الشخص ده لما قرب منك واتكلم معك كان عارف إنك متزوجة؟ ولما عرف فضل مكمل عادي؟ مشكلتك مع زوجك ممكن دفعتك تدوري على مشاعر واهتمام في مكان تاني لكن أنتِ شايفة الشخص ده كويس؟ الشخص اللي معندوش مشكلة يقرب من واحدة على ذمة شخص تاني ويخليها تحبه وهو عارف إن دي خيانة لربنا ولشخص تاني انتِ على ذمته، أنتِ شايفة إن ده شخص كويس ومحترم وبيحبك فعلًا؟ أشك إنه بيحبك أصلًا وأشك إن عنده ذرة دين وخوف من ربنا. مشكلتك مع زوجك ممكن تلاقي لها حل لكن مشكلة علاقتك بشخص لا يحل لكِ وأنتِ متزوجة دي كبيرة جدًا. محتاجة تراجعي علاقتك بربنا وهل صح اللي انتِ فيه ولا لأ قبل ما تفكري في طلاق أو غيره. وعلى فكرة، كل الحكايات اللي واحد قرب من واحدة متزوجة وخلاها تحبه كان بيضحك عليها ولما تطلق بيرميها ويرفض يتزوجها أو لو حصل وتزوجها فعلا بيفضل شاكك فيها وهيفضل يفكر إن زي ما خانت زوجها معه أكيد هتخونه مع رجل تاني. معلش لو كلامي كان قاسي لكن انتِ فعلا محتاجة تفوقي لنفسك من كل ده. ارجعي لربنا واستغفريه عشان مهما كانت تبريراتك، أنتِ عارفة إن علاقتك بالرجل ده ذنب كبير. ادعي ربنا يغفر لك ويساعدك ويخرجك من مشكلتك. ابعدي عن الرجل ده مهما كان كلامه حلو ومستعد يجيب لك نجمة من السما زي ما بتقولي... الشخص اللي معندوش خوف من ربنا مش هيتقي ربنا فيكِ. نصيحة وقفي كل ده ومشكلتك مع زوجك إن شاء الله تلاقي لها حل. حتى لو انفصلتِ ربنا يعوضك مع شخص تاني يعرف يحترمك ويكون بيتقي ربنا بجد. تحياتي.
تم النشر الاثنين، ١١ نوفمبر ٢٠٢٤
4 تعليق
عندك حقك
تم النشر الاثنين، ١١ نوفمبر ٢٠٢٤
أنا مش بهاجمك، بس مهما قلتِ عنه إنه حريص عليك وبينصحك ووو... كل ده ولا يسوى قصاد إنه عادي يعلق واحدة متزوجة ويتكلم معها ويخليها تحبه... ده شخص محترمش حُرمات ربنا ولا حدوده ولا احترم حُرمات رجل تاني، مقدرش أصدق إنه شخص شريف وحريص عليكِ... الكلام ممكن يزعلك بس أنتِ عارفة كويس إن ده حرام... إذا كان البنت اللي مش متزوجة حرام شرعًا تكون على علاقة بشاب وتتكلم معه ويحبوا في بعض من غير علاقة شرعية تربطهم، ما بالك المتزوجة؟ بلاش تضيعي نفسك وتعرضيها لغضب ربنا عشان شوية مشاعر وكلام من شخص عرف يضحك عليكِ بكلمتين... والكلام مفيش أرخص منه... فكري كويس وربنا يهديكِ ويهدينا جميعًا للخير.
تم النشر الاثنين، ١١ نوفمبر ٢٠٢٤
الشخص التانى ده ديما بشكيلو عن مشكلى وهو بيقولى كل ومشكله وليها حل هو ديما بيقولى قبل ما تفكري في موضوع الطلاق وتفكري في نفسك فكرى فى بنتك هتتحرم من ابوها لم تفضل معانا ولا فضلت مع ابوها هنتحرم منها فكرى في البنت قبل ما تفكرى فينا احنا
تم النشر الاثنين، ١١ نوفمبر ٢٠٢٤
للأسف جُل النساء تنخدع ببعض الكلمات المعسولة!
تم النشر الاثنين، ١١ نوفمبر ٢٠٢٤
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك