ازيك، يارب تكوني بخير. متفهمة جدا شعورك في أن حد يكون مسيطر عليكي في قراراتك وأفعالك. كنتي بتعملي ايه، أو كنتي بتكلميها إزاي لما بتقعدي معاها وتتكلموا وتقولي لها اللي بيحصل ده غلط، أو مينفعش التحكم، وهكذا.... هل كنتي بتستخدمي هو هو نفس الأسلوب كل مرة، بإنك رافضة ده، ولا بتحاولي تقنعيها بالمنطق والعقل والهدوء! طريقتك معاها برده بتأثر، ف حاولي تحتويها، وتطمنيها. من وجهة نظرها بتبقى شايفة أن ده الصح، وإن لازم كلامها هو اللي بتسمع. مفيش شك أنها مش بتحبكم. بالعكس هي أكيد بتحبكم. بس نقدر نقول هي شخصيتها كده، وبناءا عليه اللي تقدروا تعملوه هو انكم تحتويها وتطمنيها، وفي نفس الوقت متعملييييش أي حاجه غصب عنك، أو ضد قراراك. هي بتستخدم ضدكم الابتزاز العاطفي، وحيل علشان تمشوا وراها، المفروض انكم فاهمين ده، يعني فاهمين الحيلة بتاعة انكم وحشين وقليلين، وطبعا ديه حيلة دفاعية علشان تسمعوا فقط كلامها. ف مش لازم ابدا تستسلموا للحيلة ديه، وتسمعوا الكلام ده لانكم عارفين أنه أكيد مش حقيقي.
تم النشر الأحد، ١١ ديسمبر ٢٠٢٢
الله يبارك ف عمر والدك. هقولك كام حاجه تحاولي تتعاملي بيها معاها عشان نقلل الضغط عليكي .. 1- ابعدي كل البعد عن الخناق والمشاكل .. رفضت حاجه أو عارضتك؟ قوليللها تمام وادخلي اوضتك او غيري المكان اللي انتي قاعده فيه ومتتسحبيش ابداً لدايرة الجدال والرد بزعيق وعمل مشكلة من كل حاجة.. انتي اكيد مجربه الطريقة دي وعارفه انها مبتجبش نتيجه خالص. 2- تدخلها في أمور حياتك وخصوصياتك شئ طبيعي بالنسبالها .. فهناخد الموضوع بسلاسة وخليكي واضحة واحكيلها على قد ما تقدري وعلى قد ما ينفع تعرف .. وده يبقى بكل هدوء وتبينيلها انه عن طيب خاطر منك وتتعاملي على أساس انك بتقوليللها كل حاجه وانها تعرف كل شئ عنك حتى لو ده مش دقيق. 3- اتحكمي في غضبك قدر الامكان ومتضايقيش نفسك من أي تصرفات بتحاول تعملها .. حاولي تبقي ساكته وهاديه قدامها ف أي موقف. 4- تجنبي الاحتكاك بيها بدون هجر .. اشتري دماغك واقعدي ف اوضتك واشغلي نفسك بأي انشطه ولو مش بتشتغلي انزلي شغل عشان تقضي وقت كبير بره البيت وتقللي الاحتكاك بيها. 5- متقصريش في بِرك بيها بإنك تطيعيها لو طلبت منك حاجه ف البيت أو تخصها.. أما اختيارتك انتي ف حياتك انتي خاصة بيكي انتي زي الجواز. والدراسة وهكذا (اعملي سيرش واعرفي اكتر عن بر الوالدين عشان متشيليش ذنب) .. فقدر الامكان تصممي على اختياراتك بدون دخول ف مشاكل. 6- قربي من باباكي قدر الامكان عشان وقت ما تحتاجيه تقدري تشرحيله وجهة نظرك ويفهمك واذا امكن يقف ف صفك. الله يعينك ويقويكي واذا احتاجتي دعم ف أي وقت هنكون ف انتظارك.
تم النشر السبت، ١٠ ديسمبر ٢٠٢٢
طالما انتى فاهمه كل ده وفاهمه اللى هى بتحاول تعمله يبقى هى مش متحكمة بالشكل الكافى والحمدلله تفكيرك اهو مش بنفس طريقتها والا كان هيبقى تحكمها نجح انكم تكونوا معدومين الشخصية. طبعا هو ده من الصعوبات اللى هتبين انتوا ابناء بارين باهلكم ولا لا ( وان شاء الله انتوا قد الموقف ) هتتحملوها وربنا يبارك فى عمرها ( بالنسبالها هى شايفه انها بتدور على مصلحتكم رغم انها بتتصرف غلط) هتكونوا اكثر اصرارا على اختياراتكم ( مثلا : احنا بنحبك وبنقدرك يا ماما بس احنا منقدرش نختار نفس اختيارك ) ( ممكن ما نحققش اختياراتنا بس مش هنقدر نختار اللى انتى بتقولى عليه ) ومع كل مره توضحوا اختياركم انه على اساس ان ده الانسب ليكم انتوا وبس الاستمرار هيخليها تستسلم وتبدأ تسيبكم تنفذوا اختياركم ( بس هتكون عامله زعلانه عشان خالفتوا رأيها ) بس الحقيقة انها استسلمت. ربنا يقويكم لان ده وضع صعب
تم النشر السبت، ١٠ ديسمبر ٢٠٢٢
ممكن اعرف تفاصيل اكتر عشان احاول اساعدك؟ الاب موجود ولا متوفي؟ ولو موجود موقفه ايه؟ ولو متوفي مين المسؤول مكانه أو له كلمة على مامتك يعني خال/ عم/..؟ عندك اخوات اكبر منك؟ واعماركم قد ايه؟
تم النشر الجمعة، ٩ ديسمبر ٢٠٢٢
هاوديها واعملي الي في صالحك هتفضل مشكلة الأجيال هو الاصابع ما بين الماضي والحاضر الاهل هيفضلوا شايفينا صغيرين وأفعالهم مش من باب التحكمات علي أد ما هي من وجهه نظرهم اهتمام فأحسن طريقة هاوديها واعملي الي شيفاه مناسب ليكي بدون ما تدخلي في جدال ومناقشة
تم النشر الخميس، ٨ ديسمبر ٢٠٢٢
اوريك تعملي ايه انتي حاولي انك تقربي منها وتفهمها انو الشي دا غلط وهي حتقتنع إنشاء الله
تم النشر الخميس، ٨ ديسمبر ٢٠٢٢
لعرض السؤال في فدني اضغط هنا