دلوقتي انا عندي صاحبة بقالنا يجي سنتين قريبين من بعض اوي، بعد وفاة والدي هي الوحيدة الي وقفت جنبي و حاولت تخرجني من الحالة نفسية الي كنت فيها كانت بتحبني و بتقف جنبي و حرفياً هي كانت كل حاجة ليا و مازالت يعني
المهم أن أنا من و انا صغيرة عندي مشكلة دايما في اني بتعلق بالي حواليا جدا و انا صغيرة كان ممكن اتعلق بضيوف جت زارتنا و مش عايزاهم يمشوا خالص و عايزاهم يقعدوا معانا علي طول و كنت بعيط كتير لما بيمشوا و كنت بحس اني لوحدي
دلوقتي لما بدأت اكبر شوية بقيت اتعلق بصحابي جدا و مهما أذوني نفسياً و مهما كان في مية موقف بين ليا انهم مش بيحبوني كنت بعمل نفسي مش واخده بالي و اعدي عادي الموقف و اسامحهم مع ان ماما دايما بتحذرني منهم و بيطلع كلامها صح في الاخر و بتنتهي العلاقة بأن انا الطرف الي اتأذيت و اتدمر
مبقدرش اشوف الناس الي بحبها وحشيين مهما عملوا فيا مهما أذوني مبقدرش اشوفهم وحشيين
المهم اني اكتشفت ان انا كده مؤخراً لما بدأت اخد بالي بكل علاقتي بصحابي و كل العلاقات الي مرت عليا في حياتي اكتشفت ان انا الشخصية دي و قولت يمكن انا مبشوفهمش وحشيين مهما عملوا فيا علشان بكون محتاجهم جنبي و بيملوا عليا احساسي بالوحدة
دلوقتي صاحبتي القريبة دي مش قادرة اشوفها وحشة خالص مع انها رغم كل حاجة حلوة عملتها ليا و جدعتنها معايا اذتني جدا نفسياً و بتقلل مني اوقات كتير اوي اوي و طول الوقت بتحسسني اني أقل منها الله أعلم بقا قصدها تحسسني كده ولا لا المهم ان لما بكون مدايقة منها و احكي لحد تاني قريب مني علي موقف بيقولي ان أنا من حقي فعلا ادايق علشان انا دايما بيبقا بحس بالذنب ان هي ممكن تكون مش قصدها و انا الي بأفور و انا كمان مبحبش اعيش دور الضحية فعلشان كده دايما بسامح و بعدي و كأن نفسي مالهاش حق انها تدايق و تزعل
و انا كمان دايما جوايا صوتين صوت عقلي و صوت لقلبي و اظن ده واضح في كلامي و انا بكتب دلوقتي
عقلي بيقولي انها بتأذيني نفسياً و بتقلل مني و مش قادر يشوفها بتحبني
و قلبي بيقول مستحيل اقطع علاقتي بيها او ابعد عنها مستحيل انسي انها وقفت جنبي كتير اوي خصوصاً فترة وفاة بابا مستحيل اتخلي عنها مهما عملت فيا حتي لو قتلتني و انا قبلها علي عيبها حتي لو علي حساب نفسي و نفسيتي
لحد ما جت واحدة اعرفها و حكتلها علشان استعين بمساعدتها قالتلي جملة مش قادرة انسها قالتلي "انتي عاملة زي الي جوزها بيضربها و بيعاملها وحش و تقولك انها بتحبه و مش قادرة ابعد عنه" خوفتني الجملة دي جدا الصراحة خوفت إني أحب حد بيأذيني جدا و الحد ده يبقا شريك حياتي و تبقا قصتي كده فعلا خوفت جدا و ادركت من هنا دي مشكلة انها بوجهها دايما في علاقتي كلها بفضل للأخر لحد اما طرف تاني هو الي ينهي العلاقة مش انا
في حد ممكن يساعدني في اني افهم نفسي و تصرفاتي دي؟ و ايه الحل مع صاحبتي مقربة دي ؟
لو صاحبتك تهمك و مش حابه تخسريها و أنتي فعلا متأكدة من ناحيتها أنها مش شخص سئ يبقي لازم تشاوريلها علي الحاجات اللي بتضايقك قوليلها بكل صدق انتي قولتي كذا كذا و دا ضايقني و الموقف الفلاني دا زعلني جدا و انتي عارفه اني بتأثر بالحاجات اللي زي دي . ساعتها رد فعلها هو اللي هيحدد تعملي معاها ايه و تتعاملي معاها ازاي ، و انا بخبرتي مع الناس في المواقف اللي زي دي بقولك أنه غالبا هيطلع مكنش قصدها حاجه و كان هزار و الكلام دا كله ولو هي باقيه عليكي فعلا هي هتفهم مشاعرك دي و هتعذرلك و كل اللي جواكي دا هيبقي طلع و هتبقي ارتاحتي و المعامله معاها هترجع زي الاول. ولو لقدر الله طلع غير كدا هتبقي شوفتي الحقيقة بعينك بردو و ريحتي ضميرك و عرفتي مين اللي ينفع تبقي عليه و مين لا .
تم النشر السبت، ٢٣ سبتمبر ٢٠٢٣
كويس جدا المرحلة اللي انتي وصلتي لها .. وهي الادراك انك فعلا انتي المشكلة. وغالبا كلام الشخص اللي قالك كده صح .. مهما يكون الشخص اللي معاكي حتى لو ضربك او اهانك انتي برضه هتحبيه! انتي برضه هتكوني مع نفس الشخص. الموضوع مش فارق دلوقت صاحبتك ديه او غيرها، لان رد الفعل بتاعك ده هيكون مع اي حد. وده له أسباب كتيرة واهمها ان تركيبة شخصيتك كده بالفعل من وانتي صغيرة .. وده هتعرفيه في السؤالين اللي هضعهم ليكي هنا. شوفي اجاباتهم وركزي فيهم .. ولو فيه اي حاجه بعد ما تقري الاجابات محتاجه نتناقش فيها اكتبيلي. https://fedni.net/q/92882517/علاج-وإدارة-نمط-التعلق-القل-ق https://fedni.net/q/45045232/الشخصيات-المؤذيه-ليه-بتبقا-سبب-انجذابنا
تم النشر السبت، ٢٣ سبتمبر ٢٠٢٣
فى هنا احتمالين يتوقفوا على تفاصيل كتيره الاول: ان يكون انتى استقبالك غلط لكل حاجة بتحصل منها ... الثانى : ان تكونى اعتادتى فعلا نمط الاذى لانك خايفة من الوحدة فبتقبلى معاملة مش مناسبة فى سبيل انهم يفضلوا جنبك فى كل الاحوال انتى محتاجة لما تلاقى حاجة مؤذية ليكى تعبرى عن رفضك ليها للى قدامك وتوضحيله مدى الاذى اللى وصلك ولو الموضوع اتكرر يكون ليكى رد فعل حقيقي تجاه الموضوع ومتقوليش انا اتحمل ومش مهم ....حتى لو الشخص ده مش هتنفصلى عنه. الوضع اللى انتى فيه ده لحظة انفجاره وحشة فبلاش احسن تسكتى وتقولى انا هاجى على نفسى ....نفسك دى هتتمرد على ظلمك ليها فى يوم من الايام ومش هتعرفى تسيطرى فانتى بوعيك وادراكك الحالى الافضل تتحكمة فى ده . لو مش عارفه تعملى ده لوحدك الجأى لمساعدة اى مختص يعدى معاكى المرحلة دى
تم النشر الأحد، ٢٤ سبتمبر ٢٠٢٣
انا رأى الشخصى إن المشكله فيكى انتى بمعنى انك لازم تراجعى نفسك كويس اوى وتعاملى كل شخص على قد معملتة معاكى يعنى متثقيش فى اى حد اوى كدا لازم تعملى كذا اختبار الاول قبل الصداقه الحقيقيه وانا عن تجربتى فى الحياه مفيش حاجه اسمها صداقه حقيقيه دا كان زمان الان بقى فيه حاجه اسمها مصالح وبس وياريت متسمحيش لحد يقل منك حتى لو كان هوا مين خلى عندك شخصيتك واختارى صحابك بعنايه وعاملى كل شخص بمعاملته ليكى واكيد مفيش حد كامل عاملى كل واحد على اد احترامه ليكى اللى يحترمك ويقدرك ويصون سرك يبقى هوا دا وبس غير كدا لا مهما كانت الأسباب
تم النشر الأحد، ٢٤ سبتمبر ٢٠٢٣
اولا جربى تبعدى عنها شويه وتشوفى هل هى هيفرق معاها عدم وجودك في حياتها او لاء اذا فرق مع صحيتك انك بعدتى عنها يبقى هى حد كويس كملى معاها بس بحذر خليكى عارفه ان مش كل الناس سوية نفسيا وعرفيها اذا صدر منها حاجه ضايقتك قولها اذا حصل كدا تانى يبقى تنتهى صداقتنا وقتها هيبان معدنها الحقيقى حطيها فى اختبار لتعرفى صدق محبتها ليكى ومدى تفهمها لشخصيتك
تم النشر السبت، ٢٣ سبتمبر ٢٠٢٣
هو صعب الحكم على صاحبتك بالمعطيات ديه بس.. لكن حاولي تقعدي مع نفسك وتفصلي الآخرين من دماغك وتشوفي هل أنتِ بتعاملي نفسك أفضل من ما صاحبتك بتعاملك؟ ولا أنتِ نفسك بتقللي من نفسك ومش مدركة قيمتك وصاحبتك مجرد بتعكس نظرتك أنتِ لنفسك؟ هل عندك القدرة أنك تعتمدي على نفسك وتقعدي معاها بدون مشتتات؟ لو حسيتي أن فعلًا عندك مشكلة في الجزئية ديه ممكن تشوفي سلسلة مع نفسي لدكتور عبدالرحمن ذاكر الهاشمي وعمومًا هتساعدك تفهمي نفسك
تم النشر السبت، ٢٣ سبتمبر ٢٠٢٣
لعرض السؤال في فدني اضغط هنا