بيكسرني متعمد

Question

دا مش حبيبي ولا خطيبي ولا جوزي دا حد انا متعلقة بيه ولو سمحتو بلاش حد يقولي قربي من ربنا وابعدي عنه والكلام دا انا مش كافرة بردو ومش محتاجة اسمع الكلام دا علشان سمعت منه كتييير قبل كدا وانا مش بعيدة عن ربنا ولا حاجة المهم كان في مشكلة صغيرة خالص بيني وبين حد غالي اوي عليا وانا مش شايفة انها مشكلة كبيرة بالعكس حاجة بسيطة وحاولت اكلمه واتس واقوله مالَ يقولي ماقلت مفيش واحاول معاه تاني يشوف الرسالة ومردش والحركة اتكررت في موقفين كمان قبل كدا ان هو بيتقل عليا علشان عارف ان انا بعزه ومقدرتش اشوفه زعلان ويا جماعة مش هو بس اي كااائن محبش اشوفه زعلان ابدا ومش بيجيلي نوم غير لما اصالحه المهم علشان يعمل نفسه زعلان بزيادة بقى يخفى السين ويشوف استيت الواتس بتاعي علشان يبينلي انه مش فارقة معاه او ممكن مكنش بيشوفها فعلا ودا حصل من ليلة عيد ميلاده مبقاش بيشوفها برغم ان حتى واحنا متخاصمين كتبتله رسالة صغيرة لطيفة بقوله فيها كل سنة وانت طيب عارفة انك هتتم.... وبطل تكشير ورسمتله رموز تعبيرية صغيرة لطيفة بحيث وهو بيقرأها يبتسم بس هو مطنشني خاااالص ومكلمنيش بعد الرسالة قالي وانتي طيبة ولا اي حاجة المهم طول الفترة الللي مش بيكلمني فيها ومكنش بيشوف استيت الواتس كنت بحس روحي بتتحرق وكنت حاسة انه خلاص معدش موجود في حياتي بس انهاردة لما نزلت استيت ولقيته شافها حسيت روحي رجعتي وكنت عايزة اقوم اتنطط من الفرحة، عارفة ان دي مبالغة بس فرحت اوي اوي اوي مع العلم ان احنا لسة مبنتكلمش وانا مش عايزة اهين كرامتي اكتر من كدا واحاول اصالحه بس لو انا محاولتش هو مش هحاول وانا مش قادرة افضل على الوضع دا والمفروض إبان قدامه ان انا ولا فارقلي وعايشة حياتي علشان مبيحسش انه بيضغط عليا ولا ان انا زعلانة عليه وهموت واكلمه بس والله الوضع دا بيحرقلي قلبي بطريقة ان انا مش شايفة في الدنيا غيره وحاسة طول الوقت ان عليا دين او فلوس لحد علشان زعله مني دا وهو بيكسرني متعمد و المفروض انه قالي قبل كدا انا عارف ان انا وجعتك قبل كدا فمش عايز اأذيكي تاني وكلام من دا اعمل ايه وياريت تراعو مشاعري ومحدش لوسمحتو يقول كلام هو مش حاسس بتقله علشان انا نفسيتي متدمرة وبرضو دا مش احساس الحب هو إنسان غالي عليا اوي بس مش اكتر

Accepted Answer

سؤالك يصلح كتعريف قاموس للعلاقة السامة!! علاقة تستنزف مشاعرك وتركيزك وحياتك ومش عارفة تطلعي منها بعُقّاد نافع! إذا كانت لا هي زواج ولا حب سيتطور لزواج فهي لا شيء في الحقيقة .. وهي ستنتهي آجلا أم عاجلا عندما تجرف أمواج الحياة كلا منكم في طريقها ولن يتبقى لك منها إلى ذكرى الوجع والنفسية المتدمرة أنت مش محتاجة حد يقول لك تعملي إيه .. أنت محتاجة تقفي مع نفسك وتفوقيها

Answer

اغلى ما يملكه البني ادم هو كرامته .. لو اي حاجة هتمنع عنك اذى نفسي بس هتهين كرامتك يبقى كرامتك اولا هو واضح وصريح وانتي محتاجة تكوني صريحة مع نفسك

Answer

مش بتحبيه! أقولك على حاجة كمان هي المشكلة مش فيه أصلا ولا في أي حد من اللي قولتي عليه إنك مش بتحبي تشوفيه زعلان. المشكلة مش في أي حد. المشكلة فيكي انتي!! اه انتي ... يمكن المشكلة فيكي من زمان وانتي مش عارفه اساسا أنها مشكلة. مخاطرش على بالك تسألي نفسك (هو أنا ليه كده)؟ ليه مبحبش اشوف حد زعلان مني؟ ليه مش بحب حد يبعد عني؟ ليه أول ما بشوف حد بعد كأن الدنيا وما فيها أنطفت؟ مسألتيش نفسك كل ده؟ طيب ايه الفرق بينك وبين حد تاني قرر إن لو حد عامله بنفس الطريقة يقرر وفورا أنه ينسحب، باب واتقفل، يعني راح ومجاش! ممكن تقولي لينا علاقة بالأب والام كانت عامله ازاي في طفولتك؟ ليه أنا بسأل السؤال ده؟ علشان علاقتنا ب اللي حوالينا وطريقة تعاملنا معاهم هي من أنشأت ما انتي عليه حاليا. مش هقولك غير أن فيه مشكلة حقيقية انتي محتاجة تعي ليها وتفهمي نفسك المرة ديه، لأن أي مشكلة محتاجة فهم وإدراك واقتراح حلول، انتي لو أدركني أو فهمتي ده بيحصل ليه هتعرفي تمسكي اول الخيط. اللي بتكلم عليه حاجه اسمها أنماط التعلق التعلق الامن، والقلق، المتجنب، الخائف. محتاجة تكلمنا اكتر عن طفولتك، علشان نقدر نساعدك، محتاجة كمان إنك الافضل طبعا تتابعي مع اخصائي نفسي او كوتش. دمتي بخير

بيكسرني متعمد

نفسية

اجتماعية

سؤال من احد أعضاء فدني

تم النشر الخميس، ١ ديسمبر ٢٠٢٢

6 إجابة

4 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك