انا عندي 16سنه حسا بلذنب بسبب حاجه انا وانا عندي 15سنه كنت نائمه واهلي صحوني من النوم بعد يوم طويل وكنت تعبانه زعقت وبعد كدا دخل بابا ولما دخل معرفتش اتكلم بس اترفزت وأما مشي من الأوضاع قولت ربنا يخدكو كلكو وفي نفس اليوم بابا تعب وودناه المستشفي بعد كدا اتوفي حسيت بل ذنب الي انا السبب في موتو ولو مكنتش دعيت مكنش حصل كدا ولحد دلوقتي بلوم نفسي و قبل ما يحصل كل ده كنت بروح الدروس وارجو انام واصحي بليل خالص ومشفهوش اخر فتره مشوفتش فيها بسبب دروسي وكرهت الدروس بعد كدا وخايفه أن الدروس تاخد وقتي وما اشوفش الناس الي بحبها وبقيت ازعل من غير اي سبب واتخانق معاهم في البيت علشان اي سبب تافه ومش بكلمهم سعات حسا بحجات كتير جوايا متلغبطه وحسا اني السبب في كل ده ومضغوطه ومش عارفه اعمل ايه ولما بابا اتوفي فضلت الوم نفسي ولحد دلوقتي بس بعد ما بابا اتوفي حبيت واحد بعديها بشهرين وحسا أنه ده علشان كنت محتاجه حد في الوقت ده بس كنت بحبو من طرف واحد ولسه بحبو مش عارفه ده حب حقيقي ولا لا مش بحب أبين اني زعلانه قدام حد ولا حتي اهلي بس عاوزه حد يفهمني محتاجه حد وكل يوم الوم نفسي على حاجات كتير اوي مش عارفه اعمل ايه وبخاف من نظرات الناس ليا ومعنديش ثقه في نفسي ومش بعرف اتكلم مع الناس وبتوتر ومش حبا نفسي
غفر الله لوالدك واسكنه الجنة، نصيحة بدل ما تفضلي تلومي نفسك تستغفري له دايما وكل ما تحسي انك السبب بادري بالاستغفار له والتصدق، عَنْ أَبِي هُرَيْرَةَ رضي الله تعالى عنه: أَنَّ رَسُولَ اللَّهِ ﷺ قَالَ: إِذَا مَاتَ ابنُ آدم انْقَطَعَ عَنْهُ عَمَلُهُ إِلَّا مِنْ ثَلَاثٍ: صَدَقَةٍ جَارِيَةٍ، أو عِلْمٍ يُنْتَفَعُ بِهِ، أَوْ وَلَدٍ صَالِحٍ يَدْعُو لَهُ. رَوَاهُ مُسْلِمٌ.
تم النشر الاثنين، ١١ سبتمبر ٢٠٢٣
اولا ربنا يرحم بابا ويغفر له باذن الله. ثانيا ميين قالك انك السبب ؟ ده قضاء وقدر وربنا كاتب موت والدك من قبل ما تتولدي انتي. ولو مشنا دلوقت ورا كلامك انتي قولتي ربنا يخادكوا كلكوا؟ هل ديه كانت نيتك مثلا ؟ اكيد لا .. طيب انتي قولتي ربنا يخاكوا كلكوا .. انتي بقى دعيتي على البيت كلوا؟ ليه والدك بس اللي توفى ف اليوم ده؟ ف لا طبعا ديه كله ملوش اي اساس .. ده عمره ويومه انه يتوفى .. ملوش دعوة انتي دعيتي او لا. بالنسبة بقى للولد اللي انتي بتقولي عليه بتحبيه، 16 سنة اظن ميبقاش فيه ف حياتك غير مذاكرتك واهلك .. اما الحب مش وقته نهائي، وده طبعا 100% وبأكدلك انه مش حب. لاسباب كتير .. وانتي يعتبر قولتي سبب منهم. انتي اولا في مشاكل .. واللي ف مشاكل بيحاول يشوف اي حاجه يهرب بيها، سواء بالحب او اي حاجه تاني. ف انتي هنا كمان بتحاولي تدوري ع حاجه او اي حد يحسسك بالحب .. اي حد يفهمك، اي حد يديكي شعور كويس. انتي مش لاقياه ف البيت بسبب المشاكل اللي موجوده، وبسبب حزنك على والدك وعقدة الذنب. حاجه كمان .. انتي ف الوقت ده بتبقى المشاعر اللي موجوده مش بتبقى حب، ديه بتبقى مشاعر عابرة، اعجاب، انجذاب .. وطبعا فالسن ده كله بيترجمها حب .. لان طبعا انتي لسه لم تصلي لمرحلة النضوج الكافي انك تقولي ع الشخص ده انك بتحبيه، وكمان هل هو ده الشخص اللي انتي عايزاه مستقبلا يبقى زوجك؟ السؤال ده صعب جدا انك تحدديه فالوقت ده - خاصة ان شريك الحياة مش بنختاره ع اساس الحب وبس فيه حاجات كتير ومواضيع كتيرة تنقصك في المرحلة العمرية اللي انتي فيها. ف لما يجي وقتها هتبقى مدركة حاجات اكتر. متستعجلش ع الحب والجواز هيجي هيجي .. بس بوقته. ده اهم حاجه في الوقت المناسب.
تم النشر الثلاثاء، ١٢ سبتمبر ٢٠٢٣
أولاً ربنا يرحم والدك و يغفر له يارب بصي اتواصلي مع أخصائية نفسية و ده علشان هي هتساعدك في تخطي الاحساس بالذنب الي انتي بتمري بي خصوصاً أن عدا سنة علي الوفاة و انتي مش قادرة تتخطي الاحساس بالذنب ف هي هتساعدك و هستمعك و كده و في برامج تقدري تحجزي مع أخصائية نفسية اونلاين زي برنامج أسمه شازلونج بس طبعا الأول قولي لمامتك و ان شاء الله هي هتتفهم الموضوع و تساعدك. بالنسبة لموضوع انك حاسه بالذنب لأنك مكنتش بتشوفي كتير في الفترة الاخيرة اعرفي أن ده كان غصب عنك وقتها و كان علشان دروسك وقتها و أن شاء الله بعد عمر طويل ليك هتشوفي في الجنة و كل ما تفتكري ادعيله كتير اوي علشان ده الي هيوصله دعائك لي و تصدقيله حتي لو بجنيه لأي حد غلبان، يقول النبيُّ ﷺ" إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له"، ولد صالح في الحديث هنا بمعني أن حد من أولاده صالح و قريب من ربنا يدعيله بالرحمة و المغفرة. احساس انك خايفة متشوفيش الي بتحبيهم بسبب انشغالك ده، في فكرة بسيطة كده ممكن تحددي يوم في الاسبوع تكوني فاضية فيه تكلمي كل الي بتحبيهم في موبايل و تطمني عليهم، أما بالنسبة لأهل بيتك اقعدي معاهم في اوقاتك الفاضية بدل مثلا ما تقعدي علي سوشيال ميديا و كده و قربي منهم و عبريلهم عن حبك ده كله هيساعدك في انك تبقي احسن و تتخلصي من احساس الخوف ده. اما بالنسبة للشخص الي بتحبي ده، في كذا حاجة تدل أن ده مش حب حقيقي أولا انتي في مرحلة مراهقة و لما هتتخطيها بنسبة ٩٠٪ الشخص ده مش هتبقي معجبة بي بعد كده، تاني حاجة انتي محتاجة حد جنبك علشان كده ممكن تنجذبي لأي حد بسهولة بحثاً لحد يسمعك و يقف جنبك في الفترة دي بس خلي بالك ارجوكي و لما تلطبي المساعدة من حد اطلبيها من حد موثوق لأن حطي في بالك أن ممكن احتياجك لحد جنبك في الفترة دي يوقعك في ناس مش كويسة لقدر الله
تم النشر الاثنين، ١١ سبتمبر ٢٠٢٣
انتي بالنسبة لاحساسك بالذنب أن انتي السبب في موت ابوكي فانتي المفروض ما تحسيش بالذنب خالص لان ده قدر ومكتوب يعني انتي سواء دعيتي عليه او لاء ربنا كان كاتبله عمر وانتهي وبالنسبة لمشكلتك التانية أن انتي متلغبطة فده أمر طبيعي لان الهرمونات عندك بتتغير وكمان النرفزة من اي سبب دي بسبب أن انتي متوترة من بعد موت ابوكي بس انتي متزعليش لأنه أن شاء الله دلوقتي في حته احسن مننا وكلنا هنموت بس انتي المفروض تحاولي تهدي شوية والحاجات اللي بتضايقك وبتوترك ابعدي عنها خالص وحاولي اتقربي من ربنا اكتر ومع الوقت أن شاء الله كل حاجة هتتحل بس انتي متوتريش نفسك وبالنسبة لكلامك مع الناس فانتي ممكن لو عندك صحاب مقربين منك فانتي ممكن تخرجي معاهم وشوفي هما بيتعاملو مع الناس ازاي من غير توتر وحاولي كوني صداقات جديدة كل يوم وبكده هتقدري تخففي التوتر اللي عندك في الكلام مع الناس وبالنسبة للثقة فانتي المفروض تثقي بنفسك لأن انتي جميله من جوا ومن برا
تم النشر الاثنين، ١١ سبتمبر ٢٠٢٣
لعرض السؤال في فدني اضغط هنا