السلام عليكم،
أنا عايزه أتكلم مع حد، عشان نفسيتي تعبتني، وڪل حاجه وجعاني حاسه الدنيا جايه عليا اوي، حاسه ربنا مش بيحبني، دعيته امبارح بيقين اوي، وانا متعوده اما بدعيه بيقين بيسمعني، لكن امبارح مسمعنيش.
انا تعبانه والله بجد، بحاول أتفاءك وابتسم بس انا خلاص معدش عندي اي طاقة خالص،
انا 16 سنه عندي بابا عنيف جدا، بس انا بحكم فطرتي معرفش شويه احن ليه عشان هو بابا وشويه ابقي مش طايقه اشوفه، والتانيه بتغلب ع الاولي، بحاول افتكر اي حاجه حلوه ليا معاه عشان مكرهوش اكتر من كده.
بيشتم كتير وبينتقدني علي الصغيره والكبيره، هو كده مع البيت كله، بس تقريبا مفيش حد بيحس بالمشاعر دي غيري، انا ف ٣ث، هو انا بس مش باخد منه غير انا عايزك دكتوره عشان اشوف اسمي ع لافته.
انا فعلا عايزه كده وعايزه افرحه، بس انا مخنوقه منه، ومن اخواتي ومن الدنيا كلها، انا اكبر اخواتي، عندي اخين كمان واحد اصغر مني بسنه عنده ١٥ سنه والتاني لسه ف ٢ابتدائي، واخت ف الحضانه، بس اللي عنده ١٥ سنه ده مش محترم، وبيزهقني جدا، وجوده كده من غير اى حاجه بيزهقني، بحاول اكون كويسه وان مخليش نفسي الاماره تغلبني بس الموضوع متعب جدا.
وغير كده انا عندي جدتي بيتها تحت كده بتخاف تنام لوحدها، فانا واخويا ده وبنت عمنا بنام معاها بالدور كده، انا واخويا شهر، وبنت عمنا دي شهر، الكلام ده بقالو كده يجي ٦ سنين تقريبا، هو اللي انا فكراه اننا بنبات معاها من زمان اوي من ساعة ما كنت ف ابتدائى، انا كنت بتخنق لأني مش بعرف انام في مكان غير سريري حتي لو سرير مين كده مش بعرف، وكمان انا متعوده انام لوحدي، حتي مبعرفش انام مع ماما او اي حد لازم انام لوحدي.
المهم اني اتعودت انام هناك بقا، شهر عندها وشهر ف بيتنا كأني شغاله بالأجره، بس المشڪله ان السرير بتاعها ناشف جدا وفيه حته طالعه وحته نازله، وبفضل طول الليل صاحيه مش بعرف انام، بس حاولت اتأقلم مع الوضع اهو شهر ويعدي، لحد ما جيت بقا ف الشهر بتاعنا اللي فات كان الدور عليا في المبيت، نمت وصحيت الصبح، جدتي قالتلي تعالي افطري معايا، قولت تمام ورحت افطر، هي دخلت تجيب الفطار، وانا قاعده لقيت فار بيجري قدامي، انا اترعبت، لأني بخاف جدا من الحاجات دي، الفران والصراصير والحاجات المقرفه دي وتقريبا عندي فوبيا منها، قلت لجدتي، قالتلي عادي، رحت سايباها وطلعت جري ع بيتنا، قلت لماما قالتلي لما يجي باباكي قوليله، لما جيه قولتله قالي دي الفران دي عشرة جدتك،
(يعني انا دلوقتي اعمل اي، يعني مش ببات ف سريري ومش بنام طول الليل قولت ماشي لكن كمان فران وانا وانا مرعوبه لأ)، قلت له انزل نضف لها البيت وانا هساعدك، قالي ماشي كأنه بيريحني يعني ومنزلش، أخويا نزل بات يومه، وجا الدور عليا تاني، بابا بيقولي ياللا عشان تباتي، قلت له مش بايته، انا مش هبات طول ما الفيران دي موجوده، قالي هتنزلي تباتي والا هضربك، "والضرب ده من زمان واحنا كده تقريبا من ساعة ما وعيت ع الدنيا وهو بيضرب فيا ومش انا لوحدي اخواتي برضو، وماما قبل م تجبني"
المهم قولتله اعمل اللي انت عايزه،انا مش نازله لو هموت، ماما قعدت تسكت فيا وتقولي نومه وتعدي وانا عماله اقول مش نازله، راح جاب عصاية المكنسه وكسرها عليا ضرب، وماما كانت بتدافع عني، وانا عماله اكتم دموعي بالعافيه عشان مبنش خايفه وضعيفه مع ان جسمي كان بيرتعش وحسيت بشفايفي كانت بترتعش، وبرضو عماله اقوله، حتي لو وديتني المستشفي مش نازله، ماما قعدت تقوله خلاص وهو مشي، انا دخلت الحمام وقعدت اعيط بصوت مكتوم وطلعت، شويه واخويا جيه بيقول فيه اي، ماما قالتله ينزل يبات مكاني، انا قعدت بقا مقدرتش، صعبت عليا نفسي اوي، ان ازاى انا كده ولسه بنضرب اشمعنا انا يارب، وابتديت عياط وانا جسمي بيرتعش ورجعت كتير.
اخويا قالي خلاص هبات مكانك، رغم ان احنا دايما بنتخانق، وقعدت ساعه يعدها اعيط وماما تهديني، احنا قاعدين ف شقتين فوق بعض، انا نزلت جبت حاجتي وطلعت عند ماما نمت عندها، مكان اخويا، عدي الشهر وانا مش بكلم بابا وهو بيعاملني زفت وانا معدش فارق معايا، جيه الشهر اللي بعده اللي هو دور بنت عمنا، وعدي شهرها هي كمان، كنت انا واخويا رجعنا نتعارك تاني، وبابا رجع يكلمني، واستغفر الله العظيم عليا وعلي غبائي وعواطفي اللي بتخليني اسامح رغم اللي بيعمله فيا، جيه بقا شهرنا احنا اللى هو الشهر ده شهر ١٠،وكان اول يوم مبيات امبارح، دخلت انام بدري الساعه ١٠ كده عشان عندي دروس الصبح اللي هو النهاردة، علي اساس ان اخويا هو اللي هيبدأ الشهر يبات، ونمت، وانا اصلا مستودعه ربنا اني مباتش خالص، لأني استودعته الشهر اللي فات ومبتش، المهم ع الساعه ١٢ ونص لقيت اخويا جاي يصحيني بيقولي ياللا عشان تباتي قولتله انا مش بايته انت اللي تبدأ الشهر، سابني وطلع فوق، لقيت بابا جالي، بيقولي انتي اللي هتباتي قولتله هو اللى بدأ مش انا، قالي انا بقولك انتي اللي هتبدأي، قعدت اتخانق معاه شويه، وبعدين طلعت لماما قولتلها، هو جاي يصحيني من النوم الساعه ١٢ عشان اروح انام، هو مش عارف ينزل الزفت اخويا، قالتلي معلش، دادياللي انا خدته، رحت سايباهم، ورحت نايمه عند جدتي، فضلت لحد الساعه ٣ الصبح بعيط وقلبي بيوجعني وبكلم نفسي واقول كده يارب دا انا وثقت فيك ودعيتك، حتي انت يارب وعماله ول الليل افكر ف طريقه للانتحار،وشويه اقول لنفسي هتخسري اخرتك عشان اي ، ومعرفتش انام، عايزه ادخل الحمام خايفه اقوم الا اشوف الفران او الصراصير، قمت الصبح اللي هو انهارده، الساعه ٨ الصبح وانا مصدعه وجسمي متكسر، ومش قادره، طلعت بيتنا، كان اللي اسمه بابا راح الشغل، دخلت اوضتي من سكات وقفلت ع نفسي، رحت اغسل وشي ببص ف المرايه لقيتي عيني منفوخه بطريقه بشعه، انا مكنتش شايفه عنيا، اصلا انا نظري ضعيف ولابسه نضاره، عندي درس الساعه ١١ مرحتش، وعنديدرس الساعه واحده انجلش ومش عارفه اروح ازاى بمنظري ده ونفسيتي ف الارض، وبجد تعبانه وزهقانه من الدنيا كلها، ومش عايزه اشوف حد، عايزه اسيب البيت بس مش عارفه اروح فين واعمل اى
وعليكم السلام ورحمة الله وبركاته، بصي حبيبتي، انتي لسه صغيرة جدًا ويمكن فيه حاجات كتير متلخبطة في تفكيرك ومحتاجة بس تتوضح عشان تقدري تشوفي الطريق وتخرجي من المشكلة اللي انتي فيها. أولًا، عاوزة أنبهك لنقطة مهمة، احنا كمسلمين حاليًا معندناش الثقافة الدينية ومدرسناش دين وعقيدة صح عشان نفهم يعني إيه دعاء ومعنى استجابة الدعاء إيه. فمش معنى إنك