أنا ثانوية عامة أدبي والامتحنات قربت وأنا مش قادره اذاكر زاي الأول وحاسة إني عايزة أنام ومروحش الدروس ولا اذاكر حتى الدروس إلي كنت بحبها بقيت بروحها بتقل وبقي جوايا كل يوم صراع في فكرة إني اروح ولا مروحش هو أنا بنزل في الاخر واروح بس الفكرة دي بقت تعباني ومحسساني إني ماشية بصوتين
ده بيكون عامل نفسي زي الضغط من المذاكره او الاحباط او فقدان طاقه المذاكره جسمك بيعمل حيله دفاعيه عشان يهرب ويرتاح ...لو انتي مش بتدي جسمك مساحته من الراحه والراحه هنا مش نوم بس ده نوم وتفريغ طاقه برياضه وخروج وانك تسترخي وتعملي الحجات الي بتحبها وتغيري كمان مكان مذاكرتك وتتعرضي للشمس وقت كويس وتاكلي اكل صحي هتحسي بفرق جدا كمان حاولي تغيري عادات مذاكرتك اول متحسي بالنعس ممكن تذاكري مع حد تاني بالشرح والصوت العالي وممكن اول متنعس تقومي تتحركي تنطي تتمشي وترجعي تاني تذاكري بس ف مكان مختلف وعشان الدافعيه للمذاكره افتكري هدفك وحلمك الي انتي نفسك تحققيه وفرحتك بالنتيجه لما تجيبي المجموع الي نفسك فيه وتدخلي الكليه الي انتي عايزاها اتخيل كل المواقف الي كلها فخر وسعاده بالنجاح واعرفي عشان توصليلها محتاجين نتعب شويه صغيرين كمان مش كتير هي هانت وتوصلي لحلمك ربنا يكرمك وتحققي الي نفسك فيه وتوصلي لهدفك.
تم النشر الثلاثاء، ٧ مارس ٢٠٢٣
استعيذى بالله من الشيطان وكل ما تحسي بالكسل ده والتقل قومى اتوضي حتى لو مش وقت صلاه... ده وارد يحصل مع اقتراب الامتحانات عشان من كتر الضغط الجسم بيبقي عاوز يهرب من الضغط بالشكل ده. خلى واحده صاحبتك كده تكون زنانه شويه تتابع معاكى وانتوا رايحين وجايين ووانتوا بتبدأوا مذاكرة او كل ما تخلصوا جزء وهكذا.
تم النشر الأربعاء، ٨ مارس ٢٠٢٣
ده طبيعي جدا في الوقت ده تحسي بكده .. علشان ممكن تكوني بدأتي بشحنة قوية جدا من أول السنة وعلطول ضغط ومذاكرة .. ف الاول متحسسيش نفسك ان الموضوع مخيف لأ الموضوع عادي بس انتي محتاجة تقللي الضغط اللي انتي حاسه بيه. حاولي تاخدي بريك مثلا في يوم وتعملي حاجة بتحبيها او خروجة مثلا مع حد من صحابك وبعدها تبدأ تعملي روتين كويس لليوم بتاعك يكون فيه تمارين الرياضة او الجري مثلا كل يوم الصبح ساعة او نص ساعة، وتمارين الاسرخاء مهمين جدا انهم يكونوا موجودين في يومك اساسي، لانهم هيفرغوا شحنة الطاقة السلبية والتوتر اللي جواكي وهيدوكي كمان نشاط. رتبي يومك واعملي قايمة مهام لكل يوم سواء من بليل او من اول ما تصحي .. شوفي اللي يريحك فيهم .. علشان اول ما تبدأي اليوم بتاعك وهو منظم ده هيساعدك جدا. خلي في اليوم بتاعك حاجة ممتعة وترفيهية .. وده مهم علشان ميبقاش اليوم بتاعك كله مذاكرة وجد. لا كافئ نفسك في اخر اليوم بأي حاجة حلوة .. حتى لو هتعملي اكلة نفسك فيها. واتمنى ليكي كل التوفيق والنجاح
تم النشر الثلاثاء، ٧ مارس ٢٠٢٣
التوتر ومسؤوليه المذاكره مش اكتر زي ما اسماء كتبتلك انك غيري دايما مكان مذاكرتك وصحبه تشحن وتشجع ورياضه تفرغي التوتر فيها وهيئي المكان ال بتذاكري فيه وحاولي تحلي امتحانات كتيير وتعملي ملخصات تراجعيها فالاخر وشوفي فيديوهات اخضر واحمد ابو زيد علي ترتيب المذاكره وعمل جدول ليها حسب قدره استيعابك
تم النشر الثلاثاء، ٧ مارس ٢٠٢٣
بالنسبة للدروس فالاصدقاء الكويسين هم الحل الامثل في وجهة نظري لو بتشجعوا بعض على نزول الدروس مش هتحسي انها تقيله خالص وبالنسبه للكسل في المذاكره فا الحل هو الجدول اعملي جدول وحطي لنفسك مهمه كل يوم تخلصي جزء من المنهج ومتناميش غير لما تخلصيه وربنا معاكي انا في تانيه علمي
تم النشر الثلاثاء، ٧ مارس ٢٠٢٣
ربنا معاك هحاول أحط جدول
تم النشر الثلاثاء، ٧ مارس ٢٠٢٣
لعرض السؤال في فدني اضغط هنا