كإنك بتتكلمي عني بجد.. أنا كنت نفس الحال جدا وإللي هو ممكن أوقف حياتي أسابيع علشان كلمة أترمت في وسط كلام "حتى لو مش مقصودة" بس بدأت أشتغل على نفسي لما أدركت حاجات كتييير إتعملتها مع الوقت والتجارب القاسية وشخصيتي إللي يمكن لو مكانتش كده مكنتش هتعلم دروس كتير جدا كده نبدأ نقطة نقطة أول حل وهو إللي لو حليته مشاكلك كلها إتحلت دوري علي مميزاتك وإخلقي من عيوبك مميزات وحبي نفسك بدون شروط، يعني مثلا إنت شخص بيتأثر بالكلام ف إبدأي إدي لنفسك كلام إيجابي إللي هو ع فكرة أنا ذكية جدا وعندي قدرات حلوة مينفعش تتضيع مني، عندك هواية أبدأي إستغليها وطلعي فيها طاقتك السلبية يعني مثلا أنا لما بكون مضغوطة بتخيل الضغط أو الحاجة إللي مزعلاني إنها شخصية وأكتبها في قصة وأقتل الشخصية دي في القصة كنوع من أنواع إني قتلت الطاقة السلبية، أعرف صاحبة ليا بترسم ف بتطلع في الرسم طاقتها السلبية هكذا بقى إكتشفتي هواية حتى لو تجيبي خرز وتعملي بيه أساور وحاجات، أو تجيبي كروشية وتتعلميه هكذا بقى. بالنسبة للمشاكل اللي مش بتقدري تحليها ف أنا كذالك بس بمشي بقاعدة قرأتها في كتاب وبتساعد جدااااا علشان نحل أي مشكلة قدامنا 3 خطوات ١- نعرف إيه المشكلة ٢- ندور ع سببها ٣- نبدأ نحط حلول مثلا دماغي مصدع هي دي المشكلة، أبدأ أشوف سبب أنا ليه دماغي مصدع؟ أه دا أنا منمتش كويس إمبارح، طيب عندي حلول إيه؟ ممكن أدخل أنام شوية ،أو أشرب قهوة أو شاي، أخد مسكن قيسي دا ع حياتك كلها هتلاقيها بتنجح كتييير، ولما تأزم معاكي في الحلول خدي رأي حد تاني يفكر معاكي. نمشي بنفس القاعدة في باقي مشكلتك إنتي بتقولي دلوقتي إنك حاسة أنك مبقيتيش متفوقة كفاية في نظرك وقولتي سببين ١- الموبايل ٢- الحزن وشعور إنك مش بتعملي مجهود كفاية مشكلة الموبايل جيلنا كله عايشها بجد، عادة لما بكون في فترة محتاجة فيها المذاكرة أكتر ومش عارفة أكونترول نفسي بمسح إنستا وفيس من الموبايل، ممكن أفتح فيس من جوجل كنوع من إني بقلل إستخدام بس، لما تحسي بقى إنه وهو جمبك وإنتي تذاكري إقفليه وحطيه في أوضة تانية أو حطيه في الدولاب ولو موجود معاكي لاب شغليه ع فيديوز Study with me أو شغليه ع قرآن من غير مؤثرات يعني مثلا عندك علي جابر، وكذا حد جديد صوتهم حلو جداا ولو عاوزة تسمعيه بالصدى عادي بس بتحسيه مريح من غيره اكتر، لو بتذاكري من الموبايل إقفلي النوتفكيشن لأي أبلكيشن بيشتتك وذاكري منه. إحساس إنك مش بتعلمي كفاية بقى ،بصراحة مش قادرة أتعامل معاه بس بتجاهله تمام وبقوم أعمل حتى لو حاجة صغيرة جدااا بس بحاول وبعمل ع قد الوقت وع قد طاقتي وربنا كريم لما يلاقيكي بتسعي هيساعدك وهيكرمك ف ديما قومي وذاكري "قليل دائم خير من كثير متقطع" وقال رسول الله : أحب الأعمال إلى الله أدومها وإن قل. بصي قاعدة مهمه جدا جدا جدا جدا "من لم يكن لنفسك نورًا، لن تسعفه كل أنوار المدينة" لو مقدرتيش تحبي نفسك وتكوني رحيمة بيها وتعاتبي نفسك وقت الغلط وتساعدي نفسك محدش هيقدر يعمل دا ،التغير لازم يبدأ من جواكي إنتي.. أخر حاجة لو مكنش ليكي فايدة مكنش ربنا خلقك ومكنتيش هتبقي موجودة أصلا، وجوده ليه لازمة، وليكي أهمية، بس دورك وفايدتك مش هتلاقيها وأنتي واقفة مكانك تعيطي ع الماضي وواقفة في الحاضر مش بتتحركي علشان خايفة المستقبل يكون أوحش من الماضي، إنتي قومي وفوقي لنفسك ودوري علي حاجة تلاقي فيها نفسك، حطي لنفسك هدف ينور قدامك لما تقعي تفتكري أن إنتي دلوقتي عندك فرصة تكوني عند حلمك دا في المستقبل وقاعدة تضعيها ف تقومي من الأخر محدش ينفعك غيرك، وإللي بيقول كلمه تدايقك بينساها، بجد بينسي وبيعدي اليوم ويتحسل في حياته وينسى ومحدش بيحس بيكي غيرك والله، محدش دايم لحد والرحلة فردية ولازم تتعلمي تعيشها لوحدك وتكوني مصدر كل حاجة ل نفسك "ما ميمنعش انك هيجي اوقااات كتيييير تحتاجي حد يساعدك وينورلك الطريق بس الفكرة فإنه مش هيقدر يساعد لو أنتي مش بتعرفي تعملي دا" ربنا يريحك ويوفقك، وشيدي حيلك لسه عندك وقت تكوني حد جديد، قربي من ربنا جاامد لإن دا سبب وجودنا ♥️
تم النشر الجمعة، ١٩ أبريل ٢٠٢٤
السلام عليكم ورحمة الله وبركاته شكرا لحضرتك على المشاركة 🌷 بداية كلامك ان الحساسيه مشكلة الحساسيه مش مشكلة خالص إلا لو استعملنا معاها غلط الانسآن الحساس ده انسان هين لين سهل قريب من الناس بيشعر بغيره ويقدر غيره بس بيكون متخيل ان كل اللي حوله زيه فيصدم انه مش بيلاقي من غيره اللي بيقدمه ليهم فتجيله افكار سلبيه تحسسه بشعور سيئ ومش بيواجهها ولا بيتعامل معاها فيلغوش عليها باي حاجة تضيع الوقت زي الموبايل النوم فندخل فتقصير فالمهام بتاعتنا يوميا وتتراكم علينا وتجيلي افكار سلبية اوحش بشعور اوحش وهكذا نفضل فالدائرة دي ورا بعض علطول وكأن دي الحياة ولكنها دوامة أنا حاطة نفسي فيها ابسط حاجة ممكن تقومي بيها الكتابه طلعي اللي فدماغك علي ورق قدامك زي ماهوا بالظبط واكتبي شعورك حاسه بإيه ايه الأفكار اللي ممكن تفيدك ايه الأفكار السلبية واوجدي لها فكره بديله ايه الحاجات البسيطة اللي ممكن تسعدك فيومك حتي لو انك تبصي للسما دخلي فيومك الرسم او التلوين هيفرق فموعدك كل يوم الصبح فكري ف٣حاجات انتي ممتنه ليهم فالحياة عموما ان ربنا رزقني بيت اني بشوف بعيني بقدر ادخل الحمام لوحدي وهكذا وقبل ماتنامي فكري ف٣حاجات ممتنه ليهم فيومك شربتي مايه كفايه روقتي سريرك عملتي حاجة سخنه وشربتيها فهدوء وباستطعام مثلا في مهارة اسمها توكيد الذات ممكن تبحثي عنها وتقري شويه وتفهميها هتفرق فحياتك ربنا خلقك لحكمة فمكانك بظروفك الحالية دوري جواكي ايه الحكمة دي أدوارك فحياتك انتي عارفاها كويس بتقومي بكام من ١٠منها تقدري تحسني كل دور واحد من عشرة إزاي ؟ ربنا يرشدك للصالح وانا معاكي فأي استفسار
تم النشر الاثنين، ٢٢ أبريل ٢٠٢٤
اقتربى من الله عز وجل واجلسى مع اهلك واخبريهم بمشاعرك واخبريهم بما تشعيريه اتجاههم واجعلى القران فريضه يوميه ولا تجعلى نفسك ضحيه وولاتكثرى التفكير فى المستقبل فالله لايكلف نفسا الا وسعها وحددى اهدافك فى الحياه واعملى عليها واتمنى من الله انت تكونى قد استفتدى ولا تنسينى فى صالح دعاءك
تم النشر الاثنين، ٢٢ أبريل ٢٠٢٤
انا هقول لك انه السر في الموضوع ده. هو. انت عارفه ان اسهل حاجه هي الهروب اسهل حاجه. انا مطلوب مني حاجه طب انا هاهرب عشان ما اعملهاش انا المفروض ان انا اتصرف تصرف معين بس ده هياخد مني جهد فانا لا اهرب كده وما اعملهوش انا المفروض اذاكر اذاكر واعمل مجهود ولا اروح اهرب واعملش اروح اهرب وما اعملش انت قلت انك كنت متطوره. والدنيا كلها معك ايه اللي غير الحال من التفوق ايه النقطه اللي فصلت ما بين التفوق ولا تفوق وان كنت بتذاكري وما بقتيش بتذاكري في نقطه كده في النص او في حفره هي اللي كانت السبب في الموضوع ده فوديتك المنطقه تانيه. موقف بقى ولا شخص ولا ايه بالضبط ولا كلمه برضو؟ موضوع الحساسيه وانك حساسه جدا دي حاجه. اساسها هو اني. ما عنديش ثقه في قدرتي قدرتي على الرد او ما عنديش طاقه في حكمي انا على نفسي وبحكم على نفسي عن طريق الكلمه اللي قدامي مستنيه اللي قدامي يقول كلمه فالكلمه دي انا اخدها واقوم. مطبقها على نفسي وخلاص اعتمدها بقى. الحل بتاع الموضوع ده ما انت تبداي تعززي كلامك انت لنفسك الاول. وتتعلمي وتبطلي هروب هو انا بهرج عشان ما اعملش مجهود طالما هو انت كده كده بتعملي مجهود في انك تحاولي تقومي افكارك وتقومي احاسيسك اللي بسبب الحساسيه طب ما كده كده بتعملي طب ما نعمل مجهود في الاتجاه سليم الاتجاه السليم في اني اقوي عندي الحاجه بشخصيتي اللي بتخليني ما يجيليش احاسيس سيئه بهذا القدر المؤذي.
تم النشر السبت، ٢٠ أبريل ٢٠٢٤
يا حبيبتي مفيش اجمل واحلى من العلاقات الواضحه والصريحه يعني مثلا صحبت فلانه مش مرتاحه معاها قليلها يا فلاننه انا مش مرتاحه معاكي وان شاء الله تلاقي صاحبه احسن مني بس كدا وابعدي عن اي حاجه مش مرياحكي او بتحسسك بإحساس مش كويس
تم النشر الاثنين، ٢٢ أبريل ٢٠٢٤
الحل الوحيد هوا قربي من ربنا قربي من ربنا جدا و متسمعيش لأهلك نهائي ليه لان الكلام مش بيبطل ولا هيبطل ارمي همومك علي ربنا وبس وابدأي اسعي وذاكري وجددي نيتك وطول ما تلاقي نفسك مكتئبه قومي اتوضي صدقني الوضوء بيغسل الروح قبل البدن. وصلي ركعتين قضاء حاجه هتلاقي كمية راحه عمرك ما تتخيليها واتعرفي ع صحبه صالحه جديده وسيبك من كل صحابك القدام.
تم النشر الاثنين، ٢٢ أبريل ٢٠٢٤
لعرض السؤال في فدني اضغط هنا