حياتي يعتبر واقفه الفتره دي ومش بتمشي لا انا عارفه ابقي مبسوطه ولا عارفه اواجهه مشاكلي لا استطيع تحمل الألم النفسي واني إبان ضعيفه فبهرب من التفكير فيها
في الجامعه كنت متعرفه ع شله بنات كتيره هما اغلب بنات الدفعه لأننا قسم خاص ومفيش غيرنا ١٢ بنت اللي موجودين ، حصل خلاف بيني وبين الشلة وبيني وبين اتنين فيهم وبعيدا عن كوني مظلومه وافتروا عليا بس الباقي اتحمق ليهم وقرروا كلهم يتخانقون فيا ومكفهمش كدا مشيوا يكرهوا زمايلي وصحابي البنات اللي علاقتي كانت لطيفه معاهم لغايه ما وصل بيا الحال ببقي لوحدي طول الوقت
مشكلتي مش بس ازاي اتعامل مع الوحده اللي بقيت فيها خصوصا ان كلهم متجمعين علي عداوتي وبيقعدوا ويمشوا ويعملوا كل حاجة مع بعض وانا بحس ان قلبي احيانا واجعني علي الرغم اني عارفه قد اي ربنا نجاني ورحمني منهم بس غصب عني بحس ان فاتني حاجة كويسه !
مشكلتي كمان في اني بخاف من نظره الناس ليا ؛بخاف الاولاد يشفوني ملاقاه كدا او الناس او هما شايفني ضعيفه مش عارفه اتعامل ازاي نظرات الناس خصوصا الاولاد بتقهرني وتوترني طول الوقت بتحسسني اني خسرانه ع الرغم ان القدر دا مش بأيدي
ازاي اعرف اروح الجامعه واذاكر تاني لاني مقفوله من الحياه
عندك حق تحسي بالألم النفسي والمعاناه لأن الصوره الي إنتي بتعيشيها صوره شخص مرفوض من الي حواليه وده إحساس مرير خصوصا في مرحلتك وانتي في الجامعه، بس ممكن الصوره ماتكونش قاتمه بالشكل الي انتي متصوراه والخلافات موجوده بصوره مستمره بين الناس حتي داخل البيت الواحد لذلك باطلب منك ماتخديش الأمور بمحمل شخصي وتدي الموضوع اكبر من حجمه اعتبريها تجربه هاتقويك وتعلمك ونقي واحده او اتنين من البنات الي تتوسمي فيهم خير وابدأي كلميهم واتعاملي معاهم بطريقه طبيعيه وماتحكميش علي نفسك الحكم القاسي ده بالوحده الحياه أخذ وعطاء فحاولي تبصي للموضوع من زوايه مختلفه أوسع من الركن الضيق الي واقفه فيه لوحدك وجربي مره واتنين وعشره وربنا هاييسر لكي صديقه تفهمك وقيمها في الحياه تشبهك وافتكري ان علاقه واحده سليمه وصحيه ومتوازنه هاترجع لك ثقتك وتوازنك في حياتك ان شاء الله ربنا يوفقك ويشرح صدرك
تم النشر الخميس، ٢٦ أكتوبر ٢٠٢٣
بالنسبة لافتراء صحابك عليكي فاول حاجة لو ماخدتيش موقف منهم لازم تتكلمي و تدافعي عن نفسك روحي بكل ثقة و قولي كذا كذا و مش بانفعال ولا تبرير انتي بتقولي حقايق ال عايز يصدق يصدق و ال مش عايز عنه م صدق المهم انك برأتي نفسك و عملتي ال عليكي قدام ربنا بالنسبة بقى لوحدتك فالاول لازم ترجعي ثقتك و تقديرك لنفسك من جواكي بعد م اتأثر طبعا بسبب صحابك دول ،، اول حاجة لازم تعرفي انك مش سلعة قيمتها فالناس لا سواء ليكي صحاب ولا لا قيمتك محفوظة ده يمكن كمان ربنا راد ان كل ده يحصل عشان يعوضك بناس يقدروكي بجد ،، اتكلمي مع نفسك فكري نفسك بانك ملكيش ذنب و بكل مميزاتك كفايا انك ماذتيش حد فيهم و بعدها امشي و اتكلمي بثقة صدقيني دي اكتر حاجة هتندمهم و تعرف الناس انك ع حق،، واحدة واحدة هتلاقي ال بيتعرفو عليكي او يمكن انتي تاخدي الخطوة مع اي بنت شايفاها كويسة و ربنا يعوضك يارب بالنسبة لنظرة الناس ليكي فنفس ال قولتو فوق انتي ليكي قيمتك غصب عن نظرة او كلام اي حد ميعرفكيش اصلا و لا عارف ظروفك،، آمني بده و رسخيه فنفسك كويس و مشكلتك هتتحل واحدة واحدة ان شاء الله
تم النشر الجمعة، ٢٧ أكتوبر ٢٠٢٣
طيب ليه محاولتيش توضحي وجة نظرك، او سوء التفاهم اللي حصل ل الباقي؟ لو هما مكملين ع كده بالرغم مثلا انهم عارفين انك مظلومة، يبقى المفروض تحمدي ربنا ان الناس ديه مبقتش في حياتك. انا مقدرة انك ممكن تكونش مش حابه تفضلي لوحدك طول الوقت، ولكن صدقيني انك تكوني مع نفسك افضل من انك تكوني مع ناس انتي مش مطمنه في وسطيهم ومش حاسه بالامان، وبرضه هتبقى وحيدة بالرغم من وجود ناس حواليكي. ليه بتحسي ان فيه حاجه فيتاكي؟ وليه خايفة من نظرة الناس؟ بتحسي ب ايه او خيافة من ايه بالظبط؟ وليه بالذات في خوف من نظرات الاولاد؟ وليه رباطها بانك خسارنة؟
تم النشر الجمعة، ٢٧ أكتوبر ٢٠٢٣
وانتي في الجامعه افتحي الكتب وذاكري قصادهم او حتى مثلي المذاكره وحسسيهم انك قوية وافتحي تليفونك ورني على اختك او مامتك او باباكي واتكلمي قصادهم وهزري وبعدها كملي مذاكره يوميا على كده وتجاهليهم ومتبصيلهمش وابقي قوليلي رد الفعل اى
تم النشر الخميس، ٢٦ أكتوبر ٢٠٢٣
بصي منكرش اني كنت زعلانه جدا وقتها بس بعد فتره اكتشفت اني كنت حطاهم في مكان جوايا اكبر منهم بكتير ...خليكي واعيه انه مش شرط ان الناس اللي بتتعامل بشكل كويس ولطيف و تعاملهم حلو ان جواهم نفسهم حلوة ... مفيش اي حاجه بتكشف دواخل الناس تجاهك الا المواقف هي دي الحاجه الوحيده اللي بتبين اللي قدامك بيتعامل بشكل سوي والا لا ... وصدقيني احنا عايشين في الدنيا دي عشان نزكي نفسنا ونحاول نتعامل مع ضعف الناس اللي حولينا بحكمه و اتزان..لانفرط في القرب ولا نفرط في التجنب ..
تم النشر الخميس، ٢٦ أكتوبر ٢٠٢٣
اكيد خلينا نعتبر انهم معندهم خبره كافيه في التعامل مع الناس كويس اتعاملي مع الموضوع انهم مساكين واكيد لما يكبروا وينضجوا هيفهموا ان تصرفاتهم دي طفوليه ...تجاهلي وابتسمي من بعيد وخليكي واثقه من نفسك ومتتهزيش انتي كفايه ومش محتاجه لحد فكري نفسك بده على طول ...ولو حد جالك وكلمك فاهو اللي محتاجك مش انتي ..برافو بحيكي ❤
تم النشر الخميس، ٢٦ أكتوبر ٢٠٢٣
حاسه بيكي جدا لاني مريت باللي مريتي بيه ده قبل كده ...صدقيني الحل جواكي انتي بس ...مقدرة حزنك ورغبتك ان يكون ليكي شله او مجموعه صحاب تنتمي ليهم ويبقوا معاكي ...وعكس ده بيحسسك بإنك غلط وان اللي بيحصل ده حاطتك في مكان غريب عليكي ..بس انا جايه اقولك متقلقيش خالص ...كل ده بيتغير جواكي اول ماتركزي بس في انك تحطي لنفسك هدف حلو وانتي رايحه الجامعه حاجه ومعنى بيخليكي رايحه وانتي مبسوطه ومش هامك مين عمل ومين قال ومين سوا ...انتي قادره تثبتلهم انك هتفضلي جميله ومتألقه حتى وهما مش معاكي ..انبسطي واضحكي وهزري حتى لو بتكلمي نفسك انا عارفه ان عدد البنات بتقولي قليل اتصاحبي على بنات من اقسام تانيه اشتركي في نشاط اعملي روابط جديده غيرهم مؤقتا ...وشوفي ده هينعكس عليكي وعليهم ازاي ..ومتقلقيش انتي هتتغيري وهما كمان هيتغيروا ومفيش حد بيفضل وحش على طول ولا فيه حد بيفضل حلو على طول ..المهم عيشي يومك كأنه هتخلصي فيه كل اللي نفسك فيه ..متخليش حاجات تعكنن عليكي وهي اصلا فعلا مش اهم منك .. اتمنالك التوفيق
تم النشر الأربعاء، ٢٥ أكتوبر ٢٠٢٣
تجاهليهم تماما والله ومتركزيش ابدا مع الناس ولا الولاد ولا نظراتهم و طالما انتي متأكده انك مش عامله حاجه غلط امشي رافعه راسك و حطي ايدك ف عين التخين ولا يهمك اي حد اما بالنسبه للوحده فصدقيني والله العظيم الوحده دي على اد مهي تزعل انك لوحدك ع اد ما هي راحة بال فظيعه لا حد هيدخلك ف حوارات ولا حد هيقولك انتي قولتي كذا ولا مشاكل هتكوني عايشه ف حالك و مع نفسك وبس ♥
تم النشر الأربعاء، ٢٥ أكتوبر ٢٠٢٣
احكيلي يا ريهام اكتر اتصرفتي ازاي في الموقف الشبيه بتاعتي؟ ولو يرجع بيكي الموقف كنتي هتندمي علي حاجة معملتهاش ؟ + مشاعر الخذلان دي اتعامل معاها ازاي
تم النشر الخميس، ٢٦ أكتوبر ٢٠٢٣
شكرا ليكو قوي يا بنات انتو مش متخيلين يومي كان جميل ازاي النهاردة ع الرغم ان الظروف هيا هيا متغيرتش بس كان عندي ثقه في نفسي وشاركت كمان مع الدكتور واتكلم معايا كتير فحاسه اني مبسوطه بجد يارب اعرف اكمل كدا لاني بحس اني مرفوضه في احيانٍ ما والشعور دا بيقتلني 🚶♀️ ف الحمدلله يارب تبقي كل الايام كويسه
تم النشر الخميس، ٢٦ أكتوبر ٢٠٢٣
انا بس اللي بيوترني جامد كمان اني بتخيل انهم بيراقبوني لان المكان صغير وكلنا شايفين بعض واي حركه مني بيراقبوها وبحس بيقعدوا يتكلموا عليا دايماً ويتهامسوا فالموضوع دا موترني جامد ببقي مش عارفه اتصرف براحتي + أن فيه حركات ممكن تَصدر منهم زي انهم يحاولوا يضحكوا مع كل الناس اللي قاعده الا انا ويحاولوا يظهروا الحب للكل وانا ببقي مش عارفه بجد لما بضايق من كدا ببدأ اضايق من نفسي اني اضايقت من كدا وبحس بالذنب 🥲
تم النشر الخميس، ٢٦ أكتوبر ٢٠٢٣
لعرض السؤال في فدني اضغط هنا