اللي بحبه من سنتين كلم بابا و اتقدملي امبارح و متمسك بيا لابعد حد الفكره و المشكله كلها فيا انا .. انا كل ما بحس أن خطوه الجد بتقرب أو خطوه الارتباط بترعب خصوصا أن كان فيه واحد قبله و كنت بحبه اوي و محصلش نصيب لما اتقدم لبابا فانا دلوقتي محتاره مش عارفه اوافق ولا لاء مع أن بابايا صعب انه يوافق على حد بسهوله و هو بيقولي انا شايفه كويس و هيكون حنين عليكي و يهنيكي و متمسك بيكي اوي اكتر من الاولاني كمان فالفكره فيا انا اني شخصيه قويه اوي برج الاسد و هو برج الميزان يعني مش من الرجاله الغشيمه أو اللي تقولي " انا قلت لا يعني لا " ممكن تشوفو ده مرض نفسي ليا بس انا بحب الشخصيات دي و في نفس الوقت مش قادره اسيب اللي اتقدملي ده عشان حنين عليا اوي و مش واثقه اني لو سبته هلاقي الحنيه دي تاني ولا لاء بالاضافه أن إمكانياته الماديه مش اعلي حاجه وسط يعني .. و انا متعوده على ليڤل عيشه معينه يعني أنا مثلا مش بمشي على طول راكبه عربيه هو معندوش نظرا أنه سنه صغير عنده ٢٥ سنه لسه فانا مش عارفه اوافق مقابل حبه و حنيته عليا ولا استني الشخصيه الغشيمه اللي نفسي فيه و السؤال بقا هعيش مبسوطه مع مين اكتر ؟ يعني اللي متجوزين يدوني رأيهم اخد واحد حنين و متفاهم ولا قوي و غشيم عشان كده ده يبقي راجل ؟
أولاً يا حبيبتى مش الأبراج هى اللى بتحدد شخصية البنى آدم ومش هتحكمى على حد أكيد من صفات البرج والهبل ده ما أنا عادى ممكن برجى كذا مثلا وصفاتى غير الصفات اللى بيتكلم عنها البرج ده غير انها حرام أصلاً، طيب انتِ بتقولى انك عايزاه غشيم هل انتِ هتستحملى لو حصلت بينكم مشكلة ردة فعل الشخص الغشيم ده ضرب مثلاً كلام جارح، على عكس الشخص الحنين اللى مش هيقدر يعمل ده او على الأقل هيكون متفاهم معاكى وبعدين مين قالك ان الحنين ده مش هيحكمك مثلاً بس ده فى الصح ما هو في النهاية رجل برضو، وفى حتة الفلوس دى لو انتِ مش هتستحملى وضعه فبلاش لإنك هتشيليه حمل كبير بمطلباتك لو هو مش قادر يوفرها وهتظلميه انما لو انتِ هتكوني قادرة تساعديه وتشجعيه يوصل للأعلى وتفضلي فى ظهره للآخر وقتها قرري بقا
تم النشر الأحد، ٢٢ سبتمبر ٢٠٢٤
بصي انا هديكي رأي وانا مش متجوزه نظرا لأنك كاتبه عايزه رأي المتزوجين، بس دا ميمنعش اني مدكيش نصيحه بصي اي شخص حنين بجد بيجذبك لي، الحنيه اجمل شعور إنساني حقيقي مش كلام انتي هتستفادي اي لما تاخدي واحد غشيم علي كلامك ومش متفاهم تزعلوا يبقي مش هامه يصالحك إنما الحنين والمتفاهم لما تزعلي معاه هيبقي هامه يصالحك ويراضيكي وكمان انك تلاقي حد فاهمك وحنين دا رزق الشخص المتفاهم بيبقي سهل تدخلي معاه اي نقاش ومتفاهم لا عمره هيغلط ولا يعيبك ولا يمد ايده عليكي عكس الشخص الغشيم اقل حاجه عنده في نقاش مثلا ومش متفاهمين يزعق وكمان لو مش حنين ف مش هيبقي هامه بصالح خدي اللي بيحبك لأن عمره م هيزعلك ولو زعلك هيبقي همه يرضيكي ، خدي المتفاهم الحنون اللي شاريكي وعايزه اوضحلك حاجه برضو بتقولي عايزه واحد قوي وغشيم علشان دا بيبقي راجل لا علي فكره مش بتتقاس كدا الغشيم ممكن يزعق يمد ايده انتي عايزه راجل كدا او شايفه كدا بيبقي راجل سوري يعني كدا مش راجل خالص دا بلطجي الراجل بذوقه واحترامه وأخلاقه وتعامله مع الست واحتوائه ليها وحنيته عليها مش بزعيق ولا بالضرب خالص الرجوله
تم النشر الأحد، ٢٢ سبتمبر ٢٠٢٤
طيب ليه علقتِه بكِ سنتين وانتِ عارفة إن شخص حنين ومش الشخصية "الغشيمة" اللي بتدوري عليها في زوج المستقبل؟ مهتمتيش وقتها ليه بالفرق المادي وإنه مش عنده عربية ومش هيقدر يعيشك العيشة اللي انتي عايشاها في أسرتكِ؟ ثانيًا، انتِ محتاجة تفرقي بين الرجولة والغشومية... مش شرط عشان شخص حنين وبيخاف عليكِ إنه مش هيكون رجل حازم وواثق وقادر وقت الجد يكون له موقف. وبعدين إيه تعريفكِ للغشيم؟ شخص بيتأمر ويتحكم في زوجته؟ هل هترضي لو ارتبطتِ بشخص انتِ معتقد إنه غشيم بمعنى حمش وبيتحكم وطلع شخص مريض نفسيًا بالتحكم وقلب حياتكِ جحيم وسجن؟ هتعملي إيه لو الغشومية دي تطورت لحد الضرب مثلًا؟ وبعدين بلاش موضوع الأبراج ده... من ناحية الإيمان بالأبراج حرام ومن ناحية تانية بتبقى تحليلات كلها كلام عايم ويمشي مع أي حاجة. المستوى المادي ده ممكن يتحل بتشجيع منك تخليه يكون عنده طموح وتحاولوا تنجحوا سوا.
تم النشر السبت، ٢١ سبتمبر ٢٠٢٤
انا مش متجوزة بس خليني أقولك من اللّي شوفته من ناس متجوزة إن الراجل الحنين المُتفاهِم بمعنىٰ صح ده بيبقىٰ لين وأحسن و فوقت الغضب مش هيرمي عليكِ اليمين وكده لاء ده بيقعد يحسبها وبيفكر فِ الوضع قبل ما يتكلم في طلاق وكده دي حاجةة بالنسبة لموضوع العيشية المادية فَ هقولك لو انتِ من جوه نفسك مش هتستحملي وتعيشي على قد جوزِك وشايفةة اني دي حاجةة ممكن بعدين تقولي ده انا كنت متعوده على كذه والجوده فَ الأحسن بلاش عشان متظلميش واحد معاكي. حاجةة كمان فرضِية انك تستني عشان ممكن حد يجي أحسن دي مش صح لإن دايما هيكون في الأحسن وكده وحتى انتي اقعدي احسبيها الراجل ده في كذه وكذه لو لقيتي انه بنسبة 60% كويس يبقى تمام اوي ده ومفهوش مشكلةة ده بالعكس شيء مُحبذ يعني... وهقولك علئ حاجةة الخطوبةة مش جواز ده راجل انتي هتشوفيه هيصلُح يكون زوج و أب لـ اولادكم ولا لاء وصلِّ استخاره وامشي في الموضوع لو لقيتي في حاجةة عطلتلك اعرفي ان ربنا بيعرفك ان ده مش مناسب،لو لقيتذ الموضوع تمام وماشي ده اختيار ربنا ليك انه مناسبِك وبس كده وربنا يوفقك.
تم النشر السبت، ٢١ سبتمبر ٢٠٢٤
عزيزتي علياء، أشعر بك وبمشاعرك المليئة بالحيرة والقلق. من الطبيعي أن تشعري بالتردد عندما يتعلق الأمر باتخاذ قرار مصيري مثل الارتباط، خاصة بعد تجربة سابقة مؤلمة. فيما يتعلق بالشخص الذي تقدم لك، يبدو أنه يحمل الكثير من الصفات الإيجابية التي تجعله مناسبا لك، مثل الحنية والاهتمام بك. ومن المهم أن تأخذي في اعتبارك أن العلاقة الناجحة تعتمد على التواصل والاحترام المتبادل، وليس فقط على الصفات النفسية أو الاجتماعية. تذكري أن الحب والحنان يمكن أن يكونا أساسا قويا لبناء علاقة سليمة وصحية. في المقابل، قوة الشخصية لا تعني بالضرورة أنه يجب أن يكون "غشيمًا"، بالعكس، الشخص القوي هو من يستطيع أن يظهر مشاعره ويكون متفهماً لشريكه. أما بالنسبة للعيش برفاهية، يجب أن تأخذي في اعتبارك أن الحب لا يتعلق بمسألة المال فقط، بل بالسعادة والراحة النفسية التي يوفرها الشريك. فكرّي في ما يجعلك سعيده وما تحتاجينه في علاقتك، واسألي نفسك: هل تفضلين شريكًا يعتني بك ويظهر لك الحب، أم أن لديك رغبة أكبر في العيش بمعايير معينة؟ قبل اتخاذ القرار، قد يكون مفيدا أن تتحدثي مع أسرتك وأصدقائك المقربين الذين يعرفون الظروف بشكل جيد. مشاورتهم قد تمنحك نظرة مختلفة تساعدك في اتخاذ القرار الأنسب لك. أخيرا، اتبعي قلبك وكوني صادقة مع نفسك فيما تبحثين عنه في شريك الحياة. الارتباط هو رحلة تحتاج إلى التضحية، الصبر، والتفاهم من الطرفين. وفقك الله في اختيار ما هو الأفضل لحياتك ومستقبلك.
تم النشر السبت، ٢١ سبتمبر ٢٠٢٤
احسن حل ليكي انك تصلي استخاره
تم النشر الاثنين، ٢٣ سبتمبر ٢٠٢٤
السلام عليكم و رحمة اللّٰه و بركاته ، هو أولاً الأبراج مبتمثلش الشخصيات أبداً ، نصيحه مني صلي استخاره و ربنا هيقدملك الي في الخير
تم النشر السبت، ٢١ سبتمبر ٢٠٢٤
استني لانك هتتعبي الشخص الحالي ده معاكي
تم النشر السبت، ٢١ سبتمبر ٢٠٢٤
لعرض السؤال في فدني اضغط هنا