخطوة دي مشاعرك لسه عفويه وصدقني لما تدخل الجامعه وتشوف غيرها مشاعرك هتتغير نحيتها ف متخسرش صاحبك
تم النشر الخميس، ٩ مارس ٢٠٢٣
كلم اخوهاا ولو تقدر تربط ع قلبك وبصرك يكون احسن واستودعهاا عند ربك اماانه وربناا عمره ميضيع ودائعه
تم النشر الأحد، ٢٢ يناير ٢٠٢٣
اعمل اختبار التفرقه اللي هو تفرق ده حب ول إعجاب حاول تبعد عنها من غير ما تشوهات لمده تلات شهور لو لسه الشعور زي ما هو يبقي حب و حاول تشارك ده مع اهلك لو غير كدا يبقي ده مجرد إعجاب و هينتهي بالوقت
تم النشر الأحد، ٢٢ يناير ٢٠٢٣
شكراً
تم النشر الجمعة، ٢٠ يناير ٢٠٢٣
م هقولك انها مشاعر مراهقه لانها بتبقى اكتر مشاعر بريئه بس استنى لبعد 3 ثانوى و كلم اخوها متكلمش البنت ابدا و لما تتكلم مع اخوها قوله انا عايز اتقدم لاختك
تم النشر الجمعة، ٢٠ يناير ٢٠٢٣
لعرض السؤال في فدني اضغط هنا