لدي وسواس في كل شئ حولي، وهذا يدمرني نفسيا!

Question

انا 17 سنة تانية ثانوي المشكلة إني عندي وسواس شك في كل حاجة حواليا الأول كنت افتكره في الدين بس دلوقتي اكتشفت إنه في كل حاجة وهو إني بشك في كل حاجة بشك إن في حاجة اسمها حياة في حاجة اسمها موت في حاجة اسمها أم، أب ،أخ، أخت، صديق ،موت ،جنة ،نار ،رب، رسول ،دين ،صلاة ،عبادة،قرآن، أديان، علم ،حيوانات ، خلفة وأولاد، زواج،شيوخ،دكاترة، ادوية ،كل ده انا مش مصدقة انو موجود هتقوليلي آمال إيه ده مش هعرف أرد عليك بس عمري ما هصدق هتقوليلي طيب هجبلك أدلة انا اتعلمت حجات كتير أوي وقرأت الأدلة وبرضو شاكة اتعلمت عقيدة لأني زي ما بشك في كل حاجة بشك في ربنا قرأت الأدلة على وجود الله واتعلم أكتر من مرة وعارفة ان مفيش مخلوق إلا ليه خالق وان انا كنفس دليل على وجود آله ولو مفيش إله زي ما بقول آمال انا جيت إزاي عارفة كل ده بس المشكلة مش في إني شاكة في ربنا المشكلة اني شاكة في كل ذرة حواليا درست مصطلح الحديث تعرفي اني مش عارفة أصدق ولا حديث حتى لما تتوفر الخمس شروط بقول تلاقهم غلطانين ممكن ضعيف، الموضوع ده تعبني جدا حتى في الدراسة مرة كنت بحل قطعة في الانجلش انا وصحبتي كلمة مكنتش عارفة اترجمها صحبتي قالتلي معناها كذا قولتلها لأ مش مصدقة سألت صحبتي الاشطر مننا قالتلي قولتلها مش مصدقة فتحو القاموس وبرضو مفيش فايدة أنا لما بزاكر ببقى هختل انا مرة قعدت ازاكر كميا في يوم عيطت عياط كنت بسوط كده من كتر ما انا لأ كده غلط وقطعت المزكرة ورميت الكتب وحلفت مش هزاكر، انا درست فقه كانت أصعب أيام في حياتي وقت ما درسته مكنتش بنام من الأرق والقلق عارفة ليه لأن في خلافات بين العلماء ف انا بقا اقعد اقول افرض ده مش الراجح زي ما قال مش هتحاسب مين اللي قال كده يمكن اتحاسب وليه فسرو الحديث كده يمكن اتفسر غلط مين اللي قالهم إنه كده تفسيره اللغة ؟ يمكن اللغة غلط وعرفوا منين اللغة دي من العرب والعرب عرفو منين وستين ألف سؤال، يبقى الحديث قدامي صحيح اقول يمكن ضعيف ،مفيش تعريف خدته في العلم الشرعي انا مصدقاه مش الصيام السنة يجوز النية في النهار؟ جيت اصوم ست من شوال على القاعدة يبقى عادي ننوي من النهار انا بقى مش مصدقة قولت ما يمكن عشان دي ست شوال ف مش كده، بشك في اصحابي أوي يبقى الواحدة منهم مسجلة ريكورد واسمعه على الواتس واقول لأ ممكن مش صحبتي وانا عارفة صوتها بحس ان كل الدنيا بتكدب عليا مش بصدق حد خالص أي بني آدم، تعرفي ان في دماغي ان العالم كله بيكذب عليا كله بلا استثناء آسفة في الكلام حتى حضرتك معاهم كلو بيكذب عليا العالم كله حتى الأطفال وكلكم بتضحكو عليا ومفهميني ان في حياة وآخرة وجواز ودين وإلى آخره وهو اصلا مفيش الحجات دي اصلا وكلو بيكدب مش عايزة اي أدلة على أي حاجة لا دينية ولا عقلية لاني كده كده مش هصدق كل اللي حكيته ده عندي من وانا طفلة صغيرة بس متكلمتش مع حد قولت يمكن بيكدبو وأما أكبر هيقولولي الحقيقة بس محدش قال حاجة🥹💔💔 اعمل إيه !! بس هقول لحضرتك حاجة على ده كله انا شاكة في ربنا بس بطيعه بتعلم علم شرعي وخاتمة القرآن وبتعلم تفسير وقراءات وبصلي وبصوم وبدعي ربنا كتير ولابسة نقاب وبدعو إلى الله وبحفظ الناس قرآن 🥹 معلش بلاش حضرتك تقوليلي خلاص مادام بتعبدي ربنا وكويسه اهو يبقى خلاص مفيش مشكلة والوسواس عند أي حد حتى الصحابة والرسول قالهم ذاك صريح الإيمان الكلام ده سمعته ستين مرة مجبش معايا نتيجة عايزة حل للي أنا فيه هتجنن بجد

Accepted Answer

السلام عليكم ورحمة الله وبركاته واضح من كلامك وشرحك للأعراض التي تظهر وبشكل واضح واعترافك انها وسواس فهو بالفعل وسواس قهري عقيدة والأقرب من أفكار وسواسية وحضرتك تحتاج إلى علاج نفسي دوائي مضاد للوسواس القهري مع جلسات علاج نفسي اكلينكي لتصحيح الأفكار المسببه للاضطرابات النفسية وتعديل السلوك الناتج عن الاضطراب النفسي #Dr_A معالج نفسي

Answer

كتبتى مشكلة طويلة عريضة ومحاولات للخروج منها بدراسة عقيدة وفقة وما إلى ذلك وولا مرة فكرتي إنك مريضة ؟! وفعلا معاناتك دي مش هينهيها تعلمك عن علم معين ولا قراءة الأدلة ولا أى حاجة من دي وحتى لو كانت مقنعة لكل الناس هتيجى عندك وعقلك هيرفض يصدقها ليه؟ لإنه للاسف فى مشكلة حقيقية محتاجة لعلاج من طبيب نفسي هي دي الحالة الوحيدة اللى هتخلي حياتك تتغير وتتحسن شوية وع فكرة انا حاسة انه مش مجرد وسواس قهرى لا ده احتمال معاه حاجة تانية جايز تبقى بارانويا .. متتردديش إنك تزوري طبيب نفسي واهلك اكيد لاحظوا عليكي ده والمفروض يكون فى دافع من اهل البيت بردو لانك ممكن متصدقيش إنك محتاجة علاج ولا تصدقى الدكتور لو روحتي وقالك عندك مشكلة بس الحاجة اللى هتحسي فيها بتحسن ولو بسيط مع الاستمرار هو العلاج ..اعتبريني بكدب عليكى عادي بس التجربة مش هتخسرك حاجة بالعكس مش يمكن تكسبك؟ مش يمكن كدبي عليكي ده يريح عقلك شوية ؟ .. ربنا يعينك ويقويكى وتبقى كويسة وزى الفل يارب .

لدي وسواس في كل شئ حولي، وهذا يدمرني نفسيا!

نفسية

وسواس

سؤال من احد أعضاء فدني

تم النشر الأحد، ٢١ أبريل ٢٠٢٤

2 إجابة

7 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك