حبة فضفضة قد كده🤏🏻
(انا رغاية وبحكي بالتفاصيل فلو وقتك مهم متقراش🥸)
بعيدا اني بحس كلمة الوحده اوفر شوية لوصف حالتي لان الحمدلله عندي اهلي يعني حياتي مش فارغة تماما ولكن انا انسان رغاي جدا رغم اني انطوائية بس لما بحب اي حد وارتاحله ببقى رغاية من الدرجة الاولى وبحب اشارك يومي جدا واحكي دايما اللي جوايا علشان لما مبحكيش او اتكلم بحس بالوحده ديه وبحس اني براكم دايما جوايا مشكلتي بقى اني كان عندي بدل الواحد عشرة اتكلم معاهم كان عندي بنتين في الجامعه دول اقرب ناس ليا خسرت واحده منهم والتانية لسه صحاب بس هي مش الشخص اللي ممكن ارغي معاه من غير ما احس اني بزعجها لاني دايما بخاف اكون تقيلة فبتجنب ارغي مع اي حد.
لحد من فترة كبيرة حوالي سنتين ونص عرفت ولد وبقينا صحاب اوي وقربنا وهو اصغر مني بسنه مكنش في دماغي حاجه ناحيته بس كنت مبسوطة اني بمارس رغيي ومشاركة يومي مع حد مبيزهقش من ده ومبيحاولش يتجنبني بالعكس هو كمان رغاي زيي وبيشاركني يومه وكل تفاصيل حياته قاللي ان عنده صحاب عالسوشيال مدخلنيش جروباتهم او عرفني عليهم انا اللي كنت بدعبس وراه ولقيت جروب من الجروبات ودخلته وكان كل هدفي اني اكون معاه في الجروب مش اكتر (مستحيل اعمل كده لو حد غريب بس انا متاكده انه مكنش متضايق من وجودي فعملت كده من غير تفكير) بعدها عرفت الناس اللي في الجروب كانو ولاد وبنات وكلهم كانو اصغر مني بسنه زيه وحبيتهم اوي وهم كلهم كانو بيحبوني ويحكولي لو عايزين يفضفضو او يتكلمو وبجد كانو محترمين وطيبين جدا.
بعدها بفترة ارتبطنا (كان نفسي احكي تفاصيل الارتباط علشان ديه قصة لوحدها بس نسكيب دلوقتي).
بعد ارتباطنا بفترة بدا يكره حتة ان في ولاد بيهزرو معايا في الجروب وبدا يشد بس مكنش بيقولي اخرجي من الجروب كان بيحاول ميخنقنيش او يتحكم فيا علشان مفيش بيننا حاجه رسمي بس انا مكنتش عنادية في الحتة ديه ولما فهمت انه بدا يتخنق خرجت من الجروب من غير ما يقولي وبعدها بفترة كبيرة يعني كام شهر حصل بيننا شوية مشاكل زي اللي كانت بتحصل دايما عادي مش حاجه كبيرة يعني بس طولت شوية وانا معنديش مشكلة هنا انا عارفة اننا هنرجع انا مشكلتي اني ادركت اني وحيده من غيره يعني بجد حسيت ان مكنش ينفع اللي حصل ده مكنش ينفع ابعد عن الكل واكتفي بيه بس لان هو بجد كفاية بس مش هيكون كفاية لو بعدنا انتو فاهمين حاجه؟
اخيرا وليس اخرا انت انسان عسل علشان وصلت لهنا😚♥️
ربنا يكرمك يارب...حابب ألفت انتباهك لحاجة بسيطة..مش هتاخد منك دقيقتين..وهو إنك تبحثي عن الحكم الشرعي، يعني هل يجوز إني اكلم ولد واقول إني ارتبط وكده ولا مينفعش؟ وهو ممكن يكون أمر غريب بالنسبالك بس مش هياخد منك حاجه.. وبالتوفيق يارب
تم النشر الخميس، ٤ يوليو ٢٠٢٤
يا حبيبتي، حاسة بيكي جدًا والله. كمان السطور دي مفيش فيها رغي كتير، بالعكس، بتحكي ببساطة وإحساس. أول حاجة بقولك ربنا يساعدك ويريح بالك. لازم تفهمي أن الوحدة شعور طبيعي، والكل بيحس بيه من وقت للتاني، حتى لو عندنا ناس بنحبهم حوالينا. المشكلة انك حسيتي انك اعتمدتي عالشخص اللي بتحبيه كليا، ومش لاقية نفس الدعم اللي كنتي بتلاقيه من قبل ما يبقى في مشاكل بينكم. ممكن تبدأي تستعيدي علاقتك مع الأصدقاء اللي كانوا قريبين منك. ارسلي رسائل بسيطة للأشخاص اللي بتثقي فيهم وحسيتي معاهم بالأمان زمان، حتى لو الرسائل دي كانت مجرد "ازيك" أو "وحشتيني". وابدأي تفتحي نفسك لعلاقات جديدة على مهل، حتى لو مجرد صداقات سطحية، بس عشان متبقاش بتحملي كل الشيء على شخص واحد بس. من ناحية تانية، حاول تتكلمي معه بصراحة عن اللي بتحسي بيه. قولي له إنك محتاجة مساحة وأصدقاء تتكلمي معاهم، وإن ده مهم لصحتك النفسية. لو هو بيحبك بجد وبيقدر اللي بينكم، هيفهم ويقدر. في الآخر، خلي عندك ثقة بنفسك أكتر شوية واعرفي إنك قوية وتقدري تتغلب على أي حاجة. وأنا هنا لو عاوزة تفضفضي تاني أو محتاجة نصيحة. ربنا معاكي ❤️
تم النشر الأربعاء، ٣ يوليو ٢٠٢٤
لو انتي متضايقه انك بترغي كتير مع أن دا عادي حتي أنا كدا 😂 جربي تكتبي جيبي سكيتش حلو واكتبي فيه كل يوم بليل عن يومك ودماغك هتفضي بجد الكتابه حلوه اوي وبتشفي كمان وبتعرفي تحللي المواقف من خلالها
تم النشر السبت، ٦ يوليو ٢٠٢٤
ده عادي ، اي حد بيحب يفضفض كتير مع الشخص اللي بيرتاح معاه
تم النشر الجمعة، ٥ يوليو ٢٠٢٤
لعرض السؤال في فدني اضغط هنا