سمعت حد بيقول إن الرسول ﷺ قال لا تظهر الشماته فى اخيك فيرحمه الله ويبتليك ، الحقيقه انى مصدقه الحديث ده جدا دايما لما بقعد اقول هو الانسان ده بيعمل كده ازاى على ذنب معين بيعملوا بيعملوا بعدها وكأن ربنا بيقولى انى مش اشطر منو وانى انسان زيى زيو واكيد بغلط كل مره ينتقد فيها حد بينى وبين نفسي بدل ما ادعيلو بالهدايه سبحان الله اعمل ما يعمله الشخص ده بالظبط ، الحمدلله نضجت وفهمت ازاى اتقبل ذنوب إلى حواليا احاول اساعدهم ولو مقدرتش ادعيلو بالهدايه بدون انتقاض ولكن انا عايرت حد قبل كده كتير انو جاب مجموع قليل فى ثانويه عامه وكنت دائما بتريق عليه وبزلو فى الكلام انا كنت حد مش كويس زمان ولكن انا اقتربت من ٣ ثانوى وخايفه ربنا يعاقبنى ويبتلينى بنفس الشىء وهو انى اجيب درجه قليله عشان احس بالشخص ده والحقيقه انا معرفش هل التوبه ممكن تخلي ربنا يسامحنى ولا ربنا لازم يحسسنى بنفس شعور الشخص ده ؟
أول شيء، الحمد لله على النضوج والتطور في فهمك للدين والحياة. كلنا بنغلط ونتعلم من أخطائنا، وده جزء من الرحلة الإنسانية. أما بخصوص الحديث، الرسول ﷺ بالفعل حذرنا من الشماتة في الآخرين لأن دايما فيه دروس نتعلمها من اللي بنمر به. والحديث ده بيؤكد على أهمية الرحمة والتواضع. بالنسبة للتوبة، الله سبحانه وتعالى هو الرحمن الرحيم، ومفتوح لنا باب التوبة دائماً. ربنا قال في سورة الزمر: "قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعاً إنه هو الغفور الرحيم." يعني ربنا بيغفر الذنوب لما نتوب توبة نصوحة ونسعى لتحسين أنفسنا. صحيح أن أحياناً الله بيعلمنا دروس من خلال تجاربنا الشخصية، لكن ده مش معناه إن عقاب الدنيا لازم يحصل لكل خطأ. الأهم هو نيتك وإخلاص التوبة والندم على اللي فات. انتي دلوقتي في فرصة عظيمة إنك تبدأي فترة جديدة في حياتك بدون نقل أي طاقة سلبية من الماضي. خلّي هدفك هو التفوق الدراسي والروحاني، وادعي للشخص اللي كنت بتتريق عليه بالنجاح في حياته. وافتكري دايماً: كل واحد فينا له مشاكله وتحدياته، وسر الحياة هو إننا نحاول ندعم بعضنا البعض ونكون مصدر رحمة وخير. ربنا يوفقك ويوفقنا جميعاً 🌺
تم النشر الاثنين، ١ يوليو ٢٠٢٤
متقلقيش ياقلبي نقاء قلبك هيبعد عنك كل سوء وربنا هيوفقك لما يرضاه بإذن الله 💗
تم النشر الأحد، ٧ يوليو ٢٠٢٤
السلام عليكم ورحمة الله وبركاته، بالنسبة للحديث فحكمه إنّه لا يصح عن الرسول صلى الله عليه وسلم أو لا أصل له... ممكن تتأكدي من هذا الرابط. https://dorar.net/h/cD51oX3w?sims=1 لكن عامة بتحصل، أحيانًا لما شخص بيعيب على شخص ذنب أو سلوك معين بيقع فيه، هل ده درس من ربنا عشان ينبهه للذنب ده ولا هو مجرد تصرف لا إرادي من الإنسان خلاه يقلد الشخص اللي عاب عليه؟ بالنسبة لسؤالكِ عن التوبة فهي واجبة شرعًا على المسلم وربنا غفور رحيم يقبل التوبة لكن التوبة لها شروط لقبولها *الإخلاص، يعني أن تقصدي بها قبول الله عز وجل *الإقلاع عن الذنب. *الندم على الفعل. *العزم على عدم التوبة للذنب. *ألا يكون المسلم وصل لحالة الغرغرة قبل الموت. لكن يُضاف شرط مهم لو كان الذنب في حق العباد وهو رد الحقوق لمن أذنبت في حقهم أو طلب مسامحتهم... يعني شخص سرق من شخص لازم يرد ما سرق... شخص اغتاب شخص أمام ناس معينة وزم فيه لازم يروح يصحح اللي قاله للناس دي عشان يكون رد حق الغيبة للإنسان اللي اغتابه. بالنسبة لك، فمش عارفة الحقيقة هل المفروض تعتذري للشخص ده عن إساءتك له ولا ده هيقلب عليه المواجع؟ إذا كان موضوع الثانوية العامة مش عامل له أزمة نفسية وكلامك معه هيفتح جرحه من الموضوع فممكن يكون صعب تكلميه في كده لكن لو انتي عارفة إنه عادي الموضوع اتنسى وهو تابع حياته ممكن تحاولي بطريقة لطيفة تعتذري وتطلبي منه يسامحكِ. وكمان تستغفري له كتير وتدعي له. إن شاء الله ربنا يتقبل توبتك عن الذنب ده ولا يؤاخذكِ به... اخلصي الدعاء لله ولا تتركي الشيطان يشعركِ باليأس من قبول التوبة أو يوسوس لكِ إن الله ممكن يعاقبكِ بنفس الطريقة. وركزي في دراستكِ ومذاكرتكِ وإن شاء الله ربنا يوفقكِ فيها.
تم النشر الثلاثاء، ٢ يوليو ٢٠٢٤
لعرض السؤال في فدني اضغط هنا