عندي سؤال جدي شوية ومن واقع كلنا بنشوفه كل عام اننا بيطلع لنا طلاب جايبين مجاميع في الارض في الثانوية او طلاب راسبين اصلا ومنهم اللي ممكن للاسف يعيد السنة كذا مرة الثانوي مبقاش زي الاول وياحظه اللي بيعرف يخرج بمجموع عالي يضمنله مكان في كلية كويسة هل المجالات التانية بقت افضل زي مدارس التمريض التجارة والصنايع دول بقا افضل ونظام الثانوية بقا ظالم هل هما بيعملوا كده فعلا لتشغيل جامعتهم الخاصة اللي مش معترف بيها اصلا عند اصحاب العمل شاركوني آراءكم من واقع تجاربكم
بصي الثانوي حاليا باظ مبقاش تعليم بقي تجاره لو عايز تدخل ابنك اي دخله بس بالفلوس التعليم ف بلدنا دي محتاج كل حاجه فيه تتغير النظام نفسه يتلغي التابلت نظام بايظ وعن تجربه انا دفعه التابلت وكانت مهازل بتحصل والله اللي بيدخل بالسمعات والفون واللي بيتقي ربنا حرفيا بيتمسح بيه الأرض ف الزمن دا اعرف ناس ولا بتفهم ف اي شئ دخلت كليات واعرف ناس بجد ممتازين اقسم بالله متمرمطين في القطاع الخاص بالنسبه للقطاع الخاص برضو دا موضوع لوحده منصحش بيه وعن تجربه اما الدبلومات الفكره مش ف افضل الفكره انك هتاخدي ال ٣ سنين هتعملي اي ؟؟ الناس بتبص لطالب دبلوم ع انه فاشل وملهوش مستقبل هما بيفضلوا الثانوي علشان ليها مستقبل عن الدبلوم مش اكتر اما التمريض بفضله عن الثانوي والدبلوم عارفه لي لأنك بتخلصي بتلاقي وظيفه ف صيدليه مستشفي حكومي المهم بتشغلي التمريض شغال مش واقف اما الكليات بيخلص كليته بيتخرج قاعد مش عارف هيلاقي وظيفه ولا لا ف ظل بلد مفيهاش شغل اصلا غير بالوسطه
تم النشر الجمعة، ١٦ أغسطس ٢٠٢٤
بصي انا هطول معاكي بس هقول كلام كتير من واقع تجربتي وخصوصا اني دفعه 2022 تاني دفعه لنظام الاوبن بوك التاب ترويج للخاص اصلا النظام كله دلوقتي عشان يتيح فرص للمجالات الخاصه والجامعات الأهلية دي نقطه تاني حاجه عايزه اقولك على حته معترف بيها أو مش معترف بيها في الشغل فدي بتاعه ربنا محدش يقدر يضمنلك شغل سواء كنتي في القطاع الخاص أو العام خدي بالك من الحته دي انا هتكلم معاكي عن تجربتي بما إني في القطاع الخاص وأنا اطلاقا مبشكرش فيه ولا بنصح بيه وهقولك ليه انا زي اي حد في سنه مصيريه ومهمه زي دي بتكلم عن 3 ثانوي عملت كل اللي طالع بأيدي اعمله وبذلت اقصي ما عندي في المذاكرة عشان حلمي وأوصل لكليه حكوميه مش عايزه اطول المهم جبت 52% دا قدري ورضيت عشان ربنا يراضيني مش هقولك مزعلتش لا زعلت وجدا ولليوم يعلم ربنا بيكي على النتيجه المهم المجموع دا في ظل النظام دا ميدخلش حاجه غير خاص واكيد مش بعد كل دا هقعد كدا بعد الثانويه العامه منصحش ولا ادعم القطاع الخاص ل أسباب كتيره خليني اقولك الأول إن الثانوية دلوقتي ماشيه بالغش والتزوير في الكنترول خليني اعرفك إن الشاطر بيتمسح بيه الأرض والبليد بيلاقي كليه حكوميه ويدخلها عشان يعاير الشاطر اللي دخل خاص بجد حسبنا الله ونعم الوكيل من كل قلبي على دا نظام ودا حال وأنها ماشيه كدا حاجه قبل ما نسي في دفعتي دخلت نسبه كبيره طب 60% منهم رسبوا عشان داخلين بالسمعات والغش وغيره بعد كل دا لازالت الناس بتدخل الثانوي وهما صح مهما كان النظام هيدخلوا ومحدش هيستغني عنها اكيد لانها الوصول لكل حلم وكمان مستقبل هتقوليلي مستقبل ازاي بعد دا كله هقولك لعل تصادف احلامهم ربنا ميحرمش اي طالب بفرحته بنجاحه وحقه وتعبه وبالنسبالي الثانويه احسن من باقي المجالات ودا مش تقليل من باقي المجالات لا كل واحد وميوله واللي ربنا كاتبهوله بس بفضله بالنسبه للقطاع الخاص اولا الفلوس مشكله كبيره في ظل الاقتصاد الواقع خصوصا اني شايفه بيجبروا الأهالي كمان التعليم مش كويس شايفين حضرتك البنت الفاشله اللي مجبتش مجموع ف انتي بالنسبالهم كتله فلوس مصدر دخل ليس إلا ملهمش دعوه بقا مظلومه مش مظلومه شاطره ولا بليده خليني اتكلم على نظره الناس برضو دي مجبتش مجموع دي باليده ودي ودي ومش هتخلصي رغم اني ماليش دعوه بكلامهم وبحاول اطنش بس برضو بتدايقي آخر حاجه حابه اقولها الثانويه غداره وياما ظلمت ناس على حساب ناس والنظام دا تحديدا
تم النشر الخميس، ١٥ أغسطس ٢٠٢٤
السلام عليكم ورحمه الله وبركاته خليني اقول لك ان اللي بيحصل من بتوع الجامعات الخاصه هو استغلال لسه للافكار اللي مش عايزه تتغير في المجتمع بتاعنا وهي انه احنا بنحكم على البني ادمين من الكليات اللي هما دخلوها في حين الواقع بتاعنا بيقول انه الشخص مش بالجامعه اللي هو دخلها ومش بالشهاده الجامعيه اللي هو اخذها قد ما هو عمل ايه باي معلومات هو تعلمها ايا كانت المعلومات دي هو جابها منين هو جاب المعلومات دي لما كان في الكليه هو جاب المعلومات دي لما اشترك في انشطه في الكليه هو جاب المعلومات دي لما عمل اعمال تطوعيه بره الكليه اصلا حتى في مرحلته الجمعيه او غيرها هو قبل المعلومات دي من القراءه الذاتيه بتاعته هو جاب المعلومات دي من ك.
تم النشر الخميس، ١٥ أغسطس ٢٠٢٤
أنا طالبه لسه مخلصه ثانويه ٢٠٢٤ وبالنسبه للي حصل السنه دي كان كتير اووي علي الطلبه وأولياء الأمور بس خلينا نروح لفكره ان القرارات الجديده الخاص بالطب والتعليم بالنسبه للمدرسين مبقاش في تعيين بس بالنسبه لمجالات اخري مطلوبه خاليا في سوق العمل زي البرمجه او زي ما حضرتك ذكرت كليه التجاره وكليات زي اداب فيها عده أقسام وكذلك الإعلام واخري من الكليات اللي كنا بنشوفها زمان انها ملهاش قيمه وإن الطب بس كان كليات قمه بس حاليا بالنسبه لي ومن رأي الشخصي في اي كليه اي كانت فهي شئ مشرف لصاحبه والللي بيميز الشخص نفسه مش الكليه يعني اللي يدخل كليه غيره شايفها قليله بقدراتها ومهاراته بيميز نفسه فيها ويصنع لنفسه كيان خاص بيه وحاجه اخيره حابه اقولها ودي بجد انا مؤمنه بيها اووي ان مفيش كليه اسمها قمه وقاع في الأول والآخر كلها تحت مسمي كليه وكلها ليها مجاميع بس كفايه انها بتراعي كل الطلبه بالسنبه للمجموع بتمني اكون قدرت اوضح الفكره ودا من وجهه نظري وشكرا ♥️
تم النشر الجمعة، ١٦ أغسطس ٢٠٢٤
بصراحة أرى المشكلة في التقسيم الظالم لمخرجات الثانوية العامة، يوجد آفة اسمها كلية قمة وكليات أخرى. بالله عليك طالما رسخ في أذهان الناس أن ثمة ست كليات هي فقط القمة وباقي الكليات دون ذلك، ألن يكون من المنطقي أن يتناحر الجميع على نيل هذه القمة؟ فلا أحد يقبل البقاء في القاع. دائمًا ما أضرب هذا المثال: طالب ثانوية حقق نتيجة 10000% ونال شرف الالتحاق بكلية قمة مثل الطب، أو الهندسة. تخرج بعد جهد جهيد باحثًا عن عمل في شركة ما أو مستشفى ما بعائد لا يعلم مدى ضعفه إلا الله، ثم ينحت في الصخر محاولًا بناء مستقبل من الصفر تقريبًا. طالب آخر في كلية غير كليات القمة، وجد لنفسه متسعًا لأخذ دورات تدريبية وتعلم مهارات عديدة أهلته ربما للعمل في مجال من مجالات العمل الحر، فصار لديه مصدر ربح جانبي، ربما بإدارة جيدة لهذا المال يتخرج وهو لديه ما يكفيه لبناء مشروعه الخاص أو السفر لفرصة عمل أفضل. الآن هل من المنطق في ظل هذا المثال أن نبقى نستخدم مصطلحات قمة وغير قمة!
