مش حابة أقول لك إن الغلط كان غلطك من الأول لأنك تنازلتِ وأنتِ معززة ولك مكانتك وغلاوتك ورميتِ مشاعرك قُدام شخص لا يستحق. اللي حصل حصل خلاص. ارتبطتِ وطلع شخص ندل وجرحك، نحاول بقى نخرج من المشكلة دي ازاي؟ أولا، عاوزاكِ تسألي نفسك هل الشخص ده يستحق إني آخد كلامه بجد؟ هل يستحق إني أخليه ينتصر ويدمرني كده؟ مين هو عشان يقرر إنك مش جميلة؟ مين هو عشان تقتنعي بكلامه أصلا؟ مين هو عشان يهز ثقتك بنفسك؟ هو ولا حاجة حرفيًا... لا كان له علاقة ولا حكم عليكِ... مجرد واحد فاضي عنده وقت فراغ وكان حابب يتسلى شوية... هل ده شخص تعتمدي رأيه فيكِ؟ ثانيًا، سواء هو أو غيره، لو سمحتِ لحد إنه يبني رأيك عن نفسك فأنتِ أعطيتِه قوة عليكِ وأعطيتِه قدرة إنه يدمر أي فرصة لك في إنك تكوني أفضل صورة من نفسك زي ما تستحقي. الحل بإيدك أنتِ. هتفضلي تلفي في الدائرة دي وتفضلي مصدقة الكلام ده يبقى أنتِ حكمتِ على نفسك إنك تفضلي ضايعة وشايفة نفسك قليلة ولا تستحقي. وكل الناس اللي هتقابليهم هيشوفوا الهالة السلبية اللي انتِ صدقتِها عن نفسك. اخرجي من الدائرة دي واقنعي نفسك إنك أغلى وأجمل من رأي الشخص ده وإن رأيه مجرد رأي شخص حاقد أحب ينهي العلاقة بإنه يجرحك عشان يفضل الجرح معلم جواكِ ومتنسيش علامته أبدًا. أنتِ غالية وجميلة، يا ريت تشوفي نفسك زي كده وتبعدي مستقبلا عن أي علاقات حرام وتحافظي على قلبك لحد ما تقابلي الشخص اللي ربنا كاتبه لك في الحلال واللي يستحقك وعارف قيمتك كويس. بالتوفيق.
لعرض الإجابة في فدني اضغط هنا