احساس صعب وانت شايف وحاسس ان في ناس انت بتحبهم اوي بيبعدو وهما عارفين وانت مش عارف تعمل حاجه وتلاقيهم استغنوا عنك بس لسه مش عارفه اطلعهم من حياتي ببساطه لأنهم الناس الي أنا لتربيت معاهم وقرايبي
ليه لما الناس بتكبر لازم يبعدوا عن بعض حقيقي ساعات بكره إن إحنا كبرنا واحنا مع بعض كانت حياتنا احلى وكلنا مع بعض ومش بنخبي على بعض حاجه لكن دلوقتي بقينا نتحجج علشان مش عايزين نقعد مع بعض علشان في حاجات اهم اللي اتجوز واللي اشتغل
أنا مش عايزه نشوف بعض في المناسبات بس ونسلم ونقعد احنا مكناش كده إحنا كنا بنتحسد على لمتنا بس اتفرقنا خلاص أنا مش هموت من غيرهم بس هما كانوا حاجه حلوه أوي وهنفضل ذكرى حلوه للأسف قعدتهم كانت تخليك تضحك من قلبك وتبقى مطمن من غير فلوس ولا حاجه كانوا علاج النفسيه بس للأسف بقوا ذكرى
السلام عليكم، التغير طبيعة الحياة وطبيعي إننا نكبر ومع الوقت تختلف ظروف حياتنا وتتولد مسؤوليات جديدة وهتلاقي علاقات جديدة دخلت. عارفة أحيانا تقبل التغيير صعب وخصوصا زي ما بتقولي لو متعودة قرب كتير في علاقاتك مع الأهل والصحاب لكن لازم كمان تتفهمي التغيرات اللي بتحصل وتحاولي تتأقلمي معها. مش هم وحدهم اللي حياتهم اتغيرت وظهر فيها مسؤوليات شغلتهم عن اللمة اللي كانت بينكم، أنتِ كمان أكيد حياتك فيها مسؤوليات تخصك. المشكلة مش في التغير على قد ما هي في قدرتنا على التأقلم معه وتفهمه والرغبة في الحفاظ على العلاقات اللي بحياتنا وسط زحمة الحياة. طبيعي هتحسي بحزن وحنين للأيام اللي فاتت لكن هي دي الحياة. والذكريات رغم قسوة الحنين لها فهي هتفضل موجودة تفكرك بغلاوة الناس اللي كانوا بحياتك وتخليكِ تحاولي تتواصلي معهم وتكملي وتصنعي معهم ذكريات جديدة حتى لو هتكون مقتصرة على مجرد خروجة تفرحوا فيها وتتصوروا مع بعض وتتطمئنوا على أحوال بعضكم.
تم النشر الخميس، ٣٠ يناير ٢٠٢٥
اكيد التغيير عموما صعب ..بس لولا التغيير مكانش هيبقى فى حياه زى ما لو عدى عليكى اليوم واتكرر ومبقاش فى تغيير هتقولى زهقت لان ده طبيعى عشان تتجاوزى الوضع ده تقبلى ان التغيير فى الظروف هيحصل بس المكانه فى القلب مش هتتغير وده الاهم
تم النشر الجمعة، ٣١ يناير ٢٠٢٥
انا مش هقدم حلول لان الناس ماشاء الله قدموا حلول وزيادة.. احنا ممكن نحلل اكتر.. اول حاجة لازم تدركى ان.. هيا دى سنه الحياة.. العلاقات بين الناس مش ثابتة (ديناميكية) ، لأنها بتتأثر بالظروف، والسن، وطريقة التفكير... في الأول العلاقات بتكون قوية بسبب حاجات زي القرب في المكان، الدراسة، الشغل، أو حتى المصالح المشتركة، لكن مع مرور الوقت كل واحد بيبدأ ياخد طريقه، وده بيأثر على العلاقات.. طب ليه العلاقات بتتغير؟ لان كل واحد بيتطور بطريقته ممكن طريقة تفكيرك تتغير، أو طريقة تفكيرهم تتغير، فمش هتلاقوا نفسكم متوافقين زي زمان....الأولويات بتختلف اللي كان عنده وقت يقعد معاكي زمان، ممكن يكون عنده شغل ومسؤوليات دلوقتي مخلياه مشغول طول الوقت..المجتمع بيأثر أحيانا بيحط ضغوط على الشخص يخليه يبعد عن ناس معينة عشان وضعه الاجتماعي أو ظروفه الجديدة...ممكن الضغط النفسي، فيه ناس بتبعد مش عشان كرهتك، لكن لأنها عندها مشاكل نفسية أو ضغوط مش بتعرف تتكلم عنها.. والاسباب كتيير.. طب اى تأثير البعد على نفسيتك؟ لما تلاقي ناس قريبة منك بدأت تبعد، طبيعي تحسي بالحزن أو الإحباط، وتبدأي تسألي نفسك: هل أنا عملت حاجة غلط؟.. ليه هما اتغيروا؟.. هو أنا كنت مهمه ليهم فعلا ولا لأ؟ المشاعر اللي بتحسي بيها في الموقف ده: الإحباط.. لأنك كنتي شايفه إن العلاقة دي هتفضل قوية، لكنها ضعفت فجأة... الخذلان... بتحسي إنك كنتي مدياهم قيمة أكتر من اللازم، وهما ما قدروش ده... الحنين للماضي.. بتفضلي تفتكري الذكريات الحلوة وتقولي "إحنا كنا فين وبقينا فين" وتحبى تعيشي فية...الغضب...بتحسي إن اللي بعد عنك استغنى عنك، أو مابقاش يهتم بيكي زي الأول... الحقيقة الى يمكن وصلها لينا كلها ان لكل وقت صحاب وقليل اوى الى بيكمل.. فانتى اهتمى بنفسك وابنى حياتك وكونى صداقات جديدة لية لا..
تم النشر الجمعة، ٣١ يناير ٢٠٢٥
عزيزتي سما، أفهم تمامًا مشاعرك وتعبيرك عن الحزن بسبب ابتعاد الأشخاص الذين أحببتهم وتربيت معهم. إنّ الحياة، بطبيعتها، تفرض تغييرات كثيرة على العلاقات الإنسانية، وقد يكون لبعض هذه التغييرات آثار مؤلمة. عندما نتقدم في السن، كثيرًا ما تنشأ مسؤوليات جديدة؛ مثل الزواج، والعمل، وبناء مستقبل خاص، مما قد يؤدي إلى تباعد طبيعي بين الأفراد. ولكن هذا لا يعني أن المشاعر التي حملتيها تجاههم ستختفي. بل على العكس، يبقى الذكريات جميلة، وقد تشعرين أحيانًا بالحنين لتلك الأوقات. من المهم أن تتقبلي حقيقة أن التغيير جزء من الحياة. يمكنك الاستمرار في التواصل مع هؤلاء الأشخاص، حتى لو كان ذلك بشكل أقل تواترًا. قد تساعدك وسائل التواصل الحديثة على البقاء على اتصال، ومشاركة الذكريات والمواقف التي كانت تربطكم معًا. بجانب ذلك، كوني مفتوحة لخلق صداقات جديدة وتجارب جديدة، فذلك يمكن أن يجلب لكِ السعادة والدعم في حياتك. تذكري أن التوازن في العلاقات هو أمر مهم، وأنك قادرة على الاستمتاع بالحياة مع الاحتفاظ بذكرى علاقاتك السابقة. إذا شعرتِ بالحاجة للتحدث عن مشاعرك بشكل أعمق، فلا تترددي في طلب الدعم من معالج نفسي أو متخصص، فقد يساعدك ذلك في فهم نفسك بشكل أفضل وتجاوز هذا الشعور. كوني قوية، واعلمي أن الحياة مليئة بالفرص لتجديد العلاقات وإقامة روابط جديدة.
تم النشر الخميس، ٣٠ يناير ٢٠٢٥
بص لنفسك وبس
تم النشر الجمعة، ٣١ يناير ٢٠٢٥
الصبر أولا .. ثانيا خلي الأسبوع ده كل يوم تكلم واحد وتطمئن عليه وبعدين تقول له عايزين نتجمع الجمعة مثلا .. والله يتمها على خير
تم النشر الاثنين، ٣ فبراير ٢٠٢٥
مين قال اني موقفه حياتي انا بطور نفسي والحياه مشيه بس في احساس ناقص احساس الاهل وللأسف ده صعب تلاقيه بره
تم النشر الاثنين، ٣ فبراير ٢٠٢٥
كان نفسي يكونو معايا اوي
تم النشر الاثنين، ٣ فبراير ٢٠٢٥
بس أنا مبعتش غير لما كل واحد شاف حياته
تم النشر الاثنين، ٣ فبراير ٢٠٢٥
الحياة لا ذنب لها انت من بعدت
تم النشر الجمعة، ٣١ يناير ٢٠٢٥
عدم وجود بديل. ف حياتك. وعدم وجود اهتمامات تشغلك. وعدم تطوير. من ذاتك. هو ده السبب ال بيخليكي. تبصي. ع الزمن الجميل. اي وهو. الماضي. هتكون ذكرى وانتي ال مش هتفتكري بس ادي لنفسك وقت. وحاولي. متكونيش بتفكري بطريقه سلبيه. لانك هتقابلي. كتير. وهتتخذلي كتير. لازم تكوني اجمد. من كدا عشان نفسك مش عشان حد تاني.
تم النشر الجمعة، ٣١ يناير ٢٠٢٥
لعرض السؤال في فدني اضغط هنا