بصي اصلحي ما بينك وبين الله يصلح ما بينك وبين الناس دلوقتي عندنا اربع مشاكل اولا الادمان اللي قولتي عليه وهتستفيدي من الكومنت بتاع دكتورة جهاد اللي فوقي المشكلة التانية الولاد طيب هم على برنامج التعارف ولا على مواقع التواصل عامة؟ المشكلة الأولى والتانية حلها إنك تمسحي البرامج اللي بتخليقي تشوفي حاجات وحشة أو تكلمي ولاد امسحي برامج التعارف وامسحي الفيس واي سوشيال عامة لو عليه ولاد واعملي بلوك لاصحاب السوء سواء اصحاب اعدادي او البنت اللي عرفتك برنامج التعارف ده اصل الإنسان ضعيف فمينفعش نحط نفسنا جوه الحاحات دي ونقول هنبطل لأ لازم نخرج فزيما قولتلك امسحي الحاجات دي كلها وكل ما تبقى هتعملي حاجة وحشة اتوضي وصلي لحد ما رغبتك تروح طيب كده مش هتبقي خاشعة؟ بس واحدة واحدة هتيجي واقري قرآن طبعا اول حاجة هتيجي في دماغك إن ربنا هيتقبل صلاتك وانتي بتعملي كذا وكذا أيوة هو الرحيم الكريم وبإذن الله هيتقبل تعرفي إن كان فيه واحد قتل 100 نفس وبعدين تاب فربنا غفرله؟ متخيلة رحمة ربنا؟ طيب هتوب وهرجع علشان مقدرتش تمام تعرفي ان التوبة تجب ما قبلها يعني هيبقى معندكيش ذنوب خالص؟ وهتاخدي جبال حسنات فالوقت اللي توبتي فيه وكل لما ترجعي توبي تاني لا يمل الله حتى تملوا فمتمليش وكملي ده سيدنا محمد كان بيتوب فاليوم ألف مرة والله أعلم وده معصوم من الخطأ ما بالك إحنا اللي نفسنا بتحب الذنوب؟ واول خطوة ممكن تاخديها انك تنامي بدري وتظبطي المنبه على الساعة 5 وتقومي تتوضي وتصلي الفجر وتفتحي المصحف تقري شوية وتقري اذكار الصباح وتدعي كتير إن ربنا يقبل توبتك قومي دلوقتي صلي ركعتين بالسور اللي بتحبيها وادعي وانتي ساجدة ان ربنا يثبتك ويرزقك لخشوع والتوبة ويهديكي الصراط المستقيم طيب ربنا مستاجبش؟ مين قالك كده؟ ربنا قال ادعوني استجب لكم يعني انتي دعيتي فهو استجاب خلاص اصلا بس ادعي تاني علشان الدعاء عليه ثواب وحطي في دماغك إنه هيستجيب بس الاستجابة تلات انواع لاما يحققلك اللي دعيتي بيه في الدنيا لاما يجازيكي عليه في الاخرة لاما يدفع عنك بلاء قد الحاحة اللي دعيتي بيها يعني مثلا من كلامك محدش من اهلك يعرف انك بتكلمي ولاد او بتشوفي حاجة وحشة ما ده ستر ربنا ليكي انتي عارفة انهم لو عرفوا هتحصل حاجات كتير اوحش او مثلا كان ممكن اصحاب السوء كانوا هيعملوا فيكي حاجة وربنا نجاكي منهم فربنا كريم وهو استجاب بس ادعي لحد يوم القيامة بالهداية والثبات واشتغلي على ده مش شرط تقوميمن النوم بعد ما دعيتي تلاقي الولاد اختفوا ومبقيتيش عايزة تعملي حاجة وحشة وكل حاجة اتظبطت لأ انتي حاربي وعافري علشان تعملي ده وربنا هيعينك ادام مخلصة ليه انتي نفسك زعلانة انك محققتيش حلمك مش عايزة مامتك تزعل؟ هي بتزعل علشان هي عايزاكي احسن حد فمكانتش متوقعة ده وانتي عارفة ان لو مكانش اللي حصل من اصحاب وغيره في السنة دي كان زمانك جايبة مجموع اعلى بكتير بس لسه دي مش النهاية ابدا انتي بتقولي مجالك حلو فالحمد لله ربنا اكرمك بيه اسعي فيه وربنا هيناولك اكتر من اللي كنتي بتحلمي بيه فالمجال التاني ومامتك لما تشوفك اتغيرتي هتغير معاملتها وده من بر الوالدين حاولي تتكلمي معاها تجيبيلها حاجة بتحبها ولو كيكة حتى وبجد هتفرق مش عايزة تنزلي الكلية ليه؟ فوقي انتي مش عارفه اسمك بس انتي عارفاه وعارفة انك احسن من اللي انتي فيه دلوقتي والكلية اللي دخلتيها لو رجعتي انتي بتاعت ابتدائي هتطلعي الأولى عالدفعة فقدمي المشيئة كده وابدئي صلي دلوقتي حالا ركعتين توبة وصلوات اليوم الليفاتتك ومن بكرة اصحي الفجر صليه و ابقي صلي الضحى لو عرفتي وروحي المسجد بتاع البنات اللي فالكلية صلي الصلاة في وقتها متقوليش مش بعرف اتوضى بره البيت ولا هصلي لما اروح لا الصلاة على المؤمنين كتابا موقوتا يعني لازم تتصلى في وقتها وهتلاقي ناس فالمسجد او بيتوضوا فالحمام هتلاقيهم كويسين وهيبقوا صحبة صالحة ليكي متكلميش حد عن اللي حكيتيه هنا علشان محدش يفهم غلط بس واحدة واحدة هتلاقيهم يقولولك يلا نروح نصلي وهتروحي معاهم وهتتوبي وترجعي لربنا وهترجعي احسن من الاول بكتير وهتقولي ياااه إزاي انا كنت وحشة كده وبقيت حلوة اوي كده انا متأكدة إنك تقدري وبتمنى تردي عليا هنا وتعرفيني عملتي ايه اول بأول وأنا معاكي وهدعيلك كتير ♥️♥️♥️♥️
تم النشر الجمعة، ١٠ فبراير ٢٠٢٣
الحمدلله...اكثرى منها ....طب هتحمدى ربنا ع ايه ...استشعرى النعم الكتير اللى ربنا ادهالك...النظر والسمع وايديكى اللى بتتحرك وعضلاتك اللى بتساعدك تعملى كل حاجة....شوفى بقي قد ايه الواحد ممكن يتكسف لو حد اداله هدية وهو اساء استخدامها ...ما بالك بنعم ربنا علينا . هيبقي من حقه يحرمنا من النعم دى عشان احنا بنستخدمها فى الغلط. طب اللى حصل معاكى ده كله عبارة عن فتنة .....وقعتى فيها ...بس الحلو النضيف اللى جواكى اكبر وبيشدك ليه تانى اهو ...اللمبة منورة جواكى وبتنبهك عشان تخرجى من الضلمة . كملى مجاهدة مهما انتكستى متيأسيش ابدا . اعتبرى نفسك بتنضفى اوضة بقالها كتير مقفولة ...هتاخد مجهود اه بس هتبقي فخورة بالنتيجة النهائية . الادمان احنا نصحنا نصايح كتير هتفيدك تاخديها من الاسئلة المرتبطة بنفس الموضوع.
تم النشر الجمعة، ١٠ فبراير ٢٠٢٣
هوني ع نفسك ربنا غفور رحيم . ...وربنا بيفوقك وعايزك دايما تبقي قريبه بيحيسك بالذنب والخوف عشان تقربي منه والحاجه الغلط الي بتعمليها انا مش هقولك هي حرام ازاي بس اكيد لو عملتي سيرش عنها هتعرفي حكم الدين فيها وزي مفي غلط وذنب في توبه ورجوع لربنا واستغفار وباب التوبه مفتوح روحيله وصلي وادعي ربنا ف كل صلاة انه يبعد عنك الحرام وانه يردك ليه ردا جميلا واعملي حاجه حلوه جدا جدول للصلاه وكل يوم تصلي وكل صلاه تعلمي عليها وجدول للحاجه الي بتعمليها كل يوم تعديها من غيرها علمي عليه وخفزي نفسك وامسحي اي حاجه ليها علاقه بالموضوع ده عشان متجركيش ليه تاني ونتفق اتفاق ان لقدر الله وقعتي وعملتي الحاجه الغلط ظي تعملي سلوك تكفيري وده بيكون انك تقرأي سوره النور وانك صلي ركعتين توبه وتكلعي صدقه كل مره تكرري فيها الغلط تعملي نفس الحجات دي وطبعا الرياضه مهمه جدا هتطلع طاقتك وكبتك وغضبك بشكل صحي والقرأه وانصحك تقرأي روايات دكتوره دعاء عبدالرحمن هتفرق معاكي كتير ومتيأسيش ابدا من التوبه ورجوعك لربنا انتي فيكي بذره حلوه جدا عايزه تتوب وتبقا كويسه متخليش حد او ظروف او احباط او الشيطان ينسيكي رحمه ربنا ومغفرته...وافتكري حاجه وخليها ف بالك ع طول انه ممكن تموتي ع المعصيه وتتبعثي عليها خلي الفكره دي ف بالك واتخيلي هتقابلي ربنا عليها ازاي وانتي متوبتيش منها لسه الاحساس ده كفيل يردك عن اي خطأ
تم النشر الجمعة، ١٠ فبراير ٢٠٢٣
انتي انسانة كويسة جدا .. مش علشان اللي قولتيه بس، علشان انتي لسه بتحاولي انك تتغيري. تاني حاجة ... نقدر نقول اللي وصلك ل ده ... هما أصدقاء السوء وطبعا هما ليهم تأثير كبير على حياتك .. ومكنتيش عارفه العالم التاني ده ايه اصلا .. فكان برده عندك حب استطلاع وحب انك تسمعي وتشوفي حاجات جديدة .. الحاجة الكويسة انك فعلا لما اكتشفتي الموضوع وان ده كله غلط في غلط وحرام، للاسف كنتي ادمنتي الحاجات ديه، ولكن متقلقيش لسه فيه امل. اتمنى انك ترجعي للسؤال اللي قولتلك عليه وتشوفي الاجابات وان شاء الله هتساعدك على تخطي الامر ده. قصة الولاد .. هل فيه مشكلة معينة في البيت، يعني حاسه انك مش واخده الحب اللي انتي عايزاه، مسألتيش نفسك انتي ليه بتكلمي كل الولاد دول، ايه اللي بتاخديه من الموضوع؟ مشاعر حب، اهتمام، مع اعتراضي ع كلمة حب .. لان اللي قالك بحبك ده انتي اساسا ضمناه منين، وكلمة بحبك ديه اتقالت من ورا شاشة، واتقالت من شخص انتي اساسا متعرفهوش ولا يعرفك، الكلمة ديه كبيرة جدا ... كبيرة ومحدش يقولها بالساهل بالطريقة ديه. ف ده مش حب ( ده تسلية). قصة الثانوية .. اللي حصل حصل خلاص ... المهم اللي جاي وماما انفعلت عليكي لانها بتحبك وكانت عايزاكي تجيبي احسن مجموع، مش علشان عايزة تعنفك وخلاص ... رد فعلها ده غصب عنها، فياريت تقدري موقفها وتفهمي انها بتحبك فعلا وخايفة عليكي. الكلية بقى انتي قولتي بنفسك ان الكلية ممتازة ومجالات فرص العمل عليها كويسة جدا .. طبعا كان نفسك في هندسة بس الغلط اللي بيعمله الواحد انه بيركز في حياته على هدف واحد بس، وكأنه هو الحياة وما فيها، مع ان مش المفروض ده يحصل .. انتي عارفه لما تركزي على هدف واحد بس كأنك بتقولي هو ده ومش عايزة حاجة غيره ولو مجاش انا هبقى حد ضايع في حياته. ولو الناس كلها مشاية بالنظام ده مكنتيش هتلاقي حد كمل ولا نجح ولا عاش حياته. لأ ... الدنيا بتمشي واحنا بنمشي معاها ... الا لو اختارتي بنفسك انك متمشيش .. وتخليكي زي ما انتي، بس مظنش انك عايزة ده، الا لو مكنتيش هنا الواحد لازم يبقى عنده خطط بديلة لاي حاجة بيعملها في حياته .. في شغله، في تعليمه، في حياته عموما .. علشان لو خطة فشلت يلاقي نفسه مسنود وبيكمل. اعتبري ان اختيار ربنا ليكي هو الاصلح والانسب .. وانتي لسه مؤمنة بالله اعتبريها اشارة منه .. كلية كويسة ومجالاتها متوفرة في سوق العمل .. الواحد مش هيعوز اكتر من كده. هتقولي مش شغفك ... احنا مش بندور على الشغف احنا بندور على الاحتياجات شوفي احتياجاتك ايه ووفريها. وبعدها شوفي الحاجة اللي بتحبيها بس قبل ده كله شوفي احتياجاتك. علاقتك بماما حاولي ترضيها وتعملي لها كل اللي هي عايزاه .. وعايزة اقولك انك مهما كنتي بتعملي او بتشوفي اي حاجة غلط .. اوعي تقطعي الصلاة، مش لازم ابدا علشان تكوني بتعكي في حياتك تبوظي حاجة تانية .. فهماني.
تم النشر الخميس، ٩ فبراير ٢٠٢٣
لعرض السؤال في فدني اضغط هنا