وعليكم السلام ورحمة الله وبركاته. أولًا، أنا متفهمة شعورك تمامًا وموقفك مش سهل. بالنسبة للخطوبة، هي فترة مهمة عشان تتعرفي على الشخص اللي هتكملي حياتك معاه، ولو مش بتحسي براحة أو تواصل بينكم، ده ممكن يبقى مؤشر على احتمالية مشاكل أكبر في المستقبل. طيب، تعالي نفكر مع بعض شوية في الموضوع. انت حسب كلامك حاولتي تتكلمي معه وتحلي المشكلة كذا مرة ومفيش فايدة. ده بيوري إنه مش متجاوب معاك ومش مهتم بالمشكلة اللي بتواجهيها، ودي حاجة مهمة لازم تاخديها في الاعتبار. صلاتك للاستخارة خطوة ممتازة، وهي دليل إنك مش متسرعة في اتخاذ قرار مهم زي ده. من النتايج اللي حسيتها بعد صلاة الاستخارة إنك لسه مش مرتاحة ومش قادرة تتخيلي حياتك معاه. بناءً على كل ده، ممكن تقعدي معاه وتتكلمي بشكل واضح وصريح عن مشاعرك وتوضحي له أنك تعبانة من الوضع الحالي. لو حاول يتغير ويتفاعل ويطلع اهتمامه، ممكن تعطو بعضكم فرصة ثانية. لو ما ظهرش أي تغيير، ده ممكن يكون دليل إن فعلاً مش هيكون هو الشخص المناسب. في النهاية، أهم حاجة هو راحة قلبك وعقلك. لو مش مرتاحة ومش شايفة مستقبل معاه مهما كانت الأسباب، من حقك تقرري تنهي الخطوبة وتبحثي عن شخص يقدر يسعدك ويهتم بك. وفكري كمان في الكلام مع أهلك مرة تانية وتوضحي لهم مشاعرك بشكل واضح وصريح، عشان يكون عندك دعمهم في قرارك. ربنا يوفقك ويوضح لك الطريق الصحيح.
تم النشر الاثنين، ٣ يونيو ٢٠٢٤
وعليكم السلام ورحمة الله وبركاتة أهلا بكِ الأصل اننا لما بندخل في علاقة ما (أي علاقة حتى لو صداقة) بننظر في حال الشخص بشكل عام سماته الشخصية، طباعه، اسلوبه، طريقة تفاعله، قدرته على التواصل والتعبير والمشاركة... الخ وبنبدأ نقيم الوضع كله وبنفترض انه ده هو الواقع وده هو الشخص اللي مكمل معايا مش بنفترض الاغيير لانه ده احتمال كبير ميحصلش وبنشوف هل الشخص ده مناسب لي والعلاقة دي علاقة صحية وناجحة ومريحة بالنسبالي ولا لا وبناء عليه باخد قراري أكمل أو لا فانتِ عيدي تقييم العلاقة دي مرة تانية وشوفي هل هو ده الشخص المناسب لي؟ هل دي العلاقة اللي بتمناها وهكون مرتاحة فيها وسعيدة؟ هل شريكي في العلاقة دي قادر يطمني وحاسة بالأمان في علاقتي معاه؟ هل قادر انه ينتبه لاحتياجاتي ومشاعري؟ وبناء عليه خدي قرارك اي قرار بناخده حتى لو كويس له تبعات ايجابيه وسلبيه مفيش قرار تبعاته كلها ايجابيه كل اختيار بناخد هو بيتضمن تخلي عن اختيارات تانيه كتير فكري في الأمر بجدية وبالورقة والقلم واستخيري وخدي قرارك ومتكمليش في علاقة عشان الناس عاوزين ده او انه حاطه احتمال انه الشخص يتغير قدام. ربنا يقدر لكِ الخير 🌸
تم النشر الاثنين، ٣ يونيو ٢٠٢٤
لعرض السؤال في فدني اضغط هنا