مبدئيًا كده انا في واحد أعرفه من فتره كبيره بس معرفه سطحيه اوي، اللي هو شكلًا كده بس واعرف اسمه.
الشخصيه دي بعتلها ادد ع الفيس اما لقيتها بالصدفه وفضلت العلاقه ما بينا عباره عن اننا بنشوف استوريهات بعض وهو بس اللي بيعملي رياكتات عليها
واحده واحده دخل كلمني، الكلام ده بعد قيمه سنه سنه ونص كده ع ده الحال، دخل بقي كلمني قال لي عامله ايه قلت له الحمد لله قال لي طب ابقي سمعيني صوتك طيب قلت له ماشي بس انت يعني مبعتليش ولا فويس حتى قال لي عادي يا ستي انتي ابقي كلميني أما تفتحي.
فتح تاني يوم واتكلمنا وقال لي انه معجب بيا وقعد يزن عليا نتكلم فيديو ودي كانت حاجه غريبه اوي بالنسبة لي لأن دي اول مره نتكلم يعتبر وهو كده كده شافني كتير.
رفضت الفيديو كول والفويس وكل حاجه وتخيلت انه بعد الرفض ده مش هيكلمني بس اتفاجئت بيه إنه بيكلمني تاني وتالت وبيطلب نفس الطلب عادي ولاحظت كمان انه بعد كل مره بيكلمني فيها لازم يقفل يوم على الأقل
بس المره دي طول بقي والحوار بقاله خمس تيام كده وداخل في اسبوع فكده الشخصيه دي نواياها ايه من ناحيتي هو بيقول إنه بيحبني وبيقعد يقول لي كده ويحلف لي بدون سبب
واخر مره كنا بنتكلم عادي قبل ما يقفل الخمس تيام لقيته بيقول لي انا نفسي اخطبك
هو قال لي انا اقسم بالله بحبك وبعت لي رقمه المره اللي قبل الاخيره اللي اتكلمنا فيها فانا شاكه إنه بيعمل كده ويقفل عشان أرن عليه ويكلمني صوت زي ما هو عايز فمش عارفه بقى في ايه بالظبط أو الشخص ده بيحبني بجد فعلا ولا لا وليه دائما بعد ما بيكلمني لازم بيختفي فتره ع الأقل يوم وليه طول المره دي
عندي اسئله كتيره بجد ومفيش جواب مقنع ومش عارفه الوضع ده طبيعي ولا لا هو عامة بطل يطلب الفيديو كول ده بس مصر ع الفون وهو مبيعرفش يقرأ ويكتب كويس ع فكره للعلم
لا ده شخص مؤذي. مؤذي جدا كمان. ما تبعتيش صورك لحد. ما تفتحيش فويس مع حد؟ ولا مكالمه فيديو كمان. ابعدي عنه خالص. واللي لك نصيب فيها هتاخديه. ما تتعبيش نفسك واعصابك اللي عايزك هيجي لك بيتك ويجي يخطبك من اهلك؟ ريحي دماغك. وسيبيها على ربنا. اعملي بلوك اساسا.
تم النشر السبت، ٤ يناير ٢٠٢٥
لا وليه اشتموا والكلام ده انا ممكن اقطع علاقتي بيه وخلاص لكن مش لازم أقل أدبي احنا في الاول ولا في الاخر كنا عارفين بعض في يوم برضوا
تم النشر السبت، ٤ يناير ٢٠٢٥
فعلًا 😂
تم النشر السبت، ٤ يناير ٢٠٢٥
حفظك الله من كل سوء، لكن يبدو أن الأخوة انفعلوا قليلا
تم النشر السبت، ٤ يناير ٢٠٢٥
هو حرام بس الفكره أن احنا مكناش بنتكلم خالص زي ما قلت ف حضرتك مجاتليش فرصه احس بالاحساس ده لان مكنش فيه اي حاجه وحتي لما اتكلمنا كام مره اهو كلاموا كان عادي ولا كان في اي ايماءات أو إيحاءات ومتكلمناش فون ولا مره ولا اي حاجه ف انا والله بنت محترمه وعارفه حدودي والدنيا تمام يعني وهو لو مش عارف كده كان أتجاوز حدوده معايا
تم النشر السبت، ٤ يناير ٢٠٢٥
فعلا حوار غيابه ده مريب اوي وفعلا بيخليني دماغي مش فيا خالص اللي هو طب راح فين طب هيظهر تاني ولا لا وحاجات كتير بقي
تم النشر الجمعة، ٣ يناير ٢٠٢٥
شخص لا يؤتمن ده حتى حكاية غيابه تخوف ولا كأن في رواية رعب ولا طلبه المتكرر للفيديو ده اعملي بلوك وكبري دماغك واوعي يقابلك تاني والله الحب في الفون ده ما بيريح وأي حد ممكن يقول بحبك عادي فيها ايه وأي حد فعلا بيعرف يتكلم 😄، هيجيلك أحسن منه يخبط على باب بيتك ويطلبك من والدك.
