أعجبت بشخص.... هو بصراحه جميل جدا يعني يعتبر فيه معظم الصفات الي اي بنت بتتمناها في الرجل... بيصلي الصلاة بوقتها و محترم مش بيبص للبنات و حتى انه وسيم كمان و مجتهد و من عيلة كويسة والده تقريبا لواء أو في منصب مرموق في الشرطة و كده و كل ده عجبني فيه بس عجبني اكتر حاجه إنه محترم و مش بيبص للبنات و بس الموضوع كان مجرد إعجاب المميزات دي مش اكتر و كنت متأكدة انه مش معجب بيا و لا شايفني قدامه أصلا لكن بعد كده حصلت حاجات بينتلي إنه معجب و لما بدأت اشك انه معجب بيا الموضوع زاد و بدأت أعجب بيه اكتر لكن بعد كده مبقناش بتشوف بعض في المكان الي كان بيجمعنا و انا لحد الآن مش عارفة أبطل تفكير فيه.... انا دايما لما بعجب بحد لما بشوفه بتوتر و بيكون في احساس الفراشات ده في بطني يعني ذي أي حد لما بيعجب لكن الشخص ده يعتبر أول شخص محسش ناحيته كده كان شعور عادي جدا شعور اني منجذبة ليه و حاساه شبهي في الشخصية لكن من غير ما أحس اتجاهه بأي توتر أو فراشات و الكلام ده و قرأت قبل كده إن جسمنا بينبهنا من الأشخاص الي ممكن يضرونا أو يكونوا وحشين و ان شعور الفراشات و زيادة ضربات القلب و الحاجات الي شبهها دي كلها مش دليل على الاعجاب و لا الحب بل دليل على أن في حاجه غلط جسمنا بيحاول ينبهنا منها و فعلا كان كل مرة بحس بالحاجات دي اتجاه شخص معين في الاخر بيطلع شخص مش مناسب ليا لكن الشخص ده محسيتش كده خالص اتجاهه و فكرت انه ممكن يكون من نصيبي و بدأت ادعي ان لو كان من نصيبي و خير ليا فيارب اجمعنا بالحلال و لو كان مش من نصيبي و مش خير ليا فيارب خليني انساه لكن مش بنساه
كل الي حصل بيقول انه مستحيل نتقابل تاني
لأن خلاص المكان الي بيجمعنا مبقاش يجمعنا و مفيش اي طريقة ممكن نتقابل بيها صدفة مثلا يعني علاقة شبه مستحيلة لكن مع ذلك مش عارفة انساه و مش عارفة هل دي مثلا إشارة من ربنا إنه من نصيبي و أكمل دعاء و أمل إنه في يوم من الايام هيكون من نصيبي و لا مش عارفة أبطل تفكير فيه عشان بس اتعلقت بيه و بفكرة إني محسيتش اتجاهه بأي شعور من المشاعر الي ذكرتها فوق و ان حسيت اتجاهه براحه معرفش بصراحه فقررت إني اكتب ده و أسألكم عن وجهة نظركم في الموضوع ده يمكن تساعدني أخد قرار
تم النشر الجمعة، ١٤ يونيو ٢٠٢٤
أولاً، افهمي مشاعرك: إنك معجبة بشخص وتحسين بالاحترام والإعجاب تجاهه، ده شيء طبيعي وجميل. لكن عدم القدرة على نسيانه شيء صعب ومؤلم، وده اللي محتاجين نعترف بيه. ثانياً، ركزي على واقع الأمور: حضرتك كتبتي إن اللقاءات بينكم انتهت وأنه صعب تلتقوا تاني، والمكان اللي بيجمعكم مش بيجمعكم تاني. هنا حاولي تواجهي الحقيقة بصدر رحب ومن غير ما تحملي نفسك عبء الأمل الزائف. ثالثاً، الدعاء وتفويض الأمر لله شيء جميل ومطمئن. ده معناه إنك تدعي الله يهدي قلبك ويوجهك للخير ليكي سواء كان الخير هو الشخص ده أو شخص تاني. الدعاء يديكي طاقة إيجابية ويقربك لربنا، بس متعلقيش قلبك بنتيجة معينة، خلي تركيزك على رضا الله وتسليم الأمور ليه بالكامل. رابعاً، شغلي وقتك: ممكن تشغلي نفسك بحاجات تانية زي الهوايات أو العمل أو تطوير نفسك. ده هيساعدك تشوفي الأمور من زاوية تانية ويقلل من التفكير المفرط. خامساً، فتشي عن الدعم: ممكن تحكي لحد تثقي فيه زي صديقة قريبة أو حد من العائلة. أحيانًا المشاركة تخفف من الحمل اللي على قلبك. في النهاية، تذكري إن الحب والعلاقات جزء من حياتنا لكن مش كل حياتنا. خليكي قوية وركزي على نفسك وعلى سعادتك ومستقبل اللي جاي ليكي. إحساسك بالراحة مع الشخص ده حاجة كويسة، بس الواقع بيقول حاجة تانية، والواقع ده هو اللي محتاجين نواجهه ونتقبله لنبقى بخير.
تم النشر الجمعة، ١٤ يونيو ٢٠٢٤
تم النشر السبت، ١٥ يونيو ٢٠٢٤
كدا كدا هتنسي ريحي نفسك انا بقولك طالما شخص ما اتقدم ليكي مش من حق نفسك انك تضيعيها ارهاق بمشاعر مزيفه وتضييع وقت تعب من التفكير والوهم في الاول والاخر انتي اللي بتظلمي نفسك بدل ما تضيعي احساس بمشاعر وهميه احسنلك تستغلي نفسك انك تطوريها اكتر وتغلي قيمتها عارف ان الاحساس صعب واحنا بني ادمين... بس الشخص انتي قولتي مش بيبص لبنات ليه يبصلك يعني المفترض يغض بصره اول ما يشوفك لا كمااان بيبصلك بكبر لاي راجل البنت بتكون غاليه جدا لما تكون مفيش طريق ليها الا بيت اهلها وانها تكون ذو اخلاق ومبادئ دينيه يعني من الاخر اي حد تفكري فيه... الشيطان هيستغلها ضدك وممكن يسمحلك انك تتكلمي ولو باي حجه ودي بدايه الطريق فحابب احذرك انك ما بتهلكي الا نفسك حابب ابشرك لو صبرتي وكونتي عارفه قيمه نفسك بحق.. ربنا هيبعتلك اللي يستاهلك ويعوضك " المناسب ليكي من عند ربنا هيكون افضل من اختيار بشر بيغلط عادي " حتى لو الشخص اللي بتفكري فيه كان مناسب هيجي من نفسه لبيتك... ما فكر فيكي هو يبقى ما تقللي قيمه نفسك كبنت
تم النشر السبت، ١٥ يونيو ٢٠٢٤
متعلقيش نفسك بأرتباط ممكن يحصل او لا لو هو فعلا معجب ومنجذب ليكي كان هيجي يتكلم معاكي وياخد رقمك او رقم والدك ولكن ممكن ميكونش جاهز للخطوة دي عيشي حياتك متوقفيهاش عليه الدنيا مليانة ناس كتير وهتلاقي مواصفاته وأحسن في حد تاني وفي الاول والآخر نصيبك هيصيبك حتى وان استحالت الاسباب
تم النشر السبت، ١٥ يونيو ٢٠٢٤
عليكي بقيام الليل والدعاء أن ربنا يختارلك الخير وميخيركيش لو الشخص دا خير ليكي يجيلك ف الحلال ولو مش خير نفسك معتش تفتكره ربنا يرزقك الخير 🤍
تم النشر الجمعة، ١٤ يونيو ٢٠٢٤
لعرض السؤال في فدني اضغط هنا