تم النشر الأربعاء، ١٤ أغسطس ٢٠٢٤
والله يا حبيبي، الموضوع ده صار حديث الكل بجد. الثانوية العامة بقت بمثابة قلق لكل الأسر، والضغوط زادت بشكل رهيب. ففعلاً، في ناس بتجيب درجات مش تمام، وفي كمان راسبين، وده بيأثر على كل جوانب حياتهم. بالنسبة للمجالات التانية زي مدارس التمريض والتجارة والصنايع، ممكن تكون فعلاً أفضل من الثانوية العامة في بعض الأحيان. في مجالات دلوقتي تضمنلك شغل بسرعة، وأحياناً يكون فيها فرص أفضل من الكلية. وكمان في حاجات كتير غير التعليم الأكاديمي بتفتح لك أبواب لو اتعلمتيها كويس، زي المهارات الحرفية. وفيه كلام كتير عن موضوع الجامعات الخاصة، وإنها بتعمل مشكلات في سوق العمل. أصحاب العمل طبعاً غالباً بيفضلوا الشهادات المعترف بيها، لكن فيها كمان جامعات خاصة بدأت تحسن من سمعتها. بالتأكيد التعليم الثانوي ليه دور مهم، لكن في النهاية، اللي هيفيدك هو المهارات والخبرة اللي تكتسبيها. حاولي تركز على اللي تحبيه وتعملي شغفك. وابقى خدي خطوة بخطوة.
تم النشر الثلاثاء، ١٣ أغسطس ٢٠٢٤
انتي لو حبي هندسه مثلا الافضل ليكي الثانوي الصناعي و مش موحش يعني و لو حبي في مجال التكنولوجيا اتخول ثانوي تجاري و الزراعة لو مجموعك كبير في تالت اعدادي هتدخل معمل و كمان ممكن كليه تربيه يعني مدرسه انا برضو في تالت اعدادي و مش عارفه ادخل اي هي فعلا حاجه محيره ربنا معاك ويوفقك 🤍✨
تم النشر الأربعاء، ١٤ أغسطس ٢٠٢٤
الظلم لو علي الكل قمه العدل اما يبقي الظلم علي ناس ناس ده قهر مش ظلم والله بصراحه احسن من الثانوي ميت مره النظام الازهري وفي الاخر ان الله لا يضيع اجر من احسن عملا
تم النشر الجمعة، ١٦ أغسطس ٢٠٢٤
معظم الناس من بداية كورونا ما بيذكروش وماخدوش السنتين جد الى قبل تلته ثانوى وهى سنه تراكميه مبنيه على كل سنوات التعليم الى فاتت وبالأخص أولى وتانيه ثانوى وكمان الىّ فهم النظام من الأول صح كان هيمشى فيه كويس على مدار التلت سنين أعتقد ده جزء من تفسير ظاهرة المجاميع المنخفضه
تم النشر الأربعاء، ١٤ أغسطس ٢٠٢٤
لعرض السؤال في فدني اضغط هنا