لما بشكي لأهلي سواء عن حاجة تعباني أو مشكلة بتواجهني مبلقيش رد منهم غير واحنا هنعملك اية متوهميش نفسك متشغليش بالك مشاكلك بقت كتير ماما تقولي معتيش تحكيلي عن حاجة الواحد بقا لما يشوفك بيكره نفسه ولما أسكت واتكتم واكتم جوايا يزعقولي وماما تقولي انتي خبيثة مش عارفة اعمل ايه أنا تعبت ونفسيتي في الأرض بقيت بفضل القعده في الضلمة لوحدي عن اني اقعد معاهم وبردوا بيزعقولي ولازم يكون في دماغهم عشان أنا قعده كده يبقي النتيجة ظهرت عامله مصيبة بقي ده كل اللي في دماغهم أنا زهقت خلاص لا كده عاجب ولا كده عاجب مش عارفة اعمل ايه أنا نفسيتي في الأرض بقيت طول الوقت عايزه انام مش قادرة اتحرك من وجع جسمي مفيش حتة في جسمي حرفياً مش بتوجعني بقي قلبي بيوجعني من أقل مجهود بعملة أنا مأذتش حد عشان يحصلي كده مستهلش إن يحصلي كده مستهلش إني اكره نفسي مستهلش إن الحزن والعياط من غير سبب مستهلش إن مشاعري متتقدرش ولا أن مشاكلي ملهاش لازمه أنا نفسي مليش لازمة ولا كأني عايشة معاهم كاني هوا مستهلش كل ده مش عارفة اعمل ايه
انتي محتاجه تفرغي مشاعرك دي كلها اكتبيها كل حاجه انتي حاسه بيه حتى المواقف الي بتضايقك اكتبيها لانك محتاجه تفرغي مشاعرك دي على طول وكمان طول منتي مضغوطه من تجارب ومشاعر وافكار سلبيه هتنسي مش هتقدري تركزي وهتحسي بوجع ف جسمك ويارب يكون ليكي صديقه مقربه تحكيلها ع طول عشان تحسي بالمسانده والدعم من اشخاص مقربين منك وللأسف اوقات الاهل مش بيبقوا مدركين ان تعليقاتهم وانتقداتهم لاولادهم ممكن تكون مؤذيه ..ف اتكلمي معاهم وعبري عن مشاعرك دي وكل التفاصيل الي جواكي حتى لو عارفه انهم هيواجهوها بشكل سلبي وانتي اكيد تستاهلي حياه حلوه وسعيده وانك تحققي الي نفسك فيه وخليكي متأكده ان لسه في كتير محققتيهوش ولسه هتحققيه وان الفتره دي من حياتك مجرد فاصل وهترجعي اقوى وهتقدري تبقي احسن هتلاقي طلقتك اكتر وصبرك موجود وفي امال واحلام بتحققيها بس اديلها شويه وقت وثقه ف ربنا ثم كفائتك وانجازاتك ومجهودك وانك هتبقي شخص تاني ف المستقبل شخص ناجح في مجاله وسعيده جدا على المستوى النفسي وعلاقاتك بالي حوليكي افضل بس انتي حاولي متقفيش ومتيأسيش وواجهي مشاعرك دي واي حد يقلل منك اتناقشي معاه وعرفيه ان كلامه مؤذي بس طبعا تختاري الاسلوب الي هتتكلمي بيه مع مامتك وبباكي غير اسلوب مع صحابك وتحفظي الحدود الطبيعي تكون موجوده مع الكبار في الكلام ..وان ان شاءالله هتكوني افضل
تم النشر الأربعاء، ٢٥ يناير ٢٠٢٣
فى اسئلة مرتبطة بنفس الموضوع شوفى كمان اجاباتها
تم النشر الأربعاء، ٢٥ يناير ٢٠٢٣
انا عارفه اد ايه ده احساس وحش جدا انتى تستاهلى اكيد كل حاجة جميلة واهلك اول ناس يحبوا انك تكونى فى احسن حال. عشان كده هما بيكلموكى متكونيش زعلانه وحزينة وحابين يشوفوكى مبسوطة . ممكن انتى تكونى حابه تحسي منهم باحتواء مختلف عن ده او بتقدير لاحساسك اكتر....غصبن عنهم ممكن ده يكون نقطة ضعف عندهم وده طبيعى ...مش هيكونوا بيعرفوا كل حاجة تتعمل صح ازاى...وطبعا مع اختلاف الزمن وضغوطاته مش هيستوعبوا شوية. تقبلى بس تقصيرهم وادخلى معاهم فى تبسيط الامور اكتر من كده وانتى جاهدى نفسك عشان تتبسطى لانك اول حد مسئول عن ده.
تم النشر الأربعاء، ٢٥ يناير ٢٠٢٣
القرب من ربنا فيه الراحة الأبدية
تم النشر الخميس، ١٤ سبتمبر ٢٠٢٣
لعرض السؤال في فدني اضغط هنا