بحس ان ادراكي للي بيحصل بيجي متاخر
ومبعرفش أن الموقف أو الصدمه دي تعباني ووجعاني غير لما بشوف أثرها علي جسمي
من خمس سنين حصل حاجه معايا صدمتني انا اتعاملت عادي كان مفيش حاجه حصلت تاني يوم لقيت شعري ابيض بس مش كله
تاني حاجه حصلت معايا وصعبة عليا اوي انا معرفتش اعيط ولا اصرخ ولا اي حاجه بس بعدها لقيت نفسي ضعيفه اوي بعيط كل شويه كأني بطلع كل اللي مقدرتش اعيط عليه
من قريب اول مرة احكي لحد موقف حصلي وانا طفله أن حد اتحرش بيا وحد من أهلي كان شايف ومعملش اي رد فعل لا بالعكس لام عليا والموقف دا انا مش قادرة استوعبه لحد دلوقتي لما حكيته قعدت اعيط اوي بحرقه وصداع صعب اووووي ف راسي مش راضي يروح طول الليل
دلوقتي انا خدت صدمه تانيه بس شديده المرادي ومش قادرة استوعبها بردو ولا ازعل ولا اعيط بس جسمي تعبان الدنيا بتلف بيا وانا قاعده ولما اجي اقوم من مكاني الدنيا بتلف بيا بردو ووجع ف جسمي
اعمل اي عشان موصلش نفسي للتعب دا
اطلع اللي جوايا ازاي معنديش حد اثق فيه واحكيله ازاي مكتمش جوايا بالله حد يقولي اعمل اي
السلام عليكم ورحمه الله وبركاته. اللي بيحصل معاكي ده بيكون له كذا سبب اول سبب بيكون تقليل من قدراتك الشخصيه قصاد نفسك في انك تقدري تواجهي او انك تقدري تعبري بالشكل اللي انت فعلا حساه من جواك. او لانك تقدري تتقبلي اللوم لو في حد حاول يوقع عليك انت الغلط فلذلك بتكتفي بالسكوت. ده بيتعمل بشكل تلقائي منك من جواك بانه خلاص تمام انا هسكت افضل ليه لاني ما عنديش استعداد اتعامل مع اللي بعد الكلام. علشان كده بتسكتي لكن طبعا الكلام لسه بيتقال جوه الكلام لسه شغال جوه ما بيروحش في حته فبيحتاج ان هو يطلع فلما يحتاج يطلع هيطلع من اي شكل من الاشكال في الجسم زي الحاجات اللي انت وصفتيها زي الموقف اللي انت وصفتيه انك كان الموقف يستدعي عياط شديد جدا لكن انت عشان ما طلعتيش العياط الشديد ده العياط ده بقى بيطلع في اي حاجه اي موقف بيعدي عليكي بتعيطي فيه وانت مش فاهمه هو العياط ده ليه هو العياط ده هو العياط اللي كان واجب يطلع في وقت ثاني فاحنا هنا محتاجين نعمل ايه محتاجين نسيطر على الحاله دي ازاي محتاجين نتكلم نتكلم وحتى لو احنا ما عندناش قدره ان احنا نتعامل مع اللي بعد الكلام نتكلم ومش مهم ايه يحصل ليه مش مهم ايه يحصل لانه اي حاجه هتحصل اكيد مش هتكون اسوا من ان انا اتاذي اتاذي بجسمي اتاذي في نفسيتي. لما بتتعبي كده لما بتبقي مش قادره تقومي لما بيحصل لك اي عرض جسماني. فين هنا الاستفاده طب لو شويه كلام اتقال او لو عبرتي عن اللي عندك هنفترض ان في حد جاي يلومك على اللي انت بتقوليه او بيقول لك انت ازاي تقولي كده او ازاي تعبري كده عن زعلك. الكلام ده لا يساوي اي حاجه في ان انا جسمي يتعب لان انا اللي اتاثر ولا اخد كمان في الموضوع ايام عقبال ما اخرج كل اللي جوايا ولكن طبعا لما بيخرج غصب عني بيخرج من منافذ هي مش المنافذ الحقيقيه بتاعته. اتكلمي حتى لو هتفتحي فويس نوت وتقولي كل اللي عندك اتكلمي حتى لو هتجيبي ورقه وقلم وتكتبي كل اللي عندك اتكلمي حتى لو هتتصلي بحد هو مش موجود هنا جنبك وبعيد جدا وقولي كل اللي عندك باي طريقه اتكلمي قولي اللي عندك. دي اهم حاجه بعد الموقف. ومش بعد ما يعدي عليه كثير وحقك انك تعيطي حقك انك لو في موقف محتاجه تصرخي فيه تصرخي ده كله حقك ما تشوفيش ابدا ان ده مش حقك وحتى لو عدى عليك ان في حد وضح لك انه لا اصل ما ينفعش انك تعملي كده وما يصحش انسي الكلام ده خالص.
تم النشر الأربعاء، ٢٦ فبراير ٢٠٢٥
بجد ربنا يعينك على الصدمات دي، تقدري مثلا انك تكتبي الي جواكي ده اي حاجة حتى لو كلام مش مفهوم بس اكتبيه على ورق وقطعيه او احرقيه وبردو ممكن تسجلي ريكورد واتساب لنفسك تحكي فيه او ممكن تروحي لدكتور بغرض انك تحكي الي جواكي وتفضي قلبك، وبجد بلاش تحكي لحد يعرفك انتي هتنسي حكيتي ايه وهو هيفضل فاكرلك ده، ممكن تواجهي الصدمات دي كمان يعني حاولي تتقبلي ان خلاص دي حاجة حصلت مش هقدر اغير حاجة ولازم اعديها لان كده ممكن يحصلك امراض كتير متكتميش في نفسك وسجلي ريكوردات كانك بتحكي لحد وطلعي كل الي جواكي وكمان وانتي بتحكي بعد ما تخلصي حاولي تدي لنفسك حلول كان الي بتحكيلك دي صاحبتك وعيزاكي تنصحيها جايز الموضوع ده يمشي لو معرفتيش شوفي دكتورة كويسة عشان تاخدي رأيها، وبجد والله كان نفسي اقدملك حاجة تساعدك ولكن انا معرفش اوي، وربنا يعينك وتقدري تتغلبي على الصدمات دي
تم النشر الأربعاء، ٢٦ فبراير ٢٠٢٥
عزيزتي، أولاً، أود أن أعبر لك عن تعاطفي العميق مع ما تمرين به. قد تكون المشاعر والصدمات التي تعرضت لها مؤلمة للغاية، ومن الطبيعي أن تشعري بالارتباك والضغط النفسي في مثل هذه المواقف. إن تجربة الصدمات العاطفية يمكن أن تؤثر بشكل كبير على صحتك النفسية والجسدية، وهذا ما تشعرين به من آثار ملازمة لجسدك. من المهم أن تعرفي أن التعبير عن المشاعر ليس دائمًا سهلًا، وقد تحتاجين إلى بعض الوقت لتفهمي ما يمر بك. إليك بعض النصائح التي قد تساعدك في التعامل مع مشاعرك: تدوين المشاعر : حاولي كتابة ما تشعرين به في دفتر. قد يكون ذلك بمثابة منفذ لتفريغ مشاعرك دون الحاجة إلى التحدث مع أحد. البحث عن الدعم : إذا لم يكن لديك شخص يمكنك الوثوق به، يمكنك التفكير في الانضمام إلى حلقات دعم أو الاستعانة بأخصائي نفسي. هؤلاء المحترفون مدربون على مساعدتك في استيعاب مشاعرك والتعامل معها بشكل صحي. تحديد وقت للتفكير : خصصي وقتًا يوميًا للتفكير في مشاعرك، سواء بالكتابة أو التأمل. هذا يمكن أن يساعدك على معالجة ما يجري داخلك. استكشاف الهوايات : حاولي الانخراط في أنشطة تحبينها، مثل القراءة أو الرسم. هذه الأنشطة يمكن أن تكون وسيلة للتعبير عن نفسك وتخفيف التوتر. التوازن في الحياة اليومية : تأكدي من العناية بنفسك جسديًا - تناولي طعامًا صحيًا، وامنحي نفسك قسطًا من الراحة. الصبر مع الذات : الكل يتعامل مع الألم بطرق مختلفة، لذا كوني صبورة مع نفسك ولا تلوميها على كيفية تعبيرها عن الألم. أعلم أن الأمر صعب، ولكنك لست وحدك، وهناك دعم متاح لك. تذكري أن طلب المساعدة هو علامة من القوة، وليس الضعف. احرصي على أن تكوني لطيفة مع نفسك خلال هذه الرحلة.
تم النشر الأربعاء، ٢٦ فبراير ٢٠٢٥
مفيش حد من اهلك قريب منك
تم النشر الثلاثاء، ٤ مارس ٢٠٢٥
لعرض السؤال في فدني اضغط هنا