كان في شخص ناشر صوره لعجله علي موقع الفيس بوك دخلتله خاص واتفقنا علي السعر بعتلي رقم موبيل عشان احول عليه مبلغ فودافون كاش ١٢٠٠جنيه حولتله المبلغ علي الرقم ولزياده الثقه خلاني اتواصل مع رقم أحد الأشخاص علي أساس أنه السواق الي هيبعت معاه العجله واتضح أنهم متفقين مع بعض وبعتلي علي الخاص نمرة عربيه وهميه وضحك عليا واخد المبلغ وانا ما استلمتش العجله ايه الحل
الي حكيته دا بيشكل جريمة نصب، الحل القانوني تعمل محضر نصب، تقدر تعمله بنفسك او تستعين بمحامي.
تم النشر السبت، ٢٤ فبراير ٢٠٢٤
بلغ عنه واعمل محضر نصب وممكن يجيبوه من حساب الفيس بتااعه
تم النشر الأحد، ٢٥ فبراير ٢٠٢٤
الحل إنك تقدم بلاغ في مباحث الإنترنت طبعا يإما عن طريق موقع وزارة الداخلية أو تتصل بالخط الساخن لمباحث الإنترنت أو تروح بنفسك لأقرب قسم شرطه فيه مباحث إنترنت لو روحت بنفسك هتدخل للظابط تحكيله اللي حصل وهيخليك تفتح الحساب بتاعك ع الكومبيوتر بتاعه ويشوف كلامه معاك وهياخد لينك الحساب اللي كلمك منه و رقم الموبايل اللي اتواصل معاك منه وبس كدا وهتمضي على المحضر وحقك هيجيلك وبزيادة.. لو عايز تقدم من الموقع هتدخل على موقع وزارة الداخلية المصرية اختار "خدمات إلكترونية". واختار "تقديم بلاغات". واختار "بلاغات جرائم الإنترنت". املى نموذج البلاغ ( إشرح اللي حصل كله وحط لينك حسابه اللي كلمك منه والرقم اللي كلمك منه ). هتلاقي مكان ترفق فيه مستندات ( هترفع إسكرين شوت من كلامكم سوا واسكرين من المكالمه يكون ظاهر فيها الرقم ومده المكالمه واسكرين من حسابه وبطاقة الرقم القومي.) وتدوس إرسال البلاغ. ونفس الكلام ممكن تعمله من تطبيق أمن مصر هتعمل فيه حساب جديد وتختار خدمات وتختار بلاغات و تختار بلاغات جرائم الإنترنت وتملى نموذج البلاغ و ترفع المستندات وترسله ملاحظه مهمه هتاخد رقم المحضر او البلاغ بتاعك عشان تقدر تتابعه من الموقع او الابلكيشن او مكالمه
تم النشر الأحد، ٢٥ فبراير ٢٠٢٤
لعرض السؤال في فدني اضغط هنا