السلام عليكم ورحمة الله وبركاته
انا عندي شعور غريب ميكس ما بين كُره النساء وتصرفاتهم وما بين اني عايز اتجوز.
التفسير: اولا شعور الكُره الشعور دا جالي من لما بدأت أعاصر مشاكل النساء مع ازواجهم وحاجات كده ، اللي هو اي العقلية دي وازاي الست دي تكلم جوزها كده وبحس بقرف واشمئزاز من طريقة التفكير غير الناضجة ولا المسئولة دي ولا بقا لو قلبت شوية في الفيسبوك ولا بتاع حاجه في منتهي الانحطاط الاقيهم بيتكلموا عن الشغل ولا الواجبات والحقوق اللي هي تعرفهم لنفسها بس متعرفش حقوق جوزها عليها وحاجات تانيه كتيرة كده لو فضلت اتكلم فيها مش هخلص بس بجد ببقي عايز اقوم اطربق دماغهم واكتمهم مع ان لما اخواتي يعملوا كده ببقي هادي في التعامل معاهم وبتاع وبطنش ومبشغلش دماغي بمعظم الكلام.
ثانياً شعور الميل ليهم بشكل فطري زي اني لما الاقي بنت غير متزوجة مثلا واقعة في مشكلة ومنهاره وبتاع علي الموقع دا او بره بس اني عايز احتويها كده واطبطب عليا كده واهدي بس الدنيا مش مستاهلة وزي ما انتو فاهمين يعني.
فمش عارف بصراحه انا كنت وصلت لمرحلة اني قولت مش متجوز ولا عايز اشوف اي نساء علي وجه الكرة الارضية نهائي وبعدين هديت وقلت لا برضو لازم نتجوز وبتاع،
فأنا مش فاهمني فلو حد فاهمني يا ريت يفهمني التناقضات اللي عندي دي وازاي اكون سوي وصبور عشان انا زهقت مني بصراحه
السلام عليكم ورحمه الله وبركاته. شوف يا استاذ صلاح. الميكس اللي موجود عندك ده نابع من خوفك من المستقبل عموما انت شايف ان في عقبات او ازمات ممكن تحصل في المستقبل فخوفك من الازمات دي ان هي تحصل هو اللي مخليك عندك الخوف لما بيقف قدام احتياجاتنا الفطريه الطبيعيه بيبدا يحسسنا ان احنا ما بقيناش عارفين احنا عايزين ايه احنا عايزين ولا مش عايزين طيب ناخذها واحده واحده نمره واحد هل انه انا احس ان انا منجذب للنساء ده شيء طبيعي ده شيء طبيعي وفطري ومنطقي جدا وما فيهوش اي حاجه غريبه ان انا دلوقتي كرجل لما بكون قدام الجنس الاخر جوه اي موقف بقى يعني بحس ان انا حابب اكون اقرب للجنس الاخر ليه؟ لانه ده احتياج فطري الاحتياج للجواز ده احتياج فطري فده طبيعي جدا تمام ده منفصل بقى عن اي حاجه ثانيه. نيجي بقى للشق الثاني انا دلوقتي قدام مستقبل جواه اشياء كتير جدا مجهوله. حاجات انا ما اعرفش هتحصل ولا مش هتحصل فنمره واحد الخوف من المجهول شيء طبيعي جدا وبيحصل لكل الناس. طيب لما انا اكون عندي خوف من المجهول ومعرفش ايه ممكن يحصل او ايه الازمات اللي ممكن تعدي هل ده معناه ان انا مش هتوجه للمستقبل هنا بقى هيجي مفترق الطرق يا اما هقف مكاني وهرفض ان انا اتحرك لقدام لان حاسس طول الوقت ان انا مش جاهز اتعامل مع الحاجات اللي ممكن تحصل في المستقبل او العقبات اللي ممكن تحصل واتعامل معاها فهفضل واقف مكاني هقول خلاص انا مش حتحرك لقدام لاني ما اقدرش اتعامل مع المجهول ده او هبدأ وانا واقف في مكاني اقول لا انا هتحرك لقدام ولكن انا هكون مستعد لاي حاجه ممكن تحصل وهنا هتيجي النقطه بتاعه التعرض لانواع المشكلات اللي هي ممكن تقابلني في المستقبل زي ما قبلت الناس اللي هم سبقوني بقى اللي سبقوني حصل معاهم نوعيه المشكلات دي طيب نمره 1 كده هل انا اقدر اجزم او ااكد ان انا مش هتعرض لنفسي انواع المشكلات الحقيقه لا مش هتقدر تجزم بده اللي تقدر انك تكون متاكد منه انك تاخذ حذرك انك تقلل من نوعيه المشكلات اللي ممكن تقابلك او تقلل من احتماليه انك تتعرض للمشكله دي تعالى ناخد مثال انا دلوقتي عندي تخوف او في احتماليه ان انا زوجتي في المستقبل. تبقى بتنكر الحاجات الحلوه اللي انا عملتها طيب انا اتجنب ده ازاي واقلل احتماليه ده ازاي اقلل احتماليه ده بان انا وانا رايح ارتبط بانسانه كزوجه مستقبليه وبتقدم لها وبتعرف عليها اشوف تعاملها في وسط اهلها اشوف كلامها عن اهلها وعن ابوها هل هي بتنكر كل اللي هم قدموه او لهجتها فيها ان هي مع اقرب موقف بتزعل مثلا من اهلها او حاجه بتضايقها بتبدا تنكر او تبدا تذم فيهم لو لقيت ده يبقى انا كده باقرب من احتماليه ان انا اقع في نفس المشكله لكن لو انا لقيت ان لا يعني ده البنت قليل قوي ما بتتكلم عن ان هي متضايقه منهم او لما بتبقى متضايقه بتتكلم بس على الموقف اللي مضايق ما بتبداش تقول دول معموليش اي حاجه خالص ولا تنكر كل الفضل اللي ليهم يبقى انا كده تمام والبنت دي احتمال ضعيف جدا ان يصدر منها الموقف ده ده اللي احنا بنعمله عموما بقى انا شايف في نوعيه ازمات ممكن تحصل في العلاقه ما بين الزوجين وعاوز ان انا اقلل من احتماليتها او اتجنبها فببدا اخد احتياطاتي بالشكل ده واخد بالي من النقط دي وانا بختار الشخص اللي انا هرتبط بيه في المستقبل نقطه ثانيه بقى عايزاك تاخذ بالك منها كويس جدا جدا في مساله الجواز او في الاقبال على الجواز ما تدخلش ابدا المشوار بتاع اختيار شريك الحياه او اختيار الزوجه وانت بتحاول تلاقي شخص مش هيطلع معاه اي مشاكل لانه ده مش طبيعي ومش منطقي ومش هتلاقي زوجه مش هيطلع منها أي حاجه تمثل العقبه او تمثل مشكله او تكون حاجه انت هتتحملها ضروري تكون عينك دايما على الميثان والبيت على فكره اللي هو البيت المسلم اللي بيرضي ربنا عز وجل مش معناه ان ما فيهوش اشخاص ما بيغلطوش هتكون انت وهي إن شاء الله عاوزين ترضوا ربنا ولكن بتقف غلطات لان انتوا بشر هتفضل انت بشر وهتفضل هي بشر وهتقع في غلطات علشان تكونوا عاملين. بيت مسلم سليم هتكونوا متاكدين ان انتوا الاتنين بتساعدوا بعض ان انتوا تتخطوا الاخطاء هتكونوا انتوا الاثنين بتساعدوا بعض ان انتوا تذكروا بعض باللي اللي ربنا عاوزه تذكره بعض ازاي تقدروا توقفوا الغلط وازاي تحسنوا من نفسكم لو انت حطيت عينك على انك هتدخل الجواز عشان تعين الانسانه دي انها ترضي ربنا وتعينها يعني انت اللي هتبقى بتساعدها مشي تحصل هو اللي مخليك عندك التضارب اللي موجود جواك ده. تواخدها كده تمام هي زي الفل بترضي ربنا وما بتعملش اي حاجه غلط لان ده مش منطقي لا انت هتبقى داخل الجواز انك داخل تعينها على طاعه ربنا الموضوع هيبقى مختلف خالص في نفس الوقت هتبقى بتختار بني ادمه عينك انت كمان على طاعه ربنا معناها ان انت هتبقى متقبل منها انها لما تشوف حاجه غلط تذكره وتقول لك خلي بالك انت كده ماشي غلط وتبقى انت متقبل ده وفاهم ده وعارف ده ان هي كمان بتعينك وبتساعدك مش جايه بتقول لك انت وحش وانت غلط ركز في النقط دي واتمنى ان انا اكون ساعدتك تفهم الوضع اللي انت فيه.
تم النشر الاثنين، ٧ أبريل ٢٠٢٥
انا شايفه ان المشكله في المكان اللي بتتكلم عن النساء فيه عامه او الديره اللي انت حاطط نفسك فيها لانه غالبا ولنكون صريحين اغلب اللي عنده فيس بوك وبيدخل في مواقع وبحكي مشاكل بيته وما اللي ذلك هو إنسان مش عاقل سواء راجل او ست ،لذا يا صديق في الحمدلله بنات عاقلين جدا ومحترمين لذا ادعي ربنا يرزقك ببنت الحلال اللي تكون فاهمه نفسها وفاهمه دينها صح وايضا حاول تغير المجتمع بتاع السوشيال ميديا اللي انت محطوط نفسك بيه
تم النشر الأحد، ٦ أبريل ٢٠٢٥
السلام عليكم أستاذ صلاح، شعورك طبيعي وأتفهمه، لكن متقدرش تعمم وتقول إن كل النساء زي ما بتقول، جرب تقفل السوشيال ميديا وتخرج براها لأنها بقت حرفيًا مكان موبوء خاصة فيما يخص الحرب الدائرة بين الجنسين وكفيلة فعلا تكرهك في الزواج وتخليك تصرف نظر عنه تمامًا، وبطل كمان تسمع مشاكل المتزوجين والمطلقين من طرف واحد لأني متأكدة إن كل طرف بيكون شايف نفسه ملاك والطرف التاني ألعن الشياطين. *** اخرج كمان برا عباءة الذكورية الشرقية والعادات والتقاليد اللي نشأنا عليها ومش من الدين واعرض أفكارك على الشرع قبل ما تحكم هل فعلا الكلام اللي قرأته أو سمعته من واحدة أو مطالباتها بحاجة ما دي من صميم حقوقها اللي فرضها الدين ولا أفكار نسوية مستوردة من الغرب فعلًا وفي الحالة دي يحق لك الاعتراض عليها؟ *** وسبحان الله، عارف لو جربت تشوف من الناحية التانية، على الطرف الآخر هتلاقي بنات كتيييير قوي كرهت الزواج وكرهت الرجال بسبب أسباب مشابهة للي بتشتكي منها لكن من الطرف الآخر، جرب كده تقرأ تعليقات الشباب المصريين واستحقارهم للمصريات وتعميمهم واتهامات للبنات والنساء المصريات كلهن تصل إلى حد قذف المحصنات. جربت تلاقي ابن بلدك ماشي على السوشيال ميديا يحذر كل الناس من الزواج من مصرية، جربت تقرأ كلمات زي نواشز ومطلقات المحكمة ونسويات، وبتتقال على بوستات أصلا مفيهاش أي مشكلة، حتى على بوستات فيها أحكام شرعية لكن لمجرد إنها في صف المرأة بتزعلهم. ** جرب كمان تشوف كمية الاتهامات بالاستغلال وغلاء المهر وتكاليف الزواج ووو في الوقت اللي أصلًا أهل البنت بيشاركوا في نص الجهاز، في حين الدول العربية والإسلامية البنت مش بتحط قشة وبتاخد مهرها كامل وبتروح بشنطة هدومها. عارف هنا بقى لما بنت وأهلها يقرروا يترفقوا بالعريس ويخففوا عنه ويقولوا فعلا بنشتري راجل، عارف إيه اللي بيتقال؟ ومش كدب، ده حصل كتيير قوي ومع ناس قريبة مني وقرأتها في تعليقات لبنات كتير سواء كملوا في الزواج أو انتهت الخطوبة. اتقالهم بالحرف الواحد، أنتِ معيوبة، أنتِ أهلكِ مرخصينكِ، أنتِ أكيد عاملة عملة، أنتِ أهلكِ رموكِ. لما واحد اشتكى في بوست إن الأهل بيغلوا المهور واحدة كتبت له إن الأهل في أغلب محافظات مصر بيساعدوا في نصف الجهاز قام نفس الشخص اللي بيشتكي قايلها دي جوازة البايرة. يعني هو انت عاوز الأهل يغلوا عليكم ولا يرخصوا؟ ولما يساعدوكم تقول جوازة البايرة؟ **** زي ما أنت شايف إن فيه ستات كتير تفكيرهم غير ناضج، فيه رجال كتير ظالمين ومش عارفين من الشرع غير اللي في صفهم، لدرجة إن لو شيخ طلع اتكلم عن حاجات هي أصلا من حقوق المرأة اللي شرعها ربنا بيشتموه. تخيل توصل لشتيمة المشايخ لمجرد إن الرأي مش على هواهم. زي ما في ستات بتنتقم من طليقها وتحرمه من ولاده في رجالة كتير راميين ولادهم ولا بيدفعوا نفقة وبالمناسبة كمان ودي قرأتها في كذا تعليق من رجال مطلقين، بيقولوا على أولادهم، ولاد المطلقة. لمجرد انفصالهم عن الأم. ***** عامة باختصار، المجتمع المصري حول الزواج لشيء صعب وبشع وخلاه مجرد مظاهر كذابة، جهاز وفرح كبير ومعازيم لاثنين ميعرفوش أصلا يعني إيه زواج ولا بناء أسرة ولا حقوق وواجبات بتعدل بين الطرفين. فبقى طبيعي نوصل للمرحلة اللي حضرتك شايفها، والجنسين بقوا في حرب وكراهية متبادلة والزواج بقى مكروه من الطرفين أو في أقصى تقدير دواء مر مجبرين ياخدوه عشان المجتمع ميقولش لهم فاتكم القطر. *** تحياتي لحضرتك.
تم النشر الأحد، ٦ أبريل ٢٠٢٥
تأكد أن البنات متغيرتش كده إلا لأن الرجاله اللى المفروض مسؤلين عنهم فطرتهم السليمه كرجال قوامه فسدت في رجاله دلوقتي كتير في رقبتهم بنات و زوجات ونساء بمختلف العلاقات مش بيهتموا بيهم لا دينيا ولا حتى بشكل دنيوي الرجاله دى مش بتفكر غير فى هما هياخدوا ايه بس وبتتصرف الرجاله بطرق مش كويسه وده دفع الستات اللى مسؤولين منهم أو حتى الستات التانيه ميحترموش الرجاله ويقلقوا منهم وكمان الستات دى بيحسوا أن هما رجالة نفسهم يعني شريحة كبيره من البنات اصبحت تحس ان الست هى اللى لازم تكون الرجال لنفسها يعني تسند نفسها بنفسها عشان كده انت اصبحت تشوف الوضع ده
تم النشر الاثنين، ٧ أبريل ٢٠٢٥
للأسف انت مخزن افكار سلبية كتير في عقلك من كتر القصص اللي بتتحكي قدامك والأفكار دي بتتأكد عندك من التفاهات اللي بنشوفها علي الفيسبوك واللي أغلبها بتكون غير حقيقية وفيها مبالغات كتير وأغلب الناس دي واقعهم مختلف فبيدخلوا يتكلموا كنوع من فرد العضلات أو التباهي بأنهم أصحاب شخصيات قوية وفاكرين أن اسرار بيوتهم وقصصهم هتلاقي انجذاب من الناس وده واقع افتراضي لا يجب القياس عليه اولا في بنات كتير جدا كويسين ومتربيين وبنات بتقدر المسئولية ومتربيين علي الأصول زي والدتك وخالتك وعمتك وغيرهم كتير وكلهم فاتحين بيوت ومستقرين في زواج ناجح ومثمر حاول تختار واحدة شبهك وابعد عن تفكيرك خالص كل الأفكار السلبية دي وربنا يوفقك باذن الله 🙏
تم النشر الاثنين، ٧ أبريل ٢٠٢٥
اولا طريقة التفكير غير الناضجة غير مرتبطة ابدا بنوع معين لان دي صفة تخص الإنسان ملوش علاقة بأنه راجل أو ست وبتبقي بسبب حاجات كتير قلة خبرة وسن صغير أو نتيجة البيئة اللي كان عايش فيها ثانيا معتقدش ان المفروض تبقي فكرتك عن البنات متاخدة من بوستات فيسبوك نسبة صحتها لا تتعدي ١% وهي غير واقعية تماما انت عارف الناس في السوشيال ميديا بيحاولوا يوصلوا للاكستريم عشان يجذبوا الناس اكتر وزي ما قلت انت لما بتتحط في مواقف واقعية مع اخواتك عادي بتعرف تتصرف والدنيا لذيذة ولو مثلا التصرفات الغير مسؤولة أو التفكير الغير ناضج دا طالع من حد انت تعرفه شخصيا يبقي لازم تعرف الصورة كاملة لان ممكن يبقي حكمك علي عدم نضج الشخص دا حكم غلط وسطحي
تم النشر الأحد، ٦ أبريل ٢٠٢٥
وعليكم السلام ورحمة الله وبركاته، أخي صلاح، أشكرك على مشاركتك مشاعرك وتفكيرك بصدق حول هذه المسألة المعقدة. من الواضح أنك تشعر بتناقض كبير بين المشاعر السلبية تجاه بعض النساء ورغبتك في الزواج، وهذا أمر يشعرك بالحيرة والإحباط. أولاً، دعني أؤكد لك أن مشاعرك طبيعية إلى حد ما. العوامل الاجتماعية والثقافية التي تجعلك تتأمل تصرفات النساء في مجتمعنا يمكن أن تؤثر بشكل كبير على رؤيتك. من المهم أن نعي أن كل فرد فريد من نوعه، وأن سلوكيات مجموعة من الأشخاص لا تعكس بالضرورة سلوكيات الجميع. النقطة الثانية التي يجب عليك اعتبارها هي أهمية التواصل والتفاهم في العلاقات. بينما قد تكون قد واجهت أمثلة سلبية من النساء، تذكر أيضاً أن هناك نساء ناضجات ومستقلات يمكن أن يكن شريكات حياة رائعين. الزواج ليس فقط حول الانجذاب، بل يعتمد أيضاً على التفاهم والاحترام المتبادل. لكي تتغلب على هذه التناقضات، قد يكون من المفيد أن تأخذ بعض الوقت للتفكير في القيم التي تهمك في شريكة الحياة، وتحديد ما تبحث عنه في العلاقة. من الضروري أن تصل إلى حالة من القبول الذاتي، وأن تتقبل عواطفك المختلفة كجزء من تجربتك الإنسانية. يمكنك أيضاً أن تفكر في فتح حوار مع أحد الأصدقاء الموثوقين أو مستشار نفسي لمساعدتك على فهم مشاعرك بشكل أعمق وتوجيهك في تطوير مهارات التواصل. تذكر أن العلاقة الناجحة تحتاح إلى الصبر والتفهم لكل من الطرفين. في النهاية، الإحساس بالسلام الداخلي والقدرة على مسامحة الآخرين، بما في ذلك النساء، سيساعدك في بناء علاقات أكثر صحية في المستقبل. ابحث عن المعاني العميقة في العلاقات وتفاعل مع الأشخاص الذين يلهمونك ويشجعونك. وفقك الله في مسيرتك، وأتمنى لك التوفيق في رحلتك نحو الفهم والسعادة.
تم النشر الأحد، ٦ أبريل ٢٠٢٥
التعميم غير صحيح يا صديقي، اكيد بتلاقي البنت اللي تسعدك وترضيك فقط تقبل فكرة اختلاف الناس وتوافق مع من تحب فقط منهم وخلي نظرتك ايجابية وسترى مايسرك ، لاتبالغ في لوم الاخرين كل شخص له ظروفه وبيئته مثلا الغير متعلم غير مدرك لكثير من امور الحياة بطبيعة الحال فالافضل تقبله كما هو .
تم النشر الاثنين، ٧ أبريل ٢٠٢٥
اولا جزاك الله خير على الصراحة مع نفسك والاعتراف بالمشكلة ... ولعل دا سبب وضعه لك الله عشان تختار اختيار صحيح في الزواج بدل ما تتورط في وحدة مجنونة .......... لازم تفصل بين نظرتك للنساء وفكرتك القاصرة اللي مستمدها من الفيس بوك وبين الواقع ... ففي نساء اسوياء وعاقلين ومجتهدين وداعمين كثير .. فعليك فقط انك تحسن الاختيار وتتأنى ولا تغتر بالمظاهر والجمال بل بالدين و بالأخلاق والتفكير وبعدين الجمال ... وقد يكون سبب المشكلة انك متقلب في المزاج مثلا .. فلازم تواجه نفسك وتقعد يوميا تتأمل وتعيد التفكير وترتب أفكارك عن أي حاجة تيجي في بالك لمدة ١٠ دقائق .. فباختصار تحسن الاختيار وتراجع أفكارك
تم النشر الاثنين، ٧ أبريل ٢٠٢٥
لما بتقف على بوست ع الفيسبوك بتبدأ الخوارزميات تطلعلك كل المحتوى اللي شبهه فبتحس إن النساء كلها كده، أي صفحات أو جروبات مشاكل أسرية اطلع منها، لإن ليها تأثير سلبي، السوشيال ميديا مش الواقع،
تم النشر الاثنين، ٧ أبريل ٢٠٢٥
وفكرة أن لما تشوف واحدة في مشكله وتكون عايز تساعدها ده لان ربنا خلق الراجل لده يعني انت مش بتعمل كده لأنه أمر وفرض من ربنا عليك كرجال انك تكون قوام على النساء بس انت كمان بتعمل كده لان فطرتك سليمه من جوه متعرضهاش ولا تخلى كرهك يغلب غريزتك وفطرتك كراجل لأن ده أمر ربنا وكمان انت خلقت لهذا عشان تكون سند وقوام يعني مسؤول جزئية اشمئزازك دى مش ناحية الستات دى من ناحية الناس اللي فطرتها باظت وخربت يعني ده مش من جنس الستات ده من التصرف في حد ذاته أو الفطره الغير سليمه
تم النشر الاثنين، ٧ أبريل ٢٠٢٥
انك تفكر فى الجواز ده جزء من غريزتك وفطرتك السليمه انت مش متشتت دى عواطفك وغريزتك وعلى فكره انا كمان عندى كره الرجاله من زمان و كمان بقول زيك مش عايزه اتجوز بس غريزه اللى ربنا زرعها داخل الراجل و الست هى الدافع للجواز وبصراحه بعد اللي انت قولته عن غريزتك حسستنى انى في امل ولسه الدنيا بخير ارجوك متتغيرش
تم النشر الاثنين، ٧ أبريل ٢٠٢٥
جزاكم الله خيراً ❤
تم النشر الثلاثاء، ٨ أبريل ٢٠٢٥
لعرض السؤال في فدني اضغط هنا