دعيتِ ربنا إنه ميخليكيش تباتي عند جدتك وده محصلش إن ربنا مسمعكيش أو مستجبش أو إنه مش بيحبك أو إنه في المرة الأولى انتي مش بتي معها عشان ربنا استجاب دعائك ساعتها. الدعاء مش بيتشغل بالطريقة دي. وتفكيرك كده هيكون لا قدر الله مدخل من مداخل الشيطان عشان يوسوس لك إنه ربنا مش بيحبك أو بعد كده والعياذ بالله يشكك أصلا في وجود ربنا. ثانيا، انتي لسه صغيرة ومشفتيش حاجة من الدنيا. مش قصدي خالص يتفهم من كلامي إني بسخف من مشاكلك أو معاناتك بالعكس أنا متفهماكِ وحاسة بكِ، لكن حاولي تخرجي برا الدائرة دي وتشوفي الدائرة الأكبر. بدل ما تفضلي باصة على المشاكل والجانب المظلم من حياتك بصي على النعم اللي تركيزك مع المشاكل دي مش مخليكي شايفاها. لو هِديتي وجبتي ورقة وقلم وقلتِ كل يوم هكتب ولو خمس حاجات ربنا أنعم عليّ بهم ومش موجودين عند غيري يمكن بالأول يكون صعب لكن مع كل يوم هتلاقي نفسك بتلاحظي النعم والجانب الكويس أكتر وده هيقلل جانب التشاؤم عندكِ ويخليكِ تبصي للحياة بطريقة مختلفة. والحاجة اللي انتي شايفاها وحشة في حياتك فكري على طول واقلبيها لحاجة حلوة. هقولك مثلًا، بتكرهي تباتي في بيت جدتك؟ قصادها فكري إنه الحمد لله إن عندي بيتين وسقف فوق راسي، فيه أطفال عايشين في الشوارع من غير أهل ولا سقف يحميهم. السرير متعب ومش بتعرفي تنامي عليه؟ فكري الحمد لله إن فيه سرير، فيه ناس ربنا يكون في عونهم نايمين على الرصيف. فيه فيران وصراصير بتخافي منهم؟ فكري الحمد لله جت على قد كده... فيه إخوة لنا ربنا معهم ويحفظهم بيناموا وسط قصف صواريخ وقنابل ومش ضامنين اللحظة الجاية من حياتهم هتبقى الأخيرة ولا لأ. شايفة إن نومك في بيت جدتك مشكلة كبيرة وعذاب لكِ؟ فكري فيها إنها فرصة تخليها لوجه الله وبتقومي بصلة رحمك، فيكون وقتك وتعبك ده أجر لكِ وربنا يفتح لك بها أبواب الخير. بتضايقي من أخوكِ؟ فكري الحمد لله، فيه أخ ممكن لو عرفت أكسبه نكون سند لبعض في المستقبل... غيرك ربنا مأنعمش عليه بنعمة الإخوات وتفتكري له حاجات حلوة عملها، أكيد هتلاقي... زي مثلا إنه بات في دورك رغم إنه كان ممكن يعاند المرة اللي فاتت عادي وكان حقه. *** وهكذا، أي مشكلة في حياتك جربي تشوفيها من زاوية تانية وتبطلي تركزي على السلبيات... أي حد من أسرتك زعلانة منه هتفكري تلاقي أكيد فيه حاجات حلوة ولو صغيرة عملها معك. ****** بالنسبة للانتحار، كويس إنك عارفة إنه معناه خسارة آخرتك. الانتحار مش حل، ده مهرب سهل جدًا لكن ثمنه كبير في الآخرة ومش هيحل مشاكلك بالعكس مش هترتاحي بعد الموت. *** بتقولي بتدعي وربنا مش بيستجيب؟ ربنا قال إنه لا يغير ما بقوم حتى يغيروا ما بأنفسهم... وتغييرك لنفسك هنا إنك تغيري تفكيرك ونظرتك لحياتك وللي حواليكِ وإن مش انتي لوحدكِ اللي بتحصلك المشاكل دي. لو جربتي تاخدي لفة في التطبيق هتلاقي بنات كتييير جدًا بتشتكي زيك. يا ريت تشوفي الفيديو ده وتعملي بالنصائح اللي فيه وإن شاء الله تفيدكِ. بالتوفيق وربنا معك. 💚💚 https://www.youtube.com/watch?v=8xO-FS0IJKs
تم النشر الأربعاء، ٢ أكتوبر ٢٠٢٤
حقيقي الله يكون في عونك وللأسف الحاجه ده مش عارف ألقيلها حل لأني عن نفسي مش هعملها إطلاقا لأن نومي عند جدتي مش هيمنع ملك الموت مثلا لكن خليك واقعيه اكتر الشخصيات اللي شبه والدك لازم تتعامل بالتجاهل عشان ما تفتكر نفسها حاجه علينا معرفش بس دي حاجه بطبقها في حياتي تجاهل على قد ما اقدر يعلي قيمتك ولو على الفران والصراصير يا سيتي حطي ليهم سم لحد ما يموتوا ولو حتى قبل معاد اخوكي او بنت عمك عشان يكونوا ماتوا وركزي يا دكتوره لان حقيقي تالته ثانوي اهم من تضييع نفسيتك ووقتك لان ببساطة مش راجعين ليك تاني بالذات السنه دي حقك تحققي حلمك ربنا معاك
تم النشر الأربعاء، ٢ أكتوبر ٢٠٢٤
وعليكم السلام ورحمة الله وبركاته، انا كثير بتفهم خوفك وحزنك على الاشياء الي بتصير معك لهيك رح اجاوبك على كل اشي شوي شوي، اولا منبدأ بالله سبحانه وتعالى ربنا بحبنا وبدو الخير لإلنا لو ما بحبنا كان ما قلنا نطيعه وما قلنا كيف نعبده بالطريقة الي بيدخلنا فيها الجنة ان شاء الله ، فأفكار الانتحار شيليها من راسك لانها من وسوسة الشيطان تمام؟♡ منيجي لأبوكي ، بحب اقلك ابوكي بحبك وبحبك كثير كمان بس ما بقدر يعبر عن حبه وتصرفاته وطريقتو غلط هاد صحيح، بس لو ما بحبك ما بقلك بدي اشوفك دكتورة، شو بهمو؟ شو بهمو يدفع مصاريف تعليمك للطب والخ...؟ في كثير آباء اهملو بناتهن وتركوهن، بس انت لازم تحترميه اكثر وتحتسبي، بتعرفي شو يعني تحتسبي؟ يعني كل مرة بتحترميه تحسبي وتآمني انو ربنا رح يرزقك اجر بر الوالدين مثلا، وبس تكبري متربية وبنت عالم وناس وبتخافي ربنا رح تشكري ابوكي واهلك رح كل الناس يحكو بأخلاقك، رح تقولي الحمدلله♡ أبوكي لانه شخص منيح هو خايف كمان على أمّه، عامل حسابها ما مهملها زي ما في كثير ابناء مهملين اهلهن، اسا خلينا نشوف حل بالنسبة للمبيت... شوفي انا عمري ٢٤ سنة وكتير بحياتي نمت عند ستي، وكمان ستي عندها صراصير واكيد النومة بالبيت اريح بس بحتسب، بحتسب هيك اني راح ابسطها، انت احتسبي انك رح تبسطيها ورح ترضي ابوكي... لكل اشي في حل يا اختي صدقيني يعني مثلا الصراصير والفئران جيبو مبيد لإلهن واشتركو بالمبلغ كل العيلة والأحفاد، حاولي ابني الك روتين بالشهر عند ستك، املأي وقتك باشياء بتحبيها، قراءة قصة او فقرة تقعدي فيها تقرأي قرآن؛ او ممكن تجيبي لعبة كلمات او ذاكرة تلعبي فيها مع ستك؛ ستك بشي يوم كانت صبية وبنوتة وعندها حياتها، ستك ما خلقت كبيرة بالعمر وبدها حدا يساعدها لا ابدا.. وانت ابدا مش شغالة انت بنت بارة لأهلها... خصصي الك مكان للدراسة عندها ولو كان على الارض ابني حياتك بطريقة الي بتناسب ظروفك... وعن تجربة بعمرك ما تتمردي ، كثير الاشي ما بسبب الا نفور من عيلتك ومعاملة قاسية وانت ما بتستفيدي بس بتفكريهن ما بحبوكي وبتصيري تلتجئي للغريب وهو اقسى عليكي منهن ولو اظهر غير هيك! وتنسيش كمان شوي كمان شي كم سنة بدو يتقدملك عرسان وبدك تروحي وتتجوزي ان شاء الله وتبني بيت الك مستقر بإذن الله♡ انا بعدني مش متجوزة بس مآمنة انو عن قريب ان شاء الله دعواتك♡
تم النشر الأربعاء، ٢ أكتوبر ٢٠٢٤
وعليكم السلام ورحمة الله وبركاته، أختي العزيزة، أنا هنا للاستماع إليك ومساعدتك بأفضل ما أستطيع. أود أن أبدأ بالقول إنني أشعر بألمك ومعاناتك، فمن الواضح أنك تمرين بوقت صعب للغاية. الوضع الذي تصفينه في بيتك بسبب تصرفات والدك، وصعوبة التعامل مع مشاعر الخوف، والاستجابة للعنف، كلها أمور تحتاج إلى دعم وفهم. لنبدأ أولاً بتفهم مشاعرك. من الطبيعي أن تشعري بالإحباط والحزن عندما تكونين محاطة بمثل هذه الأجواء المتوترة. يجب أن تعلمي أنك لست وحدك في هذه المعاناة، وهناك دائمًا أمل في التحسين والتغيير. فيما يتعلق بمشاعر اليأس والتفكير في الانتحار، أود أن أؤكد لك أنه يوجد دائمًا طرق للتغلب على الألم، حتى عندما تبدو الأمور مظلمة. تذكري أن الله يحبك وأن كل إنسان يمر بتحديات، لكن هناك دائمًا الأمل في الفرج. أعتنِ بنفسك، واعتبري نفسك واحدة من أهم الأشخاص في حياتك. أوصيك بشدة بالتوجه إلى أحد المختصين في الصحة النفسية، سواء نفسياً أو اجتماعياً، حيث يمكنهم تقديم الدعم والمشورة التي تحتاجينها في هذه الفترات العصيبة. كما يمكنك أيضًا التحدث مع والدتك أو أحد أفراد أسرتك الآخرين عن ما تشعرين به. فقد يساعدك التعبير عن مشاعرك في الحصول على بعض الدعم الإضافي. تذكري أنه لا بأس في طلب المساعدة، وأنك تستحقين حياة أفضل. لا تتركي مشاعرك السلبية تعيق طريقك. حاولي البحث عن الأشياء الصغيرة التي تجلب لك السعادة، مثل قراءة كتاب تحبينه أو الاستماع إلى موسيقى مفضلة، فهذا قد يكون بمثابة بلسم لنفسك. إذا كانت لديك أي أسئلة أو تحتاجين للدعم، فلا تترددي في مراسلتي. أنا هنا لأجلك. (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الأربعاء، ٢ أكتوبر ٢٠٢٤
لعرض السؤال في فدني اضغط هنا