لية ديما صحابي مش بيكملوا معايا
انا مش وحشة دا انا بالعكس لو صاحبت حد ممكن اعمل اي حاجة عشان يكون متراضي بكون في قمة سعادتي لو عملت حاجة له هوا اتبسط منها
بس ديما اخرهم معايا فترة صغيرة ويسبونى منيش صغيرة انا في فترة الثانوي.
حتي جه عليا وقت صاحبت واحدة حبينا بعض اوي واعتبرتها بستي وكل حاجة حرفيا. المهم في عيد ميلادها عملت لها فرح عالاستورى وكلام كان كله طالع من قلبي حرفيا في عيد ميلادي قالتلي كل سنة وانتي طيبه وحتي منزلتش ليا حاجة
دا موقف من مية موقف حصلوا معايا
بسبب كل الحجات دي معدش عندي ثقة في نفسي اصلا ثقتي اتعدمت
اعمل اي😢
اللي بيحصل ده بسببك انتي .. او بمعنى ادق الشعور اللي انتي حساه ده السبب فيه انتي مش هما. هقولك ازاي؟ لو على سبيل المثال ... انا وانتي صحاب دلوقت وجيتي وعملتي كل حاجه حلوة ليا - تمام؟ انتي متوقعة مني طبعا اني اعمل نفس اللي بتعمليه .. ما هو لازم تحسي نفس الاحساس .. او ع الاقل تحسي ان اللي عملتيه ع الاقل ليه مردود .. انا جيت وخيبت ظنك ومعملتش نفس اللي انتي بتعمليه! هل انا كده وحشة؟ - الاجابة لأ هل انا صاحبة مش كويسة اني معملتش معاكي نفس اللي انتي عملتيه؟ - الاجابة برضه لأ. ايه ده يعني ايه .. امال ايه اللي بيحصل مين الغلط ومين الصح؟ الغلط هنا انك عملتي حاجه اسمها (توقعات) توقعتي من الاشخاص انهم المفروض يعملوا كذا وكذا ... مع ان اساسا كانوا واضحين معاكي ف الاول. هما محدش وعدك بحاجه، انتي اللي عملتي كده في نفسك.. انتي اللي خذلتي نفسك بنفسك.. انتي اللي توقعتي حاجات جوه دماغك والزمتيها ليهم.. يعني المفروض تعملي ايه ف علاقاتك بعد كده؟ انتي لو عايزة تعملي حاجه حلوة للناس علشان بتحبي تشوفي الناس ديه مبسوطة، تمام اعملي ده طالما ده شئ بيبسطك انتي كمان. لكن متطلبيش منهم او متتوقعيش انهم كمان يعملوا نفس الحاجه! لانك بتعملي توقعات عالية جدا، ولما التوقعات ديه بتنزل ف الارض انتي اكتر حد هيشيلها. ف ننزل توقعاتنا .. لو عايزة تعملي حاجه اعمليها لو هتبسطك .. بس ياريت ميكونش ف سبب ما انك بتعملي الحاجه ديه علشان تبيني قد ايه انتي بتحبيهم اوي، وانك قد ايه بيرفكت بالنسبة لهم .. ياريت منحاولش نثبت حاجه طول الوقت ل اللي قدامنا. خلي الامور تمشي في سياقها الطبيعي، علشان كمان طاقتك لا تستنزف. اتمنى ليكي السلامة
تم النشر الأحد، ٢٠ أغسطس ٢٠٢٣
هي مابتتقالش عشان كده ماعنديش ثقه في نفسي هي بتتقال عشان انا ماعنديش ثقه في نفسي ماحدش حاسس بقيمتي ومقدر وجودي لما تعرفي قيمه نفسك وادي كل الاهتمام لنفسك وتبقي احسن هما هيحسوا بقيمتك دي فاهماني ؟؟🩵🩵🩵
تم النشر السبت، ١٩ أغسطس ٢٠٢٣
هى مواقف بتبقي صعبه بس اساسها توقعات بزيادة تجاه الاخرين مستنياهم يعملوا حاجة معينه ولو معملوهاش يبقوا كده مش قد المكان اللى انتى حاطاهم فيه انتى بيحصل معاكى كل ده وهيفضل يحصل طول ما بتكونى متوقعه اشياء محدده محتاجة تتعلمى تشوفى افعالهم واللى هما يقصدوه بطبيعتهم هما طبعا وسطهم فى ناس كويس انهم مشيوا اصلا وده احسنلك انتى اصل مش كل اللى هيعدى علينا يبقى ينفع يبقى قريب طبيعتك جميلة وبتحبى تسعدى غيرك ....انتى شاطرة فى ده ...ممكن اقرب صاحبة ليكى تبقى شاطرة فى المشاوير مثلا ...فتبقوا بتكملوا بعض ...مش لازم نرد على بعض بنفس الطريقة اهم حاجة اننا نكون صادقين فى افعالنا وتكون طالعه من قلبنا لسه هتشوفى ناس اكتر وحتى الصادقين اللى شبهنا ممكن الدنيا تبعدهم عننا ..بس بيكفينا اننا عرفنا ناس حلوين
تم النشر الأحد، ٢٠ أغسطس ٢٠٢٣
مش لوحدك+محدش هيحبك اكتر من ربنا عيزك تعرفي ان كل حاجه ف حيتنا فطره مش اكتر.
تم النشر السبت، ١٩ أغسطس ٢٠٢٣
حبي نفسك أنتي ولا تهتمي بل غير ولحب من القلب خلي متعلق ب الله عز وجل وصحبي نفسك وطوري من ذاتك خلي الحب في الطموح والهدف وانتي سعتها مش هتبقي فاضيه ال انتي تحبي حد او تصحبي حد
تم النشر السبت، ١٩ أغسطس ٢٠٢٣
بعد يلى بشوفوا كل فتره الصحاب مش بكلام بالمواقف يلى تزعلوا من بعض وتتصلحوا علطول ويلى تقربك من ربك دايما وتخاف على بعض من معاصى اواي مشاكل مش يلى يقلك بستى وتسجلك حياتى كلها والكون كله وتطلعوا يعرفوا بعض من قريب جداا وبجد احنا تقريبا كد بتعمل فينا بقصد او من غير المهم تتفاهمى مع نفسك وانا بحصل الموضوع ده لما اكون فاضيه حياتى مفهاش مشاكل و24ساعه سوشيل فدا بعقد الانسان حرفيا.. ونصحه ليكى متتوقعيش حاجه من حد وتبعى كلام احمد الشقيري ان الصحب بقول عليه صديق فعلا لما القيه بالافعال قبل الكلام
تم النشر السبت، ١٩ أغسطس ٢٠٢٣
لعرض السؤال في فدني اضغط هنا