نفسى تشككنى فى نفسى .. أفكار سوداوية تحاوطني وكأنها تسيطر على .. فماذا أفعل ؟

Question

انا بعانى من مشكلة استمرت تسع شهور واكثر كل حياتى اتغيرت للأسوأ وافكار صعبة جدا نفسى فعلا تشكننى فى عبادتى وان ربنا غضبان عليا و ...و...وفى الرياء و النفاق مع انى عرفت الذى يفكر انه ممكن يكون عنده رياء او نفاق فهو مش كده وكانت فى حاجة استمرت معى اشهر ولكن هى نسبتها الان قليلة فى جزء وزادت فى جزء احس انها قلت من كتر اللى فى دماغى وهى ان نفسى تصور لى صور اكرهها لدرجة ممكن اشد فى شعرى اضرب نفسى عشان اشيلها من دماغى وما عمرى ما شوفتها ولا حبتها بل بالعكس بكرهها كره شديد واكثر حاجة الصور وانك بتعملى عشان الناس لدرجة ماشية فى الشارع اجى افتكر اذكر ربنا تقولى عشان انتى بس ماشية فى الشارع عشان الناس وكل حاجة وكل صورة وكل تفصيلة ليها الم وقهر تانى وشديد واليأس التام مهما حاولت ارجع لنفسى الامل مع ان مفيش حاجة كبيرة حصلت خالص يمكن افتكر ان انا كنت حساسة وبعيط على اتفه حاجة بس دلوقتى لأ فانا بقول برضو ان المشكلة من جوايا احيانا باقول يمكن تكون من الناس بس ما اظنش وبقول بعديها لأ هى من نفسى كنت فى الشهور اللى فاتت برغم اليأس بس برضو كان عندى احلام جميلة لسة بس كل دا دلوقتى درجاتى بقيت درجات وحشة ماجلة الدراسة وعمالة اسوف كتيير ومبقاش عندى اى احلام زمان فى الشهور اللى فاتت يعنى برضو كنت ممكن اهرب الى ان انا اتعلم انجليزى ولا صينى ولا برمجة هى دى الصراحة حاجات جميلة بس كانت هروب بالدراسة لماذا لان انا لما اذاكرنفسى تقولى انتى بتذاكرى ليه عشان الناس بردو اقعد اشرح ليها ليه بذاكر تانى مرة بردو تقولى ما جوابتش يفضل جوايا ان انا بعمله عشان الناس كل اللى انا بقول انها بتقوله انا مش بسمع حاجة ولكن هو شعور يمكن جاء فى اول مرة كلام مع شعور القهر بعد كدا بقى لكل حاجة شعور اقهر مختلف وفى حياتى ابقى قاعدة فى الدرس احس رجلى عاملة ترتعش بس خفيف محدش يحس بيه غيرى وحركات غريبة احيانا وعنيا مبتجيش فى عين خالتى حتى وهى بتسألنى على حاجة احاول ابص فى عنيها مش قادرة عنيا عاملة تروح بعيد وخوف شديد من حاجة جاوبت لنفسى على كل المبررات اللى بتقولها برغم كدا برضو مش قادرة اعمل الحاجة دى بقول لنفسى متفكريش واعمليها احس قلبى عامل يعنى كأن قلبى هيوقف ومن كتر الخوف اللى جوايا بقى لما افكر تقعد تقولى انتحرى وانا مش قادرة اتحكم فى حاجة ما انا عايزة اعمل الحاجة دى وهى خوف من ماما وعموما من الناس لان انا جاوبت على كل المبررات اللى تعمنعينى قلت حاجة زيها اقبل كدا قلبى كان هيوقف حتى برغم ان انا قلت وايدي بردت ثلجت ورجليا مش شايلنى وكل دا ومحدش حاسس وانا بحاول مبينش حاجة خوف صعب يمنعنى عن الحاجة ومش قادرة اتخطيه بأى شكل واكثر يمكن مش فاكرة حاجات بسبب ان انا ادمنت بجد مهما حاولت ودا اللى دمرنى اكثر وهو الموبايل واليوتيوب برغم ان انا بتفرج اغلب الفيديوهات شيوخ بس دا كل هروب ١١ ساعة كاملة بتفرج على اليوتيوب كذا يوم حاولت بس رجعت بس بقول احفظ القرآن فى شهر وكدا بس بردو مش قادرة وخوف فظيع اجى عند ايات وقفت انهاردة عند اية وكملتش حفظ بسبب نفسى تقولى انت اللى فى الاية دى وحاجة صعبة حتى املى الوحيد غير ان انا شهيتى بتبقى مفتوحة اغلب الوقت وحياتى وقولى انت بتحبى الشخص دا وبتاع والرجل اللى عنده ستين سنة او اكثر معرفش وكمان واحد مشوفتوش ولا اعرف مين هو بس عشان عدا من قدامى وانا بكره اوى الموضوع دا غير ان دكتور الباطنة قبل كدا وانا عندى ارتجاع مرئ ادانى دواء اكتءاب وقال ان عندى خوف او كدا عارفة انه مش دكتور نفسى ومخدتش الدواء بعد ما ماما عرفت انه دواء اكتءاب غير ان انا كنت بافكر فى الانتحار فى فترة وكان باقى سنة بسيطة بس الحمد لله ربنا ناجنى ومحدش حس بأى حاجة ودلوقتى بدأت ترجع تانى فكنت بادعى على نفسى ولما عرفت انه مينفعش بقيت ادعيها من جوايا وكمان لان انا مش مستعدة اموت اساسا وكنت ومازلت باعيط او عندى قهر لدرجة مش قادرة اعيط كل يوم تقريبا وكلمة تقريبا دى بقيت باقلوها عشان مكنش كدابة والكلمات اللى زيها ومرة ماما كانت بتسألنى على حاجة مردتش احسن اكون كدابة مع انى كنت متأكدة من الاجابة ولكن الموضوع عدا ودى يعنى بعض الاشياء اللى افتكرها دلوقتى بس فى اغلب الوقت مقهورة جامد غير انها بتصورلى صورة فظيعة عن الانتحار وبتقولى هترتاحى بس انا اللى مانعنى ان اكيد عذاب النار والخلود فيها اصعب وهى كانت رسمتلى حياة ان هيحصلك الحاجات اللى بتكريها فشل دراسة وهتنتهى القصة بانك الناس هيعتبروك مجنونة وتروحى مستشفى مجانين وتنتحرى فيها بردو وانا سعتها كنت برسم حياة جميلة بس باقول لنفسى قصتها هى اللى بتحقق وانا عايشة فى خيال ونفسى افهم شئ اللى عنده خوف من الناس شديد ومرضى كيف يتعالج غير انى صغيرة ١٤ سنة وما اردش اجيب او احجز اى جلسات على النت ولو طلب منى علاج مش هاقدر اجيب فياريت مساعدة اعمل ايه واتغلب على خوفى المرضى دا ازاى غير ان انا كنت بحاول اتحسن جزءيا حتى ولكن بقعد يوم يومين بالكتييييييييييييييير جدا اسبوع وماافتكرش انها حصلت ودا يومين كل كام شهر ودلوقتى اليومين اكتر حاجة دلوقتى بقيت كام ساعة مش يومين وماكنوش تحسن احسن حاجة يعنى غير ان نفسى تتفه الموضوع وتقولى دراما وتمثيل وكل دا عشان متذاكريش عشان متعمليش فى يوم كنت اقول الاذكار من الهاتف وهناك اذكار تقال ثلاثة مرات وكان يوجد عداد فى اسفل الهاتف والذكر اعلاه كنت اعرف ان هذا الذكر يقال عدد مرات معين لا اتذكره ولكن كنت اعرف نفسى تقولى بصى على العدد كدا اقول انا عارفة العدد تقولى لا يمكن غلط اقولها حتى لو التطبيق قال عدد مش اللى عارفه فانا هقول العدد اللى يعنى تقريبا صح واعرف انه صح تقولى هتخالفى العدد هتكفرى وحاجات تانية زى ايه التكبر دا و...و..و بالطبع بصيت على العدد هذا موقف واحد ويمكن لسة بيتكرر واتعلمت خلاص ابص على العدد غير بردو ان نفسى ابقى عاملة حاجة كويسة بنية كويسة تقولى مش ممكن فى الحاجة اللى انتى عملتيها دى النية الوحشة دى وتقولى يمكن دى نيتك وتقولى استغفرى بقى عشان نيتك وعملك دا مش استغفر عشان يمكن اقصرت لا استغفر عشان انا عملت حاجة غلط اجى استغفر تقولى استغفر بالصيغة المعينة دى اقول تقولى انت كدا بتقللى من الاستغفار التانى فاستغفرى بالاستغفار التانى واستغفر عشان انت قللتى من الاستغفار التانى وهكذا فى دوامة بقى ولو ماستغفرتش تقولى ولو مت دلوقتى يعنى وطبعا الخوف صعب

Accepted Answer

عارفة ؟ انتى هتطلعى كاتبة مبدعة لما تبقى لسة 14 سنة بس و قمر كدة وبتعرفى تعبرى عن الصراع اللى جواكى دا بس نسيتى ان انتى لسة طفلة وانك لسة فى سن لا تتحاسبى فيه و لا تتسألى على كل اللى بيدور فى دماغك دا لأنك لسة بتكونى شخصيتك و تتعلمى مرة صح ومرة غلط لحد ما تنضجى و تكبرى و تستقرى و حتى الكبار بيغلطوا و مفيش حد معصوم من الغلط لأن ربنا لو مش عاوزنا نغلط كان خلقنا ملايكة مش بشر لكن خلقنا نعمل صح مرة ونشكره و نعمل غلط مرة فنستغفره فيغفرلنا فنشكره و نقول الحمد لله و انتى لا تحاسبى نفسك و لا تعاتبيها و لا تسمعى الكلام دا من جوة و تردديه لكن اتعاملى على انك لسة بنوتة صغيرة من حقها تلعب و تفرح و تجرب و تغلط و تتعلم من غلطها و عارفة لو انتى وحشة زى نفسك ما بتقولك مكنتيش اهتميتى وكتبتى و طلبتى تعرفى ان دا طبيعى ولا لأ و لكن لأنك عاقلة و شاطرة كتبتى و كتبتى كويس و هتبقى كاتبة عظيمة لو حولتى نفسك و تفكيرك لقصص مكتوبة لكن روحى مكتبة المدرسة و هاتى قصص وكتب وحكايات مفيدة و اقرى عشان تعرفى طريقة الكتابة و وأول الكلام و آخره و زى ما كتبتى هنا هاتيلك كراسة 100 ورقة أو أجندة أو أى حاجة و اقعدى اكتبى فيها و فرغى الضغوط و متحمليش نفسك أى عتاب و لا لوم و عيشى حياتك فى حدود سنك زى زمايلك و اتفسحى و متخافيش و اخرجى عادى وسط الناس وخليهم سندك بدل ما تخافى منهم لأن لو حاجة دايقتك هتلاقى 100 واحد منهم واقف جمبك و ساندك و بيحامى عنك و كلنا كبار و صغار بنمر بمواقف حلوة ومواقف صعبة و بنغلط و بنصلح غلطنا بعدها و بنغلط تانى و تالت لأن الحياة كدة تجارب و تعليم و لو احتجتى حاجة ادخلى و اكتبى و هتلاقى ناس كتير هنا بتحبك و هتفضفض معاكى و تدعمك و متخافيش من حد ولا من حاجة و دايما قولى اعوذ بكلمات الله التامة من كل شيطان وهامة ومن كل عين لاَّمة و ربنا هيحفظك يا حبيبتى

Answer

هو مشكلتك طبعا الافضل فيها علاج دوائى يساعدك شويه .. بس انا عاوزه اعرف اكتر عن علاقتك بمامتك وايه اكتر حاجات اتربيتى عليها منها ...انك لازم تخلى شكلك مثلا كويس وتعملى كذا ومتعمليش كذا عشان الناس هتقول او شكلك قدام الناس هل ماما كانت دايما بتعمل رد فعل قوى على الاخطاء مثلا ؟

نفسى تشككنى فى نفسى .. أفكار سوداوية تحاوطني وكأنها تسيطر على .. فماذا أفعل ؟

نفسية

خوف

ثقة بالنفس

وسواس

سؤال من احد أعضاء فدني

تم النشر الأربعاء، ٦ مارس ٢٠٢٤

2 إجابة

51 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك