السلام عليكم ورحمه الله وبركاته
احبائى اعضاء مجتمع فيدنى . أود أن أطرح عليكم موضوعى و هو ازاى ارتبط بعد تجربة الطلاق علما بأن نظرة المجتمع للراجل المطلق صعبة للغاية و كأنه ارتكب جريمة يلحقه عار تلك الجريمة إلى الابد أو شخص منبوذ مصاب بالجرب مثلا . انا خطبت مرتين قبل زواجى و بعد كدا اتجوزت و بعد الجواز كنت عايش كويس جدا لمدة سنة ونصف و ربنا رزقني بطفلة جميلة جدا. و كنت بحب زوجتى . بس معرفش بنتى اخدت كل اهتمامى و كنت متحمل المسئولية و بساعد زوجتى . معرفش أهملت زوجتى و وجهت كل تركيزى مع بنتى اللى خطفت قلبى . و بعد كدا عشت ايام صعبة نتيجة أن جلنا طفلة و عضو جديد في الأسرة . حاولت اساعد زوجتى فى مهمة تربية بنتى و رعايتها و المساعدة في شئون البيت و برا البيت. و كنت منتظم فى شغلى . و كان عندى كذا مشكلة كان عندى مشكلة انقطاع فى التنفس أثناء النوم و اعوجاج بالحاجز الانفى و كنت اتنقلت لشغل مش بحبه و كان تعبنى نفسيا و جسديا جدا . عملت كذا عملية عشان اتخلص من التعب الناتج عن انقطاع التنفس أثناء النوم. مرة قبل الزواج و منجحتش و مرة أثناء زواجى و كنت بحاول كل مرة بصدق و اقول يارب العملية تنجح خاصة بعد زواجى و بقول يارب تنجح عشان خاطر بقت مسئول عن زوجة و طفلة . لأن حرفيا و فعليا كنت بقوم مش شايف و لا مركز و علطول عصبى و مش عاوز اتكلم مع حد. المهم العملية منجحتش أثناء زواجى و مكنتش اعرف بس الأعراض ما قبل العملية هى هى حسيتها تانى مفيش 6 شهور من العملية و رجعت الأعراض تانى و كنت كل ما اروح للطبيب المعالج يقولى لأ العملية نجحت بس انت عندك حساسية مزمنة . و اقعدت اخد أدوية حساسية و بخاخات لغاية ما يسمى انهك. و جه كمان انى اتنقلت فى شغلى لمكان مش بحبه و تعبنى نفسيا و جسديا جدا و اصبحت انسان مكتئب محاصر بالمسئولية و المرض و الشغل اللى تعبنى . و كنت بعمل حاجة ظلمت بيها نفسى جدا كنت بهرب من كل دا بالأباحية. و كنت عارف أنه حرام . و حاولت أخرج من الدايرة اللى وقعت فيها . لكن كنت ما احاول أخرج اقع تانى . و قعدت فترة انقطعت فيها عن العلاقة مع زوجتى لمدة 4 شهور . و بعدين حسيت انى بكرهها و انى مش بحبها . و انا مكنتش كدا فعلا أنا كنت بحبها جدا و كنت عاوز كل حاجة تمشى تمام . بس للأسف الدنيا باظت كلها فجأة و بدون سابق انذار. رفعت عليا قضايا و اتبهدلت و قررت بعد شهرين من القضايا . و انى مكنتش بشوف بنتى . قررت انى انهى الموضوع و طالما هى عاوزة تطلق خلاص أطلقها و ارتاح من كل ألوان األوان العذاب اللى شوفتها في تلك المرحلة . و انى اخد هدنة مع نفسى و أصلح من نفسى . بس للأسف البيت اتخرب و جت شالت العفش و اتعاملت من أهلها اسوء معاملة بعد كدا . و اتبهدلت عشان اشوف بنتى قرة عيني اللى اخدتها منى و هى عمر سنة و نصف. طلقتها و انا عمرى 33 سنة فى اجمل سنين عمرى . و قولت كل واحد يصلح من نفسه و نرجع لبعض تانى و نربى بنتنا . لكن للأسف كان اوهام قعدت خمس سنين شفت فيها أمر تجربة خلتنى كرهت الزواج و الستات . و جاهدت انى أصلح من نفسى خلال تلك الفترة و روحت دورت و عملت عملية تانية عند طبيب شاطر عرف يشخص حالتى الصحية صح و عملت عملية تالتة و نجحت الحمدلله بعد الطلاق بعدها بشهرين مع أن العملية كانت صعبة جدا. و اجتهدت لغاية ما طلعت من الشغل اللى مكنتش بحبه لشغل تانى على الأقل بقبله. و بعمل شغلى بما يرضي الله. مع انى شغلى بعيد عن سكنى ب 70 كيلو رايح جاى كل يوم . و اخر حاجة اللى طولت معايا شوية هى الاباحية . و الحمد لله بدأت أخرج منها . و مدوام على الصلاة فى المسجد . و بحب نفسى و بحب بنتى و بحاول كل يوم ابقى احسن من اليوم اللى قبله . و رغم الطلاق أنا عمرى ما قصرت مع بنتى فى اى شيىء . ازاى بعد كل المشوار دا ارجع اكون بيت تانى و ارتبط و انا حاليا عندى 38 سنة. مع العلم انى حاولت ارجع زوجتى السابقة أو طليقتى بكافة الطرق روحت لجمع الشمل فى الأزهر و بعت لعمها كذا مرة و حاولت اكلمها بدل المرة الف مرة . لكن عنادها و إصرارها على أنها مستحيل ترجع تانى . مع انى معملتش حاجة الا الظروف و الخطأ الوحيد ليا و اللى اعترفت بيه و قولتلها أنا كنت غلطان و ندمت . لكن جاءت كل المحاولات من جانبى محطمة على صخرة عنادها و راحت اتخطبت بدل المرة مرتين . و انا خلاص يأست من إصلاحها و تعبت جدا من تلك العلاقة اللى أرهقت فيها أثناء الزواج و بعد الطلاق . دلونى ازاى ارجع ابنى بيت تانى و اتزوج مرة أخرى و مش عاوز ارتبط تانى جواز صالونات و عاوز ابقى بنى ادم طبيعى عندى أسرة و اطفال و بيت . انا بقيت 38 سنة و معرفش ايه اللى مخبيه الايام ليا تانى . عاوز اعرف ازاى اكون بيت تانى و محدش يبصلى انى بقيت شخص وحش لما طلقت . انا الحمد لله عارف اخطائى و بنى ادم اخطأ و أصيب و بحاول اجتهد انى اكون احسن من اليوم اللى قبله. بحبكم في الله و فى انتظار نصيحتكم . شكرا لكل واحد حيدنى من وقته و يرد عليا .
وعليكم السلام ورحمة الله وبركاته عاوز تبدأ من جديد ...تقبل نفسك بكل مراحل انت عديت بيها ولا تقبل اى احد لا يقبلك بكل مراحله...هذة هى النقطة الأساسية فى التقدم للأمام . مش مهم انت عازب ولا مطلق ولا غيره من الظروف الاجتماعيه زى شغلك كده اللى سعيت تغيره عشان تكون فى مكان ترتاح فيه رغم ان مسافته بعيده...ده نفس الأمر..هتمشى مسافه لحد ما تلاقى حد بيعرف يتقبل ويحترم رحلة الحياه وترتاح معاه...فى وسط المسافة هتقابل ناس مش بيتقبلوا ولا يقدروا وهمهم كله يصدروا أحكام...سيبك منهم واللى هيساعدك تتجاهلهم انك عارف تقدر نفسك من غير ما تستنى تقدير من اللى حواليك اكتر .
تم النشر الأربعاء، ٨ مايو ٢٠٢٤
وعليكم السلام ورحمه الله وبركاته في افكار معطله حضرتك زي فكره اني مش عاوز اتجوز تاني صالونات ، لان مش كل زواج عن حب ناجح ولا كل زواج صالونات ناجح المهم أن حضرتك تدور علي حد مشابهه لقيمك ، وكذلك المجتمع مش دايما نظرته الراجل المطلق سيئه شخصيتك وتعاملك هو اللي بيثبت لاي حد بتتعامل معاه انت مين ، طبعا مفيش انسان مش بيغلط وظاهره الطلاق أصبحت منتشره بشكل كبير مادمت اتعلمت من التجربه يبقي نحط نقطه ومن اول السطر ندور علي علاقه جديده شبهنا
تم النشر الأربعاء، ٨ مايو ٢٠٢٤
ابحث المرة دي بهدوء و توكل ع الله
تم النشر الجمعة، ١٠ مايو ٢٠٢٤
صلي وسلم على النبي محمد صلى الله ♥
تم النشر الجمعة، ١٠ مايو ٢٠٢٤
لعرض السؤال في فدني اضغط هنا