تم النشر الجمعة، ٣ يناير ٢٠٢٥
لا طبعا مش طبيعى.. باختصار.. هو بيقرب ويبعد عشان يثير تفكيرك وتقعدى تفكرى هو فين بيعمل اى مش بيكلمنى ليه يمكن زعلته ف حاجة... واجارك الله لما الانسان يبقى اسير تفكيره.. بيشتغل معاكى كأنه" جرعة" واحدة واحدة تقعدى تفكرى فية ليل نهار وواحدة واحدة تقبلى اى حاجة هو عاوزها.. نوع من انواع الضغط عليكى..
تم النشر الجمعة، ٣ يناير ٢٠٢٥
هو ممكن يكون بيعمل كده علشان تتعلقى بيه وتتشغلى بيه وكده وواحده وحده يخليكى تكلميه صوت وياخد رقمك وتفتحى فيديو والكلام ده وبعدين هو لو بيحبك كان جيه اتقدم فكك من الكلام الى مش بيأكل عيش لو هو شاريكى وبيحبك عمره ما هيطلب الكلام ده فا احظريه وابعدى عنه خالص حفاظا علي نفسك وربنا يحفظك ويسترها علينا جميعا
تم النشر الأربعاء، ٨ يناير ٢٠٢٥
دا فخ يابنتى اعملى ليه بلوك ملوش اماااان
تم النشر السبت، ٤ يناير ٢٠٢٥
ينهارك ابيض واحد بدأ يدخل كلام وبعد كدا حب يسمع صوتك وبعديها حابب يكلمك فيديو وبعد كدا تتقابلوا والله اعلم دا نيته اى
تم النشر السبت، ٤ يناير ٢٠٢٥
ما بنى على باطل فهو باطل
تم النشر السبت، ٤ يناير ٢٠٢٥
اولا هو نرجسي بحد كبير ثانيا لماذا لم تفكري في ان هذا حرام ?.. توبي الي الله واتقي الله ومن يتق الله يجعل له مخرجا .. واذا لم تتق الله سوف تظلين في الظلام
تم النشر السبت، ٤ يناير ٢٠٢٥
بصي بصي انا هقولك هو اول حاجه بيقفل عشان يخليك تشتاقيلوا بالتالي تكلميه أو بيعاقبك برفضك لاي حاجه طلبها منك بس بالطريقه دي ولو بيحبك فعلا كان طلبك من أهلك دا هو كمان بلاير ومش تكلميه واعمليلوا بلوك لانو هتنجرحي ف الآخر وملحوظه هو حضرتك مش عارفه انو كدا حرام ولو بدايه اي حاجه بتعملها مش بترضي ربنا اخرتها مش هترضيكي ففكك منو واعملي له بلوك لانو يستحق كدا واللي بيحبك هيخاف عليكي من كلام الناس عنك بالسوء او حتي من عذاب النار وكلمه بحبك اللي بيقولها دي سهله ما أنا ممكن اقلك بحبك... بصي الخلاصه اشتميه واعملي له بلوك 🙂ومش ترني عليه اعملي بلوك وخلاص لانو دي علاقه محرمه أو لو عاوزه تشوفيه متمسك بيكي أو لاء قوليلوا تعال كلم اهلي واخطبني ولو رفض اشتميه وبلوك بردو ف كل الاحيان حتي لو وافق يخطبك هيخونك عشان زي ما كلمك وطلب فديو كول وصوت وبطيخ من دا هيطلب حاجات اكتر واكيد طلب من غيرك وشخصيه زي كدا مش بتكتفي وهتخونك فأحسن خيار بلوك ☺️😅
تم النشر الجمعة، ٣ يناير ٢٠٢٥
أنا خايفة ليكون ورايا ومرة واحدة يظهر ويقول بحبكك وبعد كدا يمشي ولو سألتيه ليه هيقول أصل باقي الأحداث في الجزء الثاني من الرواية 😅
تم النشر الجمعة، ٣ يناير ٢٠٢٥
ما هو بيقولي انو نفسوا في كده بس الظروف بقي يعني والكلام ده
تم النشر الجمعة، ٣ يناير ٢٠٢٥
لعرض السؤال في فدني اضغط هنا