ليه مش بنحاسب نفسنا علشان ما نجرحش حد ليه م بنفكر في غيرنا قبل ما نتكلم ؟!ا
لسلام عليكم
مش عارفه أبدأ منين او عايزه اقول بالمعنى ان انا مش مرتبه كلام علشان اقوله بس بفكر كتير اوي الفتره دي بفكر بليل كتير بس بصلي قيام الليل وبقرأ قرآن وبفضل قاعده لحد الفجر علشان اصلي وادخل انام بس حقيقي مش بعرف انام
المشكلة هنا إن التفكير محاوطني اوي بفكر في كلام اتقال عني مع ان دا محصلش قلت عادي مش مهم وهبعد فافتكرت آيه ف القرآن بتقول واهجرهم هجراً جميلا فحقيقي بعدت كدا كدا اصلا هما بعيد عني وكلامهم بالنسبه ليا ولا شاغلني ومش هيزعلني ف حاجه وافتكرت ان الكفار اتكلموا عن الرسول صلى الله عليه وسلم وقالوا انه شاعر ومجنون و اتكلموا عن ربنا وقالوا انه ليه زوجه وان ليه ولد بحاول دايما اصبر نفسي
وافتكر كدا يعني اتكلموا عن ربنا سبحانه وتعالى اللي هو أقوى من اي حد وإنه اللي بيلطف بينا ف بقول يعني مش هيتكلموا عننا احنا كبشر وقتها بحس ان بقيت هاديه شويه واخدت الموضوع هادي وببساطه عمري ما كنت من الناس اللي هي بتغير والله عمري دايما بتمنى الخير لغيري علشان الاقي اللي يتمنى الخير ليا بس بلاقي العكس
بس بجد ليه مش بيحاولوا انهم يبقوا كويسين ليه مش بيحاولوا انهم يتغيروا للآحسن دايما فاكرين ان كل اللي معاهم فلوس وعندهم عربيه وفيلا انهم مفيش حاجه بتبقا مزعلاهم مع اننا اكتر ناس حقيقي بتبقا متدمره نفسياً ليه فاكرين ان اي بلوجر او موديل حياتهم كويسه ليه مش بِيقَدروا اننا مطلوب ان احنا نطلع قدام الكاميرا دايما بنضحك ليه مش بيقولوا ان الفوتوز اللي بناخدهم وننزلهم أستوري واحنا كنا بنضحك فيهم اننا من وراهم وواجعين قلبنا اوي
هما كل اللي بيفكروا فيه ايه دا دي معاها فلوس وعندها عربيه وفيلا هتحتاج ايه من الدنيا ليه م بيقولوا اننا زينا زيهم بنزعل وبنفرح وبنوجع قلبنا اوي وبتدخل في تروما ليه بيبقوا كدا ليه بجد جوايا أسئلة كتير اوي
ولو فضلت اتكلم مش هخلص فيه ليييه كتير اوي بجد مش بيقولوا اننا وصلنا لكل اللي معانا دا بعد معافره وكنا ننكسر ونقوم نكمل من تاني حقيقي اكتر ناس بتبقا متدمره هما بتوع السوشيال بقا علشان بيبقا مطلوب مننا ان لازم نخلص الحاجه اللي قدامنا دي لازم نطلع بنضحك اوي ف وشهم ونقولهم ان الدنيا تحفه اوي ومفيش حاجه تستاهل ان نزعل علشانها
بس لأ فيه حاجات كتير اوي تستاهل اننا نعيط عليها مع انها مش هترجع بس بردو بنعيط مش علشان احنا مش راضيين باللي ربنا كتبه لينا لأ بالعكس بنبقا متيقنين جدا أن ربنا هيعوضنا خير عن أي حاجه وجعتنا بس بردو محتاجين ناخد وقت علشان نرجع للطبيعه بتاعتنا
التفكير الزايد وحش اوي بجد وبيتعب قلب الواحد بطريقه رخمه بس هنعمل ايه ما هي دي الدنيا ولازم كل دا يحصل علشان نتعلم
كان نفسي اوي الناس دي يبقوا بيقعدوا مع نفسهم بليل وبيقولوا ان هما غلطوا كتير اوي وان فيه حاجات كتير محتاجين انهم يصلحوها اكتر حاجه وجعتني اوي بجد وزعلتني وخليتني اندم مع ان عمري ما ندمت على حاجه بس ندمت لما اتعرفت على ناس مش شبهي مش عارفه ارجع لطبيعتي دايما كل أفكاري ليه حصل
بس دا كان خير الفتره اللي اتعرفت فيها على ناس مش شبهي وبعدت عنهم زعلت كتير اوي ودخلت في فتره كنت مش بخرج من اوضتي كنت اتمنى ابقا من الناس اللي هي مش بتعيط بسرعه دي ولا بيبقا فارق معاهم حاجه الدنيا دي مش عادله خالص
البنات كلها بتغير من بعضها تبقي مالكيش اي ريليشن بالبنت دي وتلاقيها بقا تقعد تشتم من غير سبب شعب فاضي اوي وبيحب يظهر نفسه على حساب غيره مش فاهمه ايه بيبقا الحاجه البيرفيكت في انها بنت وبتغير من بنت و انها بتشتم بنت علشان هي غيرانه منها مش هقول ان مفيش حد بيتكلم على التاني لأ احنا مش ملاك وكلنا بنغلط بس فيه مننا اللي بيبقا حريص اوي انه مايبقاش سبب في أذى حد
ليه هما بقا مش بيبقوا عندهم نفس الاوبشن دا ويفكروا في غيرهم والله الدنيا مش مستاهله اننا نعمل في بعض كدا بردو لسه فيه ناس في حياتي اتكلمت عني هما بردو من نفس الناس اللي كانت بتتكلم عني ف البدايه اصلا بس بقول مش مهم لو على الكلام فالكل بيتكلم اهم حاجه الأفعال والمواقف فسيباها على ربنا وعند الله تجتمع الخصوم
فلو انتوا كان فيه حد في حياتكوا وبيتكلم عليكوا من ضهركوا و قدامكوا بيبقا فل أوي وكأنهم مظلومين هتسيبوهم لسه في حياتكم ولا هتبعدوا؟!
مع العلم الناس دي ما اتعاملوش معايا غير شات وشافوا فوتوز ليا وخلاص ومش من نفس المكان اصلا بس بيتكلموا وانا مش شاغله بالي
السلام عليكم ورحمه الله وبركاته. تعرفي انه نفس الناس اللي انتي مستغربه قوي قوي انه هم ازاي بيعملوا كده لو عكسنا الصوره هتلاقي ان انت كمان ما تعرفيش غير الموقف اللي صدر منهم صادق ممكن حد من بعث لك رساله وقال لك فيها كلام ضايقك او حسسك ان هو حكم عليك حكم غلط ممكن الشخص ده يكون بعث لك الرساله دي في وقت انفعال ممكن تكون مش دي شخصيته ممكن يكون مش كل همه في الحياه ان هو قاعد متابعك ممكن يكون عنده هموم كثيره جدا يكون عنده ظروف صعبه جدا وللاسف لما شاف الصوره بتاعتك او لما شاف المحتوى اللي انت بتقدميه وطول الوقت ليه بتضحكي وباين بس في ان عندك كل حاجه حلوه طلع غضب وانفجاره من ظروفه من ازمته دي عليك انت خلي بالك انه كلنا بنعمل ده من غير ما ناخد بالنا لما بناخد رد فعل تجاه حد او لما بيصدر مننا فعلا تجاه حد على موقف واحد بس وخصوصا الناس اللي بيكونوا عابرين يعني زي ما انت بتقولي ما لناش علاقه بيهم اصلا ميعرفوناش مايعرفوش تفاصيل حياتنا احنا كمان ما نعرفش تفاصيل حياتهم انا كمان معرفش تفاصيل الشخص ده هو فعلا يعني مؤذي كده بيحب الاذى ولا هو شخص مضغوط وطلع منه ده. بشكل استثنائي عمل ده وهو فعلا مش حاسس عمل ده وهو ندمان من جواه ولا عمل ده وهو قاصده انا ما بعرفش ولا حد فينا عمره ما هيعرف ليه لانه دايما في جزء مخفي جوه كل بني ادم ما حدش بيعرفه تفاصيلنا ما بنعرفهاش هنا بقى انا هاجي معاكي للنقطه المهمه جدا جدا جدا واضح ان انت كل شغلك على السوشيال ميديا ودي واحده من الاثار السلبيه للسوشيال ميديا انك تبقي معرضه للحكم الخطا لانه زي ما انت قلتي مضطره انك طول الوقت تطلعي بوش واحد بس اذا كل الناس اللي بتشوفك غصب عنها مش شايفه غير ده لذلك بتتعامل معاكي على اساس اللي ظهر لها بس الناس دي كلها ناس عابره الناس دي اول حاجه لازم تحطيها لهم انهم يلتمسوا العذر مين قال ان الناس دي مش ممكن تكون بتقعد بعد كده بالليل وبتحاسب نفسها بس مش شرط لما يحاسبوا نفسهم كل الناس تلاقيهم رجعوا صلحوا غلط وممكن يكونوا قالوا لي الكلمه بايخه كتبوا لي الكومنت صحيح ده ضايقك فما بيرجعوش وبعد كده يقولوا لك سوري على الكومنت دا او ما تزعليش على الرساله دي او يرجعوا يمسحوها ليه لانه دي واحده من مساوئ السوشيال ميديا الناس بترمي الكلام وبترمي الكومنتات وبتنساها وبتروح تقع في حاجه ثانيه برده تحط عليها كومنت وتنساه وتسيبه علشان الزخم والسرعه بتاعه السوشيال ميديا الصوره بتاعتك المحتوى بتاعك الفيديو بتاعك او الاعلان بيعدي وسط حاجات كتير جدا ممكن انا معرفش ارجع له اصلا حتى لو طلعت عليك رد فعل سيء وقتها. انا عايزاكي علشان تخففي من اثر ده عليك انك بس تعرفي انه ده واحده من السلبيات بتاعه نوعيه شغلك فقط لا غير وانه مش بالضروره يكون كل الناس دي مؤذيه التمسي العذر في بس انه ده من طبيعه الشغل اللي انت بتشتغليه والكلام ده للناس العابرة الناس القريبة الموضوع عندهم حاجة تانية خالص.
تم النشر الأحد، ٩ فبراير ٢٠٢٥
عليكم السلام ورحمة الله وبركاته، أولاً، أود أن أعبر عن تقديري لصدق مشاعرك وعمق تفكيرك في هذه الأمور. من الواضح أنك تمرين بوقت تحدي، وهذا أمر طبيعي في الحياة، وخاصة عندما نشعر بأن الآخرين يتحدثون عنا أو يحكمون علينا. إدراكك للأفكار السلبية ومحاولة التباعد عنها هو خطوة إيجابية. كما أن استحضارك للآيات القرآنية وتأملها يعكس قوة إيمانك ويعطيك دافعاً لمواجهة هذه الظروف. تذكري دائماً أن الاختلاف في الأفعال والأفكار بين الأشخاص هو جزء من طبيعة الحياة، ومن الأفضل أن نركز على تحسين أنفسنا بدلاً من الانشغال بآراء الآخرين. عندما تواجهين أشخاصاً يتحدثون بالسلب عنك، يمكن أن يكون من المفيد حصر تركيزك على أصدقائك الحقيقيين وأفراد عائلتك الذين يدعمونك ويظهرون لك الاحترام والتقدير. أما بالنسبة لتجاربك مع الآخرين، فلا تجعليها تؤثر على ثقتك بنفسك. كل شخص يمر بظروف صعبة، وعلينا أن نتذكر أن الحياة ليست سطحية كما تظهر على وسائل التواصل الاجتماعي. أما عن استفسارك فيما يتعلق بالناس الذين يؤذون مشاعر الآخرين، فهذا السلوك يعكس عدم نضج أو عدم وعي بهم، وليس له علاقة بقيمتك أو بما تستحقينه. لذلك، إذا شعرت بأن هؤلاء الأشخاص لا يضيفون قيمة لحياتك، فمن المفيد اتخاذ قرار بتركهم والابتعاد عنهم. واختم دائمة بالصلاة والاستغفار، فالصبر والاحتساب عند الله لهما عظيم الأجر. ولا تترددي في طلب المساعدة من الأهل أو الأصدقاء إذا شعرت بأن تلك الأفكار تؤثر على حالتك النفسية بشكل كبير. ابحثي عن الأنشطة التي تبهجك وتعيد لك طاقتك الإيجابية. دمتي بخير.
تم النشر السبت، ٨ فبراير ٢٠٢٥
ربنا يصلح حالهم وحالنا ويهديهم ويهدينا يارب العالمين ڪل واحد هيمشي وهياخد عملو الصالح معاا فكر في اخرتك وفكك منهم كلو هيحاسب 🥹👌🏻
تم النشر الثلاثاء، ١١ فبراير ٢٠٢٥
كلنا بنتعرض للأمور دي وانا بتعرض التنمر كتير مع اني مسالم جدا وفي حالي بس اكتر حاجه بتريحني لما اسمع كلام ربنا( ولقد نعلم أنك يضيق صدرك بما يقولون فسبح بحمد ربك وكن من الساجدين) بحس باطمئنان ومبيكنش فارق معايا كلام حظ وبحس بثقه بسبب كلام ربنا أنه شايفني وحاسس بيه ده اختبار لربنا لينا علي صبرنا اهم شيء تستقيم في كل أمور حياتنا والكلام السيء غيبه ونميمه كله في ميزانهم
تم النشر السبت، ٨ فبراير ٢٠٢٥
لعرض السؤال في فدني اضغط هنا