السلام عليكم
محتاج استشركم
شغلي في الكول سنتر و التسويق
و شغلي بياخد وقت كبير جدا من يومي
و خاطب و مسئول عن نفسي و مسئوليه أخري
سبت الجامعه سنتين عشان الشغل
محتاج اعرف ازاي اقدر انظم بين الجامعه و الشغل
مع العلم اي شغل اقدر من خلاله اكون معتمد علي نفسي محتاج دوام كامل وليس جزئي
فا الحل ازاي
اني اقدر اكمل حلمي الخاص بالجامعه ؟؟
ازيك، يارب تكون بخير. لو انت في الشغل ده يومك يعتبر مقتول بالنسبة إليك. يبقى الافضل تشوف شغل تاني، علشان تعرف تظبط وقتك. وطرق الشغل كتير سواء كنت هتشتغل اونلاين أو اوفلاين. ممكن يكون الشغل الاونلاين مناسب ليك اكتر مثلا .. علشان توفر وقت أكبر سواء مواصلات أو حتى فلوس. ف ظبط شغلك الاول .. وخليه مناسب مع الكلية .. العملية مش مستحيلة ابدا .. هي بس محتاجة تظبيط. لما تروح الكلية .. ممكن لما تتعرف على ناس زمايلك وكده تحاول تهندل الدنيا معاهم من حيث المحاضرات أو التكاليف، يعني ممكن متروحش كل يوم مثلا .. ولكن ده طبعا يتوقف على نوع كليتك ايه بالظبط طبعا. هل ينفع ولا لا. ف حدد أولياتك وظبط طريقة شغلك بحيث تتوافق اكتر مع طبيعة يومك والدراسة.
تم النشر الأحد، ١١ ديسمبر ٢٠٢٢
اكيد لازم الجامعه طبعا تكملها شغل الكول سنتر يساعدك فى الفترة دى ..بس طبعا هتتعب شوية تروح الجامعة الصبح ....تاخد شيفت بالليل ...وهكذا ولو جامعتك ينفع من غير حضور يبقى الوقت ده تذاكر فيه واى حد تقدر تخليه يساعدك فى المحاضرات والتلخيص والمتابعة دى تمسك فيه بايديك وسنانك . يارب كل التوفيق ليك ان شاء الله تعدى الفترة دى على خير .
تم النشر السبت، ١٠ ديسمبر ٢٠٢٢
ظبط أولوياتك يعني الي ليه أولوية اشتغل عليه شوف كم عدد ساعات عملك والمتبقي ذاكر فيه وأحضر محاضراتك اليوم ٢٤ ساعة لازم فيه اوقات فاضية واظب علي مواعيد صلاتك هتلاقي البركة في وقتك وفي دراستك وفي شغلك
تم النشر الخميس، ٨ ديسمبر ٢٠٢٢
ممكن أسألك كام سؤال يمكن أقدر أساعدك؟ - الشغل من اول ما بتنزل لحد ما ترجع وقت قد ايه؟ - بتقعد وقت قد ايه ف الشغل؟ - بتعمل ايه تاني ف يومك غير الشغل؟ - دراستك محتاجه منك ايه بالظبط؟ يعني هل مثلا محتاج تروح الجامعه ولا على الامتحانات بس؟ هل في حاجه مطلوبة منك مثلا قبل الامتحانات؟
تم النشر الأربعاء، ٧ ديسمبر ٢٠٢٢
الله السؤال ده بيعتمد عليك انت ما حدش يقدر يفيدك اكثر منك اقعد مع نفسك خذ قرارك بناء على رغبتك انت تفكيرك وطموحك ساعتها تقدر تختار ايه الاحسن بالنسبه لك
تم النشر الخميس، ٨ ديسمبر ٢٠٢٢
لعرض السؤال في فدني اضغط هنا