أنا طالبة في تالته ثانوي وبصراحة كمية الضغط عليا بتزيد كل يوم والكل بيقولي عاوزينك دكتورة وانا كمان نفسي بس خايفه ومتوترة وكمان اتخذلت من اقرب صحاب ليا فحاسه ان دي خلاص النهاية اصل انا ولا عارفه اذاكر ولا عارفه اتقلم مع القلق والتوتر اللي حرفيا سببولي المرض
طالما عايشة وفيه نفس طالع وخارج .. يبقى عمرها ما هتكون النهاية ابدا. الثانوية العامة مش نهاية الدنيا ولا عمرها هتكون .. وكلمة (تحديد المصير) ديه ترهيب. يعنى ايه تحديد مصير ؟ ما كل حاجة احنا بنعملها في حياتنا مرتبطة بحاجة بعدها ومقترنة بنتيجة أفعالنا .. ليه هي بالذات تحديد مصير؟ التوتر والخوف اللي انتي فيه عقبة .. خوفك اكبر عدو ليكي .. اهزيمه سواء كنتي في ثانوية عامة ، كنتي في كلية ، كنتي في اي حاجة .. عمره ما كان ولا هيكون حل لمشاكلنا. ثقي في نفسك .. واعرفي ان طالما انتي عامله اللي عليكي .. توكلي على الله اصل هتعملي ايه اكتر من انك تعملي اللي عليكي؟ في ايديكي ايه هتعمليه اكتر من كده؟ انتي شوفتي قولتي ايه ..؟ اللي بيعملوه والتوتر والقلق سببولك المرض .. منتظرة ايه تاني ؟ من فضلك اقتنعي انك طالما عملتي اللي عليكي خلاص .. مفيش حاجه تتعمل . واعرفي ان الثانوية العامة مش النهاية .. بل ان كل حاجة في حياتنا هي بداية لا تنتهي الا بموت الانسان. اتمنى ليكي التوفيق
تم النشر الثلاثاء، ١٠ يناير ٢٠٢٣
لو مع اول وقعه وقعناها واحنا بنتعلم المشى فضلنا فى الارض ومقومناش تانى ...كان زماننا كلنا مش بنمشي وبقينا بنزحف بس فى كل حياتنا مع كل وقعه وخبطة لازم نقوم ونكمل والا هنفضل مكملين فى الارض. مش اخر الدنيا ولسه فى قدام كتير ...حلو ووحش اهدى الاول من كل التفكير السلبي ده وبعدها تقدرى تركزى ف المذاكرة
تم النشر الثلاثاء، ١٠ يناير ٢٠٢٣
بصي الضغط ده حاجه مش حلوه حاولي تتخلصي منه واعملي اللي عليكي علي قد ما تقدري وخليكي واثقه أن ربنا ما بيضيعش تعب حد ومادام انتي نفسك تبقي دكتوره وذاكرتي بجد اكيد ربنا هيكرمك ولازم تدخلي في تحدي مع نفسك علشان تفرحي في الاخر وانتي محققه اللي نفسك فيه لانك اكيد تستاهلي انك تفرحي وادعي ربنا كتييييير وخليكي متفائله وبالنسبه لاصحابك ده مش وقتهم خالص ركزي بس في مذاكرتك وهدفك
تم النشر الثلاثاء، ١٠ يناير ٢٠٢٣
خليكي واثقه في ربنا كويس جدا انه لما مريتي بتجربه خذلان من اصحابك ف وارد كانو شر ليكي وربنا بعدهم عنك متعرفيش في خير جيلك قد ايه من بعدهم عنك وكمان انتي لسه صغيره يعني هتقابلي ناس كتير وهيبقا ليكي صداقات افضل لانك كبرتي ونضجتي من تجاربك السابقه وعرفتي تختاري صحابك صح ازاي وبعدين احب اقولك ان طالما اهلك شايفينك دكتوره بأذن الله ف انتي بتتعبي وبتجتهدي وذكيه جدا عشان توصلي بأذن الله لهدفك ثقي في قدراتك وامكانياتك واستعيني بالله في كل مشكله بتمري بيها وحاولي تسترخي وتنظمي النفس عندك بتدريب التنفس وانك كل محسيتي انك قلقتي قوي قللي من استخدام الكافيين والشوكلت وبدليهم بحليب او يانسون او نعناع عشان يقلل القلق وافضلي كرري فكره انك شاطره ومجتهده وذكيه وان شاءالله هتبقي احسن دكتوره
تم النشر الأحد، ١٥ يناير ٢٠٢٣
الشعور بالضغط شيء عادي و طبيعي و بيحصل للكل لمختلف الأسباب ناخد بريك و منربطش المواضيع ببعضها.. القلق الدراسي بيحصل بس لازم نحط له حد علشان ميجيش علي صحتنا، تاني شيء كله بيعدي، الحلو و الوحش فلازم منديش الأمر ازيد من حجمها علشان ميقلبش بوساوس و الخ، الأصدقاء لوخذلوني يبقي انا غلطت في اختياري ليهم، و دي غلطة و الشاطر يتعلم من غلطه و برضه لازم متعليش سقف توقعاتك في الآخريين لأنه في النهاية كل واحد بيختار مصلحته و الأصلح ليه، و اوقات كتير بيخذلونا، خليك ثقتك كبيرة في ربنا ثم في نفسك،
تم النشر الثلاثاء، ١٠ يناير ٢٠٢٣
انا كنت زيك ف تالته ثانوي مستسلم لليأس وشايفه ان الظروف كلها ضدي السنه دي نجحت ودخلت تربية وراضية جدا بس يحببتي الي عايزه هيكون انتي اسعي وبس
تم النشر الأربعاء، ١١ يناير ٢٠٢٣
لعرض السؤال في فدني اضغط هنا