السلام عليكم أستاذ صلاح، شعورك طبيعي وأتفهمه، لكن متقدرش تعمم وتقول إن كل النساء زي ما بتقول، جرب تقفل السوشيال ميديا وتخرج براها لأنها بقت حرفيًا مكان موبوء خاصة فيما يخص الحرب الدائرة بين الجنسين وكفيلة فعلا تكرهك في الزواج وتخليك تصرف نظر عنه تمامًا، وبطل كمان تسمع مشاكل المتزوجين والمطلقين من طرف واحد لأني متأكدة إن كل طرف بيكون شايف نفسه ملاك والطرف التاني ألعن الشياطين. *** اخرج كمان برا عباءة الذكورية الشرقية والعادات والتقاليد اللي نشأنا عليها ومش من الدين واعرض أفكارك على الشرع قبل ما تحكم هل فعلا الكلام اللي قرأته أو سمعته من واحدة أو مطالباتها بحاجة ما دي من صميم حقوقها اللي فرضها الدين ولا أفكار نسوية مستوردة من الغرب فعلًا وفي الحالة دي يحق لك الاعتراض عليها؟ *** وسبحان الله، عارف لو جربت تشوف من الناحية التانية، على الطرف الآخر هتلاقي بنات كتيييير قوي كرهت الزواج وكرهت الرجال بسبب أسباب مشابهة للي بتشتكي منها لكن من الطرف الآخر، جرب كده تقرأ تعليقات الشباب المصريين واستحقارهم للمصريات وتعميمهم واتهامات للبنات والنساء المصريات كلهن تصل إلى حد قذف المحصنات. جربت تلاقي ابن بلدك ماشي على السوشيال ميديا يحذر كل الناس من الزواج من مصرية، جربت تقرأ كلمات زي نواشز ومطلقات المحكمة ونسويات، وبتتقال على بوستات أصلا مفيهاش أي مشكلة، حتى على بوستات فيها أحكام شرعية لكن لمجرد إنها في صف المرأة بتزعلهم. ** جرب كمان تشوف كمية الاتهامات بالاستغلال وغلاء المهر وتكاليف الزواج ووو في الوقت اللي أصلًا أهل البنت بيشاركوا في نص الجهاز، في حين الدول العربية والإسلامية البنت مش بتحط قشة وبتاخد مهرها كامل وبتروح بشنطة هدومها. عارف هنا بقى لما بنت وأهلها يقرروا يترفقوا بالعريس ويخففوا عنه ويقولوا فعلا بنشتري راجل، عارف إيه اللي بيتقال؟ ومش كدب، ده حصل كتيير قوي ومع ناس قريبة مني وقرأتها في تعليقات لبنات كتير سواء كملوا في الزواج أو انتهت الخطوبة. اتقالهم بالحرف الواحد، أنتِ معيوبة، أنتِ أهلكِ مرخصينكِ، أنتِ أكيد عاملة عملة، أنتِ أهلكِ رموكِ. لما واحد اشتكى في بوست إن الأهل بيغلوا المهور واحدة كتبت له إن الأهل في أغلب محافظات مصر بيساعدوا في نصف الجهاز قام نفس الشخص اللي بيشتكي قايلها دي جوازة البايرة. يعني هو انت عاوز الأهل يغلوا عليكم ولا يرخصوا؟ ولما يساعدوكم تقول جوازة البايرة؟ **** زي ما أنت شايف إن فيه ستات كتير تفكيرهم غير ناضج، فيه رجال كتير ظالمين ومش عارفين من الشرع غير اللي في صفهم، لدرجة إن لو شيخ طلع اتكلم عن حاجات هي أصلا من حقوق المرأة اللي شرعها ربنا بيشتموه. تخيل توصل لشتيمة المشايخ لمجرد إن الرأي مش على هواهم. زي ما في ستات بتنتقم من طليقها وتحرمه من ولاده في رجالة كتير راميين ولادهم ولا بيدفعوا نفقة وبالمناسبة كمان ودي قرأتها في كذا تعليق من رجال مطلقين، بيقولوا على أولادهم، ولاد المطلقة. لمجرد انفصالهم عن الأم. ***** عامة باختصار، المجتمع المصري حول الزواج لشيء صعب وبشع وخلاه مجرد مظاهر كذابة، جهاز وفرح كبير ومعازيم لاثنين ميعرفوش أصلا يعني إيه زواج ولا بناء أسرة ولا حقوق وواجبات بتعدل بين الطرفين. فبقى طبيعي نوصل للمرحلة اللي حضرتك شايفها، والجنسين بقوا في حرب وكراهية متبادلة والزواج بقى مكروه من الطرفين أو في أقصى تقدير دواء مر مجبرين ياخدوه عشان المجتمع ميقولش لهم فاتكم القطر. *** تحياتي لحضرتك.
العفو، إن شاء الله ربنا يكتب لك الخير وينور بصيرتك عشان تختار صح... بص هو صعب أقول لك إزاي تعرف لكن في فترة الخطوبة كل طرف بيحاول يظهر أحسن ما فيه ومحدش بيحب يظهر عيوبه، يعني مش شرط يكون كذب، بس عامة أهم خطوة الاستخارة، ثانيًا، خلي العاطفة على جنب، تدخل القلب بيعمي العقل عن إنه يحكم صح أو يشوف المشاكل أو حتى لو شافها بيتعامى عنها أو بيوهم نفسه إنه قادر يتعايش معها أويغير الطرف الثاني، ثالثًا، مهما كان الشخص بيتجمل أو بيكذب ففي زلات بتبان مع الوقت مهما حاول يمثل، أغلب البنات اللي تزوجوا واشتكوا بعد الزواج من عيوب خطيرة في أزواجهم مش قادرين يتعايشوا معها قالوا إنهم فعلا لاحظوها لكن تعاموا أو قالوا زي ما بيتقال في العادة هيتغير بعد الزواج. ففترة الخطوبة بتظِهر في الغالب لكن الناس بتختار تتجاهل. رابعًا، المهم بالنسبة لك تشوف هي عاملة إيه دينيا وأخلاقيا، علاقتها بربنا وبأهلها والناس عمومًا، وكمان تعرف انتم مناسبين ومتوافقين من الناحية الفكرية والمعتقدات ولا لأ، أرجو أكون أفدتك شوية، بالتوفيق.
تم النشر الأربعاء، ٩ أبريل ٢٠٢٥
جزاك الله خيراً ، حقيقي النصائح دي هتفرق معايا في فترة الخطوبة بأذن الله ، جعله الله في ميزان حسناتك ، لطن عندي استفسار أخير اللي انا متوقعه وخايف منو برضو ان فترة الخطوبة مفيش واحدة هتحاول تظهر الا الحلو اللي عندها انا مبقولش اني بطلب واحدة منغير عيوب لان دا مستحيل وانا متفهم دا وعارف ان انا كمان عندي عيوب ، لكن في عيوب الواحد يقدر يستحملها وعيوب لا ف ازاي هقدر اعرف دا في فترة الخطوبة؟
تم النشر الثلاثاء، ٨ أبريل ٢٠٢٥
الله المستعان حقيقي، وعامة مش معنى كلامي إن مفيش أمل أو الوضع سواد نهائي، انا بس حبيت أبين لك إنك مش لوحدك وده وضع طبيعي مع كل المدخلات اللي بنتعرض لها... رغم كل النماذج السيئة اللي قابلتني ما زلت مقتنعة إن زي ما فيه رجال سيئين فيه رجال كويسين وعارفين شرع ربنا وإيه اللي لهم وإيه اللي عليهم، وزي ما فيه نماذج سيئة من النساء فيه نماذج كتير حلوة... الفكرة في المحيط اللي انت زارع نفسك فيه وبتسمع له. إذا حابب تخوض التجربة ففترة الخطوبة معمولة عشان تشوف إذا مناسبين لبعض ولا لأ، لكن استخر ربنا لما تقرر تقدم على الخطوة دي وتركن مشاعرك السلبية على جنب وتطلب من ربنا يختار لك اللي فيه الخير. حاول كمان متدخلش خطوبة وأنت جواك تحفز تجاه البنت اللي هتخطبها، هي وأهلها، لأن التحفز والأحكام المسبقة هتخليك تشكك في كل كلمة وتصرف يصدر منهم. التفاهم والمصارحة وإنك تكون عارف حقوقك وواجبات، ومدرك حقوق الطرف التاني مش بس واجباته هيخلي الأمور سهلة كتير. توكل على الله وادعيه دايمًا يرزقك الزوجة الصالحة والذرية الصالحة، وبالتوفيق إن شاء الله.
تم النشر الاثنين، ٧ أبريل ٢٠٢٥
وحلها اي المدعكه دي طيب يعني الرجالة والنسوان كارهين الجواز امال هنتجوز اي قطط؟ 😂
تم النشر الأحد، ٦ أبريل ٢٠٢٥
لعرض الإجابة في فدني اضغط هنا