السلام عليكم
انا طالب في الثانوية العامة علمي رياضة و جبت ٨٠% و كنت عايز اخش حاسبات و معلومات حكومي بس للأسف مجموعي مجبهاش و طلعتلي كلية علوم ، أهلي عايزين يدخلوني حاسبات و معلومات خاص ب خمسين ألف في السنة مع العلم أن ظروفنا المادية مش أحسن حاجة و انا رافض الموضوع ده عشان مش عايز اتقل عليهم و هيحط عليا ضغط كبير اني لازم اتفوق و اشتغل عشان كمية الفلوس الي ادفعت عليا، بس هما مصرين و بيقولو أن علوم ملهاش مستقبل و انها شهادة علي الفاضي ، ف أنا دلوقتي محتار اصر علي رأي و ادخل علوم حكومي ب مصاريف قليلة بس خايف اندم بعدين و ملاقيش شغل ولا اخش حاسبات خاص و ابقي عبء عليهم و الله اعلم اذا كانوا هيقدروا اصلا يدفعوا المصاريف دي لمدة اربع سنين .
و التقديم فاضل عليه تلت ايام و مش عارف اعمل ايه .
فكرت في علوم قسم كمبيوتر؟ على فكرة إنت لو شغال على نفسك كويس في البرمجة وعملت مشاريع كويسة وبروفايل كويس ممكن تثبت نفسك من غير كلية حاسبات وفي خيار أنك تدخل علوم وبعدها تقدم في منحة ITI لو الشروط منطبقة عليك
تم النشر الثلاثاء، ٢٧ أغسطس ٢٠٢٤
بص ولله انا فاهمة شعورك كويس،بس سيبك من مين ليه مستقبل ومين لا،انت بتحب اي؟ لو فعلا حابب مجال البرمجة خش حاسبات حتى لو خاص بس الحاجة الي بتحبها هتعرف تثبت نفسك فيها،وصلي صلاة استخارة ده الاساس وشوف قلبك هيرتاح لإيه والف مبروووك مجموعك ماشاءالله حلو جدا ربنا يوفقك اعتقد ممكن تدخل سياسة واقتصاد او السن او اعلام فكر فيهم
تم النشر الثلاثاء، ٢٧ أغسطس ٢٠٢٤
و عليكم السلام و رحمه الله و بركاته اولاً مبروك النجاح و عادي مش شرط انك مجبتش مجموع كليتك فتُحبط خليك فاكر ان الخير دايماً فيما اختاره الله لك. من وجهه نظري شايفة إنك تخش كلية علوم أولى عشان دا كله هيبقى عبء زيادة على أهلك و هيبقى عبء نفسي عليك لو متفوقتش وهتحس بالذنب الكبير والتقصير ومين عالم يمكن ربنا يوفقك في كليه علوم وتجيب امتياز وتبقى دكتور في الجامعه أو حتى تلاقي شغل مناسب وطبعاً أفضل حاجه تعملها في الفتره دي إنك تتعلم حاجة جديدة تساعدك لو لا قدر الله ملقتش شغل زي تعلم برمجة اونلاين مثلاً و يُفضل طبعاً تصلي صلاه استخاره في الأمور دي و ربنا ساعتها هيوفقك فيما هو احلى ليك فتوكل على الله و استخيره و اتمنى لك التوفيق في حياتك
تم النشر الخميس، ٢٩ أغسطس ٢٠٢٤
وعليكم السلام ورحمة الله وبركاته، أفهم تمامًا الموقف الصعب الذي تمر به، ويبدو أنك تواجه ضغطًا كبيرًا من أسرتك ومن الظروف المالية التي تتابعها. من المهم أن تأخذ بعض الوقت للتفكير في الخيارات المتاحة لديك. التفكير في المستقبل : قبل اتخاذ أي قرار، حاول أن تبحث عن مستقبل كل من الكليتين. كلية علوم قد تبدو أقل شهرة في نظر بعض الأشخاص، لكن هناك دائمًا مجالات خاصة بها يمكن أن تفتح لك أبواب للعمل. يمكنك أن تبحث عن مجالات تخصص لدراسة علوم الحاسوب أو أي مجالات أخرى قد تكون ذات صلة. التواصل مع أسرتك : من المهم أن تتحدث بصراحة مع أهلك عن مخاوفك وقلقك حول العبء المالي. اشرح لهم وجهة نظرك حول التعليم الخاص وكمية الضغط التي ستشعر بها. قد تجد أن الحوار الصريح قد يخفف من الضغوط عليهم. استشارة مختصين : إذا أمكنك، حاول التحدث إلى استشاري أكاديمي أو من لديه خبرة في سوق العمل. قد يزودونك برؤية أو معلومات حول الكلية المثلى بالنسبة لمستقبلك. شغفك واهتماماتك : فكر فيما إذا كان لديك شغف بالفعل بمجال الحاسبات والمعلومات. إذا كان لديك شغف حقيقي في هذا المجال، فقد تتمكن من التفوق فيه بغض النظر عن الكلية. تحديد أولوياتك : إذا كنت تفضل تقليل العبء المالي، فيمكن أن تكون كلية العلوم خيارًا جيدًا، وفي ذات الوقت يمكنك الاستفادة من هذا الوقت لتكتسب مهارات إضافية (مثل البرمجة أو تصميم المواقع) عبر الدورات التدريبية التي قد تساعدك في تحسين فرص عملك في المستقبل. في النهاية، القرار يعود إليك، ويجب أن يكون مستنداً إلى ما تراه مناسبًا لطموحاتك وظروفك. أتمنى لك التوفيق في أي خيار تختاره، وأسأل الله أن ييسر لك ما فيه الخير.
تم النشر الثلاثاء، ٢٧ أغسطس ٢٠٢٤
عادي يا صديقي ادخل اي كلية مجالها حلو بالنسبالك وادرس كورسات برمجه اونلاين مش شرط انك تدخل حاسبات علشان تبقي مبرمج شاطر والشغل دا رزق عمره ما كان بالشهادة أو الكلية انت ما عليك سوي السعي وربنا يوفقك يا صديقي
تم النشر الثلاثاء، ٢٧ أغسطس ٢٠٢٤
الله يبارك فيك انا فعلا بحب البرمجة و بعد ما سألت ناس كتير منهم دكاترة في الجامعة كلهم قالوا أن كلية وحشة جدا و انا حاليا ماشي في الاوراق المطلوبة لكلية حاسبات و ربنا يكرمني إن شاء الله و افرح أهلي
تم النشر الثلاثاء، ٢٧ أغسطس ٢٠٢٤
لعرض السؤال في فدني اضغط هنا