سلام عليكم
جماعة، أنا جالي شغل في ماكدونالدز في السعودية
وراتب مقبول ،،، لكن ،،لكن ،،
أنا مش قادر اتخطى حتة ان دا ماكدونالدز راعي الإرهاب في العالم وإن فلوسه بتروح للصهاينة و حلفاؤهم ،،، وفي نفس الوقت انا مبعرفش انام من التفكير وقاعد مبشتغلش وخاطب ويعتبر لسا معملتش حاجة ومفيش شغلانة في البلد ممكن تظبطلي أموري على ما أعتقد ،،،، ومش عارف أعمل إيه ,,,
وعليكم السلام ورحمة الله وبركاته اعتقد لو بصينا بمبدأ الضرورات تبيح المحظورات هيبقى لا حرج فى انك تبدأ الشغل المتاح واذا تمسكت بمبدأك لعل الله يجازيك خيرا منه فهذا يعود الى الاحتياجات الحاليه ومسؤولياتك
تم النشر الاثنين، ٢٥ نوفمبر ٢٠٢٤
وعليكم السلام ورحمة الله، أفهم تمامًا المشاعر المتضاربة التي تعاني منها بشأن العمل في مطعم مثل ماكدونالدز، خاصة مع وجود قلق من الجوانب الأخلاقية والسياسية لذلك. من المهم أن تحافظ على قيمك ومبادئك، لكن في نفس الوقت، يجب أن تأخذ في اعتبارك الظروف التي تعيش فيها. إليك بعض الأفكار التي قد تساعدك في اتخاذ القرار: التقييم الشخصي : فكر في فوائد العمل في ماكدونالدز بالنسبة لك في هذه المرحلة من حياتك. هل سيساعدك في تأمين حاجاتك اليومية؟ هل سيساهم في دفع تكاليف خطبتك وتهيئة مستقبلك؟ البحث عن بدائل : استمر في البحث عن فرص عمل أخرى قد تكون أكثر توافقًا مع مبادئك. حاول أن تستفيد من وقتك الحالي في اكتساب خبرات جديدة أو تطوير مهاراتك. الموازنة بين القيم والضرورات : قد يكون العمل في مكان لا يتفق مع قناعاتك أمرًا صعبًا، لكن عليك أن تقيم ما إذا كان بإمكانك الاستمرار في البحث عن فرص أخرى أثناء العمل هناك. يمكنك أنهاء فترة العمل بنجاح ثم الانتقال لفرصة أخرى. نهاية المطاف : القرار النهائي يعود إليك، وسيتعين عليك موازنة المصالح الخاصة بك مع قيمك. تذكر أن كل شخص يواجه تحديات بسبب الظروف، والمهم هو كيفية التعامل معها. إذا كنت بحاجة إلى دعم إضافي، يمكنك استشارة مختص لمساعدتك في تنظيم أفكارك ومشاعرك. وفقك الله في اتخاذ القرار الصحيح.
تم النشر الأحد، ٢٤ نوفمبر ٢٠٢٤
استخير ربنا وسيبها ع الله وربنا هيكرمگ بالاحسن، الراجل اللي بتاع مسوالية ربنا بيكرمو ويدية ع قد نيتو، الراجل اللي بيتعب ويشقا وبيعتمد ع نفسو ربنا بيبركلو ف رزقو، الراجل اللي بيحافظ ع علاقتو بربناا بيرزقو من حيث لا يحتسب، الراجل اللي يصون اهلو وعيلتو ربنا بيشيلو ف عيونو اهم حاجه صلاتگ وادعي كتير وربنا هيرزقگ بشغل مكنتش تتوقعو
تم النشر الاثنين، ٢٥ نوفمبر ٢٠٢٤
حرفيا 90٪ من اي حاجه بتسخدمها في مصر مقاطعة حتي المنتجات الوطنية مكوناتها مستوردة من الخارج ، بس دا ميمنعش اني أحييك علي روحك الوطنية و مشاعرك الإنسانية و تربيتك و الأهم علي ان عندك دين و نخوة .. توكل علي الله و شوف اكل عيشك ، و المقاطعة الحق بتقوم بيها الدول مش الأفراد ،
تم النشر الأحد، ٢٤ نوفمبر ٢٠٢٤
انا مقتنع بكلامكم ان من ترك شيئاً لله عوضه الله خيرا منه
تم النشر الاثنين، ٢٥ نوفمبر ٢٠٢٤
الأخ اللي بيقول انه المقاطعه المفروض تتم من الدول و ليس من الأفراد، هذا الكلام عار من الصحه. المقاطعه تبدأ من الافراد و اللي الأخ السائل بيعمله هو أضعف الايمان. الأمر لم يعد موضوع بلد معين او موضوع مسلم و غير مسلم، الامر أصبح انساني عشان هيك بنشوف أنه حتى في الدول الاوروبية و حتى أشخاص في امريكا بيقاطعوا المنتجات التي تدعم الكيان و هم ليسوا مسلمين و لا عرب، فما بالك بالعربي و ما بالك لو كان كمان مسلم.
تم النشر الاثنين، ٢٥ نوفمبر ٢٠٢٤
من ترك شئ لله عوضه الله خيراً منه
تم النشر الاثنين، ٢٥ نوفمبر ٢٠٢٤
من ترك شيئا لله عوضه الله خيراً منه. الرزق من ربنا و الواحد دايماً بيسعى انه يكون رزقه حلال. احنا لو كل واحد فبنا رفض يشتغل في المحلات اللي بتدعم ....... المحلات دي كلها حتقفل، فأنا بقول انه مش مبرر انك بتدور على شغل يبقى تشتغل عندهم و تدعمهم. بالزبط زي اي واحد مش لاقي شغل يشتغل في بار لحد ما ربنا يبعتله شغل حلال. استفتي قلبك و انت هتعرف انه الراتب اللي حتاخده مش هيكون في بركه و ربنا يوفقك
تم النشر الاثنين، ٢٥ نوفمبر ٢٠٢٤
ربي يوفقك وييسر لك كل امورك استفتي قلبك عزيزي واعتقد معظم الحاجات في مصر او الدول العربية هي من الغرب هل تقدر تقاطع الدواء ؟ التكنولوجيا ؟السيارات؟ اكيد لا اعتقد العمل في ماكدوندلاز مافيه شي لتحسين وضعك وربي يسخر لك الحال
تم النشر الاثنين، ٢٥ نوفمبر ٢٠٢٤
الافضل خليك وربنا الي بعتلك الشغلانة دي يقدر يرزقك احسن منها وعسى ان تكرهوا شيٱ وهوا خير لك
تم النشر الاثنين، ٢٥ نوفمبر ٢٠٢٤
ربنا يوفقك و ييسرلك انت كمان و يجعله في ميزان حسناتك و حسناتنا و متشكر ❤️
تم النشر الأحد، ٢٤ نوفمبر ٢٠٢٤
ابدا والله وجع دماغ أيه بس ربنا يكرمك و يرزقك و يرزقنا جميعا يارب لا تنسانا في دعائك❤️
تم النشر الأحد، ٢٤ نوفمبر ٢٠٢٤
بص صلي استخارة و أنا متأكد أن طالما هتستشير ربنا هيرشدك للصح لو فيها خير هتلاقيها اتيسرت و قلبك مائل ليها لو فيها شر هتلاقيها مش هتتم و قلبك هينفر منها و ربنا يرزقك و يرزقنا يارب العالمين
تم النشر الأحد، ٢٤ نوفمبر ٢٠٢٤
صدقني أه البلد مفهاش شغل و تكاد تكون أنعدمت بس أنا رأيي نتقي الشبهات لأن لو أحنا حتي بنشتري حاجة ضمن مقاطعة ديه حاجة فردية و ربنا يسامحنا عليها لكن أني أسهلهم عمليات البيع و أبقي شريك لا صعبة اتقي الشبهات أحسن و والله رزقك سواء فمصر أو هناك هيجيلك لحد عندك هو اختبار من ربنا ليكي صلي استمارة و اللي قلبك يستريح ليه توكل على الله ربنا يكرمك و يرزقك يارب العالمين
تم النشر الأحد، ٢٤ نوفمبر ٢٠٢٤
هو انت اللي سمحتلهم يعملوا توكيل في مصر ..؟ و لا انت صاحب التوكيل ، ولا بلدنا العظيمة حد بيلاقي فيها اكل عيش بالساهل و لوجه الله خالص ، طالما الإجابة لاء توكل بس برضه عينك علي اي فرصة بره دي شغلانة ملهاش مستقبل حتي و ان جيه من وراها فلوس ،
تم النشر الأحد، ٢٤ نوفمبر ٢٠٢٤
انا حزين جدا ان مفيش فرصه غير دي و خصوصا اني مش متخيل اني ادخل اكل في ماكدونالدز ،، مش اشتغل فيها كمان ،،،انا فعلا محتاج الشغل ، بس خايف من ان يكون فلوسه حرام و انها تكون بتروح لقتل اخواتنا ،، و انا بشكر حضرتك علي كلامك الجميل ،،،كلك زوق ❤️
تم النشر الأحد، ٢٤ نوفمبر ٢٠٢٤
ألاخ انسان واقعي .. لاء با باشا المقاطعة الحقيقية و الفعلية تقوم بها الدول ، يعني هو انا عايش في بلد و هيه تسمح ليهم بالدخول و عمل توكيلات محال تجارية و ممارسة التجارة و الإنتاج و انا مواطن داخل الدول المفروض اني انا اللي اقاطع ، ازاي يعني بلدي تدخل و تسمح بمنتج و تقولي الأفراد يقطعوا ، اذا كان رب البيت بالدف ضارباً فشيمة اهل بيته الرقصُ مش كده ولا ايه ..؟!ثم اني بشتغل عنده يعني باخذه منه فلوس مش بديله ، و بعدين اي توكيل من دول بيخدم في السنة كذا مليون لو التوكيل نفسه مش موجود هشوف حاجه غيره في بلدي مش هسافر أمريكا او السعودية علشان ماكدونالدز او كنتاكي ..
تم النشر الثلاثاء، ٢٦ نوفمبر ٢٠٢٤
بس هو للاسف مقاطعة
تم النشر الاثنين، ٢٥ نوفمبر ٢٠٢٤
اللهم أمين و أنا أسف لو وجعت دماغك بجد ،حقك عليا ❤️❤️
تم النشر الأحد، ٢٤ نوفمبر ٢٠٢٤
كلامك صح و انا مقررتش و انا مؤمن بربنا الحمد لله و ان الرزق بإيد ربنا بس عاوزك تحط نفسك مكاني ،،خاطب و معملتش حاجه لنفسي لا شقه و لا شغل و لا جبت شبكتي و فاضل في حق الشبكه 75,000ج و حاليا بدور ع شغل و مش معايا غير شوية فكه فضيه حرفيا و مش هتكسف و انا بقول كدا و حاسس اني عالة علي ابويا و خصوصا انه كبير في السن ،، و دا كله مع اعتبار اني موافق رأيك و الله و مقررتش اعمل حاجه ،و نعم بالله ،الرزق بإيد ربنا وحده
تم النشر الأحد، ٢٤ نوفمبر ٢٠٢٤
هو عندك حق بس في اراء بتقولك ان انت بتساهم معاهم و بتساعد علي نهوض يبقي انت شريك ليهم ،،، انا بفكر. اروح فعلا و ادور علي شغل تاني برده ،،، و انا بطور في نفسي حاليا من حيث اللغات و كدا لعل و عسي ،، لأ مش انا اللي سمحتلهم يعملوا توكيل و لا بلدي فيها شغل و لا ليها مستقبل كبلد بحالها
تم النشر الأحد، ٢٤ نوفمبر ٢٠٢٤
لعرض السؤال في فدني اضغط هنا