السلام عليكم أولا ألف سلامة علي والدة حضرتك ربنا يشفيها و يعافيها يارب ثانياً انا مش طبيب انا مازالت طالب .. يعني كلامي متاخديش بيه بالمرة .. انا مجرد بس هشاركك معلوماتي البسيطة اللي أخدتها في القسم و كمان عندي تجربة سابقة مع والدي و كان عنده بردو غضروف في الرقبة و لكن مش متذكر فقرات كام الحقيقة لأن الكلام من حوالي 10 سنين. خلاصة التقرير أن الغضروف متأكل بين الفقرات من 4 لـ 7 و لكن بدرجات متفاوته ، و دا أدي لـ أن فيه ضغط متواجد علي جزء من غشاء السائل النخاعي و الأعصاب المتواجدة في المنطقة فـ اعتقد كدا والدتك بتشتكي من تنميل أو وجع في دراعها و ايدها حسب بقا الأعصاب المضغوط عليها . الحالات اللي زي دي بنبدأ العلاج الاول بـ : راحة من اي مجهود .. تلبس حزام الرقبة .. مسكنات ل الألم + علاج طبيعي بسيط و حركات بسيطة للرقبة في اتجاهات معينة. اللي بيحصل أنك لو روحتي لـ دكتور جراحة مخ و اعصاب غالباً هيقولك عملية علطول و دا مش صح و معظمهم مش بيراعي ضميره و بيبص للموضوع بشكل مادي ودا حصل مع والدي و راح لدكتور قاله لازم عملية و هو مكنش عاوز يعمل عمليات ف راح لدكتور تاني و بدأ معاه ب العلاج اللي قولتلك عليه و دا الصح و دا اللي بندرسه في الكلية .. و الحمد لله والدي بخير و الالم و التنميل عنده خف و عدي 10 سنين علي الموضوع و بفضل الله معملش عملية .. ف انصحك تروحي لدكتور عنده ضمير و إن شاء الله اللي فيه خير ربنا يقدمه ، و ألف سلامة علي والدتك و ربنا يطمنك عليها يارب
تم النشر الاثنين، ١٥ يوليو ٢٠٢٤
4 تعليق
العفو علي اية ربنا يطمنكم يارب ❤️ انا شايف انك تشوفي دكتور مخ و اعصاب تاني افضل و يكون عنده ضمير ، دكاتره العظام بيكونوا شاطرين جدا بردو فلو تعرفي دكتور عظام شاطر روحيله بس هي الحالة دي تبع قسم المخ و الاعصاب مش العظام ولكن الموضوع منتشر أن دكاتره العظام تاخد حالات زي دي ف مفيش مشكلة بردو المهم الدكتور يكون بيراعي ربنا في المرضي و ترتاحوا معاه
تم النشر الثلاثاء، ١٦ يوليو ٢٠٢٤
يعني من رأي حضرتك نروح لدكتور عظام عادي ولا مخ واعصاب؟
تم النشر الاثنين، ١٥ يوليو ٢٠٢٤
احنا فعلا روحنا لدكتور جراحه مخ واعصاب وقالها من رأي اعملي العمليه وبلاش علاج طبيعي حاليا وكتبلها حقن مسكنات وادويه مهدئه مش عارفه ليه مع اني شايفه ملهاش لازمه ومامتي مخدتهاش
تم النشر الاثنين، ١٥ يوليو ٢٠٢٤
شكرا جدا لحضرتك انت فيدتني جدا والله
تم النشر الاثنين، ١٥ يوليو ٢٠٢٤
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك