انا مشكلتي اني انا حبيت حد من قرايبي علاقه حب من طرف واحد.
والمشكله ان انا بحبها بطريقه رهيبه جدا من زمان جدا وهي كانت طفله وهي رفضاني بطريقه فظيعه صدتني بطريقه وحشه جدا. لدرجه ان هي تنمرت عليا بطريقه يعني غير مباشره ومع ذلك انا متمسك بيها.
وشايفها احسن حاجه في الحياه في الدنيا كلها وبحاول ان انا انساها بلاقي نفسي مش عارف مش عارف اركز في شغلي مش عارف اركز في دراستي مش عارف ركز في اي حاجه.
حاولت اتحايلت كثير تديني فرصه هي وامها اللي هي تبقى خالتي رفضوني بردو بطريقه من غير نقاش بيجبوها في النصيب مع انهم كانو موافقين بس مع الوقت كل يوم كنت بحس أن في تراجع في العلاقه
وانا لما بتوتر برغي كتير عابت عليّ اني بكلمها وكل لحظه زهقت مني قالت انت طول اليوم بتكلمني مش استحملتني هي بتوحشني نفسي اكون معاها دايما من لهفتي عليها اتصرغت بطريقه خلتني ألغي شخصيتي عشان توافقها علي اي شيء ومتكنش مضايقه بس هي مش قدرتني
قالت انت كويس بس انا مش حاسة بيك وانا حاليا بدمر نفسي وبقيت اعمل أمور مستغربها مش انا ده
بدعي ربنا تكون من نصيبي وتحبني لما بقولها كده بتضايق اوي وقالت ليه انت موقف حالي الحب ده ذلني اوي انا لما كنت بشوفها مضايقه كنت بتجنن عشانها ولما كانت تبتسم كنت بحس برضا وفرحه كبيره هي اول حب ومش عاوز اتجوز غيرها
هي فيها عيوب وانا فيه عيوب بس ده طبيعي احنا بشر بس انا قولتلها هتغير عشانك عشان متشابه ونكون مع بعض
مسحت رقمها عشان انساها مفيش فايده نفسي اعرف هي عاوزه ايه بس وانا مستعد اموت عشانها هي طيبه جدا جدا وبثق فيها جدا وهي تستاهل العذاب اللي انا عايشه بس فكره البعد ده بتخليني في انهيار
اصعب حاجه انك تكون عارف الصح والغلط وعارف المفروض تعمل ايه ومش قادر تدوس علي قلبك في مره بقولها بحبك قالت معلش بكره تنسى مش باكل من الكلام ده مع اني مش عملت حاجه تزعلها عشان انا انطوائي منعزل مع اني بتغير قولتلها اديني سنه وهتغير وحاليا كل يوم يتقابل حد في بيتهم.
انا عايش حاله تعب في قلبي وجع حاسس اني هموت وكل تفكيري اني اكلمها وبمنع نفسي نفسي اروح لها الشغل عارف انها هتشتمني
السلام عليكم ورحمه الله وبركاته. الحاله اللي انت فيها دي لو بصينا من اتجاه من النفس فهي حاله تعلق مش حاله حب حاليا انت حصل عندك التطورات من اول الانجذاب وان انت شفت في حاجه مميزه في قريبتك علشان كده. انت بدات تزود الانجذاب ده بانك تتعلق بيها اكتر واكتر وتوجه كل مشاعرك ناحيتها وتبدا تحط كل تخيلات حياتك المستقبليه مع الشخصيه دي فقط لا غير طبعا كل اللي انت عملته هو اللي عزز ارتباطك بيها نفسيه وشعوريا. ده الجزء الخاص بعلم النفس، ندخل في الجزء الثاني اللي مسبب لك المشكله الاكبر انه رغم ان انت اخدت الخطوات الطبيعيه وجزاك الله خيرا ما عملتش حاجه غلط ورحت واتقدمت لها ولكن اتقابلت برفض منهم وده شيء طبيعي جدا انا ممكن اكون شايفه حد مناسب وهو ما يشوفنيش مناسب لذلك مش المفترض ان احنا. ناخذ الامور من الاول بتعلق قبل ما نشوف الطرف الثاني وضعه ايه؟ نكمل بقى المشكله هنا حصلت امتى لما انا فقدت الجزء التاني من التعامل مع الامور اللي انا ما اعرفهاش فاني حطيت احتمال واحد في المستقبل ولغيت باقي الاحتمالات. هنقول كده حاجه من اللي ربنا يعني ارشدنا اليها بان احنا ازاي نتعامل مع الغيبيات وازاي ان احنا نحط احتمالات بطريقه صح؟ ربنا عز وجل قال لنا وعسى ان تكرهوا شيئا وهو خير لكم وعسى ان تحبوا شيئا وهو شر لكم. يعني خلي بالنا نخلي بالنا نخلي بالنا ان احنا ممكن نحب حاجه قوي ونشوف انه يعني الحاجه دي هتبسطنا قوي قوي قوي قوي ولكن يكون فيها الشر او العكس حاجه نكون مش بنحبها او بنقول لا انا مش مرتاح للحاجه دي ويكون الحاجه دي هي اللي فيها الخير لينا. علشان كده احنا من الافضل ان احنا ناخذ بالنا من النقطه دي كويس قوي لما تبدا تحصل احداث حوالينا في حاجه احنا بنحبها قوي ومع ذلك كل الظروف وكل الاحداث عماله بتحصل انها تبعدنا عن الحاجه دي دي بتكون علامه احنا ضروري نتنبه لها انه ربنا بيقول لنا ان الحاجه دي مش انسب حاجه لينا وما فيهاش خير لينا ووارد جدا يكون في فيها شر إيه ده هي ممكن تكون حاجه حلوه وبنحبها ويكون فيها شر ايوه هو الشر ممكن يجي منين شر ممكن في امور زي امور الزواج انها ممكن تيجي من عدم التوافق ممكن تكون شخصيه كويسه جدا جدا وما فيهاش عيوب يعني فظيعه ومليون حد يتمناها بس تكون مع شخص محدد هتعود عليه بالسلب وبالشر لأن هي مش هتساعده ان هو يكون احسن ممكن شخصيه تكون قياديه طب لو شخصيه قياديه وكانت مع شخص قيادته ضعيفه فهنا هي ممكن تمثل له شر ليه لانها مش هتشجعوا ان هو يبقى قيادي هو كان محتاج حد يكون مشارك اكثر ما يكون قيادي وهكذا فانت ما تعرفش فيه ايه علم الغيب بيقول انه هي مفيهاش خير ليك انت بس مش قادر تقتنع ده مش قادر تشوف ده عشان كده كويس قوي على النقطه دي على الجزئيه دي عشان هتفرق معاك كثير قوي في تقبل انك لازم تتخلص من التعلق ده.
تم النشر السبت، ٨ فبراير ٢٠٢٥
السلام عليكم، متفهمة مشاعر حضرتك وحبك لها لكن أنت وصلت لمرحلة تعلق شديد ومحتاج وقفة مع نفسك تعالج التعلق ده عشان تبدأ تفكر بهدوء وعقلانية، مش بقول لك تتخلص من كل مشاعر الحب ناحيتها لكن بس التعلق المرضي اللي بيدفعك تتصرف بتهور معها تصرفات أنت نفسك مش حاببها ومستغربها من نفسك. كلامك بيقول إنها كارهاك وخليني أقول لك متحاولش لأن كل محاولاتك لإقناعها إنك اتغيرت أو هتتغير ولسه متمسك بها هتخليها تقاوم وتكره أكتر. أنا بكلمك من وجهة نظر بنت... البنت لو أحست إن حد هي رفضاه مصمم بالطريقة اللي وصفتها في كلامك لا شعوريا صدقني الموضوع بيقلب معها لرفض نفسي وكل ما بتزيد انت الضغط والإصرار كل ما هيزيد نفورها من الموضوع ومش هتفكر فيه أصلا. مش متأكدة إذا كان الشباب بيحسوا نفس الشيء ناحية البنت اللي تكون مصرة على القرب من شخص هي بتحبه وهو رافضها ولا لأ... بس ده أنا فاهماه في البنات وشفته كتير. ** رأيي، وقف كل اللي بتعمله وابعد شوية. البعد هيعطيك أنت وهي الفرصة تشوفوا العلاقة دي بصورة أوضح. مين عارف ممكن مشاعرها تتغير لما تحس إنك بتبتعد وفقدت اهتمامك بها... ممكن تبدأ تشوفك بعين تانية. ممكن انت لما تتجاوز التعلق تبدأ تشوف العيوب اللي مرآة الحب عامياك عنها دلوقتي وتلاقي إنك متقدرش فعلا تتعايش معها بعد الزواج. ** صلي استخارة وابدأ تعافى من تعلقك وابعد زي ما قلت... متحاولش تشوفها ولا تتواصل معها بأي طريقة واشغل نفسك في حاجات تانية حتى لو لسه بتفكر فيها ومتعذب... استحمل شوية وإن شاء الله يحصل خير. ربنا يقويك ويوفقك للخير إن شاء الله.
تم النشر السبت، ٨ فبراير ٢٠٢٥
مشكلتك الحقيقه انك محتاج تحب نفسك الحب سند الحب راحة بال الحب سعاده وأمان والبنت دي مش هتوفرلك غير كل ألم وحزن مش غلطتها مش ذنبها انها محبتكش لكن مستقبلك أهم ومعتقدش ان ده الحب الحقيقي ليك ده بس الحب الأول الحب الحقيقي هيخليك سعيد المهم اشتغل على نفسك والأيام هتثبتلك كلامي من مُهلكات النفس ؟ لمّا يعتمد مزاجك على شخص. اليوم قرأت عبارة ومسَحت على قلبي بكل دفئ، تقول: "إن الله إذا شاءَ أمرًا كان، ولو عَارضه كُلُّ أهل الأرض، ولو عُدِمت أسبابه، ولو وقف كُلُّ شيءٍ في طريقه، إذا شاء الله أمرًا فلا مردّ له ".
تم النشر السبت، ٨ فبراير ٢٠٢٥
حضرتك محتاج تحط نقطة وتبدأ من جديد ويكفي محاولات اعمل كده بنية إنك بتتقي الله في نفسك وبتكرمها عشان هتسأل عنها أو ممكن نية إدخال السرور على أهلك لما يشوفوك أحسن من الأول لو ربنا رايد إنها تكون من نصيبك هتكون ولو لأ مهما عملت مش هتكون إنت عملت اللي عليك وحاولت وسعيت وصبرت يبقى آن الأوان إنك تحاول في الإتجاه المعاكس
تم النشر السبت، ٨ فبراير ٢٠٢٥
عشان كدة ربك امرنا بغض البصر عشان منتعلقش بالطريقة الصعبة دي ،غض بصرك عنها و اشغل نفسك بشغلك و ركز في دنيتك اما لو قعدت فاضي طبيعي تيجي في بالك ولو بصيت عليها كتير طبيعي هتحبها اكتر عشان انت انسان و الانسان أجوف و ناقص ميقدرش يتحكم بشهواته ،قرب من ربنا كدة و ان شاء الله يرزقك بالأحسن منها بس لازم تغض بصرك عنها و عن كل الاجنبيات سواء قرايبك او مش قرايبك و تعلقك بيها ده وحش و بقى بالطريقة دي مضر ليها وليك احسن حاجة تعملها دلوقت انك تبعد و تشغل نفسك بحاجة مفيدة بعيدآ عن قصص الحب و الكلام ده و ركز في شغلك و حياتك و ربك هيرزقك بنصيبك ان شاء الله
تم النشر السبت، ٨ فبراير ٢٠٢٥
لعرض السؤال في فدني اضغط هنا