السلام عليكم انا شاب عندي 30 سنه من حوالي سنتين او اكتر ابتليت بوسواس صعب شويه احيانا بيجي ف العقيده ولكن ده قليل الحمد لله انما الاكتر بقا بيكون ف الصلاه والوضوء دايما بشك ف وضوئي وصلاتي لدرجه اني بقيت اعد وانا بتوضي غسلت كام مره لحد ما اوصل للرقم كده ابقا انا تمام وكمان بفضل ف الحمام فتره بحيث ميخرجش مني اي ريح وبكون مركز ف الموضوع ده ف الصلاه اكتر من الصلاه نفسها وده بيخليني عايز اخلصها بسرعه وف الصلاه بقيت بسجل الصلاه حتي لو مسمعتش التسجيل حتي ف اخر الصلاه عشان اتاكد اني سلمت صح بقول بعد ما بسلم اني بصيت علي كذا ف اليمين وكذا ف الشمال الموضوع ده تاعبني جدا وعايز اتغلب عليه لدرجه اني بقيت ساعات مبصليش وده طبعا اللي الشيطان عايزه وانا مش حابب ده طبعا ف نفسي ابدء اغير من اسلوبي ده وهل ده ممكن يكون مرض اخد له دوا مثلا ولا ده من جوايا وهل مثلا لو بطلت اعد او اركز وحصل مره ونسيت مثلا ركعه او ركن ف الوضوء هل هيكون عليا ذنب اعتقد دي اكتر حاجه بفكر فيها وقت ما فكرت اعد او اسجل اني خايف افسد اي حاجه ف صلاتي اسف اني طولت بس اتمني لو حد عنده حل او مر بتجربه مشابهه يفيدني عشان بجد تعبت
انت بتعانى من الوسواس القهري بمعنى ان فكرة بتيجى ف دماغك ومش بترضى تسيبك الا لما تنفذها وليه صور كتير منها الوسوسة ف العقيدة زى م قولت وربنا يعافينا واياكم ومنها الوسوسة فى الوضوء والصلاة زي ما قولت بردو وفي انواع تانية غيرهم .. المهم ان الوسواس خصوصا فى الوضوء والصلاة ناس كتير اوى بتعانى منه ولكن ليه حلول إن شاء الله .. فأولا أفضل طريقة لعلاج الافكار دي هي إنك تحقرها وتعمل حاجة عكسها يعنى لما الفكرة تيجي ف دماغك تقولك اثناء الوضوء مثلا انت نسيت تغسل شعرك تقول لنفسك انا عايزه مش مغسول وبالعند كمان مش هغسله ولا هعيده تانى🙂 ولما الفكرة تبدأ تيجى ف الاول خالص قولها "اقفي انا مش هسمع كلامك" لازم تكلم افكارك بالطريقة دي ومتنفذش اللى بتقوله افكارك .. من الحاجات الكويسة بردو فى الوضوء هات براد الشاي مثلا واملاه ميه واتوضى بيه احسن من الحنفية واول م تغسل ايدك قول بصوت انا غسلت ايدي وعند المضمضة قول انا كده مضمضت وهكذا ..فكرة البراد عشان تقول لنفسك ان الميه قليله ومفيش غيرها هتوضى بيها ومش هملاه تانى وهتحاول تحافظ ع شوية المية فمش هتعيد الوضوء تانى ...ثانيا حاول تقرأ او تسمع فى الفقه واعرف ايه الواجب من المستحب بحيث تسهل جدا ع نفسك وتاخد بالواجب فقط لحد م تقدر ع السنن والمستحب لما الوسواس يخف وفى قاعده بتقول ان الشك مش بيغلب اليقين بمعنى لو شكيت ف صلاتك كملها وان شاء الله صحيحه لو شكيت فى وضوءك كمله وإن شاء الله صحيح طالما مش متأكد١٠٠٪ يبقى تكمل الحاجة مش تعيدها وبإذن الله صحيحة وحاجة كمان إنك طالما خلصت الحاجة متعيدهاش يعنى مش بعد م تخلص صلاة تفضل تشك انا نسيت كذا ونسيت كذا ..لو نسيت اثناء الصلاة صلى السهو عادى وانصحك جدا جدا جدا بسماع شرح كتاب الفقه الميسر للشيخ علاء حامد وحتى لو مش عايز تسمع الدورة كلها نقى ما يتعلق بمشكلتك لكن الدورة كلها خطيرة وبتريح الواحد جدا فى الامور اللى زى دي .... ثالثا لو روحت لطبيب نفسي هيساعدك بإذن الله كثير فى تخطى ده وتعمل اللى قولناه فوق..ولو صعب ففى دوا اسمه "بروزاك " حبة واحده يوميا بعد الاكل لمدة شهر وبعدين حبيتين يوميا لمدة شهرين وبعدين نرجع لحبة واحده يوميا لمدة ٦ شهور وبعدين حبة واحدة يوم أه ويوم لأ لمدة شهر كمان وبعدين توقف ..هو كورس العلاج بتاعه لازم يبقى بالتدريج كده سواء فى البداية او فى النهاية مينفعش تاخده فجأة او توقفه فجأة وبردو انصحك بالطبيب النفسي هيساعدك بطرق عمليه اكتر بإذن الله.. اخيرا كل تعبك ده هتاخد أجر عليه بإذن الله واحتسب ده عند ربنا عشان كمان الشيطان ميدخلكش من باب إن العذاب اللى انا فيه ده مش قادر عليه وهبطل صلاة خالص زى م حصل معاك ، رمضان فرصة حلوة للالتزام وربنا يشفيك ويعافيك ويأجرك
تم النشر الأربعاء، ١٣ مارس ٢٠٢٤
نصيحة هي انك تروح تتكلم مع شيخ من اهل العلم الموثوقين واوعدك انك بإذن الله هتطلع من عنده متغلب علي الامر ده لان دي كلها من الوساوس ومن تلبيس ابليس.. "وهل مثلا لو بطلت اعد او اركز وحصل مره ونسيت مثلا ركعه او ركن ف الوضوء هل هيكون عليا ذنب" احب اطمنك لو انت شخص موسوس وعندك دايما شكوك وخلصت الصلاة وخفت احسن تكون نسيت ركعة فابشر صلاتك صحيح بإذن الله وكذلك في الوضوء هحط، لينك للفيديو لشيخ وهو بيوضح الامر ده
تم النشر الثلاثاء، ١٢ مارس ٢٠٢٤
وعليكم السلام ورحمة الله وبركاته .. اول شئ لازم حضرتك تعترف لنفسك ان اللي انت فيه حاليا ده مرض نفسي (وسواس قهري). وتكون ميقن ده تماما. ليه لازم تكون معترف بده .. علشان ده الاساس اللي هيتبني عليه كل شئ بعد كده. الوسواس بيجي في اكتر شئ انت مهتم بيه، يعني لو حضرتك مهتم بالصحة .. هيجي في الصحة .. لو ملتزم هيجي في الدين، وخاصة في جزء ديني خارج الجزء النفسي طبعا، وهو الشيطان! ازاي هيسيبك؟ (وَلَأُضِلَّنَّهُمْ وَلَأُمَنِّيَنَّهُمْ وَلَآمُرَنَّهُمْ فَلَيُبَتِّكُنَّ آذَانَ الْأَنْعَامِ) يعني الشيطان مستحلف للانسان مش هيسيبه .. ف كل ما تلتزم اكتر كل ما هيحاول معاك .. ازاي بقى نقفل الموضوع ده ؟ تتجاهل، تجاهل كل الافكار اللي بتاتي، احنا اتفقنا ان ده من الاول وسواس، ف اي حاجه تشك فيها هي مش صح. اي فكرة هي من الشيطان .. مش صحيحة. فالحل هو التجاهل، هتحس انك مش على بعضك، هتضايق، هتفضل تحس ان فيه حاجه غلط. لازم تحس بالخوف والقلق اللي هيكون موجود ده مؤقت .. اتحدي الشيطان لان كل خطوة انت بتبعد عنه فيها بتطلع لقدام.
تم النشر الاثنين، ١١ مارس ٢٠٢٤
بص يا صاحبي انت لازم تكثر الذكر وتذكر ربنا كتير واكثر من الصلاه على النبي صلى الله عليه وسلم لان الصلاه علي النبي حل لكل مشكله
تم النشر الخميس، ١٤ مارس ٢٠٢٤
بص ياصديقى الصدوق موضوعك بسيط باذن الله بس محتاج شويه مجهود منك بمعنى انا شكيت انى نقضت وضوئى هناك معاك حاجتين قالوهم العلماء ف الموضوع ده انك تشم الريح او تسمعه غير كده متركزش يبقى وضوئك منتقضش الوضوء اتعامل معاه بمبدأ اليقين يغلب الشك هو والصلاه يعنى انا حاسس انى اتوضيت صح يبقى خلاص وكذلك الصلاه انا فاكر انى سلمت يبقى سلمت فاكر انى صليت انى صليت ٤ ركعات بس حاسس انهم ٣ يبقى الارجح انك صليت ٤والله اعلم وحده وحده هتلاقى الموضوع بيروح بس متستسلمش وحاول تخلى اليقين يغلب الشك
تم النشر الثلاثاء، ١٢ مارس ٢٠٢٤
كل حاجه وليها علاج حتي المرض النفسي الاحسن تروح لدكتور نفسي وهيساعد احسن مننا والي اقدر اساعدك بيه انك تدوم علي قرأه سوره البقره وتحصن نفسك بالاذكار 🤎
تم النشر الثلاثاء، ١٢ مارس ٢٠٢٤
بص نصيحه مني روح لدكتور نفسي والمرض النفسي عمره م كان عيب او حرام ده تعب زيه زي اي تعب انا كنت زيك واكتر والله بس روحت لدكتور نفسي واخدت قرار وقتها اني اقدر واني هتغلب ع ده وفعلا عملت كده وبقيت عادي جدا اسمع مني انا حاسه انت بتمر بإيه انا كنت اصعب منك بجد والكلام ده فات عليه حوالي 3 سنين وبقي ماشي معنتش عايزه افتكره اصلا انت تقدر والله
تم النشر الاثنين، ١١ مارس ٢٠٢٤
لعرض السؤال في فدني اضغط هنا