اعمل ايه ف احساسي بالفشل والعجز
حاسه اني مش قادره اعمل حاجه واني مهما حاولت مش هعرف و كل الناس احسن مني
رغم اني بالنسبه لناس كتير حواليا شايفين اني شاطره و ناجحه وانا شايفه عكس كده تماماً
ثقتي بنفسي صفر
بقيت كارهه الدنيا بشكل غريب و كأني مستنياها تخلص وبس
شعور العجز والفشل ده كويس في بعض الاوقات لان ما فيش حاجه بتبقى 10 على 10 في يوم وليله لا انت محتاجه توقعيه وتقومي وتحسي ان انت فاشله وتنجحي فتوصلي للنجاح ده ازاي انك تشتغلي على نفسك وما تبصيش لغيرك ما تحطيش نفسك في المقارنات كل واحد له ظروفه ولا انت ظروفك زي ظروف غيرك ولا غيرك ظروفه زيك فما تبصيش لحد وخدي فتره راحه وبصي لحياتك انت عايزه تمشيها ازاي وعايزه توصلي لايه واللي انت عايزه توصلي له ده ايه اللي انت ممكن تعمليه دلوقتي عشان توصلي له وربنا يوفقك ويسعدك وتوصلي لكل اللي بتتمنيه
تم النشر الأحد، ١ سبتمبر ٢٠٢٤
-انتي راضية عن نفسك؟ اكيد لأ عشان مش واثقة في نفسك (اللي راضي عن نفسه بيبقى واثق في نفسه) -طب ليه لأ؟ عشان مثلا عملتي حاجة غلط؟ عادي كلنا بنعمل غلط بس صلحيها عشان تتخلصي من احساس الذنب دا. -تصلحيه ازاي؟ واحدة واحدة، ومش هيتصلح من اول محاولة، هيتصلح بعد معاناة بس هيتصلح. -عندك هدف في الحياة؟ حطي لنفسك هدف ولو صغير؛ لو ليكي هدف تسعيله كل يوم مش هتيأسي خالص لانك هتحسي لحياتك معنى هدف زي ايه مثلا؟ زي ورد من القرآن ولو صفحة في اليوم، احنا في اجازة فقومي صلي الفجر، وعن تجربة صلي الفجر واوعدك كل حاجة هتتحسن. -كوني رفقة حسنة، الناس دول مايعرفوش اليأس أبدا ماشاء الله وهيخلوا حياتك احسن وهتلاقي فيه جروبس على الواتس ماسكينها ناس موثوقة جدا وبنات بس دوري عليها هتلاقيها. -مفيش حد احسن من حد، كل واحد حلو في حاجة ومش حلو في حاجة تانية وماتقرنيش نفسك بحد وماتبصيش لحد لإن مش كل الناس بتظهر كل حاجة فيه بعض الناس بتظهر الحاجات الحلوة بس فهتحسيهم احسن منك وهم في الحقيقة عكس كدا، وفيه ناس بتبين الوحش بس وهتغير مودك برده فركزي مع نفسك وبس - كل واحد فينا عنده انجازات بس مش واخد باله منها: لما تقرري تبقى احسن وتكتبي مشكلتك هما دا انجاز، لما تواسي نفسك لما تزعلي وتحسني مودك دا انجاز، لما تصبري على حاجة نفسك فيها وماخدتيهاش دا انجاز، لما تواجهي كلام الناس بابتسامة ولا مبالاة دا انجاز. انا مش بواسيكي، دي الحقيقة
تم النشر الأحد، ١ سبتمبر ٢٠٢٤
صباح الخير الاول في الاول انا مقدره مشاعرك جدا لاني كنت في يوم من الايام زيك و لكن انتي ما عمرك هتقضي على الشعور ده و انتي مش واثقه في نفسك و ده اكيد معرضك للتنمر سواء في الكليه او المدرسه مش لازم يكون التنمر جسدي ممكن لفظي بكلمه مش بتحبيها او مش بكون لطيفه بصي لنفسك في المرايه انتي جميله على فكره و قويه و مهمكيش راي الناس فيكي و لا يهمك اي حاجه غير اني البنوته الشاطره الذكيه الي واثقه في نفسها و محدش يقدر يجي جنبها قوليها و انتي بصه في المرايه هتفرق معاكي. شاركي في اي انشطه طلابية حولي تخرجي بره منطقه الامان بانك شايفه نفسك التوب غيري استيلك، اقعدي على النيل شويه و اتكلمي معاه هتلاقي نفسك المشكله دي اتحلت و هتشكريني بعدين و اهم حاجه متنسيش ٣ حجات مهمين جدا رضى والديكِ و الصلاه و اذكارك متنسيش صلاه و اذكارك 💜
تم النشر الأحد، ١ سبتمبر ٢٠٢٤
عزيزتي، أشعر بما تمرين به، وأريد أن أؤكد لك أن مشاعر الفشل والعجز هي مشاعر شائعة جداً، ولا تقتصر على أحد بعينه. من المهم أن تعرفي أن لديك قيمة كبيرة، حتى ولو لم تكوني قادرة على رؤية ذلك في الوقت الحالي. أولاً، حاولي أن تقفزِي خارج دائرة التفكير السلبي. من المفيد أن تكتبي إنجازاتك الصغيرة، مهما كانت بسيطة، لتذكري نفسك بمدى قدرتك على تحقيق الأشياء. في كثير من الأحيان، نكون أكثر قسوة على أنفسنا مما يجب. ثانياً، تحدثي مع أشخاص تثقين بهم عن مشاعرك. الدعم من الأهل والأصدقاء يمكن أن يكون له تأثير كبير في تحسين نظرتك لنفسك. ثالثاً، خذي فترة راحة لنفسك. حاولي أن تركزي على الأشياء التي تجلب لك السعادة، حتى لو كانت بسيطة. إذا استمرت هذه المشاعر لفترة طويلة ولم تشعري بتحسن، قد يكون من المفيد التحدث مع مختص نفسي. فهم يمكنهم مساعدتك على فهم مشاعرك بشكل أعمق وإيجاد استراتيجيات للتغلب عليها. لا تنسي، الله خلق كل إنسان بقدراته الخاصة، وأنتِ تستحقين أن تعيشي حياة سعيدة ومليئة بالنجاح. واعتني بنفسك، ولاتفقدي الأمل.
تم النشر الأحد، ١ سبتمبر ٢٠٢٤
لعرض السؤال في فدني اضغط هنا