مش عارفة أبدأ منين بس انا تايهة عندي خوف كبيير اووى لحجات كثير:
أولا كده انا مبقتش عارفة انام من كثر التفكير في أن حاجة تحصل لماما بقيت خايفة عليها اووى ومكنتش كده في الأول حتى بقيت بعبرلها عن ده يعني من اسبوع كده انا حرفيا اتهريت عياط وقعدت قلتلها تهتم بصحتها لاني خايفة عليها وكلام زي كدا.
ثانيا حاسة ان الوقت بيجري بسرعة اووى انا داخلة ثالثة ثانوي بس دبلومة امريكية يعني كمان سنة هبقى في جامعة حاسة انو لا لسا بدري حاسة إني لسا في ثالثة اعدادي الموضوع بجد يخوف هعمل اي في الجامعة طيب هدخل اصلا جامعة اي طيب هبقى شاطرة ولا لأ طيب لو سقطت او شلت مواد اي الي هيحصل.
ثالثا معنديش صحاب خايفة اووى اني ادخل الجامعة وملاقيش صحاب زي الناس العادية او اخلص الجامعة ومازلت معنديش صحاب وكمان خايفة اني ملاقيش الشخص الصح الي احبه.
رابعا في حزن غير مبرر جوايا مش عارفة ليه انا مكنتش حساسة كدا يعني مكنتش بعيط كثيير ولا بحس بالخنقة كثير بس لما قعدت من غير تلفوني اسبوع تقريبا حسيت بتوهان حسيت الي هو أنا هنا بعمل اي او انا مين و عايشة ليه.
انا مقدرة قلقك وخوفك من كل الحاجات دى وخصوصا قلقك على مامتك... بس ايه رأيك تجربى إن لما يجيلك فكره تقلقك تكتبيها على ورقه واسألى نفسك ايه الدليل على أن الفكره دى ممكن تحصل ولو لقيتى دليل يثبت صحة الفكره اكتبيه ولو مفيش اكتبى برضو ...طب وفى حالة أن فى دليل مثبت الفكره هنا نتناقش فيه عشان نعرف ازاى نتعامل معاه..وجربى تعملى تمارين استرخاء وتنفس بهدوء هيساعدك فى خفض الخوف والقلق والتفكير الزايد
تم النشر الخميس، ٨ أغسطس ٢٠٢٤
لا حول ولا قوة إلا بالله قربي من ربنا ممكن سبب ده بعدك عنه حاولي تشكيله همك ممكن يفك عنك أكيد بس انتي قربي منه ومتحطيش أي حاجه فدماغك واحمدي ربك مفيش حاجه تستاهل كل ده التفكير الزائد ممكن يقصر فعلا علشخص متحطيش حاجه فبالك والهي نفسك الهي نفسك وروحي نادي ولا حاجه صاحبي أتمرني كدا فكي علي نفسك تابعي مسلسلات حاولي تصاحبي فالدروس ومتخافيش الجامعه تجربه هنعديها فيها الوحش والحلو حاولي بس تحرصي فاختياراتك واهدي خالص
تم النشر الخميس، ٨ أغسطس ٢٠٢٤
يا حبيبة قلبي، أول حاجة عاوزة أقولك إن كل مشاعر اللي بتحسّيها طبيعية، كتير من الناس بيمروا بنفس المرحلة، خصوصًا في السن ده. الدنيا معقدة شوية، خصوصًا لما بنكون مظغوطين من مسؤوليات الحياة. بالنسبة لقلقك على مامتك، ده دليل على حبك واهتمامك بيها، بس حاولي تفكري بشكل إيجابي. أكيد هي عارفة اهتمامك ودعمك ليها، وحاولي تتكلمي مع مامتك في الموضوع ده، افتحي قلبك ليها. أما عن المرحلة اللي انت فيها بخصوص الجامعة، طبيعي تبقي خايفة ومترددة، بس تذكري إن كل الناس مروا بنفس التجربة! حاولي تحددي أهدافك وترتيبي أفكارك، وكمان حاولي تستمتعي باللحظة، لأن سنك ده لازم يكون مليان تجارب حلوة. لو حسيتي بالضغط، ممكن تلاقي طرق لتخفيف التوتر زي ممارسة رياضة، أو الرسم أو حتى قراءة كتب. أما عن الأصحاب، حاولي تكوني منفتحة واحتسمي الناس حوليك. الجامعة مكان حلو للتعرف على ناس جديدة وصداقات جديدة. كوني طبيعية وابتسمي، وحتلاقي الناس اللي تتناسب مع شخصيتك. وأخيرًا، بالنسبة للحزن اللي حسيت بيه، ممكن يكون ناتج عن ارتباطك بالتكنولوجيا ووجودك المستمر على الموبايل. جربي تقضي وقت من غيره وتكتبي في مذكراتك مثلاً أو تطلعي مشي في الطبيعة. قد يكون ده بيساعدك تعيدي اكتشاف نفسك. في النهاية، اتذكري أن كل حاجة هتعدي، وكل تجربة مررتي بيها هتساعدك تكبري وتتعلمي. ودايمًا أنا هنا لو احتاجتي تتكلمي. 💖
تم النشر الخميس، ٨ أغسطس ٢٠٢٤
لازم الاول ترمي حمولك على ربنا وما تفكريش في اي حاجه تضايقك وحطي دايما في دماغك ان ربنا شايفك وهيختار لك الاحسن ودايما ادعمي نفسك وحاولي تكلميها وتطمنيها اوقفي قدام المرايه وقولي لنفسك انا هنجح انا هيبقى عندي اصحاب كتير لان انا استاهل اتحب انا هبقى شاطره في دراستي وهوصل لكل اللي انا عايزاه طالما مامنه في حلمي ومامنه بربنا اما بقى عن حته انك بتخافي اني لا قدر الله تفقدي والدتك او يحصل لها حاجه في ده بتبقا عامله زي شيطان عايز يحزنك ويقلقك عشان ما تقدريش تستمتعي كل دقيقه بتعدي وانت مع والدتك
تم النشر الخميس، ٨ أغسطس ٢٠٢٤
على الأغلب أنت تمرين بتقلبات هرمونات وهذا طبيعي في مرحلتك العمرية لا تفكري في أي شيء ما زال في علم الغيب، فقط هنا والآن. استعيني بالله وأكثري من الذكر والدعاء
تم النشر الخميس، ٨ أغسطس ٢٠٢٤
لعرض السؤال في فدني اضغط هنا