للاسف انا اتقدمت لبنت ومعرفناش من الطرف اللى وصلنا ليهم انها حافظه القرآن و دكتوره وانسانه محترمه فمسألناش كتير. وحصل خطوبه وقعدنا ٥ اشهر و كتبنا الكتاب وبعدها ب ٥ اشهر كان الفرح.
انا حبيت البنت جدا ومكنش لى اى علاقات قبل كده فمكنتش بحط فى دماغى ان لما البنت مرات كتير تقولى "على فكره احنا لسه فيها" كنت بعدى واجى على نفسى. ولما مضيت على القايمه يوم كتب الكتاب اتقالى انها قايمه صوريه وبعد منجيب الحاجه هنبقى نعدلها وده هنتكلم فيه قدام.
اتجوزنا وحاولت اسعدها بكل الطرق الا انى عمرى مكنت كفايه عمرى محسيت انها سعيده من قلبها دايما فى نكد حتى فى احسن اوقاتنا واحنا فى شهر العسل مثلا مسافرين كانت بتنكد وهى قاعده على البحر! كنت بعدى وعادى يعنى البنات كلها كده انما دى كانت طبيعتها انسانه عنيده جدا ومبتقبلش الرأى التانى يأما تنكد وتتقمص. قعدنا مع بعض ٧ شهور يمكن نصهم كان نكد وخصام.
المهم بعد ال ٧ شهور دول البنت قالتلى هتروح تقعد عند اهلها يومين عشان فرح قريبتها وافقت وراحت قعدت ٥ ايام ولما كلمتها اكتشفت انها مش هتيجى الا اما اروح اجيبها وبعدين لقيتها خدت دهبها كله وادوات شخصيه وشنطه ضهر مليانه هدوم! فطبيعى ده كله مش ليومين الموضوع مترتبله. وبعدين اكتشفت ان امها من فتره كانت اتكلمت فى حقى وكلام بيحصل بينى وبينى زوجتى واسرار اوضة النوم وتعيب فى وتقول انا بنتى صاغ سليم لم يتكلموا فى الخلفه! وعارفه انا قبضى كام! وتفاصيل شخصيه عنى. وكل ده وامى مخبيه عنى.
روحنا لابوها بعد مقعدت ١٠ ايام وكان انسان سلبى بشأن غلطاتها معايا وبعدين كلمناه فى موضوع القايمه انه يعدلها زى الواقع وفى حاجات كتير مكتوبه ومجتش وحاجات مكتوبه بأسعار اعلى من سعرها ب ٤ و ٥ مرات وحاجات تانيه كنا متفقين انها عليه ومعملهاش انا اللى عملتها ومع ذلك كاتبها على باضعاف اسعارها. فرفض بشده بدون وجه حق مع انه كان وعد منه انها هتتعدل لما الحاجه تيجى خصوصا القايمه كانت قبل الفرح والفرش ب ٦ اشهر.
وحاليا بقالها اكتر من ٧ اشهر عند والدها حاولنا نقعد معاه عرفى فى وجود ناس اكتر من مره بحيث نصلح مش راضى وبيقول مبقعدش مع حد وبلده مفيش فيها شخص كبير او عمده يتقعد معاه. و مؤخرا كان باعت ناس مكانه عشان يشوهوا سمعتنا قدام قرايبنا فطلبونا نحضر ولما حضرنا واتكلمنا الناس وقفت فى صفنا ووافقوا على الكلام ومع ذلك هو موافقش.
الناس دى لما راحت لحمايا موافقش بالعكس ده قال ان القايمه مش هتتعدل الا فى الزياده! ولازم يمضى على وصل امانه وياخد شقه بره رغم انها قاعده فى شقه ١٦٠ متر لوحدها واهلى كانوا شايلنها فوق راسهم.
دلوقتى والدها رافض انه يقعد مع اى حد و لو عاوز اصلح فدى شروطه ياما يطلق و ياخد كل حاجه فى الشقه وياخد المؤخر والنفقه رغم انها رغبتهم هى الطلاق بس سايبين بنتهم بقالها ٦ اشهر بره بيتها لحد مانا اطلب الطلاق. اى اهل دول؟ واى اب اللى يسمح لناس تروح تتوسط عشان تحل مشاكل بنته وهو عايش مماتش؟ بعيدا عنى وعن الظلم اللى ظلمهولى بيظلموا بنتهم بتعليقتها مع اننا مرحبين اننا نقعد مع ناس تحكم مبينا سواء فى صلح او طلاق انما هو رافض عشان مش عاوز حد يمسك عليه كلمه خصوصا انه انسان مبيلتزمش بأى كلمه قالها وخاين وكذاب.
للأسف الموضوع اتكشفلى متأخر ان حماتى هى اللى متحكمه فى بيتها وحمايا ملوش اى كلمه. ده عمره مرد على الا وهو قاعد جمبها وفاتح الاسبيكر. وحماتى كانت بتهيأ بنتها لنفس الدور. البنت على طول كانت تسألنى عن المرتب ولما روحت شركه جديده وقولتلها مصدقتنيش وقالتلى ورينى العقد وانا فعلا مكنتش استلمت العقد وعرفت بعدها انها دخلت تدور عليه فى اوضة مكتبى!
للأسف البنت كانت تنفع وتعيش ولحد دلوقتى بحاول الاقيلها اعذار ولحد دلوقتى بحبها الا ان اهلها أسوأ اهل ممكن يتناسبوا مبين اب خاين للأمانه ملوش كلمه وام متحكمه وتدخل فى شؤون بنتها وشؤونى لان مفيش راجل يوقفها عند حدها.
الموضوع ده مأثر على نفسيتى جدا وشاغل كل تفكيرى لانى عمرى مقصرت كانت بتطلب فلوس بديها كنا بنخرج شبه اسبوعيا نتغدا بره بمبلغ مش قليل عاوزه هدوم ماشى عمرى مبخلت عليها ماديا ولا حتى بمشاعرى كنت بحبها جدا ومستغرب انا ازاى هونت عليها تفرط فيها عشان حاجات ظلم فى القايمه طول ال ٧ شهور اللى هى عند والدها متصلتش على مره واحده!؟ البنت دى عمرها محبتنى وولاسف الواحد كان عبيط وموقفتهاش عند حدها فى مواقف كتير لدرجة انه تم استغلالى.
للاسف اتخدعت بحفظها للقران انما شتان بين كونك حافظ للقران وانك تعمل بيه. القايمه اللى كتبوها ومضونى عليها قبل مالحاجه تيجى ب ٦ اشهر دى ليست الا لان البنت تلوى دراعى وتمشى فى نفس سكة امها مع ابوها.
للاسف انا مناسبتش راجل كان انسان خاين وكذاب.
وبرضو الواحد اتسرع كان المفروض الخطوبه تزيد عن كده. لان من اول كتب الكتاب والكلام الجميل ظهر واحنا لسه فيها والشغل ده.
الموضوع بقيت اشوفه انه كان مصلحه ومرسوم لكده واحده اتجوزت ٧ اشهر وهتطلع بدهب ب ١٥٠ الف وقايمه ب ٣٠٠ الف و مؤخر ونفقه اقل حاجه ٥٠ الف. نص مليون فى ٧ شهور.
انا فعلا نفسيا فى أسوأ حالاتى وطبعا مأثر على شغلى وتفكيرى وصحتى وكل حاجه لان الواحد كان هدفه يستقر ويحب ويعيش حياه طبيعيه بس حصل العكس تماما.
انا ٢٦ سنه ومستصعب الموقف بالنسبالى انا اصلا! يعنى ازاى ٢٦ سنه ومطلق ولو دخلت بيت هقول ايه؟ لما اقولهم انى طلقت قبل كده. ده فى حد ذاته كفيل يسيب انطباع اولى مش كويس. ده غير انى ازاى هدخل علاقه تانى اصلا وانا لما قدمت كل حاجه وحاولت أسعد الانسانه اللى كانت معايا استغلتنى هى واهلها.
مفيش فى ايدى غير انى اقول حسبى الله ونعم الوكيل وربنا عالم انا عاملت البنت دى ازاى وحبيتها ازاى وهى باعتنى ازاى.
أولا أحب اقولك كلمة قبل ما اقول وجهة نظري في موضوع أرفق بنفسك شوية زي ما قدمت للبنت دي كل الحب و هي مقدرتش قدم لنفسك كمان الحب ده ، و متفكرش في الارتباط و تجربة تانية انت لسه متعفتش من التجربة دي لازم تاخد وقتك و تتعافي منها أولا...ممكن نفسك في الوقت ده تكون محتاجة حد يسندها و يهون عليها ده طبيعي جدا و ساعتها هتفكر ترتبط بس لما هتخش في علاقة ارتباط و انت لم تتعافي من تجربة الاولي هتلاقي نفسك بتظلم الشخص الي معاك ده و هتلاقيك عايز كل الحب و الاهتمام منها المبالغ فيه بس انت مش هتقدر تبادر بحاجة و مش هتقدر تديلاه انت كمان طاقة حب ف ساعتها طرف الآخر هيكون مظلوم ...ف لابد انك تاخد وقتك في معافاة من تجربة دي و ان شاء الله لما تفكر في الارتباط مرة اخري و الشخصية الي هتروح تتقدملها هتشرحلها بكل بساطة عن تجربتك السابقة و هي ساعتها هتعرف انك الطرف المظلوم مش ظالم. الأهم انك تتعلم من تجربة دي كويس اوي متخليش حد يستغلك و متأمنش لناس انت متعرفهمش بسهولة بس ده مش معناه انك تكون شاكك في كل الناس او عندك سوء ظن بيهم احمي كل الافعال السلبية الي ممكن ترتب عليك نتيجة التجربة دي يعني خليك معتدل متأمنش لأي حد بسهولة و في نفس الوقت متخلي موضوع يوصل معاك لشكوك كبيرة في كل الي حواليك لأن ده وارد يحصلك بعد التجربة دي اظن انت دلوقتي بقا عندك وعي كافي عن الأول زي انك قولت فعلا مدة خطوبة قصيرة جدا كمان متعارف عليه ان الخطوبة دي الطرفين بيظهروا فيها اجمل ما فيهم و ما بعد جواز بيكون مختلف انت اختزلت فترة دي جدا مقدرتش تعرف فيها شخصية الي هتتجوزها ولا الاهل كمان و زي ما بيقولوا الأصل غالب البنت بتبقا شبه الأم في الاغلب و شبه البيئة الي اتربت فيها . في حاجة لحظتها في كلامك انك بتقول هي كانت علي طول بتسألك عن مرتب دي شئ مش وحش ان تشارك زوجتك كل حاجة بس الي كان وحش بجد انها كانت حطاك في موضع شك و مش واثقة فيك حتي في امر بسيط زي ده و تدور علي العقد. احساسك بالظلم و احساسك بخيبة الأمل و كل الاحسايس دي هتروح مع الوقت اديلها وقتها بس و اهتمامك بنفسك و بشغلك و انك تدور علي طموحات و احلام جديدة بعيد عن الحياة العاطفية حالياً فقط (مؤقتاً إلي أن تتعافي من هذه تجربة) هيحسن نفسيتك جدا و اقرأ و ثقف نفسك و القراءة كنز بجد هتخلي عندك وعي اقرأ في مجال علم نفس علشان ده هيساعدك في انك تتعامل مع نفسك في فترة دي و ازاي تساعدها تتخطي تجربة دي. و متنساش أن مفيش حق عند ربنا بيضيع حتي لو ربنا مخدلكش حقك منهم في دنيا هتعرف تاخده منهم في الآخرة ربنا مبيسبش حد ظالم . اتمني لك حياة اجمل ان شاء الله
تم النشر الأربعاء، ٥ يوليو ٢٠٢٣
أنا مخي بيقف قصاد الناس دي وتصالحهم مع افتراهم وظلمهم بجد يارب عافي قلوبنا بصرآحه لازم محامي شاطر وهو هيعرف يخرجك من العك ده وبشرع ربنا بلاش تاخد رد فعل ميرضيش ربنا وتبقي زيهم خليك ماشي صح وحقك هيرجعلك وحسبي الله ونعم الوكيل كفيله جدا جدا
تم النشر الثلاثاء، ١٤ مارس ٢٠٢٣
بص الي مريت بيه صعب جدا واحتسب حقك عند ربنا ربنا شايف ومضطلع ع كل حاجه وشايفه ظلمهم ليك .. واوقات ربنا بيحط قدامك تجارب زي دي عشان معنى عند ربنا واحده عارفه هتفهمه مع الوقت وهتفهم كمان انه قد ايه بعد عنك شر كبير وعوضك بيه عن خير كبير وبالنسبه لموضوع طلاقك لما بتروح تتقدم لعروسه تانيه اهلها بيسألوا عندك وعند اهل طليقتك وبيتعرف سبب الطلاق الفعلي وفي ناس كتير بتبقا شاريه راجل فعلا مش باصه ع شويه فلوس وقايمه وده رزق ربنا شايلهولك وقت تاني مع واحده هتحمد ربنا انك سبت الي معاك ورزقك بيها ثق ف حكمه ربنا وف قضائه وصلي شكر لربنا انه نجاك وادعي ربنا يعوضك عوض الصابرين
تم النشر الثلاثاء، ١٤ مارس ٢٠٢٣
أعتقد أن موقفك صعب جداً وأنك تعاني من حالة نفسية صعبة جداً. ليس من السهل أن تواجه مثل هذه الأمور وخاصة عندما تشعر بأنك قد تم استغلالك. من الأفضل الآن أن تركز على نفسك وتعيش حياتك بشكل طبيعي ومحاولة التغلب على الصعوبات التي تواجهك. لا تدع الماضي يؤثر على حياتك الحالية ولا تتعرض لأي إحراجات بسبب تجربتك السابقة. في النهاية، يجب عليك أن تعيش حياتك بأفضل طريقة ممكنة وأن تركز على الأمور الإيجابية في حياتك.
تم النشر الأربعاء، ١٥ مارس ٢٠٢٣
الحمد لله ربنا يقدم اللى فيه الخير
تم النشر الجمعة، ١٧ مارس ٢٠٢٣
اتجوز عليها
تم النشر الجمعة، ١٧ مارس ٢٠٢٣
مش كل الناس وحشة وانت قولت ان امها اللي ممشية الدنيا حتى لو هي فيها خير فامها غطت عليه ، جايز تلاقي بنت الحلال اللي تعوضك واحمد ربنا انها جت على قد كده لان الفلوس بتروح وتيجي والحمدلله مطلعش ليك طفل يتربى بينهم
تم النشر الجمعة، ١٧ مارس ٢٠٢٣
انت ك راجل ممكن تتجوز تاني وتالت ورابع ، ممكن تكلمها وتخيرها يا اما ترجع معاك يا اما تتجوز ،،، رجعت كده خير وبركة ، اتجوز وعيش حياتك ، طالما هي مش حامل او معاها اطفال يبقى مش مشكلة لأنها مش هتعرف تطلب منك مصاريف ، وبالتالي مش هي مش هيكون عندها غير ٣ حلول ، ي اما ترجع ، او تطلب خلع ، ي اما تفضل على قلب ابوها وامها ، وكدة كدة انت مش هتطلق يعني هي مش هتعرف تتجوز وتنصب على حد تاني ولا هتعرف تاخد منك حاجة وبكدة تكون مسكتهم من ايدهم اللي بتوجعهم
تم النشر الجمعة، ١٧ مارس ٢٠٢٣
بعيدا عن انى مازلت بحب البنت الطلاق مكلف زى ما قولت هكون مطالب برد القايمه كلها وقيمتها ٣٠٠ الف و الدهب ١٥٠ الف وكده كده معاها هى خارجه بيه واقل حاجه ٥٠ الف مؤخر ونفقه يعنى نص مليون على شاب عنده ٢٦ سنه ومش رغبتى الطلاق. ده بعيدا طبعا عن المصاريف اللى اتصرفت فى التجهيزات والفرح وخلافه. فالموضوع هيكون مش كويس نفسيا وماديا. ده بعيدا عن ان الموضوع هيقلب عند برضو بالنسبالى لان لما واحده تتجوز ٧ شهور وانا اشتريها بكل الطرق واهلها يستغلونى بالمنظر ده وبعدين تخرج بدون اى سبب ومترجعش فده معناه ان الموضوع مترتبله. وانا ان كنت ساذج وغبى فى الجواز ليه احققلهم اللى هما عاوزينه واطلقها وهى مش رغبتى اصلا ؟ يعنى اظلم نفسى تانى فى الطلاق؟
تم النشر الخميس، ١٦ مارس ٢٠٢٣
مش هكدب عليكى بس الواحد نفسه اتسدت لانى هعمل ايه اكتر من اللى عملته انا عملت كل حاجه عشان اسعدها وهى كانت دايما بتقلل منى. عمرها مكانت بتشكر ولا تقول كلمه حلوه. وهختار بناء على ايه انا مشيت باللى الدين بيقول عليه واخترت اهل القرأن وطلعوا شتان بينهم وبين القران. وموضوع عدم الخلفه ده ربنا نجانى بيه لان الناس دى بتعمل كده وبنتهم مخلفتش امال لو كانت خلفت كانوا هيعملوا ايه. حسبى الله ونعم الوكيل.
تم النشر الجمعة، ١٧ مارس ٢٠٢٣
معلش انت ماطلقتش ليه !!!!!!!!!!!!!!!!!!
تم النشر الأربعاء، ١٥ مارس ٢٠٢٣
لعرض السؤال في فدني اضغط